1. Чь дьԛәԝьми сала 66? (Бьньһерʹьн шькьле әʹԝльн.)

 БЬДӘ бәр чʹәʹве хԝә кӧ тӧ Мәсиһи йи, у дьжийи сала 66 дь Оршәлимеда. Дор бәре тә гәләк тьшт дьԛәԝьмьн. Мәрьве дәԝләта Роме Флорус, жь хьзна пʹарьстгәһе 17 тәлант дьзи. Жь бо ве йәке Щьһу гәләк һерскʹәтьнә у мьԛабьли Роме дәркʹәтьнә. Ԝана гәләк әскәред Роме кӧштьн у әʹлам кьрьн кӧ дьхԝазьн бьн сәрԝертийа Роме дәрен у башԛә бьн. Ле Роме дәрберʹа хԝә кʹьфш кьр. Нава се мәһада, 30 000 әскәр бь фәрмана Тсести Галл дора Оршәлиме гьртьн. У әԝ Щьһуйед кӧ мьԛабьли Роме дәркʹәтьн хԝә дь пʹарьстгәһеда вәшартьн, ле әскәред Роме, алийе дәрвава дәстпекьрьн диԝаре дора пʹарьстгәһе һьлшиньн. Һʹәму кәс дь шәһәрда зьравԛәтанди бун. Ле тәйе чь тʹәхмин кьра һәрге тә әԝ һʹәму дәрәщә бьдитана?

2. Мәсиһи чь гәрәке бькьрана чахе дитьн, кӧ әскәред Роме ньшкева шәһәр һиштьн, у әԝ йәк ча ԛәԝьми?

² Чәнд сал пешда, Иса дәрһәԛа ве ԛәԝьмандьне пешда готә шагьртед хԝә у тʹәми да ԝан: «Ле гава һун бьбиньн кӧ ордийа дора Оршәлиме гьртийә, һьнге бьзаньбьн кӧ ԝеранбуна ԝе незик ә. Һьнге әԝед кӧ Щьһустанеда нә бьра бьрʹәвьнә чʹийа у  әԝед кӧ Оршәлимеда нә бьра дәрен, әԝед кʹәԝшенда нә, бьра вәнәгәрʹьнә бажер» (Луԛа 21:20, 21). Ле ԝана ԝе ча тʹәмийа Иса бьԛәдандана жь Оршәлиме дәркʹәтана, нә ахьр әскәр дора шәһәр гьртьбун? Тьштәки әʹщеб ԛәԝьми. Ньшкева ордийа Роме Оршәлим һиштьн у пашда чун! Чаԝа кӧ Иса пʹехәмбәрти кьрьбу, һʹӧщӧмкьрьна ԝана «кьн» бу (Мәтта 24:22). Чахе ордийа Роме пашда чун, һәма әԝ ԝәʹдә бона Мәсиһийед амьн бу, кӧ гӧрʹа Иса бькьн у дәрберʹа бьрʹәвьнә чʹийа. a (Бьньһерʹә спартьн.) Паше, сала 70, ордийа Роме диса вәгәрʹийа Оршәлиме. Ԝи чахи ԝана шәһәр ԝеран кьр. Ле әԝед кӧ гӧрʹа Иса кьрьн хьлаз бун.

3. Мәсиһийед иройин ԝе зутьрәке рʹасти кʹижан ԛәԝьмандьне бен, кӧ мина йа бәре йә, у дь ве тʹемайеда әме дәрһәԛа чь шеԝьр кьн?

