Һәләԛәтийа Тә Тʹәви Йаһоԝа Чьԛас Реали йә?
«Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (АԚУБ 4:8).)
1. Чьрʹа әм гәрәке һәләԛәтийа хԝә тʹәви Йаһоԝа ԛәԝи хԝәй кьн?
ҺӘРГЕ тӧ Шеʹде Йаһоԝайи ньхӧманди йи, тьштәки тәйи гәләк ԛимәт һәйә. Һәләԛәтийа тәйә шәхси тʹәви Йаһоԝа һәйә. Ле дьнйа Шәйтʹан һӧщӧми сәр ԝе һәләԛәтийе дькә, у һьн жи жь бо нәкʹамьлбуна мә әԝ һәләԛәти дькарә сьст бә. Ләма жи, әм тʹьме гәрәке һәләԛәтийа хԝә тʹәви Йаһоԝа чьԛас дькарьн ԛәԝи хԝәй кьн.
2. а) Чь йә һәләԛәти? (Бьньһерʹә спартьн.) б) Әм ча дькарьн һәләԛәтийа хԝә тʹәви Йаһоԝа ԛәԝи кьн?
2 Гәло Йаһоԝа бона тә реали йә? Тӧ тʹәхмин дьки кӧ әԝ Досте тә йә? Тӧ дьхԝази ԝәки һәләԛәтийа тә тʹәви ԝи һе ԛәԝи бә? Аԛуб 4:8 дьбежә кӧ чь тӧ гәрәке бьки: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә». Һәләԛәтийа тә тʹәви Йаһоԝа, һьн тәва гьредайи йә һьн жи Хԝәдева. a (Бьньһерʹә спартьн.) Һәрге тӧ гаве бавежи ԝәки незики Йаһоԝа би, ԝе әԝ жи гаве бавежә ԝәки незики тә бә. Әԝе йәке тӧ чьԛас һе зедә бьки, ԝе һаԛас Хԝәде бона тә һе реали бә. Һәләԛәтийа тә тʹәви Йаһоԝа ԝе ӧса незик бә, кӧ тӧ сәр хԝә тʹәхмин ки ԝе йәке, чь кӧ Иса тʹәхмин кьр чахе әԝи гот: «Йе кӧ әз шандьмә, рʹасти йә. Әз ԝи нас дькьм» (Йуһʹәнна 7:28, 29, ИМ). Ле тӧ чь дькари бьки ԝәки незики Йаһоԝа би?
Тӧ ча дькари тʹәви Хԝәде хәбәрди? (Бьньһерʹә абзаса 3)
3. Әм ча дькарьн тʹәви Йаһоԝа хәбәрдьн?
3 Һәрге тӧ дьхԝази кӧ тʹәви Хԝәде незик би, гәләк фәрз ә ԝәки тӧ у Йаһоԝа тʹьме тʹәви һәв хәбәрдьн. Ле чаԝа әм дькарьн тʹәви Хԝәде хәбәрдьн? Һәла дьшьрмиш бә, чаԝа тӧ у һәвале тә кʹижан жь тә дур ә, дькарьн һәврʹа хәбәрдьн. Һун дькарьн тʹьме һәвдӧрʹа бьньвисьн у пе тʹеле хәбәрдьн. Ле тʹәви Хԝәде тӧ дькари хәбәрди чахе һәргав ԝирʹа дӧа дьки. (Бьхунә Зәбур 142:2.) Ле тӧ ча дькари ӧса бьки ԝәки Хԝәде тʹәви тә хәбәрдә? Тӧ гәрәке тʹьме бьхуни Хәбәра ԝи Кʹьтеба Пироз, у сәр бьфькьри. (Бьхунә Ишайа 30:20, 21.) Ԝәрен әм бьньһерʹьн кӧ чаԝа хәбәрдана тә у Йаһоԝа дькарә һәләԛәтийа тә тʹәви ԝи ԛәԝи кә, у ԝи бькә Досте тәйи реали.
ЙАҺОԜА ТʹӘВИ ТӘ ХӘБӘРДЬДӘ ЧАХЕ ТӦ КʹЬТЕБА ПИРОЗ ДЬХУНИ
4, 5. Ча Йаһоԝа тʹәви тә хәбәрдьдә чахе тӧ Кʹьтеба Пироз дьхуни? Бинә мәсәлә.
4 Әм заньн кӧ Кʹьтеба Пироз әԝ һәйә нәʹмә бона һʹәмуйа. Ле гәло Кʹьтеба Пироз дькарә али тә бькә ԝәки незики Йаһоԝа би? Бәле! Чахе тӧ Кʹьтеба Пироз тʹьме дьхуни у леколин дьки, дина хԝә бьдә сәр ԝе йәке кӧ тӧ чь сәр хԝә тʹәхмин дьки чахе дьхуни. У дьшьрмиш бә сәр ԝе йәке, кӧ тӧ чаԝа дькари бьди хәбате чь кӧ тӧ пеһʹәсийайи. Чахе тӧ ӧса дьки, тӧ дьһели ԝәки Йаһоԝа тʹәви тә хәбәрдә. Әԝ дьбә Досте тәйи незик, кʹижан кӧ али тә дькә, у тӧ незики ԝи дьби (Ибрани 4:12; Аԛуб 1:23-25).
5 Мәсәлә, тӧ чь тʹәхмин дьки чахе ван гьлийе Иса дьхуни: «Ль сәр дьне хьзне хԝәрʹа нәщьвиньн»? Һәрге тӧ һʹәму тьшти дьки, ԝәки дь әʹмьре хԝәда Йаһоԝа дайни щийе пешьн, тӧйе тʹәхмин ки кӧ әԝ тә ԛәбул дькә. Ле дьбәк тӧ дьхуни ван гьлийе Иса у фәʹм дьки кӧ тәрʹа лазьм ә әʹмьре хԝә һеса ки, у дьхԝази ԝәки һе зедә Хԝәдерʹа ԛӧльх бьки. Һәрге ӧса йә, демәк әԝ Йаһоԝа али тә дькә кӧ фәʹм бьки тӧ чь гәрәке бьки, ԝәки незики ԝи би (Мәтта 6:19, 20).
6, 7. а) Чахе әм Кʹьтеба Пироз леколин дькьн, чь дьԛәԝьмә тʹәви һʹьзкьрьна мә һьндава ԝи у һʹьзкьрьна ԝи һьндава мә? б) Нета мәйә сәрәкә гәрәке чь бә чахе әм Кʹьтеба Пироз дьхуньн?
6 Рʹаст ә чахе әм Кʹьтеба Пироз леколин дькьн, әм педьһʹәсьн кӧ чь гӧһастьна гәрәке бькьн, сәва кӧ һе рʹьнд Хԝәдерʹа ԛӧльх кьн. Әм ӧса жи педьһʹәсьн дәрһәԛа ԝан тьшта, йед кӧ әԝ бь һʹьзкьрьн дькә у дәрһәԛа ԝи ча кәсе лапи баш. У әԝ йәк һʹьзкьрьна мә һьндава ԝи һе зедә дькә. Ча һʹьзкьрьна мә һьндава ԝи мәзьн дьбә, ӧса жи һʹьзкьрьна ԝи һьндава мә мәзьн дьбә, у һәләԛәтийа мә тʹәви ԝи һе ԛәԝи дьбә. (Бьхунә 1 Корьнтʹи 8:3.)
7 Һәрге әм дьхԝазьн незики Хԝәде бьн, фәрз ә кӧ чахе Кʹьтеба Пироз леколин дькьн нета мәйә рʹаст һәбә. Иса гот: «Әв ә жийина һʹәта-һʹәтайе, ԝәки әԝ тә нас кьн, чаԝа Хԝәдейе рʹасти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3). Әм чахе Кʹьтеба Пироз дьхуньн, дькарьн гәләк тьштед тʹәзә у һʹәԝас пебьһʹәсьн. Ле нета мәйә сәрәкә гәрәке әԝ бә, кӧ Йаһоԝа һе рʹьнд нас кьн чаԝа Кәс. (Бьхунә Дәркʹәтьн 33:13; Зәбур 25:4.)
8. а) Ча һьнәк дькарьн дьшьрмиш бьн дәрһәԛа ве йәке кӧ Йаһоԝа ча бу һьндава Пʹадше Азарйа? б) Һәрге тӧ Йаһоԝа нас дьки, тӧйе чь дьшьрмиш би дәрһәԛа ԝе йәке кӧ әԝи чь кьр?
