Тӧ Һʹәму Дәрәщада Һʹәԝще Рʹебәрийа Кʹьтеба Пироз и?

ЧАХЕ тӧ бьчʹук буйи, дьбәкә де-баве тә гәләк щар рʹебәрийа тә дькьрьн. Чьԛас тӧ мәзьн дьбуйи, һаԛас тә дьһа зәлал фәʹм дькьр, ԝәки ԝана бь ве йәке бона тә хәм дькьрьн. Ньһа тӧ ча мәрьве гьһишти, ида бьн һʹӧкӧме де-баве хԝәда нини, ле дьԛәԝьмә диса жи бәрдәԝам дьки бь ԝан принсипа бьжийи, кʹижан кӧ ԝана тӧ һин кьрьнә.

Баве мәйи әʹзмана, Йаһоԝа, Хәбәра хԝәда һьнә ԛануна дьдә мә. Мәсәлә, әԝ ԛәдәхә дькә пʹутпʹарьстийе, бенамусийе у дьзийе (Дәркʹәтьн 20:1-17; Кʹаред Шандийа 15:28, 29). Чьԛас әм рʹӧһʹанида пешда дьчьн у гьһишти дьбьн, һаԛас әм дьһа рʹьнд фәʹм дькьн, ԝәки бь рʹасти рʹебәрийа Йаһоԝа бона кʹара мә йә у бь ԝе йәке әԝ азайе жь мә настинә (Әфәси 4:15; Ишайа 48:17, 18; 54:13).

Ле диса жи гәләк дәрәщед ӧса һәнә, бона кʹижани кӧ Кʹьтеба Пирозда рʹастә-рʹаст тʹӧ рʹебәри найе дайине. Һьнәк мәрьв дьфькьрьн, ԝәки дәрәщед ӧсада әԝана дькарьн һәр тьшти ӧса бькьн, чаԝа дьхԝазьн, чьмки бона ве дәрәще рʹебәрийа конкрет тʹӧнә. Әԝана дьбежьн, кӧ һәрге лазьм буйа, Хԝәде ԝе әʹсә ԛьрара хԝә бь сайа тʹәмикә конкрет әʹйан кьра.

Әԝед кӧ ӧса дьфькьрьн, гәләк щар сафикьрьнед ӧса дькьн, бона кʹижана кӧ паше пʹошман дьбьн. Әԝана дина хԝә надьнә ԝе йәке кӧ Кʹьтеба Пирозда нә кӧ тʹәне тʹәми у ԛанун һатьнә дайине, ле ӧса жи теда ньһерʹандьна Хԝәде у фькьред ԝи әʹйан дьбьн. Чахе әм Кʹьтеба Пирозда леколин дькьн, ԝәки Хԝәде сәр фьлан дәрәще чь щурʹәйи дьньһерʹә, бь ԝе йәке әм исафа хԝә һин дькьн. Әԝ йәк али мә дькә, ԝәки сафикьрьнед кӧ Хԝәде хԝәш тен, бькьн. Ӧса әме дьле ԝи ша кьн у жь сафикьрьнед билани кʹаре бьстиньн (Әфәси 5:1).

Мәсәлед Керһати жь Кʹьтеба Пироз

Чахе әм Кʹьтеба Пирозда дәрһәԛа хьзмәткʹаред Хԝәдейә ԝәʹде бәре дьхуньн, әм дьвиньн, ԝәки әԝана ԝан дәрәщада жи ньһерʹандьна Хԝәде һьлданә һʹәсаб, гава ԛанунәкә конкрет бона дәрәща ԝан тʹӧнә буйә. Ԝәрә дина хԝә бьдьнә мәсәла Усьв. Ԝи ԝәʹдәйида, чахе жьна Потифар дьхԝәст, ԝәки әԝ сәре хԝә перʹа дайнә, ԛанунәкә конкрет жь бина бәр Хԝәде дәрһәԛа бенамусийе тʹӧнә бу. Ле йәкә Усьв фәʹм дькьр, ԝәки бенамуси нә кӧ тʹәне мьԛабьли исафа ԝи йә, ле ӧса жи «ль бәр Хԝәде гӧнә» йә (Дәстпебун 39:9). Ча те кʹьфше, Усьв фәʹм дькьр, ԝәки бенамуси мьԛабьли ньһерʹандьн у ԛьрара Хԝәде йә, кʹижан кӧ Әԝи бахче Еденеда зәлал әʹйан кьрьбу (Дәстпебун 2:24).

