1-3. Чьрʹа хушкәкә мә баԝәр бу кӧ Йаһоԝа заньбу чь ԝерʹа лазьм бу?

 ЛАНА, пешәнга һәртʹьм ә. Әԝ дьбежә кӧ әԝ тʹӧ щар ԝе бир нәкә, кӧ чь ԛәԝьми чахе сала 2012-да әԝ ль Алманйайе бу. Әԝе тʹәхмин кьр, кӧ чаԝа Йаһоԝа щаба дӧ дӧайед ԝе да. Чахе әԝ тʹьренеда бу, кʹижан кӧ дьчу аеропорте, әԝе Йаһоԝарʹа дӧа кьр, ԝәки али ԝе бькә кӧ кәсәкирʹа даннасин кә. Чахе әԝ гьһиштә аеропорте әԝ пеһʹәсийа, кӧ ԝәʹде фьрине гӧһастьнә сәр рʹожа дьн. Ланайе диса Йаһоԝарʹа дӧа кьр, ԝәки али ԝе бькә, чьмки әԝе пʹәре хԝә гәләк хәрщ кьрьбу, ле ԝерʹа лазьм бу шәв щики бьминә.

² Чахе Ланайе дӧакьрьн хьлаз кьр, дәрберʹа әԝе дәнг бьһист: «Рʹож баш Лана, тӧ ль ԝьр чь дьхԝази?» Әԝ мерәки щаһьл бу, кʹижан кӧ тʹәви Ланайе мәкʹтәбеда һин бьбу. Пирьк у дийа ԝи жи тʹәви ԝи бун, у ԝана әԝ вәрʹедькьрьн, чьмки әԝ дьчу ль Африкайа Башуре. Чахе Ланайе һʹале хԝә ԝанарʹа гьли кьр, де у пирька ԝи мерьки әԝ тʹәглиф кьрьн, ԝәки мала ԝанда бьминә. Малда ԝана гәләк пьрс дьданә ԝе дәрһәԛа баԝәрбун у даннасинкьрьна ԝе.

³ Рʹожа дьн шәбәԛе, паши нанхԝарьне, Ланайе һе гәләк щаба пьрсед ԝанә Кʹьтеба Пирозва гьредайи да. Ланайе  информасийона ԝан һьлда, кӧ бькарьбә диса ԝанрʹа хәбәрдә, ԝәки әԝана һе зедә щабед пьрсед хԝә бьстиньн. Лана сах-сьламәт гьһиштә мала хԝә, у әԝ ньһа жи пешәнг ә. Әԝе гәләк рʹьнд тʹәхмин кьр, кӧ Йаһоԝа дӧайед ԝе бьһист. Йаһоԝа заньбу чь ԝерʹа лазьм ә, у али ԝе кьр (Зәбур 65:2).

4. Дь ве тʹемайеда әме чь пебьһʹәсьн?

⁴ Чахе ньшкева әм рʹасти проблема тен, әм һеса дькарьн дӧа бькьн ԝәки Йаһоԝа али мә бькә. У әԝ ша дьбә чахе дӧайед мә дьбьһе (Зәбур 34:15; Мәтʹәлок 15:8). Ле дӧакьрьна Иса мә һин дькә, ԝәки һе зедә тьштед фәрз һәнә, дәрһәԛа чь жи әм гәрәке дӧа бькьн. Дь ве тʹемайеда, әме пебьһʹәсьн чар хԝәстьнед пашьн дӧакьрьна Исада, кʹижан кӧ дькарьн али мә бькьн кӧ амьн бьн Йаһоԝарʹа. (Бьхунә Мәтта 6:11-13.)

5, 6. Чьрʹа Иса әм һинкьрьн ԝәки әм дәрһәԛа «нане мәйи» дӧа бькьн, һәла һе чахе хԝарьна мә тʹер-тʹьжә йә жи?

⁵ Иса әм һин кьрьн кӧ әм дӧа бькьн бона «нане мәйи», нә кӧ «нане мьн». Виктор, бәрпьрсийаред мьһале жь Африкайе дьбежә: «Әз тʹьме жь Йаһоԝа рʹази мә, ԝәки әз у жьна мьн гәләк хәм накьн, кӧ кʹидәре рʹожа дьн әм хԝарьне бьхԝьн, у нә жи хәм дькьн бона пʹәре кʹьре. Чьмки хушк-бьред мә бь дьл у щан дәрһәԛа мә хәм дькьн. Ле әз дӧа дькьм, сәва йед кӧ али мә дькьн, бькарьбьн проблемед хԝә пʹәрәва гьредайи сафи кьн».