³ Тʹәмийа Иса у ширәтед ԝи бона рʹожа иро нә жи. Зутьрәке әме жи бькʹәвьнә дәрәща ӧса. Иса әԝан дәрәщед ԛьрʹна йәкеда бәрамбәри ве йәке кьр, кӧ ԝе чь бьԛәԝьмә чахе «тәнгасикә мәзьн» дәстпебә (Мәтта 24:3, 21, 29). Чаԝа кӧ ԝәʹде һьлшандьна Оршәлиме Мәсиһийед амьн хьлаз бун, ӧса жи ԝәʹде тәнгасийа мәзьн кӧ зутьрәке ԝе бе, «әʹлаләтәкә мәзьн» ԝе хьлаз бә. (Бьхунә Әʹйанти 7:9, 13, 14.) Мәрʹа гәләк фәрз ә кӧ фәʹм бькьн, һәла Кʹьтеба Пироз чь дьбежә дәрһәԛа ԛәԝьмандьнед ахьрийе. Ле чьрʹа? Чьмки әʹмьре мә ве йәкева гьредайи йә. Ԝәрен шеԝьр кьн, һәла әԝ ԛәԝьмандьн ԝе ча сәр мә һʹӧкӧм бьн.

4. Ԝе ча дәстпебә тәнгасийа мәзьн?

⁴ Ԝе ча дәстпебә тәнгасийа мәзьн? Әԝ ԝе дәстпебә бь кʹӧтакьрьна религийа ԛәлп. Кʹьтеба Пироз религийа ԛәлп нав дькә чаԝа «Бабилона мәзьн, мака [дийа] ԛава у кʹьретийед дьнйайе» (Әʹйанти 17:5-7). Ле чьрʹа религийа ԛәлп те навкьрьне чаԝа жьна ԛав? Чьмки сәрԝеред религийед ԛәлп Хԝәдерʹа нәамьн бун. Дәԝса кӧ бь амьни пьштгьрийа Иса у Пʹадшатийа ԝи бькьн, әԝана пьштгьрийа сәрԝертийед мәрьва дькьн у чь кӧ Кʹьтеба Пироз һин дькә ԛәбул накьн. Әԝана ӧса дькьн, сәва кӧ һе зедә һʹӧкӧме ԝан һәбә. Фьрԛи һәйә ортʹа ԛӧльхкьрьна ԝан у рʹункьрийа, чьмки рʹункьри Хԝәдерʹа рʹаст ԛӧльх дькьн (2 Корьнтʹи 11:2; Аԛуб 1:27; Әʹйанти 14:4). Ле кʹе ԝе Бабилона мәзьн кʹӧта кә? Чаԝа Әʹйантида ньвисар ә, Хԝәде ԝе ӧса бькә кӧ «дәһә стьруйед» «щәʹнәԝьрәки соре гәвәз» «хԝәстьна ԝи бькьн». Ле кʹе йә әԝ «щәʹнәԝьрәки соре гәвәз»? Әԝ бь симболик те һʹәсабе Мьләтед Йәкбуйи, ле «дәһә стьруйед» ԝи тенә һʹәсабе һʹәму политик, кӧ пьштгьрийа Мьләтед Йәкбуйи дькьн. (Бьхунә Әʹйанти 17:3, 16-18.)

5, 6. Чьрʹа әм дькарьн бежьн, кӧ кʹӧтакьрьна Бабилона мәзьн найе һʹәсабе кʹӧтакьрьна һʹәму әндәмед ԝе?

⁵ Гәло һʹәму әндәмед религийед ԛәлп ԝе бенә ԛьрʹкьрьне, ԝәʹде кʹӧтакьрьна Бабилона мәзьн? На. Йаһоԝа бь Зәкәрийа пʹехәмбәр гот, кӧ чь ԝе бьԛәԝьмә. Ԝи чахи, һьнәкед кӧ бәре нава религийа ԛәлпда бун, ԝе бежьн: «Әз нә пʹехәмбәр ьм, зьламәки щоткʹар ьм, жь бәр кӧ дь щьвантийа [щаһьлтийа] мьнда зьламәки мьн жь хԝәрʹа кьр кʹолә [хӧлам]. У ԝе йәк жерʹа бежә: ‹Әв бьринен кӧ дь нав дәсте тәда нә чь нә?› У ԝе әԝ бежә: ‹Бьринен кӧ ль мала һʹьзкьрийен хԝә гьртьнә [стандийә]›» (Зәкәрйа 13:4-6). Демәк әм дьвиньн, кӧ һәла һе сәрԝеред религийа жи ԝе инкʹар кьн, кӧ әԝана баԝәрмәнд ьн, у кӧ нава религийед ԛәлпда бун.

