1-3. Чьрʹа Паԝлос дӧдьли нәдьбу кӧ дькарә итʹбарийа хԝә Йаһоԝа бинә? (Бьньһерʹә шькьле әʹԝльн.)

 ҺӘРГЕ тӧ мәсиһийе дь ԛьрʹна йәкеда Ромеда буйайи, тәйе ԝәʹдәки гәләк хофда бьжита. Ромайи бь зӧлми пәй Мәсиһийа дькʹәтьн. Ԝана шәрʹ давитьнә мәсиһийа, йан чь агьр Роме хьстьнә у ӧса дькьрьн кӧ мәрьв ԝана нәфрʹәт кьн. Гәләк хушк бьред тә һатьнә гьртьне. Һьнәк жь тәрәԝьла дьданә вәчьрʹандьне. Һьнәк жи стунава мьх дькьрьн у агьр бәри ԝан дьдан сәва кӧ шәве бьбә рʹонайи. Һәр рʹож тәйе бьзаньбуйа кӧ әԝ йәк дькарә сәре тә жи бьԛәԝьмә.

² Ԝан ԝәʹде гәләк чәтьнда, Паԝлосе шанди кʹәтә кәле. Дьбәк әԝ дьшьрмиш дьбу кӧ гәло бьред ԝийә Мәсиһи ԝе бенә һәԝара ԝи, чьмки һатә бира ԝи кӧ бәре тʹӧ кәси али ԝи нәкьр. Ле Йаһоԝа бь Иса аликʹари да Паԝлос. Әԝи ньвиси: «Ле Хӧдан тʹәви мьн сәкьни у ԛәԝат да мьн». Иса ԛәԝат да Паԝлос, чь кӧ ԝирʹа лазьм бу. Паԝлос һәла диса ньвиси кӧ әԝ «жь дәве шер» хьлаз бу (2 Тимотʹейо 4:16, 17). a (Бьньһерʹә спартьн.)

³ Паԝлос дьани бира хԝә кӧ бәре Йаһоԝа ча али ԝи дькьр. Ләма жи әԝи баԝәр дькьр, ԝәки Йаһоԝа ԝе ԛәԝате бьдә  ԝи, чь кӧ ԝирʹа лазьм ә сәва тәйах кә ԝе дәрәщеда ӧса жи дәрәщед ахьрийейә чәтьнда. Әԝи ӧса ԛайим баԝәр дькьр, кӧ ньвиси: «Хӧдан ԝе мьн жь һәр кьред хьраб хьлаз кә» (2 Тимотʹейо 4:18). Паԝлос һин бьбу кӧ чахе бьред ԝи нькарьбун али ԝи бькьрана, әԝи дькарьбу итʹбарийа хԝә Йаһоԝа у Иса бинә, ԝәки ԝе али ԝи бькьн. Ԝе йәкеда әԝ тʹӧ щар дӧдьли нәдьбу.

4, 5. а) Кʹе дькарә тʹьме аликʹарийа лазьм бьдә тә? б) Ча тӧ дькари һәләԛәтийа хԝә тʹәви Йаһоԝа ԛәԝи ки?

⁴ Ԛә проблема тәйә ӧса чәтьн һәбуйә кӧ кәсәки нькарьбуйә али тә бькә? Дьбәк тә хәбата хԝә ӧнда кьр, йан жи мәкʹтәбеда зорбәти һәбу. Дьбәк тӧ нәхԝәш буйи йан жи чәтьнайед тәйә дьн һәбун. Дьбәкә тә жь һьнәка аликʹари хԝәстийә, ле ԝана нькарьбунә ӧса аликʹарийе бьдьнә тә ча кӧ тәрʹа лазьм бу. Рʹаст ә, һәнә проблем кӧ мәрьв нькарьн сафи кьн. Һьнге тӧ чь дькари бьки? Кʹьтеба Пироз мәрʹа дьбежә ԝәки итʹбарийа хԝә Йаһоԝа биньн (Мәтʹәлок 3:5, 6). Ле тӧ дькари баԝәр би ԝәки әԝ ԝе али тә бькә? Бәле! Әм дькарьн жь Кʹьтеба Пироз дәрһәԛа гәләк мәсәла бьхуньн, кʹижан кӧ мә дьдьнә баԝәркьрьне ԝәки Йаһоԝа рʹасти жи али щьмәʹта хԝә дькә.

⁵ Һерс нәкʹәвә чахе мәрьв аликʹарийа ӧса надьнә тә ча кӧ тәрʹа лазьм ә. Дәԝсе, мина Паԝлос, чәтьнайед хԝә һʹәсаб кә ча мәщал, кӧ бь тʹәмами итʹбарийа хԝә Йаһоԝа бини. Әԝ ӧса жи мәщал ә кӧ дь әʹмьре хԝәда бьвини, чаԝа әԝ бона тә хәм дькә. Ахьрийе, итʹбари у һәләԛәтийа тә һьндава Йаһоԝа ԝе һе ԛәԝи бә.

6. Чьрʹа дькарә чәтьн бә итʹбарийа хԝә Йаһоԝа биньн чахе проблема мәйә чәтьн һәйә?

⁶ Дьбәкә проблемәкә тәйә чәтьн һәйә, жь бо кʹижане тӧ дьлтәнг дьби. Тә сәва ԝе проблеме һʹәму тьшт кьрийә чь кӧ карьбуйә, у бона аликʹарийе Йаһоԝарʹа дӧа кьрийә. Ле паши ԝе йәке, тӧ дькари дьлрʹьһʹәт би у баԝәр би ԝәки әԝ ԝе али тә бькә? Бәле тӧ дькари! (Бьхунә Зәбур 62:8; 1 Пәтрус 5:7.) Һәрге тӧ дьхԝази ԝәки һәләԛәтийа баш ортʹа тә у Йаһоԝада һәбә, гәләк фәрз ә ԝәки һин би итʹбарийа хԝә ԝи бини. Ле әԝ йәк һеса нинә. Гәло чьрʹа? Мәʹни әԝ ә, кӧ Йаһоԝа дьбәк дәрберʹа щаба дӧайед тә надә (Зәбур 13:1, 2; 74:10; 89:46; 90:13; Һәбаԛуԛ 1:2).

7. Чьрʹа щара Йаһоԝа дәрберʹа щаба дӧайед мә надә?

⁷ Чьрʹа щара Йаһоԝа дәрберʹа щаба дӧайед мә надә? Кʹьтеба Пироз дьбежә кӧ Йаһоԝа баве мә йә, ле әм зарʹед ԝи нә (Зәбур 103:13). Мәсәлә, бав һʹәму тьшти надә зарʹа хԝә чь кӧ әԝ дьхԝазә, йан жи һәма дәрберʹа наде. Бав занә кӧ зарʹ дькарә ньшкева тьштәки бьхԝазә, ле паше ида нә жи бьхԝазә. Щара бав хԝәстьна зарʹе ԛә найнә сери, чьмки занә ԝәки әԝ йәк кʹаре найнә нә зарʹерʹа на жи мәрьвед дьнрʹа. Әԝ занә зарʹа ԝи һʹәԝще чь йә у кʹәнге гәрәке бьстинә. Һәрге бав дәрберʹа бьдә зарʹе чь кӧ әԝ дьхԝазә, ӧса ԝе бав зарʹерʹа бьбә хӧлам. Йаһоԝа баве мәйи ль әʹзмана, мә һʹьз дькә. Чаԝа Әʹфьрандаре билан, әԝ занә чь мәрʹа лазьм ә у әԝ сафи дькә кӧ кʹәнге һе баш ә бьдә мә чь кӧ мә жь ԝи хԝастийә. Йа лапә баш әԝ ә кӧ әм һивийе бьн у бьвиньн щабед Йаһоԝа сәр дӧайед мә (Бәрамбәр кьн Ишайа 29:16; 45:9).

8. Йаһоԝа чь соз дьдә дәрһәԛа ԝе йәке кӧ әм чьԛаси дькарьн тәйах кьн?