⁶ Дьбәк хԝарьна мә тʹер-тʹьжә йә, ле гәләк хушк-бьред мә кʹәсиб ьн. Ӧса жи һьнәк кʹәтьнә ԛәзийе у тәнгасийе. Ләма жи әм нә кӧ тʹәне гәрәке бона ԝан дӧа бькьн, ле ӧса жи чьԛас дькарьн али ԝан бькьн. Мәсәлә әм дькарьн пʹәрә ԛӧрбан кьн бона шьхӧле щьмәʹта Йаһоԝайә һʹәмдьнйайе. Әм заньн кӧ әԝ ԛӧрбанкьрьна пʹәра, али хушк-бьред мә дькә, кʹе һʹәԝщә нә (1 Йуһʹәнна 3:17).

7. Иса ча әм һинкьрьн ԝәки әм «бона рʹожа сьбе хәма нәкьн»?

⁷ Паши ԝе йәке чахе Иса дӧакьрьн һин кьр, әԝи һин кьр ԝәки әм дәрһәԛа тьштед материали гәләк хәм нәкьн. Әԝи гот кӧ, һәрге Йаһоԝа һәла һе дәрһәԛа гиһайе чоле жи хәм дькә, «чьԛас зедә ԝе ль ԝә кә, кембаԝәрно? Иди хәм нәкьн у нәбежьн, . . . ‹Чь ль хԝә кьн?›» Паше Иса диса ԝәкʹьланд у гот: «Бона рʹожа сьбе хәма нәкьн» (Мәтта 6:30-34). Демәк әм дьвиньн ԝәки мәрʹа нәлазьм ә, бона һʹәԝщед ахьрийе дьшьрмиш бьн у хәм бькьн. Дәԝсе, әм гәрәке дәрһәԛа һʹәԝщед һәр рʹожи хәм бькьн. Мәсәлә, әм дькарьн дӧа бькьн ԝәки щи-сьтʹара мә һәбә, хәбата мә һәбә ԝәки малбәта хԝә хԝәй кьн, у дәрһәԛа биланийе, сәва кӧ сафикьрьнед баш бькьн бона сьһʹәт-ԛәԝата хԝә. Ле диса һәнә тьштед һе гәләк фәрз, дәрһәԛа чь жи әм гәрәке дӧа бькьн.

8. Гьлийед Иса дәрһәԛа нане һәр рʹожи чь тиньнә бира мә? (Бьньһерʹьн шькьле әʹԝльн.)

⁸ Гьлийед Иса дәрһәԛа нане һәр рʹожи, тиньнә бира мә, дәрһәԛа гьлийед ԝийә дьн чахе гот: «Инсан тʹәне бь нен нажи, ле бь һәр хәбәра кӧ жь дәве Хԝәде дәрдькʹәвә» (Мәтта 4:4). Демәк, әм гәрәке ӧса жи дӧа бькьн, кӧ Йаһоԝа тʹьме мә һин кә, у али мә бькә сәвә кӧ бәрдәԝан кьн незики ԝи бьн.

9. Чьрʹа гӧнед мә мина дәйн ьн?

⁹ Иса гот: «Дәйнед мә бьбахшинә». Ле щаркә дьн әԝи ӧса гот: «Гӧнед мә бьбахшинә» (Мәтта 6:12; Луԛа 11:4). Әԝи ӧса гот чьмки гӧне мә мина дәйн ә. Дь «Бьрща Ԛәрәԝьлийеда» йа сала 1951- да,  һатьбу шьровәкьрьне, кӧ чахе әм гӧнә дькьн, әԝ мина ԝе йәке йә, кӧ ча әм дьбьнә дәйндаред Йаһоԝа. Әм борщдар ьн һʹьзкьрьна хԝә һьндава Йаһоԝа бьдьнә кʹьфше, бь ԝе йәке кӧ әм гӧрʹа ԝи бькьн. Ле чахе әм гӧрʹа Йаһоԝа накьн, әм борще хԝә наԛәдиньн, у дьбьнә дәйндаре ԝи. «Бьрща Ԛәрәԝьлийеда» һатә готьне кӧ һәрге Йаһоԝа бьхԝаста, әԝи ԝе һеса бькарьбуйа достийа мә тʹәви хԝә бьбьрʹийа. У ӧса жи ньвисар ә: «Гӧнә әԝ һәйә нәһʹьзкьрьн һьндава Йаһоԝа» (1 Йуһʹәнна 5:3).

10. Йаһоԝа ча дькарә гӧнед мә бьбахшинә, у әм ча гәрәке хԝә бьдьнә кʹьфше?

¹⁰ Әм чьԛас жь Йаһоԝа рʹази нә, ԝәки әԝи кӧрʹе хԝә кьрә ԛӧрбан, сәва бахшандьна гӧнед мә! Бахшандьна Йаһоԝа мәрʹа һәр рʹож лазьм ә. Рʹаст ә Иса ԝәкә 2 000 сал пешда бу ԛӧрбан, ле йәкә ԛӧрбанбуйина ԝи иро жи мәрʹа кʹаре тинә. Ләма жи әм тʹьме гәрәке жь Йаһоԝа рʹази бьн бона ве пʹешкʹеша ԛимәт. Тʹӧ кәс жь мә, тʹӧ щар ԝе нькарьбуйа кʹьрʹинәкә ӧса бьда, кʹижан кӧ лазьм ә сәва әм жь гӧнә у мьрьне аза бьн. (Бьхунә Зәбур 49:7-9; 1 Пәтрус 1:18, 19.) Дӧакьрьна Исада гьлийед «гӧнед мә бьбахшинә», мәрʹа дьдьнә кʹьфше кӧ чаԝа әм һʹәԝще ԝе кʹьрʹине нә, ӧса жи хушк-бьред мә. Ләма жи Йаһоԝа дьхԝазә кӧ әм дәрһәԛа хушк-бьред хԝә жи дьшьрмиш бьн, у дәрһәԛа һәләԛәтийа ԝан тʹәви Хԝәде. Һьн жи әм гәрәке дәрһәԛа ԝан хушк у бьра жи дьшьрмиш бьн, йед кӧ әм данә хәйдандьне, у дәрберʹа бьбахшиньнә ԝан. Гәләк щар мә тьштед бьчʹукда дьдьнә хәйдандьне, ле чахе әм дьбахшиньнә ԝан, әм избат дькьн кӧ әм ԝана һʹьз дькьн. У ӧса жи избат дькьн, кӧ әм дьшекьриньн бахшандьна Йаһоԝа (Колоси 3:13).

11. Чьрʹа гәләк фәрз ә бьбахшиньнә мәрьва?

¹¹ Жь бо ԝе йәке кӧ әм гӧнәкʹар ьн, щара дькарә мәрʹа чәтьн бә бьбахшиньн (Ԛануна Кʹаһинтийе 19:18). Һәрге дь щьватеда әм хәбәрдьдьн сәр ԝан йед кӧ әм данә хәйдандьне, хушк-бьра ԝе дәстпекьн алийе кәсәки бьгьрьн, у ахьрийеда әв йәк ԝе һʹӧкӧм бә сәр тʹьфаԛийа щьвате. Һәрге әм бәрдәԝан кьн ӧса  бькьн, әм дьдьнә кʹьфше кӧ әм пʹешкʹеша Хԝәде, демәк ԛӧрбане у бахшандьна ԝи ԛимәт накьн (Мәтта 18:35). Чахе әм нәбахшиньнә кәсәки, Йаһоԝа жи ԝе нькарьбә бьбахшинә мә. (Бьхунә Мәтта 6:14, 15.) Ӧса жи һәрге әм дьхԝазьн кӧ Йаһоԝа бьбахшинә мә, әм гәрәке һʹәму тьштед ӧса накьн чь кӧ бәр чʹәʹве ԝи рʹәш ьн (1 Йуһʹәнна 3:4, 6).

12, 13. а) Чь ԛәԝьми паши чахе Иса һатә ньхӧмандьне? б) Чьрʹа әм гәрәке йед дьн нәһәԛ нәкьн, һәрге әм гӧнә бькьн? в) Әԝ кӧ Иса һʹәта мьрьне амьн ма, пе ԝе йәке әԝи чь избат кьр?

¹²  Жь дӧакьрьна Иса әԝ гьли «Мә нәбә щерʹьбандьне», тинә бира мә кӧ чь ԛәԝьми һьнәк ԝәʹдә шунда, чахе Иса һатә ньхӧмандьне. Кʹьтеба Пироз дьбежә кӧ рʹӧһʹ Иса бьрә бәʹрийе, сәва «жь Мирещьн бе щерʹьбандьне» (Мәтта 4:1; 6:13). Ле гәло чьрʹа Йаһоԝа һишт кӧ әԝ йәк бьԛәԝьмә? Йаһоԝа Иса шандә ль сәр әʹрде сәва кӧ пьрсәк бе сафикьрьне, у әԝ пьрс пешда һат, чахе Адәм у Һеԝайе сәрԝертийа Йаһоԝа ԛәбул нәкьрьн. Нәԛәбулкьрьна ԝана пьрсед ӧса пешда анин, кʹижанарʹа ԝәхт лазьм бу ԝәки щаб бе дайине. Мәсәлә: Гәло Йаһоԝа мәрьв нәрʹаст әʹфьранд? Мәрьве ԛәданди дькарьбу амьн бьма Йаһоԝарʹа, чахе «жь йе хьраб» бьһата щерʹьбандьне? Гәло ԝе һе баш нибуйа, һәрге мәрьва хԝәха сәр хԝә сәрԝерти бькьрана? (Дәстпебун 3:4, 5) Ахьрийеда, чахе сәр ԝан пьрса щаб һәбьн, һʹәмушк ль әʹзмана у сәр әʹрде, ԝе бьзаньбьн кӧ сәрԝертийа Йаһоԝа йа лапә баш ә.

¹³  Йаһоԝа пироз ә, ләма жи әԝ тʹӧ щар мәрьва нащерʹьбинә кӧ тьштед хьраб бькьн. Әԝ «йе кӧ дьщерʹьбинә» Шәйтʹан ә (Мәтта 4:3). У әԝ мә бь гәләк щурʹа дьщерʹьбинә. Ле әм хԝәха дькарьн бьжберʹьн, демәк сафи кьн, бькʹәвьнә тʹәлька ԝи йан на. (Бьхунә Аԛуб 1:13-15.) Чахе Шәйтʹан Иса дьщерʹьбанд, Иса дәрберʹа жь Хәбәра Хԝәде щаба ԝи дьда. Иса амьн бу Хԝәдерʹа. Ле йәкә Шәйтʹан дәсте хԝә пәйа нәкьр. Әԝ «дәмәке жь ԝи дур кʹәт», демәк һивийа мәщаләкә дьн бу, кӧ Иса бьщерʹьбинә (Луԛа 4:13). Ле Шәйтʹан чь жи дькьр, Иса тʹьме гӧрʹа Йаһоԝада бу. Хенщи ԝе йәке, Иса избат кьр кӧ мәрьве ԛәданди дькарә амьн бә Хԝәдерʹа, һәла һе щерʹьбандьнед мәзьнда жи. Ле хенщи Иса, Шәйтʹан дьхԝазә пәйчуйед ԝи бьщерʹьбинә, демәк тә жи, ԝәки гӧрʹа Йаһоԝа нәки.

14. Чь мәрʹа лазьм ә ԝәки нәкʹәвьнә щерʹьбандьна?

¹⁴  Щабед сәр пьрсед дәрһәԛа сәрԝертийа Йаһоԝа, гәрәке һе диса бенә дайине. Ньһа Йаһоԝа һе дьһелә, кӧ Шәйтʹан мә бьщерʹьбинә. Ле Йаһоԝа хԝәха тʹӧ щар ԝе «мә нәбә щерʹьбандьне». Чьмки, әԝ бь рʹастийе жи баԝәр ә, кӧ әм дькарьн ԝирʹа амьн бьминьн, у һьн жи әԝ дьхԝазә али мә бькә. Әԝ зоре накә сәр мә, ԝәки әм тьштед рʹаст бькьн. Әԝ ԛәдьре жьбартьна мә дьгьрә. Демәк, әԝ мәрʹа изьне дьдә кӧ әм хԝәха сафи кьн, ԝирʹа амьн бьминьн йан на. Һәгәр әм дьхԝазьн нәкʹәвьнә щерʹьбандьна, мәрʹа дӧ тьшт лазьм ьн: хԝә ль Йаһоԝа бьгьрьн у тʹьме дӧа бькьн ԝәки әԝ али мә бькә. Ле Йаһоԝа щаба дӧайед мә дьдә?

15, 16. а) Кʹижан щурʹә тʹәлькед Шәйтʹан һәнә? б) Һәрге әм бькʹәвьнә щерʹьбандьне, кʹе йә нәһәԛ?

