Тьштед фәрз дайнә сәр щийе пешьн. Кʹьтеба Пироз ширәте дьдә кӧ «кʹижан һәрә ԛәнщ ә», әм ԝе бьжберьн (Филипи 1:10). Хԝәрʹа дәрһәԛа тьште һәри фәрз у ләз бьньвисә. Ле бир нәкә кӧ шьхӧлед фәрз, бәʹса хәбәре хԝарьне бькʹьрʹи, тʹьме тьште һәри ләз нинә. У чь кӧ дьбәкә тӧ дьфькьри кӧ ләз ә, мәсәлә програмәкә хԝәйә һʹьзкьри телевисйонеда бьньһерʹи, найе һʹәсабе тьште фәрз. *

Пешда бьфькьрә. Ԝаиз 10:10-да те готьне: «Һәгәр һʹәсьн ко бә у дәве ԝе нәйе туж кьрьн, дьве һин жи зедәтьр ԛәԝате ле сәрф бькьн; ле бәле бона сәрфьразийа кʹарәки занйар ԛәнщ ә». Тӧ чь дәрсе дькари жь ве рʹезе һин би? «Һʹәсьне хԝә» ча бежи бь ве йәке туж кә, кӧ пешда бьфькьрә чь шьхӧлед тә һәнә, ԝәки бькарьби ԝәʹде хԝә рʹаст хәрщ ки. Шьхӧлед нәфәрз кӧ ԝәʹдә у ԛәԝате жь тә дьстиньн, паш хә йан жи нәкә. Һәгәр тә шьхӧләки хԝә зу анийә сери у ԝәʹде тә майә, ԝе баш бә кӧ ван шьхӧле хԝә бьки чь кӧ тә сафи кьрийә паше бьки. Чахе тӧ пешда бьфькьри кӧ чь бьки, тӧйе һәр шьхӧле хԝә дьһа рʹьнд бини сери у мина ԝи мәрьви би, йе кӧ пешда һʹәсьне хԝә туж дькә.

Хԝә баргьран нәкә. Һин бә бона тьштед нәфәрз кʹижан кӧ ԝе ԝәʹдә жь тә бьстиньн, бежи «на». Гәләк шьхӧл у чуйин-һатьна нәфәрз, дькарьн тә бькьнә стресе у шабуне жь тә бьстиньн.

Пашхьстьна шьхӧла у дӧдьлибун. «Йе чʹәʹвдерийе байе дькә, начинә у йе кӧ әʹԝьра бьньһерʹә, чьнандьне накә» (Ԝаиз 11:4). Тӧ чь дәрсе дькари жь ве рʹезе һин би? Пашхьстьна шьхӧла һьн ԝәʹдә һьн жи ԛәԝате жь тә дьдьзә. Һәгәр тʹохьмрʹәш һивийа һәԝа у һʹале баш бә, ԝе тʹӧ щар тьштәки нәчинә у нә жи бьчьнә. Әʹмьр ӧса йә кӧ әм ньзаньн сьбе ԝе чь бьԛәԝьмә, у рʹуйе ве йәкеда әм дькарьн хԝә жь сафикьрьнед фәрз паш хьн. Йан жи дьбәкә әм бьфькьрьн кӧ һʹәта әм һур бь һур информасийа нәстиньн, нәлазьм ә сафикьрьнәке бькьн. Бешьк, пешийа кӧ әм сафикьрьнәкә фәрз бькьн, гәрәке әм кʹур бьфькьрьн. Мәтʹәлок 14:15-да әм дьхуньн: «Йе аԛьл дина хԝә дьдә гавед хԝә». Бь рʹасти гәләк щар пешийа кӧ әм сафикьрьнәке бькьн, әм ньзаньн ахьрийа ве сафикьрьне ԝе чь бә (Ԝаиз 11:6).

Максимализм. Аԛуб 3:17-да те готьне: «Сәрԝахтийа жорьн, [демәк жь Хԝәде] . . . бәрбьһер ә». Баш ә кӧ әм нета дьдьнә пешийа хԝә. Ле чахе әм гәләки жь хԝә дәʹԝа дькьн у дьхԝазьн кӧ ԛьсура шьхӧле мә тʹӧнә бә, диса жи дьхԝазьн-нахԝазьн әме шашийа бькьн у әв йәк дькарә мә дьлтәнг кә. Мәсәлә, мәрьве кӧ зьманәки тʹәзә һин дьбә занә кӧ ԝе шашийа жи бәрдә у бь сайа ван әԝе сәр хԝә дьхәбьтә кӧ рʹьнд һин бә. Ле мәрьве максималист һәла һе жь фькьра дәрһәԛа ве йәке жи кӧ ԝе шашийа бькә, ида дьтьрсә. Әв йәк рʹийа гәләк мәрьва дьгьрә кӧ пешда һәрʹьн. Дьһа баш ә мәрьв бәрбьһер у мьлук бә! Мәтʹәлок 11:2-да те готьне кӧ «сәрԝахти тʹәви шкәстийа йә». Хенщи ве йәке мәрьве мьлук дәрһәԛа хԝә гәләки нафькьрә у дькарә сәр хԝә бькʹәнә жи.

Гәләки пәй хәбате у һесабуне нәкʹәвә. «Бь арамийе тʹьжибуна ләпәки, жь дӧһ ләпед тʹьжи йед кӧ бь кʹәде у жь хәбата кӧ жь бо гьртьна байе ԛәнщтьр ә» (Ԝаиз 4:6). Гәләк щар мәрьвед кӧ һесабуне надьнә хԝә, хәлата хԝә ӧнда дькьн. Чьмки ԝәʹде ԝан наминә кӧ кʹәда дәсте хԝә бьхԝьн. Ле йед тʹәмбәл нахԝазьн хԝә бьдьнә щәфе у бадиһәԝа ԝәʹде хԝә хәрщ дькьн. Кʹьтеба Пироз мә һелан дькә сәрԝахт бьн, бьхәбьтьн у жь кʹәда хԝә шабуне бьстиньн, чьмки әв шабун жи «дайина Хԝәде йә» (Ԝаиз 5:19).