8 Һәрге әм Йаһоԝа нас дькьн чаԝа Досте незик, әме дьлтәнг нәбьн һәрге Кʹьтеба Пироз щара мәрʹа шьровәнакә, кӧ әԝи чьма ӧса кьрийә йан жи чьрʹа ӧса хԝә дайә кʹьфше. Мәсәлә, чахе Азарйа пʹадше Щьһуда бу, щьмәʹте хӧданед ԛәлпрʹа ԛӧльх дькьрьн. Ле Азарйа мина ԝан нибу. Әԝи «тьште кӧ дь чʹәʹве Хӧданда рʹаст ьн чекьр» (2 Пʹадшати 15:1-5). Ле Йаһоԝа Азарйа бь кʹотибуне щәза кьр. Чьрʹа? Әԝа пʹара ве сәрһатийе мәрʹа гьли накә чьрʹа. Ле тӧ чь дьшьрмиш дьби дәрһәԛа Йаһоԝа? Гәло әԝ йәк тә әʹщьз дькә у тӧ дьшьрмиш дьби кӧ Йаһоԝа нәрʹаст бу, ԝәки Азарйа щәза кьр бейи мәʹна щайиз? Һьлбәт на. Һәрге тӧ Йаһоԝа рʹьнд нас дьки, тӧ зани кӧ щәзакьрьна ԝи тʹьме һәԛ ә. Әԝ тʹьме бь һәԛи мәрийа рʹаст дькә (Йерәмйа 30:11). Демәк, һәрге тӧ ньзани кӧ Йаһоԝа чьрʹа Азарйа щәза кьр, тӧ дькари баԝәр би кӧ Йаһоԝа әԝ йәк кьр чь кӧ рʹаст бу.
9. Кʹижан информасийа али мә дькә кӧ фәʹм бькьн чьрʹа Йаһоԝа Азарйа бь кʹотибуне щәза кьр?
9 Кʹьтеба Пироз мәрʹа һе зедә бь һургьли шьровәдькә дәрһәԛа әʹмьре Азарйа пʹадша, сәр кʹижани ӧса жи те готьне пʹадша Узийа (2 Пʹадшати 15:7, 32). Жь ве сәрһатийе пʹара майинда 2 Дирок 26:3-5, 16-21 дьбежә кӧ әԝи чь кӧ «дь чʹәʹвен Хӧданда рʹаст ьн кьрьн». Ле дь сәрһатийеда ӧса жи те готьне кӧ паше әԝ ԛӧрʹә бу, чь кӧ ԝи бьр бәрбь кʹӧтакьрьне. Әԝи пʹадшайи дьхԝаст әв йәк бькьра, чь кӧ тʹәне изьна кʹәшиша һәбу бькьн. Һʹәйште йәк кʹәшиша ԝирʹа дьготьн кӧ әԝ нә рʹаст ә у дьхԝәстьн ԝи бьдьнә сәкьнандьне. Ле әԝи ча хԝә да кʹьфше? Әԝ һаԛас ԛӧрʹә бу кӧ әԝ сәр ԝан һерскʹәт! Әԝ информасийа али мә дькә ԝәки фәʹм бькьн, чьрʹа Йаһоԝа әԝ пʹадша бь кʹотибуне щәза кьр.
Чьԛас һе зедә тӧ Хԝәде нас дьки, һаԛас һе зедә тӧйе итʹбарийа хԝә ԝи бини, ԝәки әԝ һʹәму тьшти ӧса дькә ча кӧ рʹаст ә
10. Чьрʹа мәрʹа нәлазьм ә кӧ бьзаньбьн мәʹнийа ԝан һʹәму тьшта чь кӧ Йаһоԝа дькә? Ча әм дькарьн һе зедә итʹбарийа хԝә Йаһоԝа биньн, ԝәки әԝ һәртʹьм ӧса дькә ча кӧ рʹаст ә?
10 Чь дәрса фәрз әм һин дьбьн жь ве йәке? Дь сәрһатийа дәрһәԛа Азарйа пʹадша, әм епʹещә информасийа һур бь һур педьһʹәсьн, сәва кӧ фәʹм бькьн чьрʹа Йаһоԝа ԝи щәза кьр. Ле һәгәр бона дәрәщәке Кʹьтеба Пирозда информасийа һур бь һур тʹӧнә, ԝи чахи тӧйе чь дьшьрмиш би? Дьбәк тӧйе дӧдьли би, гәло Йаһоԝа рʹаст кьр йан на? Йан тӧйе һʹәсаб ки, ԝәки Кʹьтеба Пироз чьԛас информасийа дьдә, тʹере дькә кӧ итʹбарийа хԝә Хԝәде бини, у дӧдьли нәби ԝәки Йаһоԝа һәртʹьм ӧса дькә ча кӧ рʹаст ә? (Ԛануна Дӧщари 32:4) Чьԛас һе зедә тӧ Хԝәде нас дьки чаԝа Кәс, һаԛас һе зедә тӧйе ԝи һʹьз ки у итʹбарийа хԝә ԝи бини. У ԝи чахи тәрʹа ԝе лазьм нибә кӧ бьзаньби мәʹнийед һʹәму кьред ԝи. Чахе тӧ Кʹьтеба Пироз леколин дьки, Йаһоԝа дьбә кәсе реали бона тә у тӧ незики ԝи дьби (Зәбур 77:12, 13).
ТӦ ТʹӘВИ ЙАҺОԜА ХӘБӘРДЬДИ ЧАХЕ ԜИРʹА ДӦА ДЬКИ
11-13. Тӧ жь кӧ зани ԝәки Йаһоԝа дӧа дьбьһе? (Бьньһерʹә шькьле әʹԝльн.)
11 Чахе әм дӧа дькьн, әм незики Хԝәде дьбьн. Әм ԝи рʹумәт дькьн, рʹазибуна хԝә дьдьнә кʹьфше, у аликʹарийе жь ԝи дьхԝазьн (Зәбур 32:8). Ле һәрге тӧ дьхԝази ԝәки достийа тә тʹәви Йаһоԝа незик бә, тӧ гәрәке сәд сәләфи баԝәр би кӧ әԝ дӧа дьбьһе.
12 Һьнә мәри дьбежьн кӧ Хԝәде дӧа набьһе у кӧ дӧакьрьн әԝ тʹәне дьлрʹьһʹәтийе тинә. Әԝана баԝәр дькьн ԝәки дӧакьрьн тʹәне али тә дькә, ԝәки дәрһәԛа проблемед хԝә дьшьрмиш би у сафикьрьна бьвини. Рʹаст ә, дь ве йәкеда жи дӧакьрьн дькарә али тә бькә. Ле чахе тӧ дӧакьрьнеда тʹәви Йаһоԝа хәбәрдьди, әԝ бь рʹастийе жи тә дьбьһе. Ча тӧ дькари баԝәр би дь ве йәкеда?
Тӧ дькари сәд сәләфи баԝәр би ԝәки Йаһоԝа дӧайед тә дьбьһе
13 Дьшьрмиш бә сәр ԝе йәке: Һʹәта Иса бьһата сәр әʹрде, әԝи дьдит кӧ Йаһоԝа щаба дӧайед ԛӧльхкʹаред Хԝәйи сәр әʹрде дьда. Ле чахе Иса һатә ль сәр әʹрде, әԝи дӧа дькьр Хԝәдерʹа, дәрһәԛа фькьр у хәмед хԝә. Щарәке әԝи һәла тʹәмамийа шәве жи дӧа дькьр (Луԛа 6:12; 22:40-46). Гәло Иса ԝе дӧа бькьра, һәрге әԝ дьшьрмишбуйа кӧ Йаһоԝа бь рʹастийе ԝи набьһе? Иса ӧса жи пәйчуйед хԝә һин дькьр кӧ чаԝа Йаһоԝарʹа дӧа бькьн. Гәло әԝи ԝе әԝана һинкьрана, һәрге әԝ дьшьрмишбуйа кӧ Йаһоԝа дӧа набьһе? Әʹйан ә, Иса заньбу кӧ Йаһоԝа рʹасти жи дӧа дьбьһе. Әԝи һәла һе әԝ гьли жи гот: «Баво, әз зәʹф рʹази мә кӧ тә дәнге мьн бьһист. Әз заньм кӧ тӧ һәр гав дәнге мьн дьбьһейи». Әм жи дькарьн сәд сәләфи баԝәр бьн кӧ Йаһоԝа дӧайед мә дьбьһе (Йуһʹәнна 11:41, 42; Зәбур 65:2).
