1. Гәләк мәрьв, дәрһәԛа намусе чь дьфькьрьн?

 ӘМ ДЬЖИН дьнйакә ӧсада, кӧ бь бенамусийе тʹьжә йә. Мәсәлә, гәләк мәрьв дьфькьрьн кӧ һомосексуәланти йан жи һәләԛәтийа сексуал тʹәви ԝи мәрьви кӧ тʹәви тә зәԝащеда нинә, әԝ тьштәки бь нормал ә. Синәм, кʹьтеб, кʹьлам, у реклам бь бенамусийе тʹьжә нә (Зәбур 12:8). Ле Йаһоԝа дькарә али мә бькә сәва әм ӧса бьжин, кӧ дьле ԝи хԝәш бен. Дь ԝе дьнйайеда кʹидәре кӧ бенамуси бәла буйә, әм йәкә дькарьн намуса хԝә тʹәмьз хԝәй кьн. (Бьхунә 1 Тʹесалоники 4:3-5.)

2, 3. а) Чьрʹа әм гәрәке жь дьлһавьжийед нәрʹаст бьрʹәвьн? б) Дь ԝе готареда әме дәрһәԛа чь шеԝьр кьн?

² Сәва кӧ дьле Йаһоԝа хԝәш бен, әм гәрәке хԝә дур хԝәй кьн жь ԝан һʹәму тьшта, чь кӧ әԝ нәфрʹәт дькә. Чьмки әм гӧнәкʹар ьн, ләма жи әм дькарьн бькʹәвьнә тʹәлька бенамусийе, чаԝа мәʹсийе кӧ дькʹәвә тʹәлька мәʹсигьртьне. Һәрге фькьред нәщайиз тенә һʹьше мә, әм гәрәке перʹа-перʹа жь сәре хԝә дәрхьн. Йан на, хԝәстьнед бенамуси дькарьн ӧса кʹур бьн, кӧ ахьрийе әм гӧнә бькьн. Кʹьтеба Пироз жи, әԝе йәке рʹьнд әʹйан дькә: «Дьлһавьжи кәле хԝә дьстинә, гӧнә же дьфьрькә». (Бьхунә Аԛуб 1:14, 15.)

 ³ Дьлһәвьжийед нәрʹаст дькарьн дьле мәда пешда бен у мәзьн бьн. Ләма жи әм гәрәке мьԛати хԝә бьн, һәла дьлһавьжийед мә чьда ньн. Чахе әм дьлһавьжийе, демәк хԝәстьнед нәрʹаст жь хԝә дур дьхьн, бь ԝе йәке әм хԝә жь бенамусийе у бәред хьраб хԝә хԝәй дькьн (Галати 5:16). Дь ве готареда, әме шеԝьр кьн дәрһәԛа се тьшта, йед кӧ ԝе али мә бькьн хԝәстьнед нәрʹаст бьтәмьриньн. Әԝ тьшт әв ьн: достийа мә тʹәви Йаһоԝа, ширәта жь Хәбәра ԝи, у аликʹари жь Мәсиһийед щерʹьбанди.

4. Чьма фәрз ә, ԝәки әм хԝә ль Йаһоԝа бьгьрьн?

⁴ Дь Кʹьтеба Пирозда ньвисар ә, ԝәки әԝед кӧ дьхԝазьн «хԝә ль Хԝәде бьгьрьн» гәрәке: «Дәстед хԝә бьшон» у «дьле хԝә паԛьж кьн» (Аԛуб 4:8). Чахе әм Йаһоԝа һʹәсаб дькьн ча Досте хԝәйи баш, һьнге әм нә кӧ тʹәне бь кьред хԝә дьхԝазьн дьле ԝи хԝәш бен, ле бь фькьред хԝә жи. Чахе фькьред мә тʹәмьз ьн, дьле мә жи тʹәмьз ә (Зәбур 24:3, 4; 51:6; Филипи 4:8). Йаһоԝа занә кӧ әм нәԛәдандинә у дькарьн дәрһәԛа тьштед нәщайиз бьфькьрьн. Ле әм нахԝазьн дьле Йаһоԝа бешиньн, ләма жи әм дьхәбьтьн кӧ фькьред нәрʹаст жь сәре хԝә дәрхьн (Дәстпебун 6:5, 6). Әм һʹәму тьшти дькьн, кӧ фькьред хԝә тʹәмьз хԝәй кьн.

