1. Чьрʹа Паԝлос гот кӧ Мәсиһ «ԛәԝата Хԝәде» йә?

 ЙАҺОԜА ԛәԝата хԝә бь Иса Мәсиһ нишан кьр. Чахе Иса ль сәр әʹрде бу, әԝи кʹәрәмәт дькьрьн. Әм дькарьн әԝан кʹәрәмәта дь Кʹьтеба Пирозда бьхуньн, у әԝ дькарьн баԝәрийа мә ԛәԝи кьн (Мәтта 9:35; Луԛа 9:11). Рʹасти жи, Йаһоԝа ԛәԝатәкә мәзьн дайә Иса, у ләма Паԝлосе шанди дькарьбу бьгота кӧ: «Мәсиһ ә, ԛәԝата Хԝәде» (1 Корьнтʹи 1:24).

2. Әм чь дькарьн жь кʹәрәмәтед Иса һин бьн?

² Әм чь һин дьбьн жь ԝан кʹәрәмәта? Әм һин дьбьн кӧ Иса ԝе чь бькә ԝәʹде Һʹәзарсалийа Пʹадшатийа хԝә. Кʹәрәмәтед ԝи ӧса жи али мә дькьн, ԝәки әм рʹьнд фәʹм кьн һʹӧнӧред ԝи у Баве ԝи. Дь ве тʹемайеда әме хәбәрдьн дәрһәԛа се кʹәрәмәтед Иса, у әме пебьһʹәсьн кӧ чаԝа әԝана дькарьн кʹаре бьдьнә мә, ча иро ӧса жи ахьрийе.

3. а) Чьрʹа Иса кʹәрәмәта пешьн кьр? б) Иса ча дь Ԛанайеда мәрʹдани нишан кьр?

³ Иса кʹәрәмәта хԝәйә пешьн шәһәре Ԛанайеда, ԝәʹде дәʹԝате кьр. Әм ньзаньн чьрʹа, ле сәр дәʹԝате шәрав кем  бу, у тʹера һʹәму мевана нәдькьр. Сәва ԝе йәке бук у зәʹва ԝе шәрми буна, чьмки ԝана гәрәке ԛәдьре мевана бьгьртана бь меванһʹьзийе. Дийа Иса Мәрйәм жи меван бу сәр ве дәʹԝате. Гәло, әԝе жь Иса аликʹари хԝаст, чьмки әԝе баԝәр дькьр, кӧ ԛәԝата ԝи һәйә кʹәрәмәта бькә? Мәрйәм дьбәк дьфькьри сәр һʹәму пʹехәмбәртийа дәрһәԛа кӧрʹе хԝә, у әԝе заньбу кӧ әԝ ԝе бе навкьрьне чаԝа «Кӧрʹе Йе Һәри Жорьн» (Луԛа 1:30-32; 2:52). Фәʹмдари йә кӧ Мәрйәме жи у Иса жи, дьхԝастьн али бук у зәʹве бькьн. Ләма Иса бь кʹәрәмәти 380 литьр ав кьрә «шәрава рʹьнд». (Бьхунә Йуһʹәнна 2:3, 6-11.) Гәло Иса борщдар бу кӧ кʹәрәмәте бькә? На. Әԝи әԝ кʹәрәмәт кьр, чьмки дәрһәԛа мәрьва хәм дькьр, у чʹәʹв дьда Баве хԝә, кʹижан кӧ мәрʹд ә.

4, 5. а) Кʹәрәмәта Исайә пешьн чь мә һин дькә? б) Кʹәрәмәта кӧ дь Ԛанайеда һатә кьрьне, дәрһәԛа ахьрийе чь мәрʹа әʹйан дькә?

⁴ Иса бь кʹәрәмәт ав кьрә шәрава баш, у шәраве кӧ тʹера гәләк мәрьва кьр. Тӧ дьвини әԝ кʹәрәмәт мә чь һин дькә? Әԝ мә һин дькә, кӧ Йаһоԝа у Иса тьма ниньн; әԝана гәләк мәрʹд ьн. Әԝ кʹәрәмәт мә дьлгәрм дькә, кӧ әԝана бона һәст у хәмед мәрийа хәм дькьн. Әԝ ӧса жи мәрʹа нишан дькә, кӧ Йаһоԝа ԝе бь ԛәԝата хԝә ӧса бькә, кӧ дьнйа тʹәзәда хԝарьн тʹер-тʹьжә һәбә. (Бьхунә Ишайа 25:6.)

⁵ Һәла бьфькьрә. Зутьрәке Йаһоԝа ԝе һʹәму тьшти бьдә мә, чь кӧ мәрʹа лазьм ә. Мала һәр кәсийә бәдәԝ ԝе һәбә у хԝарьна баш. Чахе әм дьфькьрьн кӧ Йаһоԝа щьнәтеда ԝе бь мәрʹдани тьштед баш бьдә мә, әм бь рʹазибуне тʹьжә дьбьн.

6. Иса ча ԛәԝат дьда хәбате, у әм ча дькарьн чʹәʹв бьдьнә ԝи?

⁶ Иса тʹӧ щар бона хьрабийе ԛәԝата хԝә нәдьда хәбате. Биньн бира хԝә, кӧ чь ԛәԝьми чахе Шәйтʹан Иса щерʹьбанд, ԝәки әԝ кәвьр бькә нан. Иса ԛайил нәбу ԝәки ԛәԝата хԝә бона кʹара хԝә бьдә хәбате (Мәтта 4:2-4). Ле әԝ һазьр бу ԛәԝата хԝә бьдә хәбате сәва кӧ али мәрьва бькә. Ле ча әм дькарьн чʹәʹв бьдьнә Иса? Әԝи гот кӧ әм гәрәке дәствәкьри бьн (Луԛа 6:38). Мәсәлә әм дькарьн мәрьва тʹәглифи мала хԝә кьн сәр нанхԝарьне. Әм ӧса жи дькарьн паши щьвате ԝәʹдә хәрщ кьн, сәва кӧ али кәсәки бькьн, мәсәлә чахе бьра готара хԝә һазьр кә, гӧһ бьдьне. Йан жи әм дькарьн аликʹарийе бьдьнә ԝан, кʹе даннасинкьрьнеда нәщерʹьбанди йә. Чахе әм али мәрьва дькьн, әм чʹәʹв дьдьнә мәрʹданийа Иса.

7. Дьнйа Шәйтʹанда ԝе чь проблем тʹьме һәбә?

⁷ Кʹәсиббун проблемәкә тʹәзә нинә. Мәсәлә бәре Йаһоԝа готә исраелийа, кӧ дь ԝәлатда тʹьме мәрьвед кʹәсиб ԝе һәбьн (Ԛануна Дӧщари 15:11). Иса жи чахе ль сәр әʹрде бу, гот: «Фәԛире [кʹәсиб] һәр гав тʹәви ԝә бьн» (Мәтта 26:11). Ле гәло Иса бь ԝан гьлийа дьхԝаст бьгота, кӧ ԝе тʹьме мәрьве  кʹәсиб һәбьн? На, әԝи дьхԝаст бьгота кӧ һʹәта әм дьжин дьнйа Шәйтʹанда, кʹәсиббун ԝе һәбә. Ле дьнйа тʹәзәда ԝе щурʹәки майин бә! Ԝи чахи кʹәсиббун ида ԝе тʹӧнә бә. Хԝарьна һʹәмушка ԝе тʹер-тʹьжә бә у ԝе гьшк жи бәхтәԝар бьн!

8, 9. а) Чьрʹа Иса бь һʹәзара мәрьв тʹер кьрьн? б) Тӧ дәрһәԛа ве кʹәрәмәте чь дьфькьри?

⁸ Зәбурбеж Йаһоԝарʹа гот: «Тӧ дәстед хԝә вәдьки, дахԝаза һәр жийандари бь щиһ тини» (Зәбур 145:16, ИМ). Иса жи чахе сәр әʹрде бу, тʹьме дәрһәԛа һʹәԝщед мәрьва хәм дькьр, чьмки әԝи бь кʹамьли чʹәʹв дьда Баве хԝә. Иса әв йәк дькьр, нә кӧ сәва ԛәԝата хԝә нишан кә, ле әԝ бь рʹастийе жи дәрһәԛа мәрьва дьфькьри. Ԝәрен шеԝьр кьн Мәтта 14:14-21. (Бьхунә.) Әʹлаләт жь шәһәр ньга пәй Иса чу (Мәтта 14:13). Еваре, шагьрт бәрхԝәдькʹәтьн чьмки мәрьв дьԝәстийан у бьрʹчи дьбун. Ләма жи ԝана жь Иса пьрсин кӧ әʹлаләте бьшинә, сәва кӧ әԝана бона хԝә хԝарьне бькʹьрьн. Ле Иса чь кьр?

⁹ Бь пенщ нана у дӧ мәʹсийа, Иса ԝәкә 5000 мер тʹер кьр, ӧса жи жьн у зарʹ. Ле гәло чьрʹа Иса әԝ кʹәрәм кьр? Чьмки әԝи бь рʹастийе жи мәрьв һʹьз дькьрьн у бона ԝан хәм дькьр. Иса гәләк хԝарьн да ԝан, ләма жи «һʹәмуйа жи хԝар тʹер бун». Ԝана жь ԝе хԝарьне гәрәке ԛәԝат бьстандана, ԝәки вәгәрʹийана малед хԝә, чьмки рʹийа ԝан дьреж бу (Луԛа 9:10-17). Бьдә һʹәсабе хԝә, шагьрта паши хԝарьне донздәһ сәлә һурькед бәрмайи тʹоп кьрьн.

10. Гәло кʹәсиббун ԝе һәбә ахьрийеда?

¹⁰ Жь бо сәрԝеред тьма у хьраб, бь сәда милйона мәрьв кʹәсиб дьжин. Һәла бал һьнә хушк у бьред мә жи, кемасийа хԝарьне һәйә. Ле зутьрәке, мәрьвед кӧ гӧрʹа Хԝәде дькьн, ԝе бьжин ԝе дьнйайеда кʹидәре кӧ нә хьраби у нә жи кʹәсиббун һәбә. Йаһоԝа Хԝәдайе һьмзор ә у ԛәԝата ԝи һәйә. Һьн жи әԝ дьхԝазә ԝәки һʹәԝщед һәр мәрьви рʹази кә. Әԝ соз дьдә, кӧ зутьрәке ԝе хьлазийа тәнгасийа бинә! (Бьхунә Зәбур 72:16.)

11. Чьрʹа тӧ баԝәр дьки, ԝәки зутьрәке Иса ԝе ԛәԝата хԝә бьдә хәбате сәр тʹәмамийа әʹрде, у жь бо ԝе йәке тӧ чь дьхԝази бьки?

¹¹ Чахе Иса ль сәр әʹрде бу, әԝи тʹәне се сал нива һьнә щийа кʹәрәмәт дькьрьн (Мәтта 15:24). Ле ԝәʹде Һʹәзарсалийа Пʹадшатийа хԝә, әԝ ԝе сәр тʹәмамийа дьнйайе кʹәрәмәта бькә (Зәбур 72:8). Кʹәрәмәтед Иса мә дьдьнә баԝәркьрьне, кӧ әԝ ԛәԝата хԝә бона ԛәнщийе дьдә хәбате. Рʹаст ә әм нькарьн кʹәрәмәта бькьн, ле әм дькарьн ԝәʹде хԝә у ԛәԝата хԝә бьдьнә хәбате, сәва кӧ мәрьварʹа гьли кьн дәрһәԛа ахьрийа пʹьрʹ баш, кӧ Кʹьтеба Пироз соз дьдә. Әм чаԝа Шәʹдед Йаһоԝа, борщдар ьн әԝе йәке бькьн (Рʹомайи 1:14, 15). Һәрге әм бьфькьрьн дәрһәԛа кьред Иса кӧ ԝе зутьрәке бькә, әме бьхԝазьн мәрьварʹа гьли кьн (Зәбур 45:1; 49:3).