⁶ Ле һьнге ԝе чь бьԛәԝьмә тʹәви щьмәʹта Хԝәде? Иса гот: «Һәгәр әԝ рʹож кьн нәбуна, тʹӧ кәс хьлаз нәдьбу, ле бона хатьре  бьжартийа әԝ рʹоже кьн бьн» (Мәтта 24:22). Дь ԛьрʹна йәкеда тәнгасийа Оршәлимеда «кьн» бу. Әве йәке мәщал да «бьжартийа», демәк Мәсиһийед рʹункьри, кӧ бьрʹәвьн. Ӧса жи ахьрийеда, пʹара пешьнә тәнгасийа мәзьн, ԝе «кьн» бә бона «бьжартийа». Йед политик, демәк «дәһә стьруйед» щәʹнәԝьр, ԝе нькарьбьн щьмәʹта Хԝәде кʹӧта кьн. Ле дәԝсе, паши пʹара пешьнә тәнгасийа мәзьн ԝе бьбә әʹдьлайи, ле ԝәʹдеки кьн.

7, 8. Чь мәщал ԝе һәбә паши кʹӧтакьрьна рʹелигийа ԛәлп, у чаԝа щьмәʹта Хԝәде ԝе щӧдә бьн жь мәрьвед дьн?

⁷ Чь ԝе бьԛәԝьмә паши кʹӧтакьрьна рʹелигийа ԛәлп? Ԝи ԝәʹдәйи ԝе әʹйан бә, һәла бь рʹастийе дьле мәда чь йә. Ԝи чахи, гәләк мәрьв ԝе жь «ԛәйед чʹийада», демәк жь тʹәшкиләтед мәрьва, хьлазкьрьне у аликʹарийе бьгәрʹьн (Әʹйанти 6:15-17). Ле щьмәʹта Йаһоԝа ԝе гӧмана хԝә бьдә сәр ԝи, кӧ әԝ ԝе ԝана хьлаз кә. Чахе ԛьрʹна йәкеда һӧщӧмкьрьна сәр Оршәлиме «кьн» бу, һьнге әԝ ԝәʹдә нә бона һʹәму Щьһуйа бу, ԝәки әԝана ньшкева бьбуна Мәсиһи. Ле әԝ ԝәʹдә бона Мәсиһийа бу, сәва кӧ әԝана жь Оршәлиме бьрʹәвьн, чаԝа кӧ Иса тʹәми да ԝан. Ахьрийеда жи ԝе ӧса бьбә. Чахе һӧщӧмкьрьна Бабилона мәзьн «кьн» бә, әм гәрәке һивийе нибьн кӧ гәләк мәрьв ньшкева бьбьнә Мәсиһийед рʹаст. Дәԝса ԝе йәке әԝ ԝәʹдә, ԝе мәщал бә бона ԛӧльхкʹаред рʹаст, сәва кӧ әԝана избат кьн һʹьзкьрьна хԝә һьндава Йаһоԝа у али рʹункьрийа бькьн (Мәтта 25:34-40).

⁸ Рʹаст ә әм һʹәму тьшти ньзаньн, кӧ ԝе чь бьԛәԝьмә ԝәʹде щерʹьбандьне. Ле гәрәке әм һивийе нибьн, кӧ ԝи чахи жийин ԝе һеса бә. Дәԝса ве йәке әм гәрәке һивийе бьн, кӧ дьбәк ԝе лазьм бе тьштәки ԛӧрбан кьн йан жи жь хԝә кем кьн. Ԛьрʹна йәкеда, Мәсиһи малед хԝә һиштьн у бәр гәләк чәтьнайа тәйах дькьрьн, сәва кӧ хьлаз бьн (Марԛос 13:15-18). Ләма жи әм гәрәке хԝә бьпьрсьн: «Гәло әз һазьр ьм һәбуна хԝә бьһельм? Гәло әз һазьр ьм һʹәму тьшти бькьм, сәва кӧ Йаһоԝарʹа амьн бьминьм?» Тӧ тʹәне бьфькьрә, ԝи ԝәʹдәйи чь жи бьԛәԝьмә, тʹәне әме Хԝәдайе хԝәрʹа ԛӧльх кьн, чаԝа кӧ Данийел пʹехәмбәр дькьр (Данийел 6:10, 11).

9, 10. а) Ԝәʹде тәнгасийа мәзьн, щьмәʹта Йаһоԝа ԝе кʹижан әʹламәтийе бәла кьн? б) Ԝи ԝәʹдәйи дьжмьне щьмәʹта Хԝәде, ԝе хԝә ча кʹьфш кьн?

⁹ Тәнгасийа мәзьн, ԝе нә әԝ ԝәʹдә бә, кӧ «мьзгинийа Пʹадшатийе» даннасин кьн. Ԝәʹде даннасинкьрьна ве мьзгинийе ԝе дәрбаз бә. Чьмки зутьрәке ԝәʹде «хьлази» ԝе бе! (Мәтта 24:14). Щьмәʹта Хԝәде ԝе бь мерхаси әʹламәтийа диԝанкьрьне әʹлам кьн. Әԝ әʹламәти дькарә әԝ бә, кӧ дьнйа Шәйтʹанә зӧлм, ида бь тʹәмами һәрʹә бәрбь кʹӧтакьрьне. Кʹьтеба Пироз әԝе әʹламәтийе бәрамбәри тәйроке дькә: «Жь әʹзмен тәйрока гьрә ԝәкә пенщи килограме сәр мәрьвада бари. Мәрьва жь дәст ледана тәйроке кʹьфьри ль Хԝәде кьрьн, чьмки әва бәла гәләки гьран бу» (Әʹйанти 16:21).

¹⁰ Дьжмьнед мә әԝ әʹламәтийа сәрт ԝе бьбьһен. Йаһоԝа бь пʹехәмбәр Һәзәԛел гот, кӧ ча ԝе хԝә кʹьфш кә Гог у Магог, демәк мьләтед дьнйайе: «Хӧдан, Хӧдан ӧса дьбежә: ‹Ԝе әԝ рʹожа ӧса бьбә кӧ, ԝе һьнәк тьшт бен аԛьле тә у тӧйе раманен [фькьред] хьраб бьфькьри у тӧйе бежи: ‹Әз һьлкʹьшьм ԝаре гӧндед бедиԝар, әз бь сәр йед кӧ дь рʹьһʹәтийеда нә у дь әԝләкʹарийеда рʹудьнен һәрʹьм, гьшк бейи диԝар рʹуньштьнә у чьлмерәйед дәрийед ԝан у дәрийед ԝан нинә [тʹӧнә]›. Тӧйе бона тʹалан у йәхмә кьрьне у бона кӧ ль дьжи щийед чаԝа хьраб бубун, ле  ньһа мьров ле рʹудьньне у нәтʹәԝәйа кӧ жь гәланва һатьнә щьвандьн дәсте хԝә бьзьвьринә һьлкʹьшә, әԝ нәтʹәԝа кӧ дәԝар у мал ԛәзәнщ кьрийә; дь навька [сентра] дьнеда рʹудьне›» (Һәзәԛел 38:10-12). Нава һʹәму мәрьвада, щьмәʹта Хԝәде ԝе бькʹәвьнә чʹәʹва, бь симболик әԝана ԝе чаԝа «навька дьнеда» бьн. Ләма жи мьләтед дьнйайе ида ԝе хԝә нәгьрьн, у ԝе бьхԝазьн рʹункьрийед Йаһоԝа у әԝед кӧ пьштгьрийа рʹункьрийа дькьн, кʹӧта кьн.

11. а) Әм чь гәрәке бьзаньбьн дәрһәԛа ԝе йәке, кӧ чь паши чь ԝе бьԛәԝьмә ԝәʹде тәнгасийа мәзьн? б) Мәрьв ԝе ча хԝә кʹьфш кьн чахе нишана бьвиньн?

¹¹ Чахе Гог бьхԝазә щьмәʹта Хԝәде кʹӧта кә, паши ԝе йәке ԝе чь бьԛәԝьмә? Кʹьтеба Пироз рʹастә-рʹаст мәрʹа гьли накә, кӧ чь паши чь ԝе бьԛәԝьмә, ле һьнә ԛәԝьмандьн дьбәк жи щарәкерʹа бьԛәԝьмьн. Иса чахе пʹехәмбәрти кьр дәрһәԛа хьлазийа ве дьнйайе, әԝи гот: «У сәр рʹойе, һиве у стәйрка нишане бьбьн. Ль сәр дьне жи мьләте жь дәст дәнге хӧшинийа пʹелед бәʹре бьбьздьн у хԝә ӧнда кьн. Дьле мәрьва жи жь тьрса ԝе бьсәкьнә, бона әԝ тьштед кӧ ԝе бенә сәре тʹәмамийа дьне, чьмки тʹопед әʹзмана ԝе жь рʹийед хԝә дәрен. У һьнге ԝе бьбиньн кӧ Кӧрʹе Инсан әʹԝрава бь ԛәԝат у рʹумәта мәзьн те». (Луԛа 21:25-27; Бьхунә Марԛос 13:24-26.) Гәло чахе әԝ пʹехәмбәрти бе сери, бь рʹастийе ль әʹзмана ԝе нишан у ԛәԝьмандьн һәбьн? Әм гәрәке һивийе бьн кӧ бьвиньн. Ле әм заньн кӧ, чахе дьжмьнед Хԝәде ԝан нишана бьвиньн, ԝе тьрс бькʹәвә дьле ԝан у бькʹәвьнә панике.

12, 13. а) Чь ԝе бьԛәԝьмә чахе Иса «бь ԛәԝат у рʹумәта мәзьн» бе? б) Ԝи чахи щьмәʹта Хԝәде ԝе ча хԝә бьдә кʹьфше?

¹² Чь ԝе бьԛәԝьмә чахе Иса «бь ԛәԝат у рʹумәта мәзьн» бе? Иса ԝе ԝан хәлат  кә, кʹижан кӧ амьн бьн, ле йед нәамьн, әԝ ԝе диԝана ԝан бькә (Мәтта 24:46, 47, 50, 51; 25:19, 28-30). Иса мәсәлә ани, сәва шьровәкә, кӧ әԝ йәк ԝе ча бьԛәԝьмә. Әԝи гот: «Гава Кӧрʹе Инсан тʹәви һʹәму мьлйакʹәта у рʹумәта хԝәва бе, һьнге ԝе сәр тʹәхте хԝәйи рʹумәте рʹуне һʹәму мьләт ԝе ль бәр ԝи бьщьвьн. Әԝе ԝана жь һәв башԛә кә, чаԝа шьван пез жь бьзьна вәдьԛәтинә. Әԝе пез ль мьле хԝәйи рʹасте бьдә сәкьнандьне, ле бьзьна ль мьле хԝәйи чʹәпе» (Мәтта 25:31-33). Чь ԝе бьбә тʹәви пез у бьзьна? Әԝана һәрдӧ жи ԝе бенә диԝанкьрьне. Бьзьн, демәк мәрьвед нәамьн, ԝе ԛьрʹ бьн сәр һʹәта-һʹәтайе. Ле пәз, демәк мәрьвед амьн, ԝе әʹмьре һʹәта-һʹәтайе бьстиньн (Мәтта 25:46).

¹³ Гәло бьзьн ԝе чаԝа хԝә кʹьфш кьн, чахе фәʹм кьн кӧ әԝана ԝе бенә ԛьрʹкьрьне? Әԝана ԝе «хԝә бьхьн» (Мәтта 24:30, ИМ). Ле рʹункьри у әԝед кӧ пьштгьрийа ԝан дькьн ԝе чаԝа хԝә кʹьфш кьн? Әԝана ԝе ӧса бькьн чаԝа кӧ Иса гот: «Рʹабьн сәре хԝә бьльнд кьн, чьмки азабуна ԝә иди незик ә» (Луԛа 21:28).

14, 15. Чь щьвандьн ԝе бьбә, паши дәстпебуна пәйкʹәтьна Гог у Магог, у әԝ щьвандьн ԝе ча бьԛәԝьмә?

¹⁴ Чь ԝе бьԛәԝьмә чахе Гог у Магог дәстпекә пәй щьмәʹта Хԝәде кʹәвә? Кʹьтеба Пироз дьбежә кӧ Кӧрʹе инсан ԝе «мьлйакʹәтед хԝә бьшинә у ԝе бьжартийед хԝә жь чар алийан, жь пʹәрʹе әʹрде һʹәта пʹәрʹе әʹзмен бьщьвинә» (Марԛос 13:27, ИМ; Мәтта 24:31). Әԝ щьвандьна рʹункьрийа найе һʹәсабе, әԝ ԝәʹдә чахе әԝана щара пешьн һатьнә бьжартьне. Әԝ щьвандьн ӧса жи найе һʹәсабе, кӧ рʹункьри кʹижан кӧ һе сәр әʹрде нә, ԝе мора хьлазийе бьстиньн (Мәтта 13:37, 38). Чьмки әԝана мора хьлазийе ԝе пешийа дәстпебуна тәнгасийа мәзьн бьстиньн (Әʹйанти 7:1-4). Ле ԝәки ӧса нә, әԝ щьвандьн чь те һʹәсабе? Әԝ щьвандьн те һʹәсабе, чахе рʹункьрийед кӧ һе сәр әʹрде нә, хәлата хԝә бьстиньн у һәрʹьнә ль әʹзмана (1 Тʹесалоники 4:15-17; Әʹйанти 14:1). Әԝ йәк ԝе бьԛәԝьмә, һьнәк ԝәхт паши дәстпекьрьна һеришкьрьна Гог у Магог (Һәзәԛел 38:11). Паше, чаԝа кӧ Иса гот, «мәрьвед рʹаст ԝе Пʹадшатийа Баве хԝәда мина тәʹве шәԝԛ бьдьн» (Мәтта 13:43). b (Бьньһерʹә спартьн.)

¹⁵ Гәләк Мәсиһийед ве дьнйайе баԝәр дькьн, кӧ әԝана ԝе һәрʹьн ль әʹзмана, бь бәдәна мәрьви. Әԝана ӧса жи дьфькьрьн, кӧ әԝана ԝе бь чʹәʹве хԝә бьвиньн, кӧ ча Иса вәдьгәрʹә сәр әʹрде сәва кӧ сәрԝертийе бькә. Ле Кʹьтеба Пироз әʹйан нишан дькә, кӧ һатьна Иса ԝе нәйе дитьне, чьмки «нишана Кӧрʹе Инсан ԝе ль әʹзмен хӧйа бә», у кӧ Иса ԝе «ль сәр әʹԝред әʹзмен» бе (Мәтта 24:30). Һьн жи Кʹьтеба Пироз дьбежә, кӧ «хун у гошт ль Пʹадшатийа Хԝәде нькарьн ԝар бьн». Демәк, әԝед кӧ ԝе һәрʹьнә ль әʹзман, пешийе гәрәке «бенә гӧһастьне, ньшкева, чаԝа чʹәʹве хԝә бьгьри-вәки, дәма борʹийа ахьрийе бе ледане». c (Бьньһерʹә спартьн.) (Бьхунә 1 Корьнтʹи 15:50-53.) Жь ԝе йәке әм дьвиньн кӧ рʹункьрийед амьн, кʹижан кӧ һе сәр әʹрде нә, ԝе дәрберʹа бенә щьвандьне.

16, 17. Чь ԝе бьԛәԝьмә пешийа дәʹԝата Бәх?