14, 15. а) Әм чь кʹаре дьстиньн чахе дәрһәԛа тьштед конкрет дӧа дькьн? б) Ча дӧайед Кети али ԝе кьрьн кӧ әԝ незики Хԝәде бу?
14 Щабед сәр дӧайед тә нә һәртʹьм дькарьн әʹйан бьн. Ле чахе тӧ дӧайед хԝәда дәрһәԛа тьштед конкрет дӧа дьки, ԝи чахи тӧйе бькарьби щабед Йаһоԝа һе әʹйан бьвини, у әԝ ԝе һе реали бә бона тә. Ле һәрге тӧ дь дӧайед хԝәда Йаһоԝарʹа дәрһәԛа һʹәму хәмед хԝә дьле хԝә вәдьки, ԝи чахи әԝ незики тә дьбә.
15 Мәсәлә, һʹәԝаса Кетийе сәр даннасинкьрьне тʹӧнә бу, ле әԝ даннасин дькьр. b (Бьньһерʹьн спартьн.) Әԝ гьли дькә: «Даннасинкьрьн мьн хԝәш нәдьһат. Дьхԝазьм бежьм кӧ бь рʹастийе мьн хԝәш нәдьһат». Чахе әԝ жь хәбате дәркʹәт, рʹуспи ԝе һелан кьр кӧ әԝ бьбә пешәнга һәртʹьм. Әԝ дьбежә: «Әԝи рʹуспи һәла һе мьнрʹа бланк жи да. Мьн сафи кьр кӧ бьбьмә пешәнг, у мьн дәстпекьр Йаһоԝарʹа һәр рʹож дӧа бькьм, ԝәки әз даннасинкьрьне һʹьз кьм». Гәло Йаһоԝа щаба дӧайе ԝе да? Паши се салийа ԛӧльхкьрьна пешәнги, әԝ ньһа дьбежә: «Әԝ чь кӧ мьн гәләк ԝәхт хәрщ дькьр сәр даннасинкьрьне у жь хушкед дьн һин дьбум, әве йәке али мьн кьр кӧ дь даннасинкьрьнеда һе щерʹьбанди бьм. Иро, даннасинкьрьн нә кӧ тʹәне мьн хԝәш те, ле әз гәләки һʹьз дькьм. У һе зедә, һәләԛәтийа мьн тʹәви Йаһоԝа дьһа незик буйә нә кӧ бәре». Бь рʹастийе жи, дӧайед Кетийе али ԝе кьрьн кӧ әԝ незики Хԝәде бу.
Бәрдәԝан кә незики Хԝәде бә (Бьньһерʹә абзаса 16, 17)
ЧЬ ТӘ ДЬКʹӘВӘ БЬКӘ
16, 17. а) Әм чь гәрәке бькьн ԝәки бәрдәԝан кьн һәләԛәтийа хԝә тʹәви Йаһоԝа ԛәԝи кьн? б) Әм чь шеԝьр кьн дь готара дьнда?
16 Әм дькарьн һʹәта-һʹәтайе бәрдәԝан кьн незики Йаһоԝа бьн. Ԝәрен әм бәрдәԝан кьн ԝи бьбьһен бь леколинкьрьна Кʹьтеба Пироз, у ӧса жи бәрдәԝан кьн хәбәрдьн тʹәви ԝи дӧайед хԝәда. Һәрге әм ӧса бькьн, һәләԛәтийа мә тʹәви Йаһоԝа ԝе дьһа ԛәԝи бә, у бь аликʹарийа ԝи әме бькарьбьн чәтьнайа тәйах кьн.
Әм дькарьн һʹәта-һʹәтайе бәрдәԝан кьн незики Хԝәде бьн
17 Щара ӧса дьԛәԝьмә, кӧ әм бона проблемед хԝә тʹьме Йаһоԝарʹа дӧа дькьн, ле проблемед мә хьлаз набьн. Ԝи чахи, әм дькарьн итʹбарийа хԝә һьндава Йаһоԝа һеди-һеди ӧнда кьн. Әм дькарьн дьшьрмиш бьн кӧ Йаһоԝа дӧайед мә набьһе у дӧдьли бьн, кӧ рʹасти әм досте ԝи нә йан на. Һәрге тӧ ӧса дьшьрмиш дьби, тӧ чь дькари бьки? Готара дьн ԝе али тә бькә.
