Гәло ԛәԝата инсанәте дьгьһиже, кӧ ԝан һʹәму проблема сафи кә чь кӧ әʹдьлайе жь мә дьстинә у тьрса мә һьндава ахьрийе зедә дькә? Рʹаст бежьн, сәва кӧ проблемед мә бенә сафикьрьне, әм гәрәке пебьһʹәсьн, ԝәки канийа ԝан проблема жь кʹӧ те.

Ԝәрен әм әве йәке бь мәсәла Том шеԝьр кьн, йе кӧ гьран нәхԝәш кʹәт у паше мьр. Дохдьре нәхԝәшхане кʹижанеда Том пешийа мьрьна хԝә пʹалдайи бу, дьбежә: «Чахе нишанед пешийе йед нәхԝәшийа Том әʹйан бун, тʹӧ һәким нәфькьри ԝәки леколин кә, һәла әԝ нишан жь бо чь пешда һатьн». Те кʹьфше ԝәки дохдьред Том дәԝса кӧ канийа нәхԝашийа ԝи бьвиньн, тʹәне дәрмана дьданә ԝи кӧ һʹале ԝи һәвәки сьвьк кьн.

Гәло мәрьв бь ви щурʹәйи проблемед дьнйайе сафи дькьн? Мәсәлә сәрԝер сәва кӧ беԛанунийе бьдьнә сәкьнандьне, щурʹә-щурʹә ԛануна дәрдьхьн, ль һʹәму щийа камера датиньн у полиса зедә дькьн. Һәмьки әв тьшт һьнә аликʹари дьдьн, ле бь рʹасти әԝана канийа проблема сафи накьн. Бәле, әв кӧ чь щурʹәйи мәрьв хԝә кʹьфш дькьн, дьдә кʹьфше кӧ бь рʹасти әԝана дәрһәԛа чь дьфькьрьн, чь тʹәхмин дькьн у чь дьхԝазьн.

Данийел йе кӧ ԝәлатәки Америкайа Башуре дьжи у кʹидәре кӧ алийе аборийеда мәрьв дәсттәнг ьн, дьбежә: «Ԝәхтәки жийина мә баш бу. Әз нәжи дьфькьрим кӧ ԝе бе ԝәʹдә, ԝәки жь бо ԛачахтийе әме бьн тьрседа бьжин. Ньһа ԛә шәһәрәк у гӧндәк тʹӧнә, кʹидәре әʹдьлайи һәбә. Һʹале гьран ԝәлaтда, әʹшкәрә кьр ԝәки гәләк мәрьв тьма нә, ԛимәт накьн жийина мәрьвед дьн у һәбука ԝан».

Мерәк кӧ жь бо шәрʹ-дәʹԝа рʹәви Р′оһьлата Навин у паше дәстпекьр Кʹьтеба Пироз һин бә, ӧса дьбежә: «Ԝәлате мьнда, гәләк хортед щаһьл дьһатьнә һеланкьрьне, ԝәки һәрʹьнә шәрʹ у бьбьнә әʹгит. Нәфәред мала ԝан, мәрьвед политике у религийайе, ԝана бәрбь ԝе йәке һелан дькьрьн. Дьжмьнед ԝан жи, хортед хԝә ви щурʹәйи һелан дькьрьн! Әван һʹәму тьшта мьнрʹа әʹйан кьрьн, ԝәки нәһежа йә итʹбарийа хԝә сәрԝера биньн».

Хәбәра Хԝәде йа кӧ бь биланийе тʹьжә йә ӧса дьбежә:

• «Чьмки сьтԛе дьле мерьв жь зар′отийеда хьраб ә» (Дәстпебун 8:21).

• «Дьл жь һәр тьшти зедәтьр хапиноки йә у ԛәлс ә; ма ки дькарә ԝи фәʹм бькә?» (Йерәмйа 17:9).

• «Чьмки жь дьл фькьред хьраб, . . . ԛави, дьзи, дәрәԝи, бӧхдан дәртен» (Мәтта 15:19).

Инсанәт нькарә дәрмане ԝе йәке бьвинә, кӧ ньһерандьна мәрийа рʹаст кә ԝәки әԝана зийане нәдьнә һәв. Чаԝа готара пешьнда һатьбу готьне, һʹәму тьшт дьһа хьраб дьбә (2 Тимотʹейо 3:1-5). Чаԝа те кʹьфше, иро гәләк информасийа у занәбуна мәрьва һәйә, ле йәкә әв аликʹарийе надә кӧ проблемед дьнйайе сафи бьн. Гәло әм чьма нькарьн әʹдьлайе биньн дьнйайе кӧ бетьрс бьжин? Дьԛәԝьмә әм тьштед ӧса жь хԝә дәʹԝа дькьн, чь кӧ ԛәԝата мә нагьһиже бькьн? Гәло ԛә дьбә ԝәки дьнйайеда әʹдьлайи у бехофи һәбә?

Һәрге мә бькарьбуйа кьред мәрьва йед нәрʹаст бьгӧһаста, йәкә мәйе нькарьбуйа ӧса бькьра, ԝәки тʹәмамийа дьнйайе бона һәр кәса бьбуйа щики бехоф. Чьма? Чьмки ԛәԝата бәнда нагьһиже әве йәке бькьн.

 Рʹасти ве йәкеда нә, кӧ «рʹейа мьров нә дь дәсте ԝида йә» (Йерәмйа 10:23). Бәле, әм ӧса нәһатьнә әʹфьрандьне, кӧ бькарьбьн рʹебәрийе хԝә бькьн. Бь рʹасти әм нәжи ӧса һатьнә әʹфьрандьне, кӧ сәрԝертийе сәр мәрьвед дьн бькьн, анәгори ԝе йәке ча әм нькарьн бьн аведа бьжин!

Бь тʹәбийәти мәрьв һʹьз накьн, чахе мәрьвед ԛаси ԝан, ԝанарʹа дьбежьн чаԝа бьжин йан хԝә ль кʹижан принсипед нав-намусийе бьгьрьн. Нә жи мәрийа хԝәш те гава ԝанрʹа дьбежьн, кӧ ньһерʹандьна ԝан һьндава зарбәркьрьне у ширәткьрьна зарʹа гәрәке чь щурʹәйи бә. Әв тʹәне һьнә пьрс ьн, чь кӧ мәрийа жь һәв щӧдә дькә. Дьԛәԝьмә ԝе ԝана чәтьн бе, ԛәбул кьн ԝе йәке, чь кӧ Кʹьтеба Пироз дьбежә. Ԛәԝата мә нагьһиже кӧ сәрԝертийе бькьн сәр мәрийа. Ле жь кʹидәре әм дькарьн аликʹарийе бьстиньн?

Һәмьки жь Әʹфьрандаре хԝә. Чьмки әԝи әм әʹфьрандьнә! Һьнә мәрьв дьфькьрьн кӧ Хԝәде әм бир кьрьнә, ле бь рʹасти әв ӧса нинә. Жь Кʹьтеба Пироз әʹйан дьбә ԝәки Хԝәде бона мә хәм дькә. Чахе әм һе рʹьнд әве кʹьтебе фәʹм дькьн, һьнге әм дәстпедькьн һе рʹьнд хԝә фәʹм бькьн. Әв кʹьтеб ӧса жи али мә дькә фәʹм кьн, кӧ чьма һʹале инсанәте һʹәта ньһа нәбаш ә. Философе Алмани ӧса ньвиси: «Инсанәт тʹӧ тьшти һин нәбу жь тʹәрихийе, ләма жи ԝана рʹабун-руньштьна хԝә нәгӧһаст».

Мәрьвәки билан гьлийе ӧса гот: «Һ′әмуйед кӧ пәй сәрԝахтийе дьчьн әԝ к′ьфш дькьн кӧ сәрԝахти р′аст ә» (Луԛа 7:35). Кʹьтеба Ишайа 2:22 жи дьбежә: «Дәстен хԝә жь мьрове . . . бькʹьшиньн». Әв ширәт дькарә али мә бькә, ԝәки бадьһәԝа итʹбарийа хԝә тьштәки нәйиньн, чь кӧ ԝе тʹӧщар нәйе сери. Кенет йе кӧ бажарәки Амәрикайа Бакӧреда дьжи у рʹасти нәһәԛийе һатьбу дьбежә: «Һʹәму мәрьвед политик, тʹьме соз дьдьн тьштәки алийе башда бьгӧһезьн, ле әԝана нькарьн. Әԝана тʹьме созед хԝә найиньн сери, у әв йәк избат дькә, ԝәки гьлийе Кʹьтеба Пироз рʹаст у билан ьн».

Данийел дәрһәԛа кʹижани жоре һатийә готьне, дьбежә: «Һәр рʹож әз избат дьбьм ԝәки мәрьв нькарьн ча лазьм ә сәрԝертийе бькьн. . . . Һәрге банкеда пʹәре тә һәйә йан жи тӧ пенсийайе дьстини, әв найе һʹәсабе кӧ ахьрийа тә ԝе рʹьһʹәт у баш бә. Мьн хԝәха дит, ԝәки гәләк мәрьвед кӧ һевийа хԝә дабунә сәр пʹәред хԝә, ахьрийеда пʹошман бун».

Кʹьтеба Пироз нә тʹәне мә хԝәй дькә, ле һе зедә дькә. Әв һевийе дьдә мә, дәрһәԛа кʹижани әме готара дьнда хәбәр дьн.