¹⁶ Чахе һʹәму 144 000 рʹункьри ль әʹзмен бьн, ида дькарә дәстпебә һазьркьрьнед хьлазийе бона дәʹԝата Бәх (Әʹйанти 19:9). Ле пешийа дәʹԝате, гәрәке тьштәк  бьԛәԝьмә. Биньн бира хԝә, кӧ Гог ԝе пәй щьмәʹта Хԝәде кʹәвә, чахе рʹункьрийед кӧ манә һе сәр әʹрде бьн (Һәзәԛел 38:16). Ле щьмәʹта Хԝәде ԝе чь бькә? Әԝана ԝе гӧһ бьдьнә ве тʹәмийе: «Йе кӧ дь ԝи шәрида щәнге бькә нә һун ьн; . . . рʹез гьредьн у бьсәкьньн, тʹәви хԝә хьлазийа Хӧдан бьвиньн; нәтьрс ьн у нәкʹәвьн безарийе» (2 Дирок 20:17). Чахе Гог пәйкʹәтьне дәстпекә, һʹәму рʹункьри сәр әʹрде ԝе һьлкʹьшнә ль әʹзмен. Ле ль әʹзмен ԝе чь бьԛәԝьмә чахе Гог пәй мә кʹәвә? Әʹйанти 17:14 дьбежә кӧ дьжмьнед щьмәʹта Хԝәде ԝе «тʹәви Бәрх шәрʹ бькьн, ле Бәрх тʹәви йед газикьри, бьжарти у амьна ԝе ль сәр ԝан бькарьбә». Демәк, Иса у 144 000 рʹункьри ԝе щьмәʹта Хԝәде сәр әʹрде хьлаз кьн.

¹⁷ Әԝ хьлазкьрьн ԝе ԝәʹде шәрʹе Һармәгәдоне бә, кʹижан кӧ ԝе наве Йаһоԝайи пироз рʹумәт кә (Әʹйанти 16:16). Һʹәму мәрьвед кӧ ԝе бенә диԝанкьрьне ча бьзьн, демәк йед нәамьн, ԝе бенә кʹӧтакьрьне. Ида тʹӧ щар зӧлми у нәһәԛи ԝе тʹӧнә бә сәр әʹрде, у «әʹлаләтәкә мәзьн» ԝе жь Һармәгәдоне хьлаз бә. Ахьрийе, пʹехәмбәртийа хьлазийа кʹьтеба Әʹйанти ԝе бе сери, демәк ԝе дәʹԝата Бәх бә! (Әʹйанти 21:1-4) d (Бьньһерʹә спартьн.) Һʹәмуйед кӧ ԝе хьлаз бьн ԝе пʹьрʹ ша бьн, чьмки ԝе бьвиньн ԛәбулкьрьна Хԝәде у һʹьзкьрьн у мәрʹданийа ԝи. Әм гәләк һивийа ԝи ԝәʹдәйи нә. Дәрбазкьрьна дәʹԝате ԝе чьԛас баш бә! (Бьхунә 2 Пәтрус 3:13.)

18. Жь бо ве йәке кӧ ԝе зутьрәке әԝ пʹехәмбәрти бенә сери, әм чь гәрәке сафи кьн кӧ бькьн?

¹⁸ Һʹәта кӧ әԝ ԛәԝьмандьн зутьрәке бьԛәԝьмьн, иро әм гәрәке чь бькьн? Йаһоԝа Паԝлос һелан кьр кӧ бьньвисә: «Һәгәр әв һәр тьшт ԝе бь ви аԝайи ԝеран бьн һәрʹьн, һун гәрәке мәрьвнә чаԝа бьн? Гәрәке һун жийина һʹәлал у хԝәденасийеда бьмәшьн, һивийа Рʹожа Хԝәде бьн у һатьна ԝи ләз хьн . . . Аԝа дәлално, һун кӧ һивийа ван йәка нә, бькьн кӧ әԝ ԝә беләкʹә у беԛӧсур әʹдьлайийеда тʹәви хԝә бьбинә» (2 Пәтрус 3:11, 12, 14). Ԝәрен әм һʹәму тьшти бькьн, сәва кӧ ԛӧльхкьрьна хԝә тʹәмьз хԝәй кьн, кӧ тʹәви религийа ԛәлп гьредайи нибә, у пьштгьрийа Пʹадша Иса Мәсиһ бькьн.