ТʹЕМА ЖЬ РʹУЙЕ ЖУРНАЛЕ | ЖИЙИН ПАШИ МЬРЬНЕ—ГӘЛО ДЬԚӘԜЬМӘ?
Гәло Чь Дьԛәԝьмә Паши Мьрьне?
«Әз дьфькьрим, кӧ чахе мәрьв дьмьрьн, әԝана дьчьнә йан ль әʹзмен, йан щәʹньме, йан жи щийе паԛьжкьрьне. a (Бьньһерʹә спартьн.) У мьн заньбу кӧ әз һаԛас баш ниньм кӧ һәрʹьмә ль әʹзмен, у һаԛас хьраб жи ниньм кӧ һәрʹьмә щәʹньме. Ле щийе паԛьжкьрьне бона мьн нә әʹйан бу, кӧ әԝ чь щи йә у ль ԝедәре чь дьԛәԝьмә. Мьн фькьред ӧса дь Кʹьтеба Пирозда тʹӧ щики нәдитийә. Фькьред ӧса тʹәне мәрьва дьготьн» (Лионел).
«Әз ӧса һатьбум һинкьрьне кӧ һʹәму мәрьв паши мьрьне дьчьнә ль әʹзмен, ле әз ве йәкеда дӧдьли дьбум. Әз дьфькьрим кӧ мьрьн хьлазийа һʹәму тьшти йә, у кӧ бона мьрийа ахьри тʹӧнә йә» (Фернандо).
Һун ԛә фькьринә сәр ван пьрса: «Бь рʹастийе чь дьԛәԝьмә паши мьрьне? Гәло дьбәкә мәрьвед мәйи һʹьзкьри щики дьчәрчьрьн? Гәло әме ԝана диса бьвиньн? Әм ча дькарьн ԝе йәкеда баԝәр бьн?» Ԝәрә әм шеԝьр кьн, һәла Кʹьтеба Пироз чь һин дькә дәрһәԛа ԝан пьрса. Йа пешьн ԝәрә әм леколин кьн, кӧ Кʹьтеба Пироз дәрһәԛа мьрьне чь дьбежә. Паше әме шеԝьр кьн кӧ Хәбәра Хԝәде, йани Кʹьтеба Пироз, чь гӧмане дьдә дәрһәԛа мьрийа.
Гәло мьри чь һʹалида ньн?
КʹЬТЕБА ПИРОЗ ЩАБА ВЕ ПЬРСЕ ДЬДӘ: «Жь бәр, йед кӧ дьжин дьзаньн кӧ ԝе бьмьрьн; ле бәле мьри бь тьштәки ньзаньн у еди бона ԝан мише нинә; жь бәр кӧ биранина ԝан һатийә жь бир кьрьн. Тьште кӧ бона ль сәр хәбат кьрьне тә дитйә һәр чь бә, бь һеза [ԛәԝата] хԝә ль сәр ԝе бьхәбьтә; жь бәр кӧ ль ԝаре мьрийан, йа кӧ тӧйе һәре кʹар у раман [фькьр], занин у занйари нинә» b (Бьньһерʹә спартьн.) (Ԝаиз 9:5, 10).
Һәрге һеса бежьн, Ԝаре Мьрийа әԝ щийе һʹәму мьрийа йә; ле әԝ щи бь симболик ә, кʹидәре кӧ һʹәму занин у кʹаркьрьн хьлаз дьбә. Ибо мәрьве амьн чь дьфькьри дәрһәԛа «Ԝаре Мьрийа»? Әԝи рʹожәкеда ӧнда кьр һʹәму һәбуна хԝә у зарʹед хԝә, у һьн жи паше сәр тʹәмамийа бәдәна ԝи пʹьрзьк дәркʹәтьн, жь бо кʹижана әԝ зәʹф дьчәрчьри. У әԝи жь Хԝәде лава кьр: «Хԝәзьла тӧ мьн дь ԝаре мьрийанда [«щәʹньмеда», Catholic Douay Version] вәшерә» (Ибо 1:13-19; 2:7; 14:13). Әʹйан ә кӧ Ибо нә дьфькьри кӧ Ԝаре Мьрийа әԝ һәйә щәