Фьрԛи тʹӧнә хәбата тә дьһа зәʹф һʹьшва гьредайи йә, йан йа физики йә, йан жи дьбәкә һәрдӧ тʹәвайи йә, бьзаньбә кӧ «һәр кʹәд ԛәзәнще [кʹаре] тинә» (Мәтʹәлок 14:23). Ле чь щурʹәйи кʹаре тинә? Мәсәлә хәбата физики, али мә дькә ԝәки әԝ тьштед материали кӧ әм һʹәԝщә нә щәм мә һәбьн. Бәле, Хԝәде соз дьдә ԛӧльхкʹаред хԝәйә дьлсах, ԝәки чь кӧ ԝанрʹа лазьм ә ԝе бьдә ԝан (Мәтта 6:31, 32). Ле әԝ ӧса жи һивийе йә, кӧ бь һʹәлали у бь дьл у щан бьхәбьтьн (2 Тʹесалоники 3:10).

Әм дькарьн һʹәсаб кьн кӧ хәбат али мә дькә бьгьһижнә нетед хԝә. Хәбат ӧса жи али мә дькә ԝәки әм борще хԝә бьԛәдиньн. Щошуа, йе кӧ 25 сали йә ӧса гот: «Мәрьв хԝә хԝәй кә, әԝ тьштәки һеса нинә. Һәрге тӧ дькари бона хәрщед хԝә хәм бьки, демәк хәбата тә шьхӧле хԝә дькә».

Сәва кӧ хәбата физикийә гьран бькьн, лазьм ә ԛәԝате хәрщ кьн. Ләма жи әԝед кӧ хәбата физикийә гьран дькьн, һе зедә ԛәдьре хԝә дьгьрьн. Һьнә хәбат дьбәкә ԛә нәһәԝас бә у чәтьн бә, ле чахе ԛәԝате дьди хәбате ԝәки хәбата ԝи щурʹәйи жи пек бини, әԝ йәк шабуне тинә, чьмки тӧ зани кӧ тә һʹәму тьшт рʹьнд кьрийә (Мәтʹәлок 26:14). Ӧса, тӧйе жь хәбата хԝә ләзәте бьвини. Аарон дәрһәԛа кʹижани тʹема дьнда һатьбу готьне дьбежә: «Әԝ рʹожа кӧ әз гәләки дьхәбьтьм, паши хәбате әз хԝә баш тʹәхмин дькьм. Рʹаст ә щарна әз дьбәк ԝәстийайи бьм йан жи дьбәкә хәбата мьн кәсәк нәвинә, ле әз жь хԝә рʹази мә, чьмки әз заньм кӧ мьн тьштәки һежа кьрийә».

Кʹьтеба Пироз бь ԛәдьр хәбәрдьдә дәрһәԛа мәрьвед кӧ «дь кʹаре хԝәда һостә йә», у дәрһәԛа жьна кӧ һәр шьхӧләки бь дьл у щан дькә (Мәтʹәлок 22:29; 31:13). Фәʹмдари йә кӧ мәрьв бь автоматики нькарә бьбә һостә. Гәләк мәри нә жи дьхԝазьн һин бьн кӧ хәбата хԝә рʹьнд бькьн у бьбьнә һостә. Ле мәрьве кӧ хәбата хԝә рʹьнд накә, шабуне настинә. Дьбәк ләма жи гәләк мәри жь хәбата хԝә шабуне настиньн.

Бь рʹастийе, мәрьв дькарә жь һәр хәбатәке шабуне бьстинә. Фәрз әԝ ә кӧ мәрьв рʹаст бьньһерʹә сәр хәбата хԝә, демәк һин бә кӧ хәбата хԝә һе рʹьнд бькә. Ԝиллиам йе кӧ 24 сали йә дьбежә: «Чахе тӧ һʹәму ԛәԝата хԝә хәрщ дьки кӧ хәбате рʹьнд бьки у кʹара ве жи дьвини, әԝ йәк шабуне тинә. Тӧйе тʹӧ щар әве шабуне у һәԝасе тʹәхмин нәки, һәрге тӧ хәбата хԝә бе һʹәмде хԝә дьки».

Ԝе баш бә һәрге тӧ тʹәне бона ве йәке дьшьрмиш нәби, кӧ тӧйе жь хәбата хԝә чьԛас пʹәрә бьстини. Дәԝсе, жь хԝә бьпьрсә: «Чьрʹа әԝ хәбат лазьм ә? Чь ԝе бьԛәԝьмә һәрге әԝ хәбат нәйе кьрьне, йан жи нә рʹаст бе кьрьне? Әԝ хәбата мьн чь кʹаре тинә мәрийарʹа?»

Илаһи сәр ве пьрса хьлазийе гәләк баш ә ԝәки бьфькьрьн, чьмки хәбата мә һе зедә ԝи чахи шабуне тинә, чахе тӧ дьвини кӧ әԝ хәбат чь кʹаре дьдә мәрийед дьн. Иса Мәсиһ гот: «Хԝәзи ль дайийа, нә кӧ ль стандийа» (Кʹаред Шандийа 20:35). Хенщи ве йәке кӧ хәбата мә кʹаре дьдә мәзьне хәбате у мәрийед дьн, әԝ ӧса жи кʹаре дьдә нәфәред мә у ԝан мәрийед дәсттәнг, әм али кʹе жи дькьн.

Нәфәред мале. Чахе малхе мале ԛайим дьхәбьтә, әԝ лапә кем дӧ тьштед баш дькә бона малбәта хԝә. Йа пешьн, әԝ хәм дькә бона һʹәԝщед ԝанә физики, демәк мал, хԝарьн у кʹьнщ дьдә ԝан. Әԝ ӧса жи борщдарбуна хԝә дьԛәдинә йе кӧ Хԝәде ԝирʹа дайә ԝәки мьԛати «хԝәхатийа хԝә» бә (1 Тимотʹейо 5:8). Йа дӧда, малхе мале бь мәсәла хԝә һин дькә фәрзбуна хәбата гьран. Шан дәрһәԛа кʹижани тʹема пешьнда һатийә готьне дьбежә: «Баве мьн мәсәләкә мәзьн ә ве йәкеда, кӧ хәбата хԝәйә гьран бь дьл у щан дькә. Әԝ ча мерәки һʹәлал тʹәмамийа әʹмьре хԝәда хәбата гьран кьрийә, у дьһа зәʹф ча нәщар хәбьтийә. Жь мәсәла ԝи әз һин бум, ԝәки чьԛас ԛимәт ә хәбата кӧ бь дәсте хԝә дьки, у чь кӧ дьки мәрьв ԝе кʹаре же бьстиньн».

Йед дәсттәнг. Паԝлосе шанди ширәт да ԝәки Мәсиһи «бь худана хԝәйә һʹәлал бь дәстед хԝә бьхәбьтә, кӧ бькарьбә дәст бавежә кʹәтийа» (Әфәси 4:28). Рʹасти жи, чахе әм хәбата гьран дькьн, әм хԝә у малбәта хԝә хԝәй дькьн, у әм ӧса жи дькарьн али дәсттәнга жи бькьн (Мәтʹәлок 3:27). Бь ве йәке, хәбата гьран дькарә шабуне мәрʹа бинә, чьмки әм дьдьн, нә кӧ дьстиньн.

Ль сәр чʹийайе Сәрмон Иса ӧса гот: «Һәгәр йәки ԛӧльхеда зоре ль тә бькә, ԝәки километьрәке тә бьбә, тʹәви ԝи дӧда һәрʹә» (Мәтта 5:41). Ча әве принсипе һун дькарьн бьдьн хәбате дь хәбата хԝәда? Дәԝса ве йәке кӧ кем бьки, бьхәбьтә ԝәки һе зедә бьки, нә кӧ чьԛас те дәʹԝакьрьне. Нете дайнә пешийа хԝә кӧ дьһа рʹьнд у зу бьки, нә кӧ ча жь тә те хԝәстьне. Хәбата хԝәда һәр тьштәки бьчʹукда жи ша бә.

Чахе тӧ һе зедә дьки, нә кӧ чьԛас жь тә те дәʹԝакьрьне, әв йәк һе зедә дьбә мәʹнийа шабуне. Чьрʹа? Чьмки ве дәрәщеда, тӧ хԝәха сәр кьред хԝә контрол дьки. Тӧ зедә дьки чьмки тӧ хԝәха дьхԝази, нә кӧ кәсәк зоре дьдә тә (Фьлимон 14). Дәрһәԛа ве йәке әм дькарьн дина хԝә бьдьн принсипа жь Мәтʹәлоке 12:24: «Дәсте жиран сәрԝәрийе дажон, ле бәле терали [тәмбәли] жи дьбә дилтийе». Рʹаст ә гәләк һьндьк ьн әԝед кӧ бь рʹастийе дилтийеда ньн у ԝана зоре дьдьнә хәбате. Ле щарна әм хԝәха хԝә дькьнә дил, чахе әм бе дьл у зоре дьхәбьтьн. Ле мәрьве кӧ һе зедә дькә нә кӧ чьԛас жь ԝи те дәʹԝакьрьне – әԝ нә дил ә. Чьмки әԝ хԝәха дьжберә у дьхԝазә – у әʹмьре хԝә хԝәха контрол дькә.

Хәбатһʹьзи тьштәки баш ә. Ле әм гәрәке бир нәкьн кӧ дь әʹмьре мәда тьштед һе фәрз у лазьм һәнә. Рʹаст ә Кʹьтеба Пироз мә һелан дькә кӧ әм хәбаткʹар бьн (Мәтʹәлок 13:4). Ле Кʹьтеба Пироз набежә кӧ гәрәке әʹмьре хԝә тʹәсмили хәбате кьн. Әԝ дьбежә кӧ: «Ләпәкә бь рʹьһʹәтийе тʹьжә, жь дӧ ләпед хәбата гьран у ба гьртьне, четьр ә» (Ԝаиз 4:6, ДТʹ). Әԝ мәри кʹижан кӧ тʹәмамийа ԝәʹде хԝә у ԛәԝата хԝә хәрщ дькә сәр хәбата хԝә, әԝ ԝе тʹӧ щар шабуне у ләзәте нәвинә жь ве хәбате. Бь ви щурʹәйи, хәбата ԝи ԝе бебәрәкʹәт бә чаԝа гьртьна байе.

Кʹьтеба Пироз дькарә али мә бькә ԝәки бь ньһерʹандьна рʹаст бьньһерʹьн сәр хәбата хԝә. Рʹаст ә Кʹьтеба Пироз мә һелан дькә ԝәки хәбата хԝә бь дьл у щан бькьн, ле әԝ ӧса жи ширәте дьдә кӧ чь «һәрә ԛәнщ ә, . . . ԝе бьбьжерьн» (Филипи 1:10). Ле чь йә һәрә ԛәнщ бона мә? Чахе әм тʹәви малбәта хԝә у һәвалед хԝә ԝәʹдә дәрбаз дькьн. Ле һе фәрз ә шьхӧле рʹӧһʹани, мәсәлә Кʹьтеба Пироз бьхуньн у сәр бьфкьрьн.

Әԝед кӧ ӧса дькьн, жь хәбата хԝә шабуне дьстиньн у ләзәте дьвиньн. Ԝиллиам дәрһәԛа кʹижани кӧ дь ве тʹемеда һатьбу готьне, гьлийе ӧса дьбежә: «Әз тʹәви кʹе кӧ дьхәбьтим, мәсәла мәзьн бу ԝе йәкеда, кӧ хәбата хԝә дьда щийе лайиԛ. Әԝ бь дьл у щан дьхәбьти у һәләԛәтийа ԝи тʹәви клийентед ԝи гәләк баш бу, чьмки әԝи хәбата хԝә рʹьнд дькьр. Ле хьлазийа рʹожа хәбате, әԝи хәбат дьда алики у һʹьш-аԛьле хԝә дьда сәр малбәта хԝә у ԛӧльхкьрьна хԝә. У заньн чь? Әԝ бь рʹастийе жи мәрьвәки бәхтәԝар ә!»