«ЗАРʹОТИЙА ХԜӘДА МЬН ТʹӘНЕ БЕҺʹӦРМӘТИ У ԚУЖИНИ ДЬБЬҺИСТ. Әз һини бахшандьне нәбьбум. Һәла һе чахе әз мәзьн бумә жи, нава чәнд рʹожада мьн нькарьбу хәйде бир бькьм у жь бо ԝе йәке хәԝн нәдькʹәтә чʹәʹве мьн». Дьбежә кʹӧлфәта бь наве Патрисийа. Бәле, иро мәрьв гәләк щар һерс дькʹәвьн у хәйде дькʹьшиньн, жь бо чь жи әԝана бәхтәԝар набьн у сьһʹәт-ԛәԝата ԝан жи зийане дькʹәвә. Ль гора леколинкьрьне һатә кʹьфше, ԝәки мәрьвед кӧ хәйде хԝәй дькьн у йед дьнена набахшиньн . . .

• Нькарьн һәләԛәтийа баш тʹәви мәрийа хԝәй кьн, жь мәрийа хԝә дур дьгьрьн у тʹәнебуне тʹәхмин дькьн

• Зу дьхәйидьн, рʹьһʹәтийа дьл ӧнда дькьн у дькʹәвьнә депресийайә мәзьн

• Һаԛас дьфькьрьн дәрһәԛа ԝе йәке кӧ һьндава ԝанда нәһәԛ хԝә кʹьфш кьрьн, ԝәки нькарьн жь жийине шабуне бьвиньн

• Исафа ԝан ԝана сущдар дькә, чьмки заньн кӧ гәрәке бьбахшиньнә мәрийа

• Стреса ԝан зедә дьбә у сьһʹәт-ԛәԝата хԝә жи хьраб дькьн. Мәсәлә тʹансийона хуне щәм ԝан бьльнд дьбә, нәхԝәшийед дьлва гьредайи дәстпедьбьн, сәреш у нәхԝәшийед дьн жи пешда тен *

ЧЬ ЙӘ БАХШАНДЬН? Бахшандьн те һʹәсабе, бьбахшини мәрьвед кӧ тә данә хәйдандьне, һерсе жь хԝә дурхи, у нәфькьри дәрһәԛа кʹинеажотьне. Әв найе һʹәсабе, ԝәки чʹәʹве хԝә дадьн ль сәр тьште нәрʹаст, йан ԛә һьлнәди һʹәсаб у хԝә ӧса бьгьри, тебежи тьштәк нәԛәԝьми. Бахшандьн әв сафикьрьна сәро-бәро нинә, у бь рʹасти һьзкьрьн әԝ һелан дькә кӧ тʹәви мәрьвәки дьн ль һәв бе, у һәләԛәтийа баш диса тʹәви ԝи чекә.

Бахшандьн фәʹмкʹарийева гьредайи йә. Мәрьве кӧ дьбахшинә, фәʹм дькә, ԝәки әм гьшк гӧнәкʹар ьн, у бь гьлийа йан кьред хԝә, шашийа бәрдьдьн (Рʹомайи 3:23). Кʹьтеба Пироз ӧса дьбежә: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә» (Колоси 3:13).

Ле тьштәки зәлал ә, ԝәки бь бахшандьне әм һʹьзкьрьне дьдьнә кʹьфше, чь кӧ «бь йәктийа тʹам һәвва гьредьдә» (Колоси 3:14). Ль гора малпәра нәхԝәшханайа «Mayo Clinic», мәрьве кӧ дькарә бьбахшинә . . .

• Ша дьбә бь һәләԛәтийа баш тʹәви мәрийа, чьмки һьндава ԝанда дьлрʹәмийе, фәʹмкʹарийе у дьлшәԝатийе дьдә кʹьшфе

•   Алийе емосийалида һʹале ԝи баш ә у тʹәхмин дькә кӧ ԛәбулкьрьна Хԝәде дьстинә

• Һьндьк хәмгин дьбә, у һьндьк дькʹәвә стресе, у һьндьк жи сәр йед дьнена һерс дькʹәвә

• Нәкʹәвә бәр хофийа ԝе йәке, кӧ бькʹәвә депресийайе

БЬБАХШИНӘ ХԜӘ. Ль гора журналәкә медисинайе «Disability & Rеhabilitation», хԝәбахшандьн «тьштәкә лап зор ә», ле һәмьки бона сьһʹәт-ԛәԝата мәйә емосийали у физики әв «пʹьрʹ фәрз ә». Ле чь ԝе али тә бькә бьбахшини хԝә?

• Һивийе нибә кӧ тӧ һʹәму тьшти бь кʹамьлийе бьки. Ле бир нәкә ԝәки әм гьшк жи шашийа бәрдьдьн (Ԝаиз 7:20).

• Жь шашийед хԝә һин бә, сәва кӧ щарәкә дьн шашийед ви щурʹәйи бәрнәди

• Һьндава хԝәда сәбьр кә; ԝәʹдә лазьм ә, кӧ тʹәрка кемаси у хәйсәтед хԝәйә хьраб бьди (Әфәси 4:23, 24).

• Һәвалтийе бькә тʹәви ԝан мәрийа, йед кӧ баш ль сәр тә һʹӧкӧм дькьн, тә һелан дькьн у һьндава тәда жи баш хԝә кʹьфш дькьн. Ле чахе лазьм бә әԝана ԝе бькарьбьн бь дьлсахийе тәрʹа бежьн әԝ чь бона тә лазьм ә (Мәтʹәлок 13:20).

• Һәрге тә кәсәк да хәйдандьне, шашийа хԝә бинә рʹуйе хԝә у чьԛас дькари зу бахшандьне бьхԝазә. Чахе тӧ әʹдьлайе хԝәй дьки у тʹәви мәрьв ль һәв тейи, тӧ рʹьһʹәтийа дьл дьстини (Мәтта 5:23, 24).

Патрисийа дәрһәԛа кʹижани кӧ жоре һатьбу готьне, дәстпекьр Кʹьтеба Пироз һин бә. Бь сайа ве йәке әԝ һини бахшандьне бу. Әԝ дьбежә: «Шькьр әз аза бумә жь һерсе, чь кӧ һаԛас сал әз дьлтәнг дькьрьм. Ньһа нә әз у нә жи мәрьвед дьн дьчәрчьрьн. Принсипед Кʹьтеба Пироз, әʹйан дькьн, кӧ Хԝәде мә һʹьз дькә у ԛәнщийа мә дьхԝазә».

Мерәки жи бь наве Рон дьбежә: «Әз нькарьм фькьр у шьхӧлед мәрьвед дьн контрол бькьм. Нә әз дькарьм хԝә контрол бькьм. Һәрге әз дьхԝазьм әʹдьлайе хԝәй кьм, әз гәрәке хәйде жь хԝә бәрдьм. Мәсәлә чәтьн ә бьдьнә бәр чʹәʹве хԝә, кӧ мәрьвәк нава ԝәʹдәкида һьм дькарә ль алийе бакӧре бә, һьм жи ль башуре. Анәгори ԝе йәке, һәмьки чәтьн бә һьм һәләԛәтийа баш тʹәви мәрийа хԝәй кьн, һьм жи ль сәр ԝана хәйде бьгьрьн».