⁸ Бира хԝәда хԝәй кә, кӧ Йаһоԝа занә һәр кәс чьԛас дькарә бькә у чьԛас дькарә  тәйах кә (Зәбур 103:14). Әԝ ԛәԝата лазьм дьдә мә. Рʹаст ә щара мә тʹьре ида чʹарә тʹӧнә. Ле Йаһоԝа соз дьдә кӧ һәрге чәтьн ә әм щерʹьбандьнеда тәйах кьн, әԝ ԝе «дәлиләке жи бькә». (Бьхунә 1 Корьнтʹи 10:13.) Чахе әм заньн кӧ Йаһоԝа занә әм чьԛаси дькарьн тәйах кьн, әԝ йәк мә дьлрʹьһʹәт дькә.

9. Әм чь гәрәке бькьн һәрге Йаһоԝа дәрберʹа щаба мә надә чахе әм аликʹарийе ԝи дьхԝазьн?

⁹ Һәрге әм Йаһоԝарʹа дӧа дькьн бона аликʹарийе, ле әԝ дәрберʹа щаба мә нәдә, ԝәрен әм сәбьр кьн. Бира хԝәда хԝәй кә ԝәки Йаһоԝа дьхԝазә али мә бькә, ле әԝ бь сәбьр һивийа ԝәʹде баш ә ԝәки һьнге бьдә мә чь кӧ мәрʹа лазьм ә. Кʹьтеба Пироз мәрʹа дьбежә: «Бона кӧ Хӧдан хере ль ԝә бькә, ԝе бьсәкьнә [һивийе бә], у бона кӧ дьле ԝи бь ԝә бьшәԝьтә, ԝе бьльнд бьбә; жь бәр кӧ Хӧдан, Хԝәдайе дадийе [һәԛийе] йә, хԝәзи ль һʹәмуйен кӧ ль бәнда [һивийа] ԝи нә!» (Ишайа 30:18)

10-12. а) Кʹижан чәтьнайи дькарьн һәбьн чахе мьԛати нәфәре хԝәйи нәхԝәш дьбьн? б) Чахе тӧ итʹбарийа хԝә Йаһоԝа тини ԝәʹде чәтьнайа, ча әԝ йәк һʹӧкӧм дьбә сәр һәләԛәтийа тә тʹәви Йаһоԝа? Мәсәле бинә.

¹⁰ Дьбәк дәрәща тә һаԛас чәтьн ә кӧ тӧ хԝә мина Паԝлос тʹәхмин дьки у лазьм ә ԝәки жь «дәве шер» хьлаз би (2 Тимотʹейо 4:17). Ԝәʹде ԝе чәтьнайе, гәләк фәрз ә ԝәки итʹбарийа хԝә Йаһоԝа бини. Мәсәлә, дьбәк тӧ мьԛати нәфәре хԝәйи нәхԝәш дьби. Тә Йаһоԝарʹа дӧа кьрийә бона али тә бькә ԝәки сафикьрьна рʹаст бьки у ԛәԝи би. b (Бьньһерʹә спартьн.) Паши ԝе йәке, тӧ дьлрʹьһʹәтийе тʹәхмин дьки чахе зани кӧ Йаһоԝа тә дьвинә у һʹале тә фәʹм дькә. У әԝ ԝе али тә бькә ԝәки сәбьр ки у амьн бьмини (Зәбур 32:8).

¹¹ Щара дьбәкә найе кʹьфше ԝәки Йаһоԝа али тә дькә. Дьбәк тӧ у һʹәким тьштәкида һәврʹа нәрʹази нә. Йан гӧмана тә сәр кʹе йә кӧ ԝе бәр дьле тәда бен, дәԝсе әԝана шьхӧле тә һе хьраб дькьн. Тʹьме итʹьбарийа хԝә Йаһоԝа бинә, кӧ ԝе ԛәԝате бьдә тә. Незики ԝи бә. (Бьхунә 1 Самуйел 30:3, 6.) Ахьрийе, чахе тӧ бьвини кӧ Йаһоԝа ча али тә кьр, һәләԛәтийа тә ԝе тʹәви ԝи ԛәԝи бә.

¹² Ԝәрен әм бьньһерʹьн мәсәла Линдайе. c (Бьньһерʹә спартьн.) Әԝе гәләк ԝәʹдә бона де-баве хәм дькьр, у һʹәта мьрьна ԝан мьԛати ԝан бу. Әԝ дьбежә: «Ве дәрәщеда, малхе мьнрʹа, бьре мьнрʹа, у мьнрʹа гәләк щар чәтьн бу бьзаньбьн чь бькьн. Мә хԝә беаликʹари тʹәхмин дькьр. Чахе әм бона бәре дьшьрмиш дьбьн, әм һе зәлал дьвиньн кӧ чаԝа Йаһоԝа тʹәви мә бу. Әԝи әм ԛәԝи дькьрьн у дьда мә чь кӧ мәрʹа лазьм бу, һәла һе ԝи чахи жи кӧ мә тʹьре ида чʹарә тʹӧнә».

13. Рандайе кӧ итʹбарийа хԝә Йаһоԝа дьани, әве йәке ча али ԝе кьр кӧ бәр кӧл-дәрда тәйах кьр?

¹³ Чахе әм бь тʹәмами итʹбарийа хԝә Йаһоԝа тиньн, әԝ йәк али мә дькә һәла һе бәр кӧл-дәрдед гьран жи тәйах кьн. Ԝәрә бьньһерʹьн мәсәла Рандайе. Мере ԝе Шәʹде Йаһоԝа нибу у әԝ жь ԝе ԛәтийа. Ԝи ԝәʹде чәтьнда әԝ пеһʹәсийа кӧ бьре ԝе бь нәхԝәшикә гьран нәхԝәш ә. Паше, чәнд мәһ дәрбаз бун, жьна бьре ԝе мьр. Паше ԝәʹдә дәрбаз бу у Рандайе тʹәхмин кьр кӧ әԝ сәр хԝәда һатийә, у әԝе дәстпекьр ча пешәнг ԛӧльх кә. Паше жи дийа ԝе мьр. Ле Рандайе ча тәйах кьр  бәр ԝан кӧл-дәрда? Әԝ гьли дькә: «Мьн һәр рʹож тʹәви Йаһоԝа хәбәрдьда, һәла һе дәрһәԛа пьрсед бьчʹук жи. Бь ԝе йәке Йаһоԝа бона мьн реали бу. Әԝе йәке әз һин кьрьм, ԝәки гӧмана хԝә бьдьмә сәр Йаһоԝа, нә кӧ сәр хԝә йан жи сәр йәки дьн. Аликʹарийа ԝи реали бу, чьмки әз һʹәԝще чь жи бума мьн гьшк дьстанд. Ахьрийе, мьн сәр хԝә тʹәхмин кьр кӧ ча бежи дәсте мьн дәсте Йаһоԝада йә».

14. Ча Йаһоԝа дькарә али тә бькә һәрге нәфәрәкә мала тә жь щьвате һатийә дәрхьстьне?

¹⁴ Бьфькьрә сәр чәтьнайикә дьн. Дьбәкә кәсәк жь малбәта тә жь щьвате һатийә дәрхьстьне. Тӧ жь Кʹьтеба Пироз рʹьнд зани, кӧ гәрәке чаԝа бьн һьндава мәрьвед жь щьвате һатийә дәрхьстьне (1 Корьнтʹи 5:11; 2 Йуһʹәнна 10). Ле чьмки тӧ әԝи мәрьви һʹьз дьки, тӧ дьбәк тʹәхмин ки кӧ зәʹф чәтьн ә йан жи нькари әԝе тʹәмийа жь Кʹьтеба Пироз бьԛәдини. Гәло тӧ баԝәр дьки ԝәки Баве тәйи ль әʹзмана дькарә ԛәԝате бьдә тә, кӧ бь амьни гӧрʹа ԝи бьки? Гәло тӧйе сәр ве дәрәще ӧса бьньһерʹи, кӧ әԝ мәщал ә ԝәки тʹәви Йаһоԝа незик би?

15. Чьрʹа Адәм гӧһдарийа Йаһоԝа нәкьр?

¹⁵ Әм әԝе дәрәще ча дькарьн бәрамбәр кьн тʹәви дәрәща мәрьве пешьн Адәм? Әԝи баԝәр дькьр һәрге әԝ гӧрʹа Хԝәде нәкә, ԝе бәрдәԝан кә бьжи? На, Адәм «нәхапийа» (1 Тимотʹейо 2:14). Ле чьрʹа әԝи гӧрʹа Йаһоԝа нәкьр? Адәм емише кӧ жьна ԝи да ԝи, хԝар чьмки әԝи жьна хԝә һе  зедә һʹьз дькьр нә кӧ Йаһоԝа. Әԝи дәԝса кӧ гӧһ бьда тʹәмийа Йаһоԝа, гӧрʹа жьна хԝә кьр (Дәстпебун 3:6, 17).

16. Һʹьзкьрьна мә һьндава кʹе гәрәке ԛәԝи бә, у чьрʹа?

¹⁶ Сафикьрьна Адәм мәрʹа дьбә дәрс ԝәки әм гәрәке Йаһоԝа һе зедә һʹьз бькьн нә кӧ кәсәки дьн. (Бьхунә Мәтта 22:37, 38.) У һәрге һʹьзкьрьна мә һьндава Йаһоԝа ԛәԝи йә, ԝи чахи әм дькарьн бь щурʹе лапи баш али мәрьвед хԝәйи незик бькьн, фьрԛи тʹӧнә әԝана Йаһоԝарʹа ԛӧльх дькьн йан на. Тӧ бәрдәԝан кә һʹьзкьрьн у баԝәрийа хԝә һьндава Йаһоԝа мәзьн кә. Һәрге жи тӧ бәрхԝәдькʹәви сәва нәфәре хԝәйи кӧ жь щьвате һатийә дәрхьстьне, Йаһоԝарʹа дӧа бькә у гьли кә һʹәму тьшти чь кӧ дьле тәда һәйә. d (Бьньһерʹә спартьн.) (Рʹомайи 12:12; Филипи 4:6, 7) Һәрге паши ԝе йәке жи диса тәрʹа чәтьн ә, сәр ве дәрәще бьньһерʹә чаԝа мәщал сәва кӧ ԛәԝи ки һәләԛәтийа хԝә тʹәви Йаһоԝа. Паше тӧйе бькарьби итʹбарийа хԝә ԝи бини у бьзаньби кӧ һәрге тӧ гӧрʹа ԝи бьки ахьрийеда те кʹарәкә баш бьстини.

17. Һәрге әм бәрдәԝан кьн шьхӧле даннасинкьрьнева мьжул бьн, әм чь гәрәке баԝәр кьн?

¹⁷ Чьрʹа Йаһоԝа Паԝлос жь «дәве шер» хьлаз кьр? Паԝлос дьбежә: «Ԝәки пе мьн Мьзгинидайин мийасәр бә» (2 Тимотʹейо 4:17). Йаһоԝа мәрʹа жи шьхӧле даннасинкьрьна «мьзгинийа хере» да, у әԝ мә нав дькә ча һәвалхәбаткʹаре хԝә (1 Тʹесалоники 2:4; 1 Корьнтʹи 3:9). Һәрге әм бәрдәԝан кьн әԝи шьхӧлива мьжул бьн, әм дькарьн сәд сәләфи баԝәр бьн, кӧ Йаһоԝа ԝе бьдә мә чь кӧ әм һʹәԝщә нә (Мәтта 6:33). У ԝе мәрʹа һеса бә кӧ һивийе бьн һʹәта Йаһоԝа щаба дӧайед мә бьдә.

18. Чаԝа тӧ дькари һе зедә баԝәрийа хԝә Йаһоԝа бини у һәләԛәтийа тʹәви ԝи һе ԛәԝи ки?

¹⁸ Һәр рʹож бьхәбьтә ԝәки һәләԛәтийа хԝә тʹәви Йаһоԝа ԛәԝи ки. Чахе тӧ рʹасти тәнгасийе тейи у бәрхԝәдькʹәви, әԝе йәке бьдә хәбате ча мәщал кӧ незики Йаһоԝа би. Бьхунә, леколин кә, у бьфькьрә сәр Хәбәра Хԝәде, демәк Кʹьтеба Пироз. Бәрдәԝан кә дӧа бькә у ԛӧльхкьрьнева мьжул бә. Һәрге тӧ ԝан һʹәму тьшта бьки, тӧ дькари баԝәр би кӧ Йаһоԝа ԝе али тә бькә кӧ тәйах ки бәр һʹәму чәтьнайед хԝә, чаԝа ньһа ӧса жи ахьрийе.