1. Кʹижан фәрәсәт али мә дькә ԝәки чʹәʹв бьдьнә Йаһоԝа?

 ЙАҺОԜА фәрәсәтәки ӧса дайә мә, кӧ әм дькарьн һәстед мәрьва фәʹм кьн, һәла һьнге жи, чахе әм нәкʹәтьнә дәрәща ԝан. (Бьхунә Әфәси 5:1, 2.) Ле әԝ фәрәсәт ча дькарә али мә бькә, ԝәки әм чʹәʹв бьдьнә Йаһоԝа? У ча әм дькарьн әԝи фәрәсәти бь билани бьдьнә хәбате?

2. Йаһоԝа чь сәр хԝә тʹәхмин дькә чахе әм дьчәрчьрьн?

² Йаһоԝа мәрʹа соз дьдә ахьрийа бәхтәԝар у бетәнгаси. Рʹункьри һивийе нә жийина һʹәта-һʹәтайе сәр әʹзмана бьстиньн у «пәзед дьн» жийина сәр әʹрде (Йуһʹәнна 10:16; 17:3; 1 Корьнтʹи 15:53). Ле ньһа чахе әм дькʹәвьнә тәнгасийе, Йаһоԝа фәʹм дькә кӧ әм чь һалида ньн. Бәре жи, Йаһоԝа һале щьмәʹта хԝә фәʹм дькьр у бәрхԝәдькʹәт чахе әԝана Мьсьреда дьчәрчьрин. Кʹьтеба Пироз дьбежә кӧ әԝ бона ԝан «әщьз бу» (Ишайа 63:9). Паше, чахе щьмәʹта ԝи пʹарьстгәһ тʹәзәда ава дькьр у дьжмьнед хԝә дьтьрсийан, Йаһоԝа һәстед ԝан фәʹм дькьр. Әԝи готә ԝан кӧ йе дәсте хԝә бьдә ԝан, дәсте хԝә дьдә бибока чʹәʹве ԝи (Зәкәрйа 2:8). Чаԝа кӧ һʹьзкьрьна де һәйә һьндава зарʹа, ӧса жи һʹьзкьрьна Йаһоԝа һәйә һьндава ԛӧльхкʹаред ԝи у әԝ дьхԝазә али ԝан бькә (Ишайа 49:15). Чахе әм мәрьва фәʹм дькьн кӧ әԝана чь тʹәхмин дькьн, у хԝә дьдьнә дәԝса ԝан, бь ԝе йәке әм  һʹьзкьрьнеда чʹәʹв дьдьнә Йаһоԝа (Зәбур 103:13, 14).

3. Иса ча бу һьндава мәрийа?

³ Иса чахе тәнгасийа мәрьва дьдит, әԝи рʹьнд һʹале ԝан фәʹм дькьр, рʹаст ә әԝ тʹӧ щар дәрәща ԝанда жи нибу. Мәсәлә, әԝи заньбу кӧ әʹмьре гәләк мәрьва чәтьн бу. Сәрԝеред религийайе әԝана дьхапандьн у гәләк ԛанунед ӧса чедькьрьн, кӧ нә жь Хԝәде бун. Мәрьв жь сәрԝеред религийайе дьтьрсийан (Мәтта 23:4; Марԛос 7:1-5; Йуһʹәнна 7:13). Рʹаст ә Иса жь ԝан нәдьтьрсийа у тʹӧ щар дәрәԝед ԝан баԝәр нәдькьр, ле йәкә әԝи дькарьбу һәстед мәрьва фәʹм кә. Дьле Иса дешийа чахе әԝи дьдит, кӧ әԝана һьндава мәрьва чь щурʹәйи нә. Мәрьв беаликʹари бун, чаԝа «пәзе бе шьван» (Мәтта 9:36). Иса жь Баве хԝә һин бу мәрьва һʹьз бькә у «дьлован у кʹәрәмдар» бә (Зәбур 103:8).

4. Чахе Иса дьдит кӧ мәрьв тәнгасийеда ньн, әԝи чь дькьр?

⁴ Чахе Иса дьдит кӧ мәрьв дьчәрчьрьн, али ԝан дькьр чьмки әԝи әԝана һʹьз дькьрьн. Әԝ хут мина Баве хԝә бу. Мәсәлә, щарәке Иса у шагьртед ԝи паши даннасинкьрьна рʹийа дьреж, ԝәстийайи бун у дьхԝастьн кӧ щики бьвиньн һеса бьн. Ле Иса гәләк мәрьв дитьн кӧ һивийа ԝи бун. Әԝи фәʹм дькьр кӧ ԝанарʹа аликʹарийа ԝи лазьм ә, у рʹаст ә әԝ гәләк вәстийайи бу, әԝи «дәстпекьр гәләк тьшт әԝ һин кьрьн» (Марԛос 6:30, 31, 34).

5, 6. Һәрге әм дьхԝазьн мина Йаһоԝа бь һʹьзкьрьн бьн, әм чь гәрәке бькьн? Мәсәләке бинә. (Бьньһерʹьн шькьле әʹԝльн.)

⁵ Әм чь гәрәке бькьн һәрге әм дьхԝазьн мина Йаһоԝа бь һʹьзкьрьн бьн? Бьфькьрә дәрһәԛа ве дәрәще. Бьраки щаһьл наве ԝи Алан ә. Әԝ дьшьрмиш дьбә дәрһәԛа бьраки әʹмьрда мәзьн кӧ чәтьн рʹе дьчә у чʹәʹвада бәләнгаз ә. Алан дьшьрмиш дьбә сәр ван гьлийед Иса: «Чаԝа һун дьхԝазьн мәрьв бона ԝә бькьн, һун жи ӧса ԝанрʹа бькьн» (Луԛа 6:31). Паше Алан пьрсе дьдә хԝә: «Әз чь дьхԝазьм мәрьв бона мьн бькьн?» Әԝ дьфькьрә: «Мәсәлә, әз дьхԝазьм ԝәки тʹәви мьн тʹоп бьлизьн». Ле әԝ бьре әʹмьрда мәзьн нькарә бьрʹәвә у тʹоп бьлизә. Демәк, ԝе рʹаст бә һәрге Алан пьрса ӧса бьдә хԝә: «Һәрге әз дәԝса ԝи бьре әʹмьрда мәзьн бума, мьне чь бьхԝаста ԝәки мәрьва бона мьн бькьрана?»

⁶ Рʹаст ә Алан һе щаһьл ә, ле әԝ дьхәбьтә ԝәки бьдә бәр чʹәʹве хԝә, кӧ әԝ ԝе чаԝа буйа һәрге әʹмьрда мәзьн буйа. Әԝ ԝәʹде хԝә хәрщ дькә сәр ԝи бьре әʹмьрда мәзьн, у рʹьнд гӧһе хԝә дьде чахе әԝ хәбәр дьдә. Паше әԝ ида фәʹм дькә кӧ ԝи бьрайирʹа чәтьн ә Кʹьтеба Пироз бьхунә у мал бь мал даннасин кә. Алан дьвинә кӧ әԝ ча дькарә али ԝи бьрайи бькә, у дьхԝазә аликʹарийе бьдә ԝи кӧ чьԛаси дькарә. Һәгәр әм жи һәстед мәрьва фәʹм бькьн у һʹьзкьрьне бьдьнә кʹьфше, әме чʹәʹв бьдьнә Йаһоԝа (1 Корьнтʹи 12:26).

7. Әм ча дькарьн хушк у бьра фәʹм бькьн кӧ әԝана чь һʹалида ньн?

⁷ Һеса нинә ԝәки әм фәʹм кьн мәрьв чь һʹалида ньн, илаһи һәрге әм хԝәха рʹасти ԝе чәтьнайе нәһатьнә. Мәсәлә, гәләк хушк у бьред мә еше дькʹьшиньн чьмки нәхԝәш ьн, йан зийан стандьнә, йан жи кал-пир дьбьн. Һьнәк жи тәйах дькьн бәр депресйайе, йан жи һәртʹьм паникеда ньн, йан жи бәреда рʹасти зорбәтийе һатьнә. Һьнәк зарʹед хԝә тʹәне хԝәй дькьн. Малбәта һьнәкада жи нәфәред мале Шәʹдед Йаһоԝа ниньн. Проблемед һәр кәси һәнә, у һʹәчʹи зәʹф жь ԝан проблема нә мина проблемед мәнә. Ле әм ча дькарьн һʹьзкьрьне нишан кьн у али ԝан хушк у бьра бькьн? Һәр кәсәкирʹа аликʹари бь щурʹәки майин лазьм ә. Демәк һәрге әм рʹьнд гӧһ бьдьнә ԝан у бьхәбьтьн кӧ һәстед ԝан фәʹм кьн, әме һе баш бьзаньбьн кӧ чь щурʹәйи али ԝан бькьн. Һьн жи әм дькарьн биньнә бира ԝан кӧ ча Йаһоԝа сәр проблемед ԝан дьньһерʹә.  Йан жи әм дькарьн аликʹарийе бь щурʹәки майин бьдьнә ԝан. Һәрге әм ӧса дькьн, әм чʹәʹв дьдьнә Йаһоԝа. (Бьхунә Рʹомайи 12:15; 1 Пәтрус 3:8).

8. Чь али Иса кьр кӧ һʹәйф бу?

⁸ Йаһоԝа һьндава һʹәму мәрьва ԛәнщ ә (Луԛа 6:35). У Иса жи мина Баве хԝә һʹәйф бу. Ле чь али Иса кьр кӧ әԝ һʹәйф бу һьндава мәрийа, чахе сәр әʹрде бу? Әԝ дьшьрмиш дьбу кӧ гьлийед ԝи йан кьред ԝи, ԝе ча һʹӧкӧм бьн сәр мәрьва. Мәсәлә, жьнәкә кӧ гәләк хьраби дькьр һатә бал Иса, у ӧса дьгьрийа кӧ һесьред ԝе дьрʹьжийанә сәр ньгед Иса. Иса дит кӧ әԝ жьньк гәләк бәрхԝәдькʹәвә жь бо кьред хԝәйә хьраб, у дит ԝәки әԝ пʹошман буйә. Иса фәʹм дькьр кӧ һәрге һьндава ԝе һʹәйф нибә, жьньк ԝе һе хьраб хԝә тʹәхмин кә. Ләма әԝи пʹайе жьньке да бона ван кьред баш, у бахшандә ԝе. Һьн жи Иса тʹәви ԝи Ферьси жи нәрм хәбәр да, кʹижани хԝәш нәһат кӧ Иса һьндава ԝе жьньке ча бу (Луԛа 7:36-48).

9. Чь дькарә али мә бькә ԝәки әм мина Йаһоԝа һʹәйф бьн? Мәсәле биньн.

⁹ Әм ча дькарьн мина Йаһоԝа һʹәйф бьн? Пешийа кӧ тьштәки бькьн йан бежьн әм гәрәке дьшьрмиш бьн. Ӧса әме бь ԛәдьр бьн тʹәви мәрьва у дьле ԝана нәешиньн. Паԝлос гот ԝәки Мәсиһи гәрәке шәрʹа нәкә, ле «һьндава һʹәмуйада бәрбьһер бә» (2 Тимотʹейо 2:24). Мәсәлә, дьшьрмиш бә тӧ ча дькари һʹәйф би дь ван дәрәщада: Һәрге мәзьне хәбате тә, хәбата хԝә рʹьнд накә, тӧйе ча хԝә бьди кʹьфше? Һәрге бьра гәләк ԝәхт нәдьһатә сәр щьвате у һат, те жерʹа чь бежи? Һәрге тӧ даннасин дьки у хԝәйе мале тәрʹа дьбежә кӧ ԝәʹде ԝи тʹӧнә йә, тӧ ча дькари һʹәйф би һьндава ԝи? Һәрге жьна тә жь тә дьпьрсә кӧ тә чьрʹа жерʹа нә готийә кӧ тә чь сафи кьрийә, тӧйе тʹәви ԝе нәрм хәбәрди? Әм гәрәке бьдьн бәр чʹәʹве хԝә һәстед мәрьва у дьшьрмиш бьн кӧ гьлийед мә ԝе ча сәр ԝана һʹӧкӧм бьн. У паше әме бьзаньбьн чь бькьн йан чь бежьн, ԝәки мина Йаһоԝа һʹәйф бьн. (Бьхунә Мәтʹәлок 15:28.)

10, 11. Әм ча дькарьн биланийе жь Йаһоԝа һин бьн? Мәсәле биньн.

¹⁰  Йаһоԝа гәләк билан ә, у әԝ дькарә бьвинә кӧ чь ԝе бьԛәԝьмә ахьрийеда. Рʹаст ә әм ньзаньн кӧ ахьрийеда чь ԝе бьԛәԝьмә, ле әм жи дькарьн билан бьн. Ле чаԝа? Пешийа кӧ әм тьштәки сафи кьн, әм дькарьн бьдьнә бәр чʹәʹве хԝә кӧ әԝ сафикьрьн ча дькарә сәр мә у мәрьвед дьн һʹӧкӧм бә. Әм гәрәке чʹәʹв нәдьнә Исраелийа. Чьмки әԝана дьшьрмиш нәдьбун кӧ ԝе чь бьԛәԝьмә һәрге әԝана гӧрʹа Йаһоԝа нәкьн. У әԝана дьшьрмиш нәдьбун дәрһәԛа һәләԛәтийа хԝә тʹәви Хԝәде, у ӧса жи дәрһәԛа һʹәму ԝан тьшти, чь кӧ әԝи бона ԝан кьрьбу. Муса фәʹм дькьр у заньбу кӧ Исраели пәй хьрабийе дьчьн. Әԝи готә ԝан: «Чьмки исраел мьләтәки чәлԛйайи йә, фәʹме ԝи тʹӧнә йә. Һәгәр әԝ сәрԝахт буна әԝ йәк ԝе тедәрхьстана, ԝане фәʹм бькьра чь ԝе бе сәре ԝана» (Ԛануна Дӧщари 31:29, 30; 32:28, 29, ПʹКМ).

¹¹ Мәсәлә, һәрге тӧ рʹасти кәсәки тейи, бира хԝәда хԝәй кә, кӧ чахе мәрьв кәсәки бәгәм дькә, гәләк чәтьн ә һәстед хԝә у хԝәстьнед сексуали контрол кә. Ләма жи, зәʹф фәсал бә кӧ тьштәки ӧса нәки, ԝәки зийане бьдә һәләԛәтийа тәйә ԛимәт  тʹәви Йаһоԝа! Дәԝсе билан бә у жь тʹәлька бьрʹәвә. Гӧһ бьдә ширәта Йаһоԝайә билани кӧ дь мәтʹәлокеда ньвисар ә, ԝәки мәрьве сәрԝахт чахе хәтайе дьвинә, хԝә вәдьшерә, ле мәрьве нәщерʹьбанди пешда дьчә у дькʹәвә хәтайе (Мәтʹәлок 22:3).

12. Фькьред мә ча дькарьн зийане бьдьнә мә?

¹² Мәрьве билан фькьред хԝә контрол дькә. Чаԝа кӧ агьр дькарә йан кʹаре бьдә мә йан жи зийане, ӧса жи фькьред мә дькарьн йан али мә бькьн, йан жи зийане бьдьнә мә. Чахе әм агьр фәсал дьдьнә хәбате, әԝ дькарьн кʹаре бьстиньн, мәсәлә хԝарьне чекьн. Ле һәрге әм фәсал ниньн, агьр дькарә мала мә бьшәԝьтинә у мә бькӧжә. Ӧса жи фькьред мә. Чахе әм дьфькьрьн дәрһәԛа ԝан тьшта, чь кӧ әм жь Йаһоԝа һин дьбьн, әԝ йәк гәләк кʹар ә бона мә. Ле һәрге әм дәрһәԛа бенамусийе дьфькьрьн, у дьдьнә бәр чʹәʹве хԝә кӧ әм тьштед хьраб дькьн, ахьрийеда әме әԝан тьшта ӧса бьхԝазьн кӧ нькарьбьн нәкьн. У ӧса әм дькарьн һәләԛәтийа хԝә тʹәви Йаһоԝа ӧнда кьн. (Бьхунә Аԛуб 1:14, 15.)

13. Һеԝа дәрһәԛа әʹмьре хԝә чь дьшьрмиш дьбу?

¹³ Әм дькарьн жь Һеԝайе жьна пешьн, хԝәрʹа дәрсе һьлдьн. Йаһоԝа фәрман да Адәм у Һеԝайе ԝәки емиш «жь дара ԛәнщи у хьраби» нәхԝьн (Дәстпебун 2:16, 17, ПКʹМ). Ле Шәйтʹан готә Һеԝайе: «На, һун тʹӧ щар намьрьн, ле Хԝәде занә, ԝе рʹожа гава һун жь ԝе бьхԝьн, чʹәʹвед ԝәйе вәбьн у бьбьнә мина Хԝәде, ԛәнщи у хьрабийе жь һәв дәрхьн». Һеԝайе дьда бәр чʹәʹве хԝә, кӧ ԝе әʹмьре ԝе гәләк баш бә, һәрге әԝ хԝәха бькарьбә сафи кә чь ԛәнщ ә у чь хьраб ә. Һеԝайе бәрдәԝан дькьр дьшьрмиш бә дәрһәԛа ве йәке у «дина хԝә дайе ԝәки бәре даре баш бу бона хԝарьне, бәрбьчʹәʹвә һʹәԝаскʹар у дьлһавьжи бу». Паше чь ԛәԝьми? Һеԝа «дәст авитә бәре ԝе хԝар у да мере тʹәви хԝә, әԝи жи хԝар» (Дәстпебун 3:1-6, ПКʹМ). Ахьрийеда, «гӧнә кʹәтә дьне у жь гӧнә жи мьрьн һат» (Рʹомайи 5:12). Гәрәке Һеԝайе бәрдәԝан нәкьра дьшьрмиш бә, кӧ тьштәки ӧса бькә чь кӧ нәрʹаст бу!

14. Кʹьтеба Пироз дәрһәԛа бенамусийе пешда чь тʹәмийе дьдә?

¹⁴ Рʹаст ә гӧне Һеԝайе бенамуси нибу. Ле Кʹьтеба Пироз зәлал мәрʹа әʹйан дькә, ԝәки әм гәрәке нәдьнә бәр чʹәʹве хԝә кӧ тьштәки бенамуси дькьн. Иса гот: «Кʹи бь тәме хьраб жьнәке бьньһерʹә, әԝи дьле хԝәда иди тʹәви ԝе зьнекʹари кьр» (Мәтта 5:28). Ӧса жи Паԝлос ширәт да: «Гӧһ нәдьнә ԝан хԝәстьнед бьнйатʹа хԝәйә мәрьвайи» (Рʹомайи 13:14).

15. Әм гәрәке дина хԝә бьдьнә сәр кʹижан хәлате, у чьрʹа?

¹⁵ Кʹьтеба Пироз ӧса жи мәрʹа дьбежә кӧ әм гәрәке дина хԝә бьдьнә ԝе йәке кӧ ча дьле Йаһоԝа ша кьн, нә кӧ дьшьрмиш бьн кӧ ча дәԝләти бьн. Һәбуна мәрьве дәԝләти, тʹӧ щар нькарә бь рʹастийе ԝи хԝәй кә (Мәтʹәлок 18:11). Иса гот ԝәки мәрьве кӧ хԝәрʹа хьзне тʹоп дькә, ле  Хԝәде данайнә щийе пешийе әʹмьре хԝәда, әԝ мәрьв беаԛьл ә. Әԝ мәрьв «дь чʹәʹве Хԝәдеда нә дәԝләмәнд ә» (Луԛа 12:16-21, ИМ). Чахе әм «хьзне хԝәрʹа ль әʹзмен» тʹоп дькьн, бь кьред дьле Йаһоԝа хԝәш те, әԝ гәләк ша дьбә, у әм жи бәхтәԝар ьн (Мәтта 6:20; Мәтʹәлок 27:11). Демәк һәләԛәтийа баш тʹәви Йаһоԝа һе гәләк ԛимәт ә нә кӧ тьштәки дьн.

16. Чахе әм дәрһәԛа тьштәки хәм дькьн, чь дькарә али мә бькә?

¹⁶ Һәрге әм дьхԝазьн ве дьнеда дәԝләти бьн, ԝе гәләк хәмед мә һәбьн (Мәтта 6:19). Иса гот кӧ ԝанарʹа ԝе чәтьн бә, йед кӧ тʹьме дәрһәԛа пʹәра хәм дькьн, Пʹадшатийа Хԝәде дайньн щийе пешьн әʹмьре хԝәда (Мәтта 13:18, 19, 22). Ӧса жи һьнә мәрьв тʹьме дьшьрмиш дьбьн кӧ дьбәкә тьштед хьраб бе сәре ԝан. Ле һәрге әм бәрдәԝан кьн ӧса бьфькьрьн, әм дькарьн нәхԝәшкʹәвьн у һәла баԝәрийа хԝә жи һьндава Йаһоԝа һеди-һеди ӧнда кьн. Дәԝсе әм гәрәке итʹбарийа хԝә Йаһоԝа биньн кӧ әԝ ԝе али мә бькә. Кʹьтеба Пироз дьбежә кӧ «дьле бь хәм мьров дьхинә [дьшкенә], ле бәле готьна хԝәш кʹефхԝәш дькә» (Мәтʹәлок 12:25). Һәрге тӧ дәрһәԛа тьштәки хәм дьки, дьле хԝә ԛӧльхкʹарәки Йаһоԝарʹа вәкә, кʹижан кӧ тә рʹьнд нас дькә. Де йан бав, мере тә йан жьна тә, йан жи һәвале баш дькарә тә дьлгәрм кә, ԝәки тӧ баԝәрийа хԝә Йаһоԝа бини, у ԝе али тә бькә кӧ һе кем хәм бьки.

17. Ча Йаһоԝа дькарә али мә бькә чахе әм бәрхԝәдькʹәвьн?

¹⁷ Йаһоԝа һе рʹьнд һәстед мә занә, нә кӧ кәсәки дьн. У чахе әм хәм дькьн, әԝ дькарә али мә бькә ԝәки әм дьлрʹьһʹәт бьн. Паԝлос ньвиси: «Бона тʹӧ тьшти хәм нәкьн, ле хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә» (Филипи 4:6, 7). Демәк чахе тӧ хәм дьки, бьфькьрә дәрһәԛа аликʹарийа кӧ Йаһоԝа дьдә тә, ԝәки һәләԛәтийа хԝә тʹәви ԝи ԛәԝи хԝәй ки. Мәсәлә әԝ аликʹарийе дьдә тә бь хушк у бьра, рʹуспийа, хӧламе амьн, мьлйакʹәта, ӧса жи бь Иса.

18. Ча әԝ фәрәсәте мә кӧ әм дькарьн тьшта бьдьнә бәр чʹәʹве хԝә дькарә али мә бькә?

¹⁸ Чаԝа кӧ әм пеһʹәсийан, чахе әм фәрәсәте ӧса дьдьнә хәбате кӧ һәстед мәрийа фәʹм кьн, әм чʹәʹв дьдьнә Йаһоԝа (1 Тимотʹейо 1:11; 1 Йуһʹәнна 4:8). Әме бәхтәԝар бьн һәрге һʹьзкьрьне у ԛәнщийе мәрийарʹа нишан кьн, һәрге дәрһәԛа ахьрийа кьред хԝә дьшьрмиш бьн, у һәрге әм бьхәбьтьн кӧ хәма нәкьн. Ԝәрен әм тʹьме бьдьнә бәр чʹәʹве хԝә кӧ әʹмьре мә ԝе чь щурʹәйи бә бьн сәрԝертийа Пʹадшатийеда, у һʹәму тьшти бькьн ԝәки чʹәʹв бьдьнә Хԝәдайе хԝә Йаһоԝа (Рʹомайи 12:12).