Кʹьтеба Пироз Жийина Мәрьва Дьгӧһезә

ЧЬ ҺЕЛАН кьр мәрьвәки хӧмарбаз у ԛачах, ԝәки әʹмьре хԝә бьгӧһезә? Пебьһʹәсьн, кӧ әԝ дәрһәԛа хԝә чь гьли дькә.

«Мьн Гәләк Ләщед Һәспа Һʹьз Дькьр». РИЧАРД СТИУАРТ

САЛА БУЙИНЕ: 1965

ԜӘЛАТ: ЖАМАИКА

БӘРЕ: ХӦМАРБАЗ У ԚАЧАХ

ЖИЙИНА МЬНӘ БӘРЕ: Әз мәзьн бум пʹайтәхта Жамаикеда, мьһаләкә кʹәсиб Кингстонеда. Ԝедәре гәләк мәрьв бе хәбат бун у ԛачахти жи гәләк бәлабуйи бу. Кʹомед ԛачаха тьрс дькьрьнә сәр мәрьва. Дәнге гӧла дькарьм бежьм һәррʹож дьһатә бьһистьне.

Дийа мьн гәләк щәфа дькʹьшанд, ԝәки мьн у хушк-бьре мьни бьчʹук хԝәй кә. Әԝе һәр тьшт дькьр, ԝәки әм һинбуне бьстиньн. Һʹәԝаса мьн һинбунерʹа нәдьһат, ле мьн гәләк һʹьз дькьр ләщед һәспа. Мьн дәрсед мәкʹтәбе бәрʹдьда у дьчумә сәр ләще. Мьн хԝәха жи һʹьз дькьр сәр һәспа сийар бьм.

Зутьрәке ләща һәспада әз бумә һостә. Мьн дәстпекьр бенамусийе бькьм у марихуанайе бькʹьшиньм. Сәва кӧ бона ԝан һʹәму хԝәстьнед хԝә пʹәра дәстхьм, мьн ԛачахти дькьр. Гәләк чʹәкед мьн һәбун, ле чьԛас баш ә, кӧ ԝәде гӧләкьрьна тʹӧ кәс жь дәсте мьн нәһатә кӧштьне.

Ахьрийа-ахьрийе мьн гьртьн у кьрьне кәле. Чахе әз жь кәле аза бум әз диса жи нәһатьмә гӧһастьне. Әз бумә мәрьвәки дьһа хьраб. Рʹаст ә рʹува әз йәки нәрм дьһатьмә кʹьфше, ле бь рʹасти әз йәки сәрһʹьшк, һерс у берʹәʹм бум. У әз тʹәне дәрһәԛа хԝә дьфькьрим.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Ԝи ԝәхте чәтьнда, дийа мьн тʹәви Шәʹдед Йаһоԝа дәстпекьр Кʹьтеба Пироз һин бә. Мьн дьдит кӧ әԝ ча алийе башда те гӧһастьне. Ләма жи мьн дьхԝәст пебьһʹәсийама, һәла чь али ԝе кьр кӧ әԝ һатә гӧһастьне у мьн дәстпекьр тʹәви Шәʹдед Йаһоԝа дәрһәԛа һинкьрьнед Кʹьтеба Пироз хәбәр дьм.

Мьн тедәрхьст, кӧ һинкьрьнед Шәʹдед Йаһоԝа гәләк щӧдә нә жь һинкьрьнед религийед майин у бь тʹәмами сәр һʹиме Кʹьтеба Пироз ьн. Мьн дьдит кӧ әԝана тʹәне мал бь мал хьзмәт дькьн, чаԝа кӧ Мәсиһийед ԛьрʹна йәке дькьрьн (Мәтта 28:19; Кʹаред Шандийа 20:20). Һʹьзкьрьна кӧ ԝана һьндава һәв дьданә кʹьфше, мьн да баԝәркьрьне ԝәки мьн религийа рʹаст дитийә (Йуһʹәнна 13:35).

Чахе мьн дәстпекьр Кʹьтеба Пироз һин бьм, мьн фәʹм кьр кӧ әз гәрәке бь тʹәмами әʹмьре хԝә бьгӧһезьм. Әз пеһʹәсийам кӧ бенамуси бәр чʹәʹве Йаһоԝа Хԝәде рʹәш ә у сәва кӧ әз ԝи хԝәш бем әз гәрәке хәйсәтед хԝәйә бәре, кӧ бәдәна мьн дьһʹәрʹьминьн, бьтʹәркиньм (2 Корьнтʹи 7:1; Ибрани 13:4). Гәләк дьле мьн гьрт әве йәке, кӧ һәстед Йаһоԝа һәнә у ԝәки кьред мьн дькарьн дьле ԝи йан бешиньн йан ша кьн (Мәтʹәлок 27:11). Ләма жи мьн сафи кьр тʹәрка марихуанайе бьдьм, чʹәкед хԝә бавежьм у хәйсәте хԝә бьгӧһезьм. Һʹәлал бежьм, лапә чәтьн мьнрʹа әԝ бу, ԝәки бенамуси у хӧмарбази бьһельм.

Пешийе мьн жь һәвалед хԝә вәдьшарт, кӧ әз тʹәви Шәʹдед Йаһоԝа Кʹьтеба Пироз һин дьбьм. Ле щарәке мьн гьлийед Иса жь Мәтта 10:33 хԝәнд, кʹидәре кӧ те готьне: «Кʹи кӧ мьн бәр мәрьва инкʹар кә, әзе жи ԝи бәр Баве хԝәйи әʹзмана инкʹар кьм». Әԝе йәке әз һелан кьрьм, ԝәки һәвалед хԝәрʹа гьли кьм кӧ әз тʹәви Шәʹдед Йаһоԝа Кʹьтеба Пироз һин дьбьм. Әԝана әʹщебмайи ман гава әве йәке пеһʹәсийан. У ԝана нькарьбу баԝәр кьра кӧ мәрьвәки мина мьн дьхԝазә бьбә Мәсиһи. Хенщи ве йәке, мьн ԝанрʹа гот кӧ әз ида жийина хԝәйә бәре дьһельм.

ЧЬ КʹАР МЬН СТАНД: Дийа мьн гәләк ша дьбу гава дьдит, кӧ әз әʹмьре хԝә ль гора Кʹьтеба Пироз дьгӧһезьм. Ньһа әԝ ида бәрхԝә накʹәвә кӧ әзе бькʹәвьмә ԛәзийе. Һʹьзкьрьн һьндава Йаһоԝа али мә һәрда кьр, кӧ һәвдӧрʹа бьбьнә дост. Гава дькʹәвә бира мьн кӧ әз бәре йәки ча бум, әз нә жи дькарьм баԝәр бькьм кӧ бь сайа ԛәԝата Хԝәде мьн карьбу ӧса ԛайим бемә гӧһастьне. Әз нә жи бира жийина хԝәйә бәре дькьм, кö чахе мьн бенамуси дькьр у пәй пʹәра дькʹәтьм.

Һәгәр мьн дәстпенәкьра Кʹьтеба Пироз һин бьм, әзе ньһа йан кәледа бума йа жи ида мьри бума. Ньһа малбәта мьн гәләк бәхтәԝар ә. Жьна мьн һәйә, кʹижан тʹьме пьштгьрийа мьн дькә у ԛиза мьнә гӧһдар. Чахе әм тʹәвайи Хԝәдерʹа хьзмәт дькьн, әм гәләк шабуне дьстиньн. Әз чьԛас жь Хԝәде Йаһоԝа рʹази мә, кӧ әԝи изьн да мьн бьбьмә әндәме бьратийа һʹәмдьнйайе, кʹидәре кӧ һʹьзкьрьна рʹаст һәйә. Әз ӧса жи гәләк жь ԝан рʹази мә, йед кӧ али мьн кьрьн, ԝәки әз дәрһәԛа һинкьрьнед Кʹьтеба Пироз пебьһʹәсьм. Ле һәри зәʹф әз жь Йаһоԝа рʹази мә, кӧ әԝи ԛәнщи у рʹәʹма ӧса мәзьн һьндава мьн да кʹьфше, ԝәки әз бькарьбьм незики ԝи бьм.

[Ньвисар]

«Гәләк дьле мьн гьрт әв йәк, кӧ һәстед Йаһоԝа һәнә у ԝәки кьред мьн дькарьн дьле ԝи йан бешиньн йан ша кьн»

[Шькьл]

Мьн дьдит кӧ дийа мьн чьԛас алийе башда дьһатә гӧһастьне

[Шькьл]

Тʹәви жьн у ԛиза хԝә