Ԝәрә дина хԝә бьдьнә мәсәләкә дьн. Жь Кʹаред Шандийа 16:3 әм педьһʹәсьн, ԝәки Паԝлосе шанди пешийа кӧ тʹәви Тимотʹейо бькʹәта рʹеԝитийе, Тимотʹейо сьнәт кьр. Жь рʹеза 4 әм педьһʹәсьн, ԝәки ԝәʹде рʹеԝитийе Паԝлос у Тимотʹейо шәһәр у гӧндарʹа дәрбаз дьбун, ԝана «әԝ тʹәмийед кӧ шандийа у бәрпьрсийаред Оршәлиме ԛьрар кьрьбун, дьданә баԝәрмәнда». Йәк жь ԝан тʹәмийа әԝ бу, ԝәки Мәсиһийарʹа нәлазьм ә бенә сьнәткьрьне! (Кʹаред Шандийа 15:5, 6, 28, 29) Ле чьма Паԝлос сафи кьр, ԝәки Тимотʹейо сьнәт кә? Бона «щьһуйед ԝан дәра . . . чьмки һʹәмуйа жи заньбу кӧ баве [Тимотʹейо] йунан» ә. Паԝлос нәдьхԝәст, ԝәки тьштәк бона кәсед дьн бьбә кәвьре лькʹӧмандьне у һәстед ԝан беһӧрмәт кә. Әԝи дьхԝәст, ԝәки һʹәмушк бьзаньбьн кӧ Мәсиһи «хԝә дийари исафа мәрьва дькьн ль бәр Хԝәде» (2 Корьнтʹи 4:2; 1 Корьнтʹи 9:19-23).

Ньһерʹандьна ԝи щурʹәйи бона Паԝлос у Тимотʹейо тʹәбийәти бу. Һәрге әм бьхуньн рʹезед жь Рʹомайи 14:15, 20, 21 у 1 Корьнтʹи 8:9-13; 10:23-33, әме бьвиньн ԝәки ча Паԝлос хәм дькьр бона рʹӧһʹанийа у һʹалхԝәшийа мәрьва, илаһи бона ԝан мәрьва кӧ дькарьбун бьһатана лькʹӧмандьне жь бо тьштәки ӧса, чь кӧ бь рʹасти хьраб нибу. Дәрһәԛа Тимотʹейо Паԝлос ӧса ньвиси: «Әз дьле хԝәрʹа йәки мина ԝи набиньм, кӧ бона һʹале ԝә мина пешәԝьтики хәм бьхԝә. Чьмки йед майин һәр кәс ль пәй кʹара хԝә кʹәтийә, нә кӧ йа Иса Мәсиһ. Ле һун хԝәха заньн кӧ әԝ йәки чаԝайи щерʹьбанди йә у хԝәха тʹәви мьн Мьзгинидайинерʹа ӧса хьзмәти кьр, чаԝа кӧрʹ баверʹа» (Филипи 2:20-22). Мәсәләкә чьԛас баш ԝан дӧ Мәсиһийа мәрʹа һиштьнә! Дәрәщед ӧсада, гава рʹебәри у ԛанунәкә конкрет тʹӧнә бу жи, ԝана дәԝса кӧ ԝе йәке бькьн, чь кӧ ԝан хԝәш дьһат, ньһерʹандьна мәрьва һьлдьдан һʹәсаб у дьфькьрин кӧ сафикьрьна ԝан ча ԝе сәр рʹӧһʹанийа мәрьвед дәр-дор һʹӧкӧм бә. Бь ԝе йәке ԝана чʹәʹв дьда һʹьзкьрьна Йаһоԝа у Кӧрʹе ԝи.