5, 6. Чаԝа дӧакьрьн дькарә али мә бькә, кӧ хԝәстьнед нәщайиз нав хԝәда бьтәмьриньн?

⁵ Һәрге әм тʹьме Йаһоԝарʹа дӧа дькьн сәва аликʹарийе, әԝ ԝе али мә бькә кӧ фькьред бенамуси жь сәре хԝә дәрхьн. Йаһоԝа рʹӧһʹе пироз дьдә мә, ԝәки ԛәԝата мә һәбә кӧ әм бькарьбьн тʹәмьзайе хԝәй кьн. Дӧакьрьнеда әм дькарьн Йаһоԝарʹа бежьн, кӧ әм дьхԝазьн бь фькьред хԝә дьле ԝи хԝәш бен (Зәбур 19:14). Әм бь мьлукти жь Йаһоԝа һиви дькьн, кӧ мә бьньһерʹә у бьвинә, һәла дьле мәда хԝәстьнед нәрʹаст һәнә, жь бо кʹижана әм дькарьн гӧнә бькьн (Зәбур 139:23, 24). Тʹьме жь Йаһоԝа һиви кә, кӧ али тә бькә жь бенамусийе бьрʹәви, һәла һе һьнге жи гава әв йәк чәтьн ә (Мәтта 6:13).

⁶ Пешийа кӧ әм дәрһәԛа Йаһоԝа пеһʹәсийан, дьԛәԝьмә мә тьштед ӧса дькьр, чь кӧ ԝи хԝәш нәдьһатьн. У дьбәкә һʹәта ньһа әм тʹәви ԝан хԝәстьнед хԝәйә нәрʹаст шәрʹ дькьн. Ле Йаһоԝа дькарә али мә бькә кӧ әм бенә гӧһастьне у ве йәке бькьн чь кӧ ԝи хԝәш те. Мәсәлә чахе Даԝьд Пʹадша тʹәви Батʹ-Шәбайе бенамуси кьр, паше әԝи тʹобә кьр у лавайа Йаһоԝа дькьр, кӧ «дьләки паԛьж» бьдә ԝи у али ԝи бькә кӧ әԝ гӧһдар бә (Зәбур 51:10, 12). Ләма жи, һәрге бәреда һʹәта ньһа әм тʹәви хԝәстьнед хԝәйи нәщайиз шәрʹ дькьн, Йаһоԝа дькарә али мә бькә, кӧ әм гӧрʹа ԝи бькьн у ве йәке бькьн, чь кӧ рʹаст ә. У ӧса жи әԝ дькарә али мә бькә, кӧ әм бькарьбьн фькьред хԝә контрол бькьн (Зәбур 119:133).

7. Чаԝа Хәбәра Хԝәде дькарә али мә бькә, кӧ фькьред бенамуси жь сәре хԝә дәрхьн?

⁷ Йаһоԝа дькарә щаба дӧайед мә бьдә у али мә бькә бь Хәбәра хԝә, демәк Кʹьтеба Пироз. Дь Кʹьтеба Пирозда әм биланийа Хԝәде дьбиньн, йа кӧ тʹәмьз ә (Аԛуб 3:17). Чахе әм һәр рʹож Кʹьтеба Пироз дьхуньн, һьнге әм һʹьше хԝә бь фькьред тʹәмьз тʹьжә дькьн (Зәбур 19:7, 11; 119:9, 11). Хенщи ԝе йәке дь Кʹьтеба Пирозда гәләк мәсәлә у ширәт һәнә, йед кӧ али мә дькьн ԝәки фькьр у хԝәстьнед бенамуси инкʹар кьн.

8, 9. а) Чьма хортәки щаһьл тʹәви кʹӧлфәтәкә бенамус, бенамуси кьр? б) Сәрһатийа кӧ Мәтʹәлок сәре 7-да ньвисар ә, чь дәрәщада дькарә али мә бькә?

⁸ Дь кʹьтеба Мәтʹәлок 5:8-да, Хәбәра Хԝәде мә ширәт дькә, кӧ хԝә жь бенамусийе дур бьгьрьн. Дь Мәтʹәлок сәре 7-да, әм сәрһатийа хортәки щаһьл  дьхуньн, йе кӧ еваре бәр мала кʹӧлфәта бенамусрʹа дәрбаз дьбә. Кʹӧлфәт ԛәрахе кʹучʹеда сәкьнийә у ча кʹӧлфәтәкә бенамус хԝәкьри йә. Әԝ незики ви хорти дьбә, ԝи дьгьрә, пачʹ дькә у тьштед ӧса дьбежә, жь бо чь жи хԝәстьнед нәрʹаст щәм ԝи пешда тен. Хорт ԝан хԝәстьна натәмьринә, у ль ахьрийе жи тʹәви ԝе бенамусийе дькә. Рʹаст ә әԝ дьшьрмиш нәбьбу гӧнә бькә, ле йәкә кьр. Паше әԝи ахьрикә хьраб ԛазанч кьр. Һәрге әԝи фәʹм кьра кӧ әв йәк чьԛас хоф ә, әԝи ԝе хԝә жь кʹӧлфәта бенамус дур бьгьрта! (Мәтʹәлок 7:6-27)

⁹ Чахе әм мина ԝи хорте щаһьл, фәʹм накьн ԝәки әԝ тьшт чьԛас хоф ьн, жь бо ԝе йәке әм дькарьн сафикьрьнед нәрʹаст бькьн. Мәсәлә, евара һьнә бәрнамед телевизийоне тьштед бенамуси нишан дькьн. Әԝ йәк дькарә хоф бә у мәрʹа чәтьн бә кӧ әве бәрнаме нәньһерʹьн. Ӧса жи сәва мә дькарә хоф бә әв йәк, чахе әм Интернетеда линкәке дьтькиньн у ньзаньн әԝ чь линк ә. Йан жи чахе һьнә малпәред дьн дьдьнә хәбате, кʹидәре кӧ дькарьн рекламед бенамуси һәбьн, у линкед порнографи. Дь ԝан дәрәщада әԝ тьштед кӧ әм дьвиньн, дькарьн хԝәстьнед бенамуси нав мәда пешда биньн, у мә һелан кьн кӧ гӧрʹа Йаһоԝа нәкьн.

10. Чьрʹа флирт хоф ә? (Бьньһерʹә шькьле әʹԝльн.)

¹⁰ Дь Кʹьтеба Пирозда ӧса жи те  готьне кӧ мер у жьн һьндава һәвда гәрәке чаԝа бьн. (Бьхунә 1 Тимотʹейо 5:2.) Мәсиһи бь һәстед романтик тʹәне ль ԝан дьньһерʹьн йед кӧ тʹәви ԝан зәԝащеда ньн, йан жи тʹәви кʹе дьхԝазьн бьзәԝьщьн. Әԝана флирте накьн. Һьнәк дьфькьрьн, кӧ һәрге мәрьв һәстед романтик дьдә кʹьфше бь жестед хԝә, бь бәдәна хԝә, у чʹәʹвед хԝә, әв тьштәки бь нормал ә, чьмки әԝана бь рʹастийе накʹәвьнә һәләԛәтийа сексуал. Ле ӧса нинә. Чахе дӧ мәрьв һәврʹа флирте дькьн, һьнге фькьред бенамуси пешда тен, жь бо чь жи әԝана дькарьн бенамусийе бькьн.

11. Усьв чьда сәва мә мәсәләкә баш ә?

¹¹ Усьв, сәва мә мәсәләкә баш ә. Жьна Потифар дьхԝәст кӧ Усьв тʹәви ԝе бенамусийе бькә. Ле Усьв, жьна Потифаррʹа рʹази нәбу. Әԝе диса у диса Усьв дьщерʹьбанд. Һәр рʹож әԝе дьготә ԝи, кӧ сәре хԝә ԝерʹа дайнә (Дәстпебун 39:7, 8, 10). Зандарәки Кʹьтеба Пироз шьровәдькә, ԝәки жьна Потифар гӧман бу, кӧ һәрге әԝана тʹәне бьминьн, Усьве бьхԝәзә тʹәви ԝе бькʹәвә һәләԛәтийа сексуал. Усьв тʹӧ щар нәдькʹәтә бьн байе флирта ԝе, у нә жи тʹәви ԝе флирт дькьр. Бь ԝе йәке әԝи нәһишт кӧ хԝәстьнед нәрʹаст дьле ԝида пешда бен. У чахе жьна Потифар дәсте хԝә авитә кʹьнща Усьв, у дьхԝәст бь зоре тʹәви ԝи бенамусийе бькә, әԝи перʹа-перʹа «кʹьнща хԝә дәсте ԝева бәрда у рʹәви дәркʹәтә дәрва» (Дәстпебун 39:12, ПКʹМ).

12. Әм жь кӧ заньн ԝәки тьштед кӧ әм дьвиньн, дькарьн ль сәр дьле мә һʹӧкӧм кьн?

¹²  Иса пешда готьбу ԝәки тьштед кӧ әм дьвиньн дькарьн сәр дьле мә һʹӧкӧм кьн, у хԝәстьнәд нәрʹаст бал мә пешда биньн. Әԝи гот: «Кʹи бь тәме хьраб жьнәке бьньһерʹә, әԝи дьле хԝәда иди тʹәви ԝе зьнекʹари кьр» (Мәтта 5:28). Һәма әв йәк һатә сәре Даԝьд Пʹадша. Әԝ сәр бане мала хԝә бу, у дит кӧ кʹӧлфәтәк сәре хԝә дьшо. Даԝьд бәрдәԝан кьр ле ньһерʹи у дәрһәԛа ԝе фькьри (2 Самуйел 11:2). Рʹаст ә әԝ жьна мәрьвәки дьн бу, ле Даԝьд дәстпекьр бь чʹәʹве хьраб сәр ԝе бьньһерʹә у тʹәви ԝе бенамуси кьр.

13. Чьма әм гәрәке тʹәви чʹәʹве хԝә «пәймане» гьредьн, у ча әм дькарьн әве йәке бькьн?

¹³  Һәрге әм дьхԝазьн фькьред бенамуси жь хԝә дур хьн, әм гәрәке чʹәʹв бьдьнә мәсәла Ибо. Әԝи гот: «Мьн бь чʹәʹвед хԝә . . . пәйманәке чекьр» (Ибо 31:1, 7, 9). Мина Ибо әм дькарьн сәва хԝә сафи кьн, ԝәки тʹӧ щара сәр тʹӧ кәси бь чʹәʹвед хьраб нәньһерʹьн. У һәрге әм компотәреда тьштед бенамуси дьвиньн, мәсәлә шькьлада, рекламада, журналада, йан жи щики дьнда, һьнге әм гәрәке перʹа-перʹа чʹәʹвед хԝә сәр ԝан тьшта һьлдьн.

14. Әм чь гәрәке бькьн, сәва кӧ намуса хԝә тʹәмьз хԝәй кьн?

¹⁴  Һәрге һʹәму тьштед, кӧ жоре һатьнә шеԝьркьрьне һьлди һʹәсаб, дьбәкә тӧйе бьфькьри кӧ лазьм ә һе зедә бьки, нә кӧ тʹәне хԝәстьнед бенамуси нава хԝәда бьтәмьрини. Һәрге тәрʹа лазьм ә һьнә тьшт нав хԝәда бьгӧһези, перʹа-перʹа әве йәке бькә! У чахе тӧ гӧһ дьди гьлийе Йаһоԝа, тәрʹа һеса дьбә хԝә жь бенамусийе дур бьгьри у намуса хԝә тʹәмьз хԝәй ки. (Бьхунә Аԛуб 1: 21-25.)

15. Һәрге әм дьвиньн кӧ мәрʹа чәтьн дьбә хԝәстьнед нәрʹаст нав хԝәда бьтәмьриньн, һьнге чьма фәрз ә кӧ аликʹарийе бьхԝазьн?

¹⁵  Һәрге тӧ дьвини кӧ тәрʹа чәтьн дьбә хԝәстьнед нәрʹаст нав хԝәда бьтәмьрини, ԝе баш бә кӧ тʹәви кәсәки жь щьвате хәбәрди, йе кӧ ида гәләк сал ә Йаһоԝарʹа ԛӧльх дькә. Демәк хәбәрдә ԝи мәрьвирʹа, йе кӧ дькарә ширәта баш жь Хәбәра Хԝәде бьдә тә. Дьбәкә сәва тә ԝе һеса нибә дәрһәԛа проблемед хԝәйә шәхси тʹәви йед дьнена  хәбәрди, ле гәләк фәрз ә кӧ аликʹарийе бьхԝази (Мәтʹәлок 18:1; Ибрани 3:12, 13). Мәсиһийед щерʹьбанди дькарьн али тә бькьн, кӧ бьвини чь гӧһастьн тәрʹа лазьм ьн. Паше ида әван гӧһастьна бькә, кӧ бькарьби достийа хԝә тʹәви Йаһоԝа хԝәй ки.

16, 17. а) Рʹуспи ча дькарьн али ԝан мәрьва бькьн, кʹижанарʹа чәтьн дьбә кӧ хԝәстьнед бенамуси нав хԝәда бьтәмьриньн? Мәсәлә гьли кә. б) Чьма әԝед кӧ порнографиайе дьньһерʹьн, гәрәке бе әгләкьрьн аликʹарийе бьхԝазьн?