12. Чьрʹа әм дькарьн бежьн ԝәки Иса бь тʹәмами дәрһәԛа тʹәбийәте у әʹрде занә?

¹²  Чахе Хԝәде дьне әʹфьранд, Иса чаԝа «һостә» бу бал Хԝәде (Мәтʹәлок 8:22, 30, 31; Колоси 1:15-17). Ләма жи Иса бь тʹәмами занә дәрһәԛа тʹәбийәте. Әԝ занә кӧ чаԝа бьдә хәбате у дькарә һʹӧкӧм кә сәр тʹәбийәте.

13, 14. Мәсәле биньн кӧ чаԝа Иса дькарә һʹӧкӧм кә сәр тʹәбийәте.

 ¹³  Чахе Иса сәр әʹрде бу, әԝи әʹйан кьр кӧ Хԝәде ԛәԝат дайә ԝи у кӧ әԝ дькарә сәр тʹәбийәте һʹӧкӧм кә. Ԝәрен бьфькьрьн дәрһәԛа ԝе мәсәле, кӧ чаԝа Иса фьртонә да сәкьнандьне. (Бьхунә Марԛос 4:37-39.) Зандарәки Кʹьтеба Пироз шьровәдькә, кӧ кʹьтеба Марԛосда сәр зьмане Йунани хәбәра «фьртонә», дьдә кʹьфше багәр йан байе гәләк ԛайим. Әԝ һәйә фьртонә кӧ бь әʹԝьре рʹәш те, бь байе ԛайим, бь бьруске у барана ԛайим. Чахе әԝ фьртонә дьсәкьнә, һʹәму тьшт һәвкʹәти йә.

¹⁴  Бьдә бәр чʹәʹве хԝә әве дәрәще: Пʹеле аве ԛәйике дьхьн, у ав жи дькʹәвә ԛәйике. Дәнге фьртоне те у ԛәйик вьрда-веда дьһәжә, ле Иса рʹаза йә, чьмки гәләк ԝәстийайи бу. Шагьрт гәләк тьрсийан, ләма Иса һʹьшйар кьрьн у готьн: «Әм ӧнда дьбьн!» (Мәтта 8:25) Ле Иса чь кьр? Әԝ рʹабу у готә ба у бәʹре: «Бьсәкьнә, кәрʹ бә!» (Марԛос 4:39). Паши ԝан гьлийа фьртона хоф хьлаз бу, у «һʹәму тьшт сәԛьрʹин». Әԝ мәсәла ԛәԝи, әʹйан дькә кӧ Иса дькарә сәр тʹәбийәте һʹӧкӧм кә.

15. Ча Йаһоԝа избат кьр кӧ әԝ тʹәбийәте контрол дькә?

¹⁵  Йаһоԝа ԛәԝат дайә Иса, у ләма жи фәʹмдари йә кӧ Хԝәдайе Һьмзор хԝәха жи дькарә сәр тʹәбийәте һʹӧкӧм у контрол кә. Мәсәлә, пешийа селаве, Йаһоԝа гот: «Һʹәфт рʹожа шунда, әзе 40 рʹожи у 40 шәви баране бьбариньм» (Дәстпебун 7:4, ПКʹМ). Ӧса жи, дь кʹьтеба Дәркʹәтьн 14:21-да әм дьхуньн: «Хӧдан тʹәмамийа шәве бь байе рʹоһлатейи ԛайим бәʹр ажот, (ПКʹМ)». Дь кʹьтеба Уньс 1:4-да ньвисар ә: «Хӧдан байәк мәзьн шанд сәр бәʹре, дь бәʹреда баһозәк [фьртонәк] мәзьн чебу у һәма мабу кӧ кәшти [гәми] пʹарчә бубуна». Демәк, дьнйа тʹәзәда жи Йаһоԝа ԝе тʹьме сәр тʹәмамийа тʹәбийәте һʹӧкӧм кә, у әԝ йәк мә гәләк дьлгәрм дькә.

