Зәԝаща Ԛәԝи у Бәхтәԝар
«Әгәр Хӧдан мале ченәкә, авакʹар бәрәдайи [бадиһәԝа] дьхәбьтьн» (ЗӘБУР 127:1а, ИМ).
1-3.Щоте зәԝащеда рʹасти кʹижан чәтьнайа тен? (Бьньһерʹә шькьле әʹԝльн.)
МАЛХЕ кʹижан кӧ 38 сала зәԝаща хԝәда бәхтәԝар бу дьбежә: «Һәрге бона бәхтәԝарбуна малбәте чьԛас тә те ԛәԝате хәрщ дьки, те шабуне бьстини жь кʹәрәмед Йаһоԝа». Бәле, мер у жьн дькарьн бәхтәԝар бьн у ԝәʹде чәтьнайа али һәв бькьн (Мәтʹәлок 18:22).
2 Бь рʹастийе щоте зәԝащеда рʹасти «охьрмед гьран» тен (1 Корьнтʹи 7:28). Чьрʹа? Мәсәлә, жь чәтьнайе һәррʹожи дәстпедьбә ортʹа ԝан һәвкʹәвә. Чьмки әԝ нәԛәданди нә, әԝана дькарьн дьле һәв бьешиньн, йан жи һәв фәʹм нәкьн (Аԛуб 3:2, 5, 8). Гәләк щотед зәԝащеда һьн гәрәке бьхәбьтьн һьн жи зарʹа мәзьн кьн у ширәт кьн. Жь бо стрес у ԝәстандьне, жьн мер щарна нькарьн хԝәрʹа ԝәʹдә бьвиньн, сәва кӧ зәԝаща хԝә ԛәԝи кьн. Проблемед алийе пʹәрада у сьһʹәт-ԛәԝатеда, ӧса жи чәтьнайед майин дькарьн һʹьзкьрьне у ԛәдьр ортʹа ԝанда сьст кьн. У һе зедә, һәла һе һʹиме зәԝаща лапә ԛәԝи жи дькарә зийане бьстинә жь бо «кьред бьнйатʹа инсен», мәсәлә ча бенамуси, толти, нәйарти, шәрʹ-дәʹԝ, һʹәвсуди, һерскʹәтьн, һәврʹьки (Галати 5:19-21).
3 У һе хьраб әԝ ә, кӧ ԝан ԝәʹде «зәманед хьраб», мәрьв хԝәһʹьз ьн у тьштед бехԝәдети дькьн, у әв йәк дьбә ча жәʹр сәва зәԝаще (2 Тимотʹейо 3:1-4). Кӧл нә әԝ кӧл ә, щоте зәԝащеда гәрәке шәрʹ кә пешбәри ԝе йәке кӧ дьжмьне зӧлм дьхԝазә зәԝаща ԝана һьлшинә. Паԝлосе шанди мәрʹа пешда дьбежә: «Нәйаре ԝә мина шер мьрʹә-мьрʹа ԝи йә, дьгәрʹә кʹа кʹе һʹуфи хԝә кә» (1 Пәтрус 5:8; Әʹйанти 12:12).
4. Ча әм дькарьн зәԝаща ԛәԝи у бәхтәԝар ава кьн?
4 Мерәки жь Жапонйайе гьли дькә: «Бона проблемед пʹәрава гьредайи, әз стреса мәзьнда бум. Жь бо ԝе йәке кӧ әз тʹәви жьна хԝә нәдькʹәтьмә хәбәрдане ӧса ча лазьм бу, жьна мьн жи кʹәтә стресәкә мәзьн. Һьн жи, һьнә ԝәʹдә пешда әԝе нәхԝәшикә гьран дәрбаз кьрьбу. У әԝ стрес бунә мәʹни кӧ ортʹа мьн у жьна мьн һәвкʹәт». Дь зәԝащеда һәнә чәтьнайи жь кʹижана әм нькарьн бьрʹәвьн, ле әм дькарьн тәйах кьн у дәрбаз кьн. Бь аликʹарийа Йаһоԝа, мер у жьн дькарьн ша бьн зәԝаща хԝәйә ԛәԝирʹа у тʹьфаԛийа хԝәрʹа. (Бьхунә Зәбур 127:1.) Ԝәрен әм ньһа хәбәрдьн дәрһәԛа пенщ тьшта, кʹижан кӧ дькарьн зәԝаще ԛәԝи у дьреж кьн. Паше әме шеԝьр кьн, кӧ чьрʹа һʹьзкьрьн гәләк фәрз ә сәва зәԝащ ԛәԝи бьминә.
БЬРА ЙАҺОԜА ТʹӘВИ ЗӘԜАЩА ԜӘ БӘ
5, 6. Жьн у мер чь дькарьн бькьн ԝәки Хԝәде тʹәви зәԝаща ԝан бә?
5 Һʹиме зәԝаща ԛәԝи әԝ ә, кӧ һәйә гӧһдарикьрьн у амьни һьндава сазкʹаре зәԝаще. (Бьхунә Ԝаиз 4:12.) Һәрге мер у жьн пәй рʹебәрийа Йаһоԝайә бь һʹьзкьрьн дьчьн, һьнге Йаһоԝа ԝе тʹәви зәԝаща ԝан бә. Кʹьтеба Пироз дәрһәԛа щьмәʹта Хԝәдейә бәре дьбежә: «У дәма һун бәр бь алийе рʹаст йан жи алийе чʹәпева чәԝт бьбьн, [бьзԝьрьн] ԝе гӧһен тә, дәнгәки кӧ дьбежә: ‹Рʹе әв, дь ве рʹейада бьмәшьн!› жь пашийа тә бьбьһизьн» (Ишайа 30:20, 21). Иро, мер у жьн дькарьн «бьбьһизьн» хәбәра Йаһоԝа, чахе әԝана тʹәвайи Кʹьтеба Пироз дьхуньн (Зәбур 1:1-3). Әԝана ӧса жи дькарьн зәԝаща хԝә ԛәԝи кьн бь аликʹарийа Ԛӧльхкьрьна тʹәви Малбәте, чь кӧ бь һʹәԝас ә у ԝана рʹӧһʹанида ԛәԝи дькә. Ӧса жи чахе мер жьн тʹәвайи һәр рʹож дӧа дькьн, әԝ йәк зәԝаща ԝан ԛәԝи дькә, у зәԝащ дькарә дьнйа Шәйтʹанда ԛәԝи бьсәкьнә.
Чахе мер у жьн тʹәвайи Йаһоԝарʹа ԛӧльх дькьн, әԝана незики Хԝәде дьбьн, һьн жи һәврʹа незик дьбьн, у зәԝаща ԝан бәхтәԝар дьбә (Бьньһерʹә абзаса 5, 6)
6 Герһарт жь Алманйайе гьли дькә: «Һәргав шабуна мә дьтәмьри жь бо чәтьнайед мәйә шәхси йан жи жь бо һәвнәфәʹмкьрьне, ле ширәта жь Хәбәра Хԝәде али мә кьр ԝәки сәбьркьрьне у бахшандьне бал хԝә зедә кьн». Әԝ зедә дькә: «Әԝ һʹӧнӧр гәләк лазьм ьн сәва зәԝащ баш бә». Чахе жьн мер бь сайа шьхӧлед рʹӧһʹани тʹәвайи дьхәбьтьн ԝәки Хԝәде дь зәԝаща ԝанда бә, ԝи чахи ԛәԝи дьбә һәләԛәтийа ԝанә тʹәви Хԝәде у тʹәви һәв ӧса жи йәктийа ԝан.
СӘРԜЕРТИЙА МАЛХЕЙӘ БЬ ҺʹЬЗКЬРЬН
7. Ча мер гәрәке сәрԝертийе бькә?
7 Әԝ йәк кӧ мер чь щурʹәйи сәрԝертийе дькә, дькарә һʹӧкӧм бә ль сәр ԛәԝибун у бәхтәԝарбуна зәԝаще. Кʹьтеба Пироз дьбежә: «Сәре һәр мери Мәсиһ ә, сәре жьне мер ә у сәре Мәсиһ Хԝәде йә» (1 Корьнтʹи 11:3). Контекста ԝе рʹезе дьбежә кӧ ча гәрәке мер сәрԝертийе бькьн, демәк чʹәʹв бьдьнә Иса кӧ әԝ ча сәрԝертийе ль сәр мера дькә. Иса тʹӧ щар сәрт у бе рʹәʹм нибу, ле әԝ йәки бь һʹьзкьрьне тʹьжә, ԛәнщ, сәрԝахт, шкәсти, у дьлмьлаһим бу (Мәтта 11:28-30).
8. Ча мер дькарә жь кʹӧлфәта хԝә ԛәдьр у һʹьзкьрьн ԛазанч кә?
8 Меред кӧ мәсиһи нә, ԝанрʹа нәлазьмә ԝәки һәртʹьм жь жьнед хԝә дәʹԝа бькьн кӧ ԛәдьре ԝан бьгьрьн. Дәԝсе, әԝана гәрәке «бь фәʹмдарийе әʹмьре хԝә тʹәви жьнед хԝә» дәрбаз кьн. Әԝана гәрәке «чаԝа ԛьсьме сьст ԛәдьре ԝан» бьгьрьн (1 Пәтрус 3:7). Мер гәрәке һьндава жьна хԝә бь ԛәдьр у бь дьлрʹәми хәбәрдә, ча нав мәрийада ӧса жи чахе тʹәне нә. Жь бо ве йәке мер нишан дькьн кӧ кʹӧлфәтед ԝан чьԛас ԝанрʹа ԛимәт ьн (Мәтʹәлок 31:28). Һәрге мер сәрԝертийе бь һʹьзкьрьн дькә, ԝи чахи әԝ жь кʹӧлфәта хԝә һʹьзкьрьне у ԛәдьр ԛазанч дькә, у һьн жи Йаһоԝа зәԝаща ԝана кʹәрәм дькә.
ЖЬНЕД КӦ МЬЛУК У ГӦҺДАР ЬН
9. Ча жьн дькарә бь мьлукти гӧрʹа мере хԝәда бә?
9 Һʹьзкьрьна һʹәлал, йа кӧ ль сәр һʹиме принсипед Йаһоԝа йә, дькарә али мә һʹәмушка бькә кӧ әм «бьн дәсте Хԝәдейи зор та бьн» (1 Пәтрус 5:6). Һәрге жьн тʹәви мере хԝә шьхӧлкʹарийе дькә у алийе хԝәда дьхәбьтә ԝәки маледа әʹдьлайи һәбә, әԝ пе ве йәке нишан дькә ԛәдьр һьндава сәрԝертийа Йаһоԝа. Кʹьтеба Пироз дьбежә: «Кʹӧлфәтно, гӧрʹа меред хԝәда бьн, чаԝа кӧ ль йәктийа Хӧдан дькʹәвә» (Колоси 3:18). Фәʹмдари йә кӧ нә һʹәму сафикьрьнед мер дькарә жьна ԝи хԝәш бе. Хенщи ԝе йәке һәрге сафикьрьна мер нәмьԛабьли ԛануна Хԝәде йә, жьна гӧһдар тʹәви ԝи рʹази дьбә (1 Пәтрус 3:1).
10. Чьрʹа гӧһдарикьрьна бь һʹьзкьрьн фәрз ә?
10 Жьнерʹа щийе бь ԛәдьр һатийә дайине, әԝ һʹәвалхәбаткʹара мере хԝә йә (Малахи 2:14). Ԝәʹде сафикьрьнед дь малбәтеда жьн дькарә али мере хԝә бькә. Мәсәлә әԝ бь ԛәдьр фькьред хԝә у һәстед хԝә әʹйан дькә, у йәкә диса гӧрʹа мере хԝәда дьминә. Мере билан ԝе рʹьнд гӧһе хԝә бьдә гьлийед жьна хԝә (Мәтʹәлок 31:10-31). Гӧһдарикьрьна бь һʹьзкьрьн дькарә шабуне, әʹдьлайе, у тʹьфаԛе бькә нава малбәте. У әԝана кӧ гӧрʹа Хԝәде дькьн, жь бо ԝе йәке ша дьбьн (Әфәси 5:22).
БАХШАНДЬНА БЬ ДЬЛ У ЩАН
11. Чьрʹа бахшандьн гәләк фәрз ә?
11 Йәк жь ԝан тьшта кӧ зәԝаще ԛәԝи у дьреж дькә, әԝ һәйә бахшандьн. Зәԝащ ԝе һьнге ԛәԝи бә һәрге мер у жьн «ль һәв сәбьр кьн у ль һәв бьбахшиньн» (Колоси 3:13). Аликива жи, һәләԛәти дь зәԝащеда дькарә хьраб бә, һәрге жьн у мер хәйда бәре дьле хԝәда хԝәй дькьн, у ча чʹәк дьдьнә хәбате сәва кӧ һʹӧщӧми сәр һәв кьн. Чаԝа кӧ ԛәлш диԝаре авайи сьст дькә, ӧса жи хәйд у һерскʹәтьн дькарьн ӧса сәр дьле мәрийа һʹӧкӧм бьн, ԝәки бахшандьн зәʹф чәтьн бә. Ле зәԝащ дькарә ԛәԝи бә, һәрге жьн у мер ӧса һәвдӧ бьбахшиньн, чаԝа кӧ Йаһоԝа дьбахшинә ԝан (Миха 7:18, 19).
12. Ча һʹьзкьрьн «гәләк гӧна дьньхемә»?
12 Һʹьзкьрьна рʹаст «кʹине нажо». Бь рʹастийе жи «һʹьзкьрьн гәләк гӧна дьньхемә». (1 Корьнтʹи 13:4, 5; бьхунә 1 Пәтрус 4:8.) Бь гьлийе майин, һʹьзкьрьн чапе данайнә чьԛас щар гӧнә бьбахшиньн. Чахе Пәтрус пьрс кьр кӧ чьԛас щар әԝ гәрәке кәсәки бьбахшинә, Иса щаба ԝи да: «Һʹәта һʹәфте щара һʹәфт» (Мәтта 18:21, 22). Әԝи нишан кьр кӧ һʹәсаб тʹӧнә кӧ Мәсиһи чьԛас щар гәрәке бьбахшинә (Мәтʹәлок 10:12). a (Бьньһерʹә спартьн.)
13. Тӧ чь дькари бьки ԝәки һеса бьбахшини?
13 Анетт жь Алманйайе дьбежә: «Һәрге жь щоте зәԝаще йәк нәхԝазә бьбахшинә, ԝи чахи һерскʹәтьн у нәитʹбари пешда тен, у әԝ йәк дьбә жәʹр бона зәԝаще. Бахшандьн һәләԛәтийа мер у жьн ԛәԝи дькә у ԝана незики һәв дькә». Сәр хԝә бьхәбьтә ԝәки бешекьр ниби у шекьрандьна хԝә бьдә кʹьфше. Пʹайе мер йан жьна хԝә бьдә сәва кьред ԝи йан ԝе. Һәрге тӧ ӧса бьки, те һеса бькарьби бьбахшини (Колоси 3:15). Ахьрийе жи ԝе әʹдьлайи у тʹьфаԛи һәбә һʹьше тәда, у тӧйе ԛәбулкьрьна Хԝәде бьстини (Рʹомайи 14:19).
ХӘБЬТАНДЬНА ԚӘЙДЕ ЗЕРʹИН
14, 15. Чь йә Ԛәйде Зерʹин, у ча әм дькарьн бьдьнә хәбате ԝәки зәԝаще ԛәԝи кьн?
14 Фәʹмдари йә кӧ тӧ дьхԝази ԝәки ԛәдьре тә бьгьрьн. Тӧ дьшекьрини чахе тә дьбьһен у дәрһәԛа һәстед тә дьшьрмиш дьбьн. Тӧ ԛимәт дьки чахе гӧһ дьдьнә тә у һәстед тә һьлдьдьн һʹәсаб. Дьбәк ԝә жь кәсәки бьһистийә ԝәки готийә: «Әԝ мьнрʹа ча бу, әзе жи ԝирʹа ӧса бьм». Ле Кʹьтеба Пироз мьԛабьли ве йәке йә: «Готьна: Тьштен кӧ ԝи ль мьн кьрьнә, әзе жи жь ԝирʹа бькьм, әзе бәрдела [щаба] кьрьнен ԝи бьдьм ԝи; нәбежә» (Мәтʹәлок 24:29). Иса рʹекә лапә баш һин кьр, кӧ ча дәрәщед чәтьн сафи кьн. Әԝ чь кӧ Иса гот, ль сәр гәләк зьмана те готьне Ԛәйде Зерʹин: «У чаԝа һун дьхԝазьн мәрьв бона ԝә бькьн, һун жи ӧса ԝанрʹа бькьн» (Луԛа 6:31). Иса пе ԝе йәке дьхԝәст бьгота кӧ әм гәрәке тʹәви мәрийа ӧса бьн чаԝа кӧ әм дьхԝазьн әԝана тʹәви мә бьн, нә кӧ ча әԝана тʹәви мә нә. Әԝ те һʹәсабе ԝәки әм чь кӧ дьхԝазьн жь зәԝаща хԝә бьстиньн, әԝе йәке әм хԝәха гәрәке бькьнә нав зәԝаща хԝә.
Әм чь кӧ дьхԝазьн жь зәԝаща хԝә бьстиньн, әԝе йәке әм хԝәха гәрәке бькьнә нав зәԝаща хԝә
15 Мер у жьн һәләԛәтийа ортʹа хԝә ԛәԝи дькьн чахе һәстед һәв һьлдьдьн һʹәсаб. Мерәки жь Африкайе дьбежә: «Мә щерʹьбанд кӧ Ԛәйде Зерʹин бьдьнә хәбате. Рʹаст ә әм щара һерс дькʹәвьн, ле әм дьхәбьтьн кӧ һьндава һәвда ӧса бьн ча кӧ әм хԝәха дьхԝазьн кӧ һьндава мәда бьн, демәк бь ԛәдьр у мәʹрифәти».
16. Мер у жьн һьндава һәв чь гәрәке нә кьн?
16 Тʹӧ щар кемасийед һәвалщоте хԝә нәдә кʹьфше бәр мәрьвед дьн, у дәрһәԛа хәйсәтед ԝийә йан ԝейә кӧ тә хԝәш найен, һәла һе һʹәнәкада жи нәбежә. Бира хԝәда хԝәй кә, кӧ зәԝащ әԝ йәк нинә кӧ һәврʹа бькʹәвьнә һʹӧщәте, һәла кʹе ԛәԝат ә, кʹе дькарә һе зедә бькә ԛарʹини, йан кʹе дькарә пе гьлийа һе зедә дьле мәрийа бьешинә. Әм гьшк жи гӧнәкʹар ьн, у щар щара дькарьн һерса һәв биньн. Ле бь рʹастийе бежи, дь зәԝащеда мәʹнийед ӧса тʹӧнәнә ԝәки мер у жьн гьлийе хьраб һәврʹа бежьн, дьле һәв бьешиньн, һәв беһӧрмәт кьн, йан жи дәсте хԝә ль сәр һәв һьлбьрʹьн. (Бьхунә Мәтʹәлок 17:27; 31:26.)
17. Ча мер дькарә Ԛәйде Зерʹин бьдә хәбате?
17 Нава һьнә мьләтада, мер тьрса хԝә дькьнә сәр жьна хԝә йан жи дәсте хԝә сәр ԝана һьлдькʹшиньн, сәва кӧ избат кьн әԝана ԛәԝат ьн. Ле Кʹьтеба Пироз дьбежә, ԝәки кʹе ләзнакʹәвә һерс кʹәвә мәрьве лапә зор баштьр ә, у кʹе хԝә дәсте хԝәда дьгьрә жь йе шәһәр алткьри баштьр ә (Мәтʹәлок 16:32). Ԛәԝатәкә мәзьн лазьм ә ԝәки мәрьв чʹәʹв бьдә хԝәгьртьна мәрьве гьринг, демәк Иса. Әԝ малхе кӧ жьна хԝә дьдә хәйдандьне у дькʹӧтә мерәки сьст ә, кʹижан кӧ ԝе һәләԛәтийа тʹәви Йаһоԝа ӧнда кә. Зәбурбеж Даԝьд кӧ ԛәԝат у мерхас бу, гьлийе ӧса гот: «Жь һерсе бьләрьзьн; бәле гӧнәһ нәкьн. Дь нав ньвинен хԝәда кʹур ль сәр ве йәке бьфькьрьн, һьш бьн» (Зәбур 4:4).
«ҺʹЬЗКЬРЬНЕ ЛЬ ХԜӘ КЬН»
18. Чьрʹа гәрәке әм бь һʹәлали һәв һʹьз кьн?
18 Бьхунә 1 Кʹорьнтʹи 13:4-7. Һʹьзкьрьн гәләк фәрз ә дь зәԝащеда. Кʹьтеба Пироз дьбежә: «Дьлшәԝатийе, ԛәнщийе, мьлуктийе, бәрбьһерийе у сәбьре ль хԝә ԝәргьрьн. У сәр ван һʹәмуйада һʹьзкьрьне ль хԝә кьн, йа кӧ ван һʹәмуйа бь йәктийа тʹам һәвва гьредьдә» (Колоси 3:12, 14). Мер у жьн гәрәке һʹьзкьрьна һʹәлал бьдьнә кʹьфше у чʹәʹв бьдьнә Иса, кʹижан кӧ бь рʹәзәдьли хԝә кьрә ԛӧрбан бона һʹәмуйа. Һәрге һʹиме зәԝаще ль сәр һʹьзкьрьна ԝи щурʹәйи йә, чь чәтьнайи жи һәбьн, мәсәлә проблемед пʹәрава гьредайи, нәхԝәшийед гьран, проблемед тʹәви мәрьвед незик, йәкә әԝ ԝе ԛәԝи бьминьн.
19, 20. а) Ча мер у жьн дькарьн зәԝаща хԝә ԛәԝи у бәхтәԝар кьн? б) Чь әме пебьһʹәсьн дь тʹема дьнда?
19 Бона зәԝащ бәхтәԝар бә, лазьм ә ԛәԝате хәрщ кьн ӧса жи һәв һʹьз кьн у амьн бьминьн. Чахе чәтьнайи пешда тен, щоте зәԝащеда гәрәке гӧмана хԝәйә сәр зәԝаще ӧнда нәкьн. Ԝанрʹа лазьмә һе гәләк незики һәв бьн. Мер у жьнед кӧ Йаһоԝа һʹьз дькьн у ӧса жи һәвдӧ, гәрәке проблемед хԝә сафи кьн бь һʹьзкьрьне чьмки «һʹьзкьрьн тʹӧ щар кʹӧта набә» (1 Корьнтʹи 13:8; Мәтта 19:5, 6; Ибрани 13:4).
20 Рʹожа иройин гәләк чәтьн ә ԝәки зәԝаща хԝә ԛәԝи у бәхтәԝар ава кьн, мәʹни әԝ ә кӧ әм дьжин ԝәʹде «зәманед хьраб» (2 Тимотʹейо 3:1). Тʹәне бь аликʹарийа Йаһоԝа әве йәке дькарьн бькьн. Чʹьмки щоте зәԝащеда ӧса жи гәрәке мьԛабьли бенамусийа ве дьнйайе һәрʹьн. Дь тʹема дьнда әме пебьһʹәсьн, кӧ чаԝа мер у жьн дькарьн зәԝаща хԝә ԛәԝи хԝәйи кьн.
a Рʹаст ә щоте зәԝащеда дьхәбьтьн кӧ һәвдӧ бьбахшиньн у чәтьнайед хԝә сафи кьн, ле бона бенамусикьрьне Кʹьтеба Пироз изьне дьдә щоте нә нәһәԛ, кӧ хԝәха сафи кә бьбахшинә, йан жь йе бенамус бьԛәтә (Мәтта 19:9). Бьньһерʹә тʹема «Ньһерʹандьна Кʹьтеба Пироз: Бенамусийе-Бьбахшиньн йан Нәбахшиньн?» жь журнала «Һʹьшйар Бьн!» йа 8 Тʹәбахе, сала 1995.