¹⁶  Рʹуспийед щьвате, гәләк щерʹьбанди нә у дькарьн али мә бькьн. (Бьхунә Аԛуб 5:13-15.) Нава гәләк салада, хортәки щаһьл дь Бразилйайеда сәр хԝә дьхәбьти кӧ хԝәстьнед нәрʹаст нав хԝәда бьтәмьринә. Ԝирʹа чәтьн бу әве йәке бькә. Әԝ дьбежә: «Мьн заньбу ԝәки фькьред мьн, Йаһоԝа хԝәш найен, ле мьн гәләк шәрм дькьр ԝәки дәрһәԛа һәстед хԝә кәсәкирʹа гьли кьм». Рʹуспики тедәрхьст кӧ ԝи хортирʹа аликʹари лазьм ә у әԝ һелан кьр, ԝәки әԝ бьһелә кӧ рʹуспи бькарьбьн али ԝи бькьн. Хорте щаһьл дьбежә: «Әз әʹщебмайи мам жь бо ԝе йәке, кӧ чаԝа рʹуспийа һьндава мьнда хԝә кʹьфш дькьрьн. Әԝана һьндава мьнда рʹәʹм бун у жь мьн фәʹм дькьрьн. Әз нә жи һивийе бум кӧ ԝе ӧса бә. Рʹуспийа рʹьнд гӧһ дьданә мьн, чахе мьн проблема хԝә ԝанарʹа гьли дькьр. Ԝана Кʹьтеба Пироз дьда хәбате, сәва кӧ мьнрʹа нишан кьн ԝәки Йаһоԝа чьԛас мьн һʹьз дькә. Ԝана ӧса жи сәва мьн дӧа дькьрьн. Жь бо ве йәке мьнрʹа ида һеса бу, ԝәки әве ширәта кӧ ԝана жь Кʹьтеба Пироз данә мьн, ԛәбул кьм». Ньһа ида чахе әԝи һәләԛәтийа хԝә тʹәви Йаһоԝа ԛәԝи кьр, әԝ гьлийе ӧса дьбежә: «Ньһа әз фәʹм дькьм, ԝәки чьԛас фәрз ә аликʹарийе бьгәрʹи, дәԝса кӧ тʹәне бара хԝәйә гьран бьгәрʹини».

¹⁷  Һәрге тәрʹа буйә хәйсәт порнографиайе бьньһерʹи, тӧ гәрәке бе әгләкьрьн аликʹарийе бьхԝази. Чьԛас һе зедә тӧ хԝә әглә ки, һаԛас һе зу дьԛәԝьмә тӧ бькʹәви тʹәлька бенамусийе. Бь ве йәке тӧ дькари зийане бьди йед дьнена, у һьн жи мәрьвед дор-бәр ԝә дәстпекьн дәрһәԛа Йаһоԝа хьраб хәбәр дьн. Гәләк хушк-бьра, жь рʹуспийа аликʹари хԝәстьн, у ширәта ԝан жи ԛәбул кьрьн, сәва кӧ дьле Йаһоԝа ша кьн у щьватеда бьминьн (Зәбур 141:5; Ибрани 12:5, 6; Аԛуб 1:15).

18. Ԝә сәва хԝә чь сафи кьрийә кӧ бькьн?

¹⁸  Дьнйа Шәйтʹанда бенамуси һе зедә у зедә дьбә. Ле ԛӧльхкʹаред Йаһоԝа һʹәму тьшти дькьн, ԝәки фькьред хԝә тʹәмьз хԝәй кьн. Йаһоԝа ԝан Мәсиһийарʹа гәләк фьрнаԛ дьбә. Ләма жи ԝәрен әм хԝә ль Йаһоԝа бьгьрьн у бьԛәдиньн әԝан ширәта кӧ әм жь Хәбәра ԝи у ль сәр щьвата, дьстиньн. Һәрге әм ӧса бькьн, әме бәхтәԝар бьн у исафа мә жи ԝе тʹәмьз бә (Зәбур 119:5, 6). У ль ахьрийеда жи, әме бькарьбьн һʹәта-һʹәтайе бьжин дьнйа Хԝәдейә ну у тʹәмьзда, кʹидәре кӧ Шәйтʹан ида ԝе сәрԝертийе нәкә.