Ньһа жи ԝәрә дина хԝә бьдьнә мәсәла сәрәкә, мәсәла Иса Мәсиһ. Әԝи, ԝәʹде Хьзмәткьрьна хԝәйә сәр Чʹийе, зәлал кьр, ԝәки мәрьве кӧ нета ԛанунед Хԝәде рʹьнд фәʹм дькә, ԝе нә кӧ тʹәне ԛануне бинә сери, ле ӧса жи принсипе (Мәтта 5:21, 22, 27, 28). Иса, Паԝлос, Тимотʹейо у Усьв нәдьфькьрин ԝәки һәрге Хԝәде ԛанунәкә конкрет нәдайә, ԝи чахи әԝана дькарьн ча бьхԝазьн, ӧса жи бькьн. Ле әԝана һин дьбун кӧ мина Хԝәде сәр тьшта бьньһерʹьн у бьфькьрьн. Ӧса ԝана избат дькьр, ԝәки ль гора тʹәмийед һәри фәрз дьжин, демәк Хԝәде у һәвале хԝә һʹьз дькьн (Мәтта 22:36-40).

Мәсиһийед Иройин

Ча те кʹьфше, әм гәрәке Кʹьтеба Пироз ча документәкә ԛанунзанийе һʹәсаб нәкьн, кʹидәре кӧ һур бь һур у конкрет дәрһәԛа һʹәму борщдарийед мә те готьне. Әм гәләк дьле Йаһоԝа ша дькьн, гава ль гора ньһерʹандьна ԝи тьштәки сафи дькьн, һьнге жи чахе тʹӧ ԛанун конкрет набежә әм чь бькьн. Демәк, дәԝса кӧ тʹьме һивийа рʹебәрийа Хԝәдейә конкрет бьн, ԝе баш бә фәʹм бькьн «чь йә ԛьрара» Хԝәде (Әфәси 5:17; Рʹомайи 12:2). Чьма әв йәк Йаһоԝа хԝәш те? Чьмки ӧса әм дьдьнә кʹьфше, кӧ бона мә дьһа фәрз ә ԛьрара ԝи биньн сери, нә кӧ бькʹәвьнә һʹәйра хԝәстьнед хԝә. Ӧса жи әм дьдьнә кʹьфше, ԝәки һʹьзкьрьна Хԝәде ԛимәт дькьн, у әв һʹьзкьрьн мә һелан дькә чʹәʹв бьдьнә ԝи (Мәтʹәлок 23:15; 27:11). Хенщи ԝе йәке, чахе әм ԛәԝате дьдьнә хәбате, ԝәки ль гора Ньвисаред Пироз бьжин, әв йәк али мә дькә рʹӧһʹанида у гәләк щар физикида жи сьһʹәт-ԛәԝат бьн.

Ԝәрә бьньһерʹьн, кӧ әм әве принсипе ча дькарьн жийина хԝәда бьдьнә хәбате.

Бьжартьна Ԝәʹдәдәрбазкьрьне

Бьдә бәр чʹәʹве хԝә, хортәк дьхԝазә албома кʹьлама бькʹьрʹә. Жь ве албоме кʹьламәк гәләк ԝи хԝәш һатийә, ле әԝ бәрхԝә дькʹәвә, чьмки жь информасийа сәр албоме кʹьфш ә, ԝәки текстед кʹьлама бенамусийева гьредайи нә. Һьм жи әԝ занә, кӧ гәләк кʹьламед ԝи стьранбежи рʹӧһʹәки сәрт у һерс дьдьнә кʹьфше. Әв хорт Йаһоԝа һʹьз дькә у дьфькьрә кӧ ча ве дәрәщеда әԝ дькарә ньһерʹандьна Хԝәде һьлдә һʹәсаб. Ле гәло әԝ чаԝа дькарә бьзаньбә, кӧ ньһерʹандьна Хԝәде сәр ве дәрәще чь щурʹәйи йә?

Паԝлосе шанди нәʹмеда, йа кӧ Галатийарʹа ньвиси бу, хәбәр дьдә дәрһәԛа кьред бьнйатʹа инсен у бәре рʹӧһʹе Хԝәде. Дьбәкә һун заньн чь дькʹәвә нава бәре рʹӧһʹ: һʹьзкьрьн, шабун, әʹдьлайи, сәбьркьрьн, ширьнайи, ԛәнщи, баԝәри. Ле чь дькʹәвә нава кьред бьнйатʹа инсен? Паԝлос дьньвисә: «Аԝа кьред бьнйатʹа инсен әʹйан ьн: Бенамуси, һʹәрами, толти, пʹутпʹарьсти, пирәсерти, нәйарти, шәрʹ-дәʹԝ, һʹәвсуди, һерскʹәтьн, һәврʹькʹи, дӧтирәти, щӧдәти, чʹәʹве хьраб, меркӧжи, сәрхԝәш, кучʹьксанти у чь кӧ мина ван ьн. Әз ньһа ԝәрʹа дьбежьм, чаԝа кӧ мьн пешда жи ԝәрʹа готьбу, кӧ йед ван тьшта дькьн, Пʹадшатийа Хԝәде ԝар набьн» (Галати 5:19-23).

Дина хԝә бьдьнә сәр гьли-готьна хьлазийе, «чь кӧ мина ван ьн». Паԝлос дәрһәԛа һәр тьшти конкрет нәньвиси, кӧ чь гәрәке һʹәсаб кьн ча кьред бьнйатʹа инсен. Әв найе һʹәсабе, ԝәки кʹе кӧ нәʹма ԝи бьхԝәнда ԝе ӧса бьфькьрийа: «Сәр һʹиме Ньвисаред Пироз әз дькарьм ԝан һʹәму тьшта бькьм, дәрһәԛа кʹижана Паԝлос вьра нәньвисийә». Хԝәндәԝан гәрәке ве йәкеда сәрԝахт буна, сәва тедәрхьстана кʹижан ьн әԝ кьр дәрһәԛа кʹижана Паԝлос конкрет нәньвисийә, ле дькʹәтьнә нава тьштед «мина ԝан». Әԝед кӧ тʹобә накьн у ԝан тьшта дькьн, дәрһәԛа кʹижана Паԝлос нәгот, ле дькʹәвьнә нава тьштед «мина ԝан», ԝе кʹәрәмед Пʹадшатийа Хԝәде ԝар нәбьн.

Анәгори ве йәке, әм жи гәрәке фәʹм бькьн, кӧ чь бәр чʹәʹве Йаһоԝа рʹәш ә. Ле гәло әв йәк чәтьн ә? Бьдә бәр чʹәʹве хԝә, ԝәки дохдьр ширәте дьдә тә, кӧ дьһа зәʹф емиш у пʹьнщарʹе бьхԝи, нә кӧ гӧлмаст у ширнайед дьн. Гәло ԝе тәрʹа чәтьн бә тедәрхи, кӧ тотьк дькʹәвә нава кʹижан рʹезе? Ԝәрә ньһа диса щарәке дина хԝә бьдьн бәре рʹӧһʹе Хԝәде. Әв албома кʹьлама дькʹәвә нава кʹижан рʹезе? Әв албом әʹйан накә һʹьзкьрьне, ԛәнщийе, хԝәгьртьне у хәйсәт-һʹӧнӧред дьн кӧ бәре рʹӧһʹе Хԝәдева гьредайи нә. Әм һʹәԝще ԛануна конкрет ниньн, сәва кӧ фәʹм бькьн, ԝәки кʹьламед ви щурʹәйи ль гора ньһерʹандьна Хԝәде ниньн. Принсипед ви щурʹәйи әм ӧса жи дькарьн бьдьнә хәбате бона бьжартьна кʹьтеба, синәма, бәрнамед телевизийоне, листькед компотәре, малпәра у тьштед дьн.