16. Чьрʹа занәбуна ԝе йәке кӧ ԛәԝата Йаһоԝа у Иса һәйә, кӧ һʹӧкӧм кьн сәр тʹәбийәте, мә дьлгәрм дькә?

¹⁶  Занәбуна ԝе йәке кӧ ԛәԝата Йаһоԝа у Иса һәйә, кӧ һʹӧкӧм кьн сәр тʹәбийәте, мә дьлгәрм дькә. Ԝәʹде Һʹәзарсалийа Пʹадшатийа Мәсиһ, сәр әʹрде һәр кәс ԝе бехофийеда бьжи. Тʹӧ кәс ԝе зийане нәстинә у нәйе кӧштьне жь бо тʹәбийәте, мәсәлә жь бо фьртонә, тсунаме, волкане, йан жь бо әʹрдһәже. Әме ида тʹӧ тʹәшԛәле тʹәбийәте нәтьрсьн, чьмки ԝе «коне Хԝәде нава мәрьвада» бә! (Әʹйанти 21:3, 4) Гӧмана мә һәйә кӧ Иса ԝәʹде Һʹәзарсалийа Пʹадшатийа хԝә жи, ԝе бь ԛәԝата Йаһоԝа сәр тʹәбийәте һʹӧкӧм кә.

17. Ньһада, әм чьда дькарьн чʹәʹв бьдьнә Хԝәде у Иса?

¹⁷  Һьлбәт, ԛәԝата мә дәр ә ԝәки тʹәшԛәлед тʹәбийәте бьдьнә сәкьнандьне. Чьмки тʹәне Йаһоԝа у Иса дькарьн әԝе йәке бькьн. Ле әм дькарьн тьштәки дьн бькьн. Әм дькарьн бьдьнә хәбате гьлийед жь Мәтʹәлок 3:27. (Бьхунә.) Чахе хушк-бьред мә тәнгасийеда ньн, әм дькарьн хәм бькьн бона һʹәԝщед ԝанә физики у емосиали, у ԝана дьлгәрм кьн (Мәтʹәлок 17:17). Мәсәлә, әм дькарьн али ԝан бькьн чахе тʹәшԛәлед тʹәбийәте дьԛәԝьмьн.  Мала жьнәбике һьлшийа бу жь бо фьртоне, у әԝ гьли дькә: «Әз гәләк жь Йаһоԝа рʹази мә, ԝәки әз тʹәшкиләта ԝида ньм, нә кӧ тʹәне бона аликʹарийа физики, ле ӧса жи йа рʹӧһʹани». Мала хушкәкә азәп жь фьртоне зийан станд, у әԝе хԝә бегӧман тʹәхмин дькьр. Паше чахе бьра али ԝе кьрьн мала ԝе чекьрьн, әԝе гот: «Әԝ йәк тьштәки әʹщеб ә! Әз нькарьм бь тʹәмами һәстед хԝә бьдьмә кʹьфше». Әԝе зедә кьр: «Зәʹф рʹази мә Йаһоԝа!» Әм рʹасти жи гәләк рʹази нә жь хушк-бьред мә, кӧ әԝана бона һʹәԝщед мәрьва хәм дькьн. Ле һе зедә әм гәләк жь Йаһоԝа у жь Иса рʹази нә, ԝәки әԝана бь рʹастийе жи бона мә хәм дькьн.

18. Чь тә хԝәш те ве йәкеда, кӧ Иса чьрʹа кʹәрәмәт дькьрьн?

¹⁸  Иса ԝәʹде ԛӧльхкьрьна хԝә, избат кьр кӧ әԝ һәйә «ԛәԝата Хԝәде». Ле әԝи тʹӧ щар ԛәԝата хԝә нәдьда хәбате бона зийане бьдә мәрьва йан жи бона кʹара хԝә. Дәԝсе, Иса ԛәԝата хԝә дьда хәбате сәва кʹәрәмәта бькә, чьмки әԝи мәрьв бь рʹастийе һʹьз дькьр. Дәрһәԛа ԝе йәке әме һе зедә пебьһʹәсьн дь тʹема дьнда.