Хәԝа хԝә бьстинә. Кʹьтеба Пирозда те готьне: «Әз рʹьһʹәт пʹал дьдьм у рʹадьзем» (Зәбур 4:8). Бона мәрьвед мәзьн ԝәкә һʹәйшт сьһʹәт лазьм ә рʹазе ԝәки жь алийе физики у емосийалида ԛәԝате бьстинә. Гәрәке мәрьв хәԝа хԝә бьстинә, чьмки хәԝ али дькә биранина хԝә ӧнда нәки у зене хԝәй ки, ӧса жи хәԝ али һʹьш дькә кӧ рʹаст бьхәбьтә. Ле чахе мәрьв хәԝа хԝә настинә әԝ нькарә рʹаст бьфькьрә, әԝ зу һерс дькʹәвә, шашийа дькә у дькʹәвә ԛәзийа.

Нетед реали бьдә пешийа хԝә. «Дитьна чʹәʹва, жь кʹьшандьна хԝәстәка щан ԛәнщтьр ә» (Ԝаиз 6:9). Әв йәк чь те һʹәсабе? Мәрьве сәрԝахт изьн надә, ԝәки хԝәстәкед ԝи сәр ԝи һʹӧкӧм кьн, илаһи гава нәреали йә ван хԝәстәка биньн сери. Ләма жи әԝ накʹәвә бәр байе рекламе у кредита һьлнадә. Әԝ мәрьв рʹази йә жь һәр тьштед кӧ щәм ԝи һәнә, демәк чь кӧ дькарә бь рʹасти дәст хә.

Бьфькьрә кӧ чь бона тә ԛимәт ә. Тьштед һәри ԛимәт дькарьн али тә бькьн кӧ тедәрхи, ԝәки бь рʹасти чь баш ә, фәрз ә у керһати йә. Һәгәр жийин бәрамбәри тире кьн, дькарьн бежьн кӧ тьштед кӧ бона тә ԛимәт ьн ԝе рʹебәрийа жийина тә бькьн. Ләма жи тьштед һәри ԛимәт ԝе али тә бькьн кӧ рʹаст тьшта сафи ки, демәк тӧйе бьзаньби кӧ һәр рʹож у һәр сьһʹәт ча ԝәʹде хԝә рʹаст хәрщ ки. Ле әм жь кʹӧ дькарьн ван тьштед һәри ԛимәт дәстхьн? Гәләк мәрьв ван тьшта жь Кʹьтеба Пироз дьстиньн, чьмки һʹәсаб дькьн кӧ әв канийа биланийе йә (Мәтʹәлок 2:6, 7).

Бьра йа һәри фәрз жийина ԝәда һʹьзкьрьн бә. Сәр һʹиме Колоси 3:14 һʹьзкьрьн «һʹәмуйа бь йәктийа тʹам һәвва гьредьдә». Әм бе һʹьзкьрьне нькарьн бь рʹасти бәхтәԝар бьн, илаһи малбәтеда. Әԝ мәрьвед кӧ ве йәке пьшт гӧһе хԝәва давежьн у пәй һәбуке дькʹәвьн, ахьрийеда шабун у бәхтәԝарийа хԝә ӧнда дькьн. Ләма жи Кʹьтеба Пироз гәләк щар бәʹса һʹьзкьрьне дькә (1 Корьнтʹи 13:1-3; 1 Йуһʹәнна 4:8).

Ԝәʹдә бона тьштед рʹӧһʹани вәԛәтинә. Малбәта мәрьвәки бь наве Щеф гәләк баш бу. Әԝ хԝәйе жьн у дӧ зарʹа бу. Ӧса жи гәләк һәвалед ԝийә баш һәбун у әԝ ча бәрдәстийе һʹәким дьхәбьти. Хәбата ԝи ве йәкева гьредайи бу кӧ әԝи бь чʹәʹве хԝә дьдит кӧ чаԝа мәрьв дьчәрчьрьн у дьмьрьн. Әԝ дьфькьри: «Гәло бь рʹасти жийин гәрәке бь ви щурʹәйи буйа?» Щарәке әʹдәбйәтед Шәʹдед Йаһоԝа кʹәтьнә дәсте ԝи у гава әԝи әв әʹдәбйәт хԝәндьн, әԝи щаба гәләк пьрсед хԝә стандьн.

Щеф дәрһәԛа ве йәке жьн у зарʹед хԝәрʹа жи гьли кьр, у мьзгина Кʹьтеба Пироз ԝана жи хԝәш һат. Әв малбәт рʹийа рʹастийе дит у ԝана дәстпекьр ԝәʹде хԝә рʹаст хәрщ кьн. Бь сайа һинбуна Кʹьтеба Пироз ԝана һевийа жийина һʹәта һʹәтайе стандьн у ньһа ида жь гәләк һинкьрьнед пʹучʹ у кӧл-дәрда аза бунә (Әʹйанти 21:3, 4).

Сәрһатийа Щеф тинә бира мә хәбәред Иса Мәсиһ: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани» (Мәтта 5:3, ДТʹ). Ле һун һазьр ьн ԝәʹдә бона тьштед рʹӧһʹани вәԛәтиньн? Тʹәне бь ви щурʹәйи һуне биланийе ԛазанщ кьн, йа кӧ ԝе али ԝә бькә ԝәки һәла һе рʹожәке жи бадиһәԝа хәрщ нәкьн.