Кʹьнщхԝәкьрьна Лайиԛ

Кʹьтеба Пирозда ӧса жи һәнә принсипед дәрһәԛа кʹьнщхԝәкьрьн у хәмьландьне. Әв принсип рʹебәрийе дьдьнә Мәсиһийа, кӧ кʹьнщхԝәкьрьна ԝан лайиԛ у бәдәԝ бә. Әԝед кӧ Йаһоԝа һʹьз дькьн, ве пьрседа жи мәщале дьвиньн, ԝәки нә кӧ пәй хԝәстьнед хԝә һәрʹьн, ле дьле Баве хԝәйи әʹзмана ша кьн. Ча мә ида дит, гава Йаһоԝа рʹебәрийа конкрет надә, әв йәк найе һʹәсабе, ԝәки ԝирʹа йәк ә кӧ хьзмәткʹаред ԝи ԝе чь бькьн. Һʹәму щийада кʹьнщхԝәкьрьна мәрийа жь һәв щӧдә дьбә у һәла һе щикида жи щурʹе кʹьнщхԝәкьрьне дькарә ԝәʹдә шунда бе гӧһастьне. Чь жи һәбә, Хԝәде принсипед сәрәкә дьдә, бь кʹижана хьзмәткʹаред ԝи һәргав у һʹәму щийа дькарьн рʹебәри бьн.

Мәсәлә 1 Тимотʹейо 2:9, 10-да те готьне: «Ӧса жи бьра кʹӧлфәт бь кʹьнщед лайиԛ, шәрме у бәрбьһерийе хԝә бьхәмьлиньн, нә кӧ бь гӧли-гӧжанга, йан зерʹ, йан бь дӧрʹа, йан жи бь кʹьнщед бьһа, ле бь кьред ԛәнщ, чаԝа ль ԝан кʹӧлфәта дькʹәвә, йед кӧ наве хԝәденасийе һьлданә сәр хԝә». Анәгори ԝе йәке, ча мер ӧса жи кʹӧлфәт гәрәке кʹур бьфькьрьн, кӧ мьһала ԝанда кʹьнщхԝәкьрьна чь щурʹәйи ԝе лайиԛ бә бона әԝед кӧ «наве хԝәденасийе һьлданә сәр хԝә». Илаһи Мәсиһи гәрәке бьфькьрә дәрһәԛа ԝе йәке, кӧ мәрьв жь бо кʹьнщхԝәкьрьна ԝи, ԝе дәрһәԛа мьзгинийа хере чь бьфькьрьн (2 Корьнтʹи 6:3). Мәсиһийе щерʹьбанди ԝе нәкʹәвә һʹәйра хԝәстьн у парьстьна изьна хԝә, ле ԝе бьфькьрә кӧ чь щурʹәйи бь кʹьнщхԝәкьрьна хԝә мәрийа нәлькʹӧминә (Мәтта 18:6; Филипи 1:10).

Чахе Мәсиһи дьвинә, кӧ кʹьнщхԝәкьрьна ԝи бона мәрьвед дьн дьбә кәвьре лькʹӧмандьне, әԝ дькарә чʹәʹв бьдә Паԝлосе шанди. Демәк әԝ ԝе бәри пешьн дәрһәԛа рʹӧһʹанийа мәрьва хәм бькә, нә кӧ дькʹәвә һʹәйра хԝәстьнед хԝә. Паԝлос ньвиси: «Чʹәʹв бьдьнә мьн, чаԝа әз жи чʹәʹв дьдьмә Мәсиһ» (1 Корьнтʹи 11:1). Ле дәрһәԛа Иса, Паԝлос ньвиси, ԝәки әԝи хԝәстьнед хԝә нәдьани сери. Ньһа фәʹмдари йә кӧ жь һʹәму Мәсиһийа чь те дәʹԝакьрьне: «Әм кӧ баԝәрийеда ԛәԝат ьн, гәрәке бькʹәвьнә бьн баре сьста, нә кӧ әм ль хԝә хԝәш бен. Бьра жь мә һәр кәс алийе ԛәнщийеда ль һәвале хԝә хԝәш бе, кӧ баԝәрийеда бьшьдә» (Рʹомайи 15:1-3).

Фәʹмкʹарийа Хԝә Зедә кьн

Әм чь щурʹәйи дькарьн фәʹмкʹарийа хԝә зедә кьн, сәва кӧ ԝан дәрәщада жи дьле Йаһоԝа ша кьн, бона кʹижана ԛанунед конкрет тʹӧнә нә? Фәʹмкʹарийа мә ԝе дьһа кʹур бә, һәрге әм һәр рʹож Хәбәра Хԝәде бьхуньн, леколин кьн у сәр бьфькьрьн. Фәʹмкʹари һеди-һеди зедә дьбә, чаԝа кӧ зарʹ һеди-һеди мәзьн дьбә. Мина ве йәке, зедәкьрьна рʹӧһʹанийе жи һеди-һеди пешда дьчә у дәрберʹа найе кʹьфше. Ләма жи әм гәрәке бь сәбьр бьн у дьлтәнг нәбьн, һәрге дәрберʹа әм нав хԝәда гӧһастьна навиньн. Ԝәʹдә шунда фәʹмкьрьна мә ԝе дьһа кʹур у мәзьн бә. Ле мәрьве кӧ гәләк ԝәʹдә рʹастийеда йә жи һәрге тʹӧ тьшти нәкә, ԝе хԝәха бь хԝә рʹӧһʹанида гьһишти нәбә. Чаԝа кӧ жоре һатьбу готьне, әм гәрәке һәргав бь сайа леколина Хәбәра Хԝәде, фәʹмкьрьна хԝә бьшьдиньн у һʹәму ԛәԝата хԝә бьдьнә хәбате, ԝәки ль гора ве Хәбәре бьжин (Ибрани 5:14).

Чахе әм ԛанунед Хԝәде пек тиньн, те кʹьфше, кӧ әм чьԛас гӧһдар ьн. Ле чахе әм бь принсипед Хԝәде рʹебәри дьбьн, рʹӧһʹанийа мә те кʹьфше у әʹйан дьбә, ԝәки әм чьԛас дьхԝазьн Хԝәде хԝәш бен. Чьԛас әм рʹӧһʹанида пешда дьчьн, һаԛас әм һе зедә дина хԝә дьдьнә ԝе йәке, кӧ чаԝа һе рʹьнд чʹәʹв бьдьнә Йаһоԝа Хԝәде у Кӧрʹе ԝи. Хенщи ԝе йәке, хԝәстьна мә ԝе һәбә, ԝәки һʹәму сафикьрьнед хԝәда ньһерʹандьна Хԝәде һьлдьн һʹәсаб, кʹижан кӧ әм дькарьн жь Ньвисаред Пироз һе зәлал бьвиньн. Гава әм һәр кьред хԝәда дьле Баве хԝәйи әʹзмана ша кьн, шабуна мә жи ԝе дьһа зедә бә.

[Шькьл]

Рʹаст ә һәр щики щурʹе кʹьнщхԝәкьрьна мәрийа жь һәв щӧдә дьбә, ле йәкә әм гәрәке ве пьрседа принсипед Хԝәде һьлдьн һʹәсаб