1, 2. Хәбәра «бьнпʹи» дь Ньвисаред Ибранида чь дькарә бе һʹәсабе?

 ЙАҺОԜА ХԜӘДЕ гот: «Тʹәхта мьн әʹзман у жь льнгед мьнрʹа пʹельк [бьнпʹи, ДТʹ] әʹрд ьн» (Ишайа 66:1). Хԝәде ӧса жи дәрһәԛа «бьнпʹийа» хԝә ӧса гот: «Әзе щиһе льнгед хԝә пироз бькьм» (Ишайа 60:13). Ле әԝ ԝе чаԝа бьнпʹийа хԝә пироз кә? У әԝ йәк чь те һʹәсабе бона ԝан, йед кӧ дьжин бьнпʹийа ԝи, демәк сәр әʹрде?

² Дь Ньвисаред Ибранида, хәбәра «бьнпʹи» ӧса жи һатә хәбьтандьне, чахе хәбәрдан дьчу дәрһәԛа пʹарьстгәһа бәре дь Исраеледа (1 Дирок 28:2; Зәбур 132:7). Әԝ пʹарьстгәһ бона Йаһоԝа гәләк бәдәԝ у хԝәш бу, чьмки әԝ щийе ԛӧльхкьрьн у һʹәбандьна рʹаст бу. У әԝ пʹарьстгәһ дьһатә хәбьтандьне, сәва кӧ сәр әʹрде Йаһоԝа рʹумәт бә.

3. Иро чь йә щийе ԛӧльхкьрьн у һʹәбандьна рʹаст, у кʹәнге әԝ кʹәтә ԛәԝате?

³ Ле иро чь йә щийе ԛӧльхкьрьн у һʹәбандьна рʹаст? Әԝ һәйә пʹарьстгәһа рʹӧһʹани, нә кӧ пʹарьстгәһа бь дәсте мәрьва авакьри. Пʹарьстгәһед бәре һаԛас Йаһоԝа рʹумәт нәдькьрьн, чьԛас кӧ пʹарьстгәһа рʹӧһʹани рʹумәт дькә. Ле чь йә пʹарьстгәһа  рʹӧһʹани? Әԝ пʹарьстгәһ те һʹәсабе, һʹәму тьшт чь кӧ Йаһоԝа һазьр кьр у саз кьр бона һʹәбандьн у ԛӧльхкьрьна рʹаст. Бь сайа ве йәке Йаһоԝа мәрьварʹа рʹе вәдькә кӧ бьбьнә дост у ԛӧльхкʹаред ԝи. Әԝ йәк һатә стандьне тʹәне бь сайа ԛӧрбанбуна Иса. Әԝ сазкьрьна Йаһоԝа кʹәтә ԛәԝате сала 29-да, чахе Иса һатә ньхӧмандьне у бу чаԝа Сәрәккʹаһин дь пʹарьстгәһа Йаһоԝайә рʹӧһʹанида (Ибрани 9:11, 12).

4, 5. а) Ль гора гьлийед жь Зәбур 99, ԛӧльхкʹаред Йаһоԝайи рʹаст чь дьхԝазьн бькьн? б) Әм чь пьрсе гәрәке бьдьнә хԝә?

⁴ Әм жь Хԝәде гәләк рʹази нә, сәва чь кӧ әԝи саз кьр у һазьр кьр бона әм бькарьбьн ԝи рʹаст бьһʹәбиньн у ԛӧльх кьн. Әм рʹазибуна хԝә әʹйан дькьн, чахе мәрийарʹа гьли дькьн дәрһәԛа наве ԝи у пʹешкʹеша ԝийә ԛимәт, демәк ԛӧрбане. Әм гәләк ша дьбьн кӧ һʹәйшт милйона зедәтьр Мәсиһийед рʹаст һәр рʹож Йаһоԝа рʹумәт дькьн! Рʹаст ә гәләк мәрьв баԝәр дькьн кӧ әԝана тʹәне ԝе паши мьрьне, сәр әʹзмана Хԝәде рʹумәт кьн, ле щьмәʹта Йаһоԝа занә кӧ чьԛас фәрз ә ԝи рʹумәт кьн ль ԝьр сәр әʹрде у ньһа.

⁵ Чахе әм Йаһоԝа һӧрмәт дькьн, әм чʹәʹв дьдьнә ԛӧльхкʹаред Хԝәдейи амьн, дәрһәԛа кʹижана кӧ дь Зәбур 99:1-3, 5-7-да те готьне. (Бьхунә.) Мәрьвед амьн, Муса, Һарун, у Самуйел бь тʹәмами пьштгьрийа ԝе йәке дькьрьн, чь кӧ Хԝәде чекьр бона һʹәбандьна рʹаст. Иро рʹункьри, һʹәта кӧ тʹәви Иса ль әʹзмана ԛӧльх кьн чаԝа кʹаһин, әԝана бь амьни Йаһоԝарʹа ԛӧльх дькьн дь пʹарәкә пʹарьстгәһа рʹӧһʹанида, ль сәр әʹрде. Милйона «пәзед дьн» бь амьни али ԝан дькьн (Йуһʹәнна 10:16). Әԝ һәрдӧ кʹом, бь йәкти Йаһоԝа дьһʹәбиньн. Ле әм гәрәке пьрсе бьдьнә хԝә: «Гәло әз пьштгьрийа ԝе йәке дькьм, чь кӧ Йаһоԝа бона һʹәбандьна рʹаст чекьр?»

6, 7. Чь чәтьнайи дәстпебу щьвата Мәсиһийед бәре, у чь ԛәԝьми бәрбь сала 1919?

⁶ Сәд сала кемтьр паши сазкьрьна щьвата Мәсиһити, рʹабәрибун бәла бу, чаԝа кӧ һатьбу пʹехәмбәртикьрьне (Кʹаред Шандийа 20:28-30; 2 Тʹесалоники 2:3, 4). Ләма жи, ԝи чахи һе зедә чәтьн бу, кӧ ԛӧльхкʹаред Хԝәдейи рʹаст нас кьн. Бь сәда сал дәрбаз бун, у паше Йаһоԝа бь Иса әʹйан кьр, кӧ дь пʹарьстгәһа Хԝәдеда бь рʹастийе кʹе бун ԛӧльхкʹаред рʹаст.

 ⁷ Бәрбь сала 1919, әʹйан бу кӧ Хԝәде кʹе ԛәбул дькә, у кʹе дь пʹарьстгәһа ԝийә рʹӧһʹанида ԛӧльх дькә. Әԝед кӧ пʹарьстгәһа Хԝәдейә рʹӧһʹанида ԛӧльх дькьрьн, гӧһастьне ӧса кьрьн, кӧ ԛӧльхкьрьн у һʹәбандьна ԝан һе Йаһоԝа хԝәш бе (Ишайа 4:2, 3; Малахи 3:1-4). Бь ԝе йәке, дитьнока кӧ Паԝлосе шанди сәда сала пешда дитьбу, дәстпебу бе сери.

8, 9. Чь «бӧһьшт» Паԝлос дитьнокеда дит?

⁸ Дитьнока Паԝлос һатийә гьликьрьне дь 2 Корьнтʹи 12:1-4-да (Бьхунә.) Дь ве дитьнокеда, Йаһоԝа Паԝлосрʹа әʹйан кьр, кӧ ахьрийеда чь гәрәке бьԛәԝьмә. Ле чь «бӧһьшт», йани щьнәт, Паԝлос дитьнокеда дит? Йа әʹԝльн, дьԛәԝьмә әԝ щьнәт ә, кʹижан кӧ зутьрәке ԝе ль сәр әʹрде бә (Луԛа 23:43). Йа дӧда, дьԛәԝьмә әԝ щьнәта рʹӧһʹани йә дьнйа тʹәзәда. Йа сьсийа, дьԛәԝьмә һʹале хԝәш, кʹижан кӧ ль әʹзмана «бӧһьшта Хԝәдеда йә» (Әʹйанти 2:7).

⁹ Ле чьрʹа Паԝлос гот кӧ әԝи «тьштед найенә готьне бьһистьн кӧ жь мерьв накʹәвә бона ԝан тьшта хәбәр дә жи?» Чьмки һе ԝәхт нибу, кӧ Паԝлос бь детала шьровәкьра әԝ тьштед баш, кʹижан кӧ әԝи дитьнокеда дитьбун. Ле иро, Йаһоԝа изьне дьдә, ԝәки әм мәрьварʹа гьли кьн дәрһәԛа кʹәрәмән кӧ щьмәʹта Йаһоԝа дьстинә у ша дьбә!

10. Чьрʹа щьнәта рʹӧһʹани у пʹарьстгәһа рʹӧһʹани нә йәк ьн? Шьровәкьн.

¹⁰ Әм гәләк щар хәбәрдьдьн дәрһәԛа щьнәта рʹӧһʹани. Ле чь те һʹәсабе щьнәта рʹӧһʹани? Щьнәта рʹӧһʹани әԝ әʹдьлайи йә, кʹижан кӧ Хԝәде дьдә щьмәʹта хԝә. Демәк, щьнәта рʹӧһʹани у пʹарьстгәһа рʹӧһʹани йәк ниньн. Чьмки пʹарьстгәһа рʹӧһʹани әԝ ә чь кӧ Хԝәде саз кьр бона һʹәбандьна рʹаст. Ле щьнәта рʹӧһʹани әʹйан кʹьфш дькә ԝан мәрьва, кʹижана кӧ Хԝәде ԛәбул дькә у пʹарьстгәһа ԝида ԛӧльх дькә (Малахи 3:18).

11. Мә чь ԛәдьр стандийә?

¹¹ Әм чьԛас ша нә, чьмки заньн кӧ жь сала 1919 Йаһоԝа изьн да мәрьвед нәԛәданди, ԝәки әԝана щьнәта рʹӧһʹани баш кьн, пешда бьвьн у ԛәԝи кьн. Ле тӧ пьштгьрийа ԝи шьхӧли дьки? Тӧ дьшекьрини әԝи ԛәдьри, кӧ дькари тʹәви Йаһоԝа шьхӧлкʹарийе бьки, сәва кӧ ԝи сәр әʹрде рʹумәт ки?

12. Әм жь кʹӧ заньн кӧ гьлийед жь Ишайа 60:17 һатә сери? (Бьньһерʹә шькьле әʹԝльн.)

¹² Ишайа пʹехәмбәрти кьр, кӧ гәләк гӧһастьнед баш гәрәке бьԛәԝьмьн дь пʹарәкә тʹәшкиләта Хԝәдейә сәр әʹрдеда. (Бьхунә Ишайа 60:17.) Мәсиһийед щаһьл йан жи йед тʹәзә, тʹәне хԝәндьнә йан жи бьһистьнә дәрһәԛа ԝан гӧһастьна. Ле һәнә гәләк хушк-бьра, кӧ хԝәха дитьнә әԝ гӧһастьнед баш. Әԝ ԛӧльхкʹаред амьн баԝәр ьн, кӧ Хԝәде бь Иса рʹебәрийе тʹәшкиләта хԝә дькә! Чахе әм дьбьһен кӧ ча ԝан хушк-бьра хԝәха дитьнә әԝ гӧһастьн, баԝәрийа мә у итʹбарийа мә һьндава Йаһоԝа һе ԛәԝи дьбә.

13. Ль гора готьнед Зәбур 48:12-14, әм чь гәрәке бькьн?

¹³ Һʹәму Мәсиһийед рʹаст, гәрәке дәрһәԛа тʹәшкиләта Йаһоԝа мәрьварʹа гьли кьн. Әв йәк кʹәрәмәт ә, кӧ һәла һе ве дьнйа Шәйтʹанә зӧлмда жи, әм тʹәви бьратийа хԝә, әʹдьлайе у йәктийеда ньн! Әм гәрәке бь шабуне рʹькʹьнйата нурʹа гьли кьн, дәрһәԛа тʹәшкиләта Йаһоԝа у дәрһәԛа щьнәта рʹӧһʹани! (Бьхунә Зәбур 48:12-14.)

14, 15. Кʹижан гӧһастьн һатьнә кьрьне паши сала 1970, у тʹәшкиләте ча жь ԝе йәке кʹар станд?

¹⁴ Гәләк хушк-бьред мә хԝәха дитьнә әԝан гӧһастьн, кʹижан кӧ һе баш у бәдәԝ кьрьн пʹарәкә тʹәшкиләта Йаһоԝа йа сәр  әʹрде. Мәсәлә, те бира ԝан хушк у бьра, чахе дәԝса кʹома рʹуспийа, щьватада һәбу тʹәне хьзмәткʹарәки щьвате, чахе ԝәлатда дәԝса Комитейа Филиале, хьзмәткʹарәки филиале һәбу, йан жи чахе дәԝса Кʹома Рʹебәрийе, президенте Щьвака Бьрща Ԛәрәԝьлийе рʹебәри дьда. Рʹаст ә ԝи чахи һәбун аликʹарчи кʹижан кӧ али ԝан бьра дькьрьн, ле йәкә тʹәне йәк бу йе щабдар бона сафикьрьна дь щьватада, филиалада, у дь офиса сәрәкәда. Паши сала 1970, гӧһастьн һатьнә кьрьне, демәк дәԝса йәки, ида кʹома рʹуспийа щабдар бу бона сафикьрьнед дь щьватеда.

¹⁵ Чьрʹа әԝан гӧһастьна тʹәшкиләтерʹа кʹар анин? Чьмки әԝ гӧһастьн һатьнә кьрьне сәр һʹиме ве йәке, кӧ Кʹьтеба Пироз дьһа рʹаст һатә фәʹмкьрьне. Дәԝса кӧ тʹәне мәрьвәк һʹәму сафикьрьна бькә, ньһа ида кʹома рʹуспийа сафикьрьна дькьн, у тʹәшкиләт жи кʹаре дьстинә жь һӧнӧред һʹәму рʹуспийайә баш, йед кӧ Йаһоԝа дайә ча «пʹешкʹеш бь щурʹе мәрьва» (Әфәси 4:8, ДТʹ; Мәтʹәлок 24:6).

16, 17. Кʹижан гӧһастьнед пашԝәхтийе тәрʹа һʹәԝас һатьн, у чьрʹа?

¹⁶ Һәла бьфькьрә дәрһәԛа ԝе йәке кӧ чаԝа ԝан пашԝәхтийа әʹдәбйәтед мә һатьнә гӧһастьне. Әм ша нә ԝәʹде даннасинкьрьне бәла кьн әʹдәбйәтед кӧ һʹәԝас ьн у али мәрьва дькьн. Бьфькьрә ӧса жи, әм чаԝа техноложийед тʹәзә дьдьнә хәбате, сәва кӧ мьзгинийа хере бәла кьн. Мәсәлә, малпәра jw.org али гәләк мәрьва дькә, сәва кӧ әԝана аликʹарийа лазьм бьстиньн. Дь ван һʹәму гӧһастьнада, әм әʹйан дьвиньн хәмкьрьн у һʹьзкьрьна Йаһоԝа һьндава мәрьва.

¹⁷ Әм ӧса жи дьшекьриньн әԝ гӧһастьна дәрһәԛа щьвата, жь бо кʹижана кӧ әм дькарьн ԝәʹдә бьвиньн, кӧ ԛӧльхкьрьна тʹәви малбәте йан жи һинбуна шәхси дәрбаз кьн. Әм ӧса жи рʹази нә, сәва гӧһастьнед  бәрнамед щьватед мәйи мәзьн. Әԝ бәрнамә һәр сал һе баш у баш дьбьн! Әм ӧса жи гәләк рʹази нә, кӧ гәләк мәкʹтәбед мә һәнә, кʹидәре кӧ әм һин дьбьн у кʹаре дьстиньн. Дь ԝан һʹәму гӧһастьнада, әм әʹйан дьвиньн кӧ Йаһоԝа рʹебәрийа тʹәшкиләта хԝә дькә, у кӧ әԝ щьнәта рʹӧһʹани һе бәдәԝ дькә!

18, 19. Ча әм дькарьн щьнәта рʹӧһʹани һе бәдәԝ кьн?

¹⁸ Йаһоԝа ԛәдьр дайә мә, кӧ әм дькарьн аликʹарийе бьдьн кӧ щьнәта мәйә рʹӧһʹани һе бәдәԝ бә. Ле әм ча әԝе йәке дькьн? Әм бь хирәт даннасин дькьн мьзгинийа хере дәрһәԛа Пʹадшатийе, у шагьрта һазьр дькьн. Һәр щар чахе әм али кәсәки дькьн, сәва кӧ әԝ мәрьв бьбә ԛӧльхкʹаре Хԝәде, бь ве йәке әм аликʹарийе дьдьн кӧ щьнәта рʹӧһʹани мәзьн бә (Ишайа 26:15; 54:2).

¹⁹ Әм ӧса жи щьнәта рʹӧһʹани бәдәԝ дькьн, чахе сәр хԝә дьхәбьтьн, сәва кӧ бьбьнә Мәсиһийед һе баш. Чахе әм ӧса дькьн, әԝ щьнәта рʹӧһʹани һе һʹәԝас дьбә бона мәрьвед дьн. Нә кӧ тʹәне занәбуна мәйә Кʹьтеба Пироз, ле тʹәмьзбуна мә у рʹабун-рʹуньштандьна мәйә баш, һʹәԝаса мәрьва тинә пешийе бәрбь тʹәшкиләте, у паше бәрбь Йаһоԝа у Иса.

20. Ль гора готьнед Мәтʹәлок 14:35 хԝәстьна мә гәрәке чь бә?

²⁰ Йаһоԝа у Иса гәләк ша дьбьн чахе дьвиньн щьнәта мәйә рʹӧһʹанийә иро. Әԝ шабун кӧ әм ньһа щьнәта рʹӧһʹани бәдәԝ дькьн, һаԛас нә мәзьн ә, чьԛас әԝ шабун чахе әме бьхәбьтьн ԝәки әʹрде бькьнә щьнәт. Әм гәрәке тʹьме бира хԝәда хԝәй кьн рʹеза жь Мәтʹәлок 14:35, ДТʹ, кʹидәреда те готьне: «Пʹадша жь ԝи хӧламе хԝә рʹази йә, йе кӧ бь аԛьлайи дькә». Ԝәрен әм билан бьн кӧ гәләк бьхәбьтьн бона щьнәта рʹӧһʹани һе бәдәԝ кьн!