¹⁵  Йаһоԝа рʹӧһʹе хԝәйи пироз дьдә мә, ԝәки али мә бькә кӧ әм нәкʹәвьнә тʹәлькед Шәйтʹан. Әԝ бь Кʹьтеба Пироз у щьвата, пешда әʹлами мә дькә,  дәрһәԛа тʹәлькед Шәйтʹан. Мәсәлә, әԝ пешда дьбежә, кӧ әм гәрәке гәләк ԝәʹдә, пʹәрә, у ԛәԝата хԝә хәрщ нәкьн, сәр тьштед кӧ мәрʹа бь рʹастийе нә лазьм ьн. Еспен у Йана дьжин дь ԝәлате Әԝропайе дәԝләмәндда. Ԝана гәләк сал чаԝа пешәнг ԛӧльх дькьрьн, ль щийе кӧ һʹәԝщәти һәбу. Ле чахе ԝанрʹа зарʹ һатә буйине, ԝана пешәнгтийа хԝә данә сәкьнандьне, у ньһа дӧ зарʹед ԝан һәнә. Еспен дьбежә: «Әм тʹьме Йаһоԝарʹа дӧа дькьн, ԝәки нәкʹәвьнә щерʹьбандьне, чьмки әм ньһа һаԛас ԝәʹдә хәрщ накьн, чаԝа кӧ бәре мә сәр шьхӧле даннасинкьрьне хәрщ дькьр. Ләма әм жь Йаһоԝа һиви дькьн, кӧ али мә бькә, сәва әм рʹӧһʹанийа хԝә хԝәй кьн у даннасинкьрьнеда хирәт бьн».

¹⁶  Тʹәлькәкә дьн, жь кʹижани әм гәрәке бьрʹәвьн әԝ һәйә порнографиа. Һәрге әм бькʹәвьнә ве тʹәльке, әм нькарьн Шәйтʹан нәһәԛ кьн. Чьмки Шәйтʹан у дьнйа ԝи, зоре накьнә сәр мә, ԝәки әм әԝан тьшта бькьн чь кӧ хьраб ә. Һьнәк кʹәтьнә тʹәлька порнографиайе, чьмки ԝана дәрберʹа фькьред нәрʹаст жь сәре хԝә дәрнәхьстьн. Ле гәләк хушк-бьред мә, хԝә жь ве тʹәльке хԝәй кьрьнә, у әм жи дькарьн хԝә хԝәй кьн (1 Корьнтʹи 10:12, 13).

17. а) Әм ча дькарьн Йаһоԝарʹа нишан кьн, кӧ әм дьхԝазьн әԝ мә «жь йе хьраб хьлаз кә»? б) Ахьрийеда әме жь чь хьлаз бьн?

¹⁷  Әм ча дькарьн Йаһоԝарʹа нишан кьн, кӧ әм дьхԝазьн әԝ мә «жь йе хьраб хьлаз кә»? Әм гәрәке «нә пʹара дьнйайе» бьн, у ӧса жи гәрәке «дьнйайе һʹьз нәкьн, нә жи ԝан тьштед кӧ дьнйайеда нә» (Йуһʹәнна 15:19; 1 Йуһʹәнна 2:15-17). Ԝе чьԛас баш бә, чахе Йаһоԝа Шәйтʹан у әве дьнйа зӧлм кʹӧта кә! Ле һʹәта әԝ ԝәʹдә бе, әм гәрәке бира хԝәда хԝәй кьн, кӧ Шәйтʹан «жь һерсе хԝә дьхԝә, кӧ занә ԝе һьндьки бьминә». Әԝ һʹәму тьшти дькә чь кӧ дькарә, сәва кӧ әм ԛӧльхкьрьна хԝә Йаһоԝарʹа бьдьнә сәкьнандьне. Ләма жи, әм гәрәке тʹьме Йаһоԝарʹа дӧа бькьн, сәва әԝ мә жь Шәйтʹан хԝәй кә (Әʹйанти 12:12, 17).

18. Һәрге әм дьхԝазьн жь кʹӧтасийа ве дьнйайе хьлаз бьн, әм чь гәрәке бькьн?

¹⁸  Тӧ дьхԝази бьжийи ԝе дьнйайеда, кʹидәре кӧ Шәйтʹан ԝе тʹӧнә бә? Дә ԝәки ӧса нә, бәрдәԝан кә дӧа бькә ԝәки Пʹадшатийа Хԝәде бе, наве Хԝәде Пироз бә у ԝәки ԛьрара ԝи бә сәр әʹрде. Тʹьме итʹбарийа хԝә Йаһоԝа бинә, ԝәки әԝ ԝе бона тә хәм бькә у али тә бькә сәва кӧ ԝирʹа амьн бьмини. Бәле, һʹәму тьшти бькә чь кӧ дькари, сәва кӧ анәгори дӧакьрьна Иса бьжийи.