1, 2. а) Иса дәрһәԛа рʹожед ахьрийе чь әʹйан кьр? б) Дь ве тʹемайеда әме дәрһәԛа кʹижан пьрса хәбәрдьн?

 БЬДӘ бәр чʹәʹве хԝә кӧ Иса рʹуньштийә сәр чʹийайе Зәйтʹуне у дьньһерʹә сәр пʹарьстгәһа Оршәлиме. Әԝ тʹәви чар шагьртед хԝә Пәтрус, Әндраԝьс, Аԛуб у Йуһʹәнна йә. Ԝана рʹьнд гӧһ дьданә Иса, чахе әԝи ԝанарʹа пʹехәмбәртийа бона ахьрийе гьли дькьр. Әве пʹехәмбәртийе әʹйан дькьр кӧ чь ԝе бьԛәԝьмә ԝәʹде рʹожед ахьрийа ве дьнйа зӧлм, чахе Иса пʹадшатийе бькә дь Пʹадшатийа Хԝәдеда. Иса ԝанрʹа гьли дькә, кӧ дь ԝан рʹожед ахьрийеда, хӧламе ԝийә «амьн у сәрԝахт» ԝе бьбьнә ԝәкʹиле ԝи, у ԝәхтда хԝарьна рʹӧһʹани бьдьнә ԛӧльхкʹаред ԝи (Мәтта 24:45-47).

² Паше, Иса дь ве пʹехәмбәртийеда мәтʹәлокәке гьли дькә дәрһәԛа дәһ ԛизед бькʹьр. (Бьхунә Мәтта 25:1-13.) Дь ве тʹемайеда әме хәбәрдьн дәрһәԛа ван пьрса: 1) Нета ве мәтʹәлокейә сәрәкә чь йә? 2) Йед рʹункьри ширәта жь ве мәтʹәлоке ча данә хәбате, у кʹара жь ве йәке чь йә? 3) Ча һәр кәс жь мә иро, дькарә кʹаре бьстинә жь ве мәтʹәлока Иса?

3. Бәре әʹдәбйәтед мәда ча дьһатә шьровәкьрьне мәтʹәлока дәрһәԛа дәһ ԛизед бькʹьр, у дьбәкә чь кемасийа ве йәке һәбу?

³ Дь тʹема пешьнда әм пеһʹәсийан, кӧ дь ԝан пашԝәхтийада, хӧламе амьн у сәрԝахт гӧһаст щурʹе шьровәкьрьна ԛәԝьмандьнед жь Кʹьтеба Пироз. Хӧламе амьн ньһа һе зедә дина хԝә дьдә сәр дәрсед керһати, нә кӧ сәр фәʹмкьрьна бь симболик йан жи бь пʹехәмбәрти. Мәсәлә мәтʹәлока Иса дәрһәԛа дәһ ԛизед бькʹьр. Әʹдәбйәтед мәда дьһатә готьне, ԝәки рʹун, дәрдана рʹун у чʹьра, әԝ тенә һʹәсабе кәсәк йан тьштәк. Гәло дьԛәԝьмә, жь бо ве йәке кӧ дина хԝә дьданә сәр тьштед бьчʹук, нета фәрз йа ве мәтʹәлоке ӧнда бу? Щаба ве пьрсе фәрз ә.

4. Дь ве мәтʹәлокеда әм жь кʹӧ заньн ԝәки а) кʹи йә зәʹва? б) кʹе нә ԛизед бькʹьр?

⁴ Ԝәрен әм леколин кьн нета мәтʹәлока Иса. Йа әʹԝльн, дьшьрмиш бьн дәрһәԛа кәсед дь мәтʹәлокеда. Кʹи йә зәʹва? Әԝ һәйә Иса Мәсиһ. Әм әве йәке заньн, чьмки Иса хԝәха дәрһәԛа хԝә гот кӧ әԝ ә зәʹва (Луԛа 5:34, 35). Кʹе нә ԛизед бькʹьр? Әԝана «кәрийе . . . бьчʹук» ьн, демәк Мәсиһийед рʹункьри. Ле әм жь кʹӧ заньн? Дь мәтʹәлокеда, ԛизед бькʹьр гәрәке пе чʹьред вехьсти һазьр буна чахе зәʹва бьһата. Ньһа дина хԝә бьдьне, Иса чь готә рʹункьрийе хԝә: «Бьра пьшта ԝә гьредайи у чʹьред ԝә вехьсти бьн. Һун мина ԝан мәрьва бьн, йед кӧ һивийа ахайе хԝә нә, кӧ әԝе кʹәнге жь дәʹԝате вәгәрʹә» (Луԛа 12:32, 35, 36). Һьн жи, Паԝлос у Йуһʹәннайе шанди жи рʹункьрийед Иса бәрамбәри ԛизед бькʹьр кьрьн (2 Корьнтʹи 11:2; Әʹйанти 14:4). Демәк Иса әв мәтʹәлока кӧ дь Мәтта 25:1-13-да һатийә ньвисаре, бона ве йәке гот ԝәки тʹәмийе бьдә рʹункьрийед хԝә у ԝәки һаш жь хԝә һәбьн.

5. Иса ча әʹйан кьр кӧ әԝ мәтʹәлок дәрһәԛа кʹижан ԝәʹдәйи йә?

⁵ Ле әм ча бьзаньбьн кӧ әв ширәта Иса дәрһәԛа кʹижан ԝәʹдәйи бу? Ԝе али мә бькә гьлийед Иса, кʹижан кӧ әԝи бәри хьлазийа мәтʹәлоке гот: «Зәʹва һат» (Мәтта 25:10). Жь журнала «Бьрща Ԛәрәԝьлийе» йа 15 Тирмәһе, сала 2013, әм пеһʹәсийан кӧ пʹехәмбәртийа Исайә дь Мәтта сәре 24 у 25-да, һʹәйшт щара те готьне дәрһәԛа һатьна Иса. Чахе Иса дәрһәԛа һатьна хԝә дьгот, әԝи бона ԝәʹде тәнгасийа мәзьн дьгот, чахе әԝ бе диԝане бькә у дьнйа зӧлм ԛьрʹ кә. Демәк әм дьвиньн кӧ мәтʹәлока Иса дәрһәԛа рʹожед ахьрийе йә, ле әԝ ԝе ԝәʹде тәнгасийа мәзьн бе.

6. Чь йә нета ве мәтʹәлоке?

⁶ Әм чь дькарьн һин бьн жь нета ве мәтʹәлоке? Ԝәрен әм бькьнә бира хԝә контекста ве мәтʹәлоке. Дь Мәтта сәре 24-да, Иса хәбәр дьдә дәрһәԛа хӧламе амьн у сәрԝахт. Әԝ хӧлам гәрәке кʹома бьчʹук йа рʹункьрийа буйа, кʹижан кӧ гәрәке борщдари һьлда сәр хԝә нава пәйчуйед Исада, ԝәʹде рʹожед ахьрийе. Иса пешда готә ԝан рʹункьрийа кӧ әԝана гәрәке амьн бьминьн. Ле сәре 25-да, Иса мәтʹәлок ани дәрһәԛа дәһ ԛизед бькʹьр, ԝәки һʹәму рʹункьрийед хԝә ширәт кә бона рʹожед ахьрийе. Әԝи ԝанрʹа гот «һʹьшйар бьминьн», чьмки бь ве йәке ԝана ԝе хәлата хԝәйә әʹзмана ӧнда нәкьрана (Мәтта 25:13). Ньһа ԝәрен әм әве мәтʹәлоке шьровәкьн у бьвиньн  кӧ рʹункьрийа чаԝа әԝ ширәт ԛәбул кьрьн.

7, 8. а) Чьрʹа ԛизед сәрԝахт һазьр бун? б) Чаԝа рʹункьри һазьр ьн?

⁷ Дь ве мәтʹәлокеда, Иса кʹьфш кьр кӧ ԛизед сәрԝахт нә мина ԛизед бефәʹм бун, әԝана ида һазьр бун чахе зәʹва һат. Чьрʹа? Чьмки хԝә һазьр кьрьн у һʹьшйар ман. Һʹәму дәһ ԛизед бькʹьр гәрәке сәрхԝә буна у мьԛат буна ԝәки шәв чʹьред ԝан венәсьн. Әԝ пенщ ԛизед сәрԝахт кӧ нә мина йед бефәʹм бун, хԝә һазьр кьрьн чьмки ԝана хԝәрʹа тʹәви чʹьред хԝә рʹуне зедә һьлдан. Ле гәло чаԝа рʹункьрйед амьн хԝә һазьр кьрьнә бона һатьна Иса?

⁸ Рʹункьри һазьр ьн ԝәки шьхӧле хԝә һʹәта хьлазийе бьԛәдиньн. Әԝана фәʹм дькьн, сәва кӧ Хԝәдерʹа ԛӧльх кьн, лазьм ә инкʹар кьн әԝ комфорта материали кӧ дьнйа Шәйтʹанда нә, у әԝана ӧса жи дькьн. Әԝана дьхԝазьн бь амьни Хԝәдерʹа ԛӧльх кьн, нә кӧ чьмки хьлази незик ә, ле чьмки әԝана Хԝәде у Кӧрʹе ԝи һʹьз дькьн. Әԝана беԛӧсуртийа хԝә хԝәй дькьн у наһельн ԝәки дьнйа пʹәрәһʹьз, бенамус у хԝәһʹьз сәр ԝан һʹӧкӧм кә. Әԝана мина ԝан ԛизед сәрԝахт, йед кӧ чʹьра һазьр кьрьн у һивийе бун, шәԝԛе дьдьн у бь сәбьр һивийа һатьна Зәʹва нә. Дьбәкә ӧса те кʹьфше, кӧ Зәʹва дәрәнги дькʹәвә, ле әԝана дина хԝә надьнә ԝе йәке (Филипи 2:15).

9. а) Иса чь готә шагьртед хԝә дәрһәԛа хәԝрʹачуйине? б) Рʹункьрийа хԝә ча данә кʹьфше, чахе дәнг бьһистьн кӧ: «Ва йә зәʹва те»? (Бьньһерʹә спартьн.)

⁹ Ԛизед сәрԝахтә бькʹьр ӧса жи һазьр бун бона һатьна зәʹва, чьмки әԝана һʹьшйар бун. Ле дь мәтʹәлокеда те готьне ԝәки һʹәму 10 ԛизед бькʹьр «һеньжин у хәԝрʹа чун», чахе һивийа зәʹва бун, йе кӧ те бежи дәрәнги дькʹәт. Ле гәло дькарә ӧса бьԛәԝьмә кӧ иро Мәсиһийед рʹункьри жи «хәԝрʹа һәрʹьн», демәк һʹәта һивийа һатьна Иса нә, һʹьше ԝан у дина ԝан һәрʹә сәр тьштед дьн? Бәле. Иса заньбу ԝәки һәла һе әԝ мәрьве кӧ һазьр ә жи, ԝәʹде һивийебуне дькарә сьст бә у дина ԝи һәрʹә сәр тьштед майин. Рʹункьри гәләк дьхәбьтьн, ԝәки һʹьшйар бьминьн. Дь ве мәтʹәлокеда, һʹәму дәһ ԛизед бькʹьр чахе әв дәнг бьһистьн: «Ва йә зәʹва те!» һʹьшйар бун. Ле тʹәне ԛизед сәрԝахт һазьр бун (Мәтта 25:5, 6; 26:41). Иро жи, ԝәʹде ԝан рʹожед ахьрийе, Мәсиһийед рʹункьри дәнг бьһистьн кӧ: «Ва йә зәʹва те!» Ԝана избаткьрьна ԛәԝи йа һатьна Иса дитьн, у әԝана һазьр ьн бона һатьна ԝи. a (Бьньһерʹә спартьн.) Ԝәрен әм бьньһәрʹьн хьлазийа мәтʹәлока Иса, йе кӧ дина мә дьдә сәр ԝәʹдәки конкрет.

10. Әм чь дькарьн бежьн дәрһәԛа дәрәща ортʹа ԛизед бефәʹм у ԛизед сәрԝахт?

¹⁰ Ль хьлазийа ве мәтʹәлоке ԛизед бефәʹм жь ԛизед сәрԝахт рʹуне бона чʹьре дьхԝазьн. Ле ԛизед сәрԝахт  ԛайил нәбун али ԝан бькьн. (Бьхунә Мәтта 25:8, 9.) Ле гәло кʹәнге тьште ӧса ԛәԝьмийә кӧ мәсиһийед рʹункьри али кʹәтийа нәкьрьнә? Һәла бинә бира хԝә, әԝ мәтʹәлок дәрһәԛа кʹижан ԝәʹдәйи дьбежә. Иса, демәк Зәʹва, те ԝәки незики хьлазийа тәнгасийа мәзьн диԝане бькә. Демәк, ча те кʹьфше әԝ дәрәща ортʹа ԛизед бефәʹм у ԛизед сәрԝахт ԝе бьԛәԝьмә һәма пешийа хьлазийа тәнгасийа мәзьн. Чьрʹа әм ӧса дьбежьн? Чьмки ԝи ԝәʹдәйи рʹункьри мора хԝәйә хьлазийе ԝе бьстиньн.

11. а) Чь ԝе бьԛәԝьмә пешийа дәстпебуна тәнгасийа мәзьн? б) Әԝ йәк кӧ ԛизед сәрԝахт готьнә йед бефәʹм кӧ һәрʹьн у хԝәха рʹун бькʹьрʹьн, чь те һʹәсабе?

¹¹ Демәк, паше пешийа кӧ тәнгасийа мәзьн дәстпебә, һʹәму рʹункьрийед амьн ԝе мора хьлазийе бьстиньн (Әʹйанти 7:1-4). Пәй ԝе йәкерʹа әԝана ида ԝе сәд сәләфи бьзаньбьн кӧ ԝе һәрʹьн сәр әʹзмана. Ле һәла дьшьрмиш бә дәрһәԛа салед пешийа тәнгасийа мәзьн. Һәгәр жь рʹункьрийа һьнәк һʹьшйар у амьн нәминьн, ԝе чь бьԛәԝьмә тʹәви ԝан? Әԝана ԝе море нәстиньн. Ләма ԝи чахи мәсиһийед амьнә дьн ԝе бенә рʹункьрьне. Чахе тәнгасийа мәзьн дәстпебә, әԝед бефәʹм у нәамьн, чахе бьвиньн кӧ Бабилона Мәзьн һатә кʹӧта кьрьне, ԝе зәндәгьрти бьминьн. Ԝи чахи әԝана ԝе фәʹм кьн кӧ һазьр ниньн бона һатьна Иса. Һәрге һьнге әԝана аликʹарийе бьхԝазьн, гәло ԝе бьстиньн? Щаба ԝе пьрсе дь мәтʹәлокеда йә. Ԛизед сәрԝахт рʹун нәданә ԛизед бефәʹм, у дәԝсе готьн ԝәки һәрʹьн хԝәха бькʹьрʹьн. Чьмки әва «ниве шәве» ԛәԝьми, кәс тʹӧнә бу кӧ рʹун бьфрота ԝан. Ида гәләк дәрәнг бу!

12. а) Ԝәʹде тәнгасийа мәзьн, йед кӧ рʹункьри бун ле амьн нәман ԝе чь һʹалида бьн? б) Чь ԝе бьԛәԝьмә тʹәви ԝан, йед кӧ мина ԛизед бефәʹм бьн?

¹² Ԝәʹде тәнгасийа мәзьн, рʹункьрийед амьн ԝе нькарьбьн али нәамьна бькьн. Чьмки ԝе ида гәләк дәрәнг бә. Ле чь ԝе бьԛәԝьмә тʹәви нәамьна? Дина хԝә бьдә ԝе йәке, кӧ чь ԛәԝьми тʹәви ԝан ԛизед бефәʹм, йед кӧ чун рʹун бькʹьрʹьн: «Зәʹва һат у әԝед һазьр тʹәв ԝи кʹәтьнә дәʹԝате у дәри һатә гьртьне». Чахе Иса незики хьлазийа тәнгасийа мәзьн бе, әԝ ԝе һʹәму рʹункьрийед амьн ль сәр әʹзмана тʹоп кә (Мәтта 24:31; 25:10; Йуһʹәнна 14:1-3; 1 Тʹесалоники 4:17). Ле йед нәамьн ԝе ԛәбул нәкә. Мина ԝан ԛизед бефәʹм әԝана жи дьбәкә ӧса бежьн: «Әм хӧлам, Әм хӧлам! Дәри ль мә вәкә!» Ле Иса ԝе ча щаба хԝә бьдә? Ле сәд һʹәйф Иса ԝе диса ӧса бежә ԝан, чаԝа кӧ ԝе бежә нәһәԛа: «Әз рʹаст ԝәрʹа дьбежьм, әз ԝә нас накьм» (Мәтта 7:21-23; 25:11, 12).

13. а) Чьрʹа әм гәрәке нәбежьн кӧ гәләк жь мәсиһийед рʹункьри, ԝе бьбьнә нәамьн? б) Чьрʹа әм дькарьн бежьн кӧ мәтʹәлока Иса дьдә кʹьфше кӧ әԝ итʹбарийа хԝә рʹункьрийед хԝә тинә? (Бьньһерʹә шькьле әʹԝльн.)

¹³ Ле гәло Иса әв йәк дьхԝәст бьгота, кӧ гәләк жь рʹункьрийа ԝе нәамьн бьн у дәԝса ԝан ԝе йед дьн бенә жьбартьне? На. Дь Мәтта сәре 24-да, әм дьхуньн кӧ Иса пешда готә хӧламе амьн у сәрԝахт, ԝәки әԝана нәбьнә хӧламе хьраб. Ле әԝ найе һʹәсабе кӧ Иса һивийе бу кӧ ԝе ӧса жи бьԛәԝьмә. Жь ԝьр те кʹьфше кӧ мәтʹәлока дәрһәԛа дәһә ԛизед бькʹьр, әв һәйә ширәт йан жи тʹәми. Чаԝа дәһә ԛизед бькʹьр, пенщ жь ԝан бунә бефәʹм, пенщ жи сәрԝахт, ӧса жи мәсиһийе рʹункьри гәрәке бьжберә кӧ бьбә сәрԝахт, демәк һазьр бә у һʹьшйар бә, нә кӧ бьбә бефәʹм у нәамьн. Паԝлос жи ширәтәкә ӧса да хушк у бьред рʹункьри.  (Бьхунә Ибрани 6:4-9; бәрамбәр кьн Ԛануна Дӧщари 30:19.) Паԝлос сәрт ширәт да ԝан, ле әԝи итʹбарийа хԝә хушк бьред хԝә дьани, кӧ әԝана дькарьн хәлата хԝә бьстиньн. Дәрса мәтʹәлока дәрһәԛа дәһә ԛизед бькʹьр, дьдә кʹьфше, кӧ Иса жи итʹбарийа хԝә рʹункьрийа тинә. Әԝ занә кӧ һәр кәс жь рʹункьрийа дькарә амьн бьминә у бьстинә хәлата баш!

14. Чьрʹа «пәзед дьн» жи дькарьн кʹаре бьстиньн жь ве мәтʹәлока дәрһәԛа дәһ ԛизед бькʹьр?

¹⁴ Мәтʹәлока Иса бона Мәсиһийед рʹункьри бу. Ле гәло пәзед дьн жи дькарьн жь ве мәтʹәлоке кʹаре бьстиньн? (Йуһʹәнна 10:16) Бәле! Нета мәтʹәлоке гәләк фәʹмдари йә: «Һʹьшйар бьминьн». Щарәке Иса гот: «У әз чь ԝәрʹа дьбежьм, һʹәмуйарʹа дьбежьм: ‹Һʹьшйар бьминьн!›» (Марԛос 13:37) Иса дәʹԝа дькә ԝәки һʹәму шагьртед ԝи һазьр бьн у һʹьшйар бьминьн. У һʹәму мәсиһи дькарьн чʹәʹв бьдьнә мәсәла рʹункьрийайә баш, йед кӧ ԛӧльхкьрьне датиньн щийе пешийе дь әʹмьре хԝәда. Биньн бира хԝә, кӧ ԛизед бефәʹм жь ԛизед сәрԝахт һиви кьрьн ԝәки һьнә рʹун бьдьнә ԝан. Һивикьрьна ԝана ԛәбул нәкьрьн. Әԝ мәрʹа нишан дькә ԝәки тʹәне мәва гьредайи йә әме амьн бьминьн йан на. Ләма жи әм гәрәке хԝәха һʹьшйар бьн у һазьр бьн. Тʹӧ кәс дәԝса мә йан сәва мә нькарә әԝе йәке бькә. Әме хԝәха щаба хԝә бьдьн бәр диԝана Иса Мәсиһ, йе кӧ ԝе зутьрәке бе. Демәк әм гәрәке һазьр бьн!

15. Чьрʹа зәԝаща Иса у бука ԝи, һʹәԝас ә бона һʹәму Мәсиһийед рʹаст?

¹⁵ Һʹәму мәсиһийарʹа һʹәԝас ә әԝ зәԝащ, дәрһәԛа кʹижани кӧ дь мәтʹәлока Исада һатийә готьне. Дь ахьрийеда, паши Һармәгәдоне, мәсиһийед рʹункьри ԝе бьбьнә бука Иса (Әʹйанти 19:7-9). Паше һәр кәсе ль сәр әʹрде ԝе кʹаре бьстинә жь зәԝаща ль әʹзмана. Чьрʹа? Чьмки әԝ созе сәрԝертийа кʹамьл бона һʹәму мәрьва дьдә. Фьрԛи тʹӧнә гӧмана мә йа әʹзмана йә йан йа әʹрде, ԝәрен әм хԝәрʹа сафи кьн ԝәки һазьр бьн у бәрдәԝан кьн һʹьшйар бьминьн. Һәрге әм ӧса бькьн, әме бькарьбьн жь ахьрийа башрʹа ша бьн, кʹижан кӧ Йаһоԝа бона мә һазьр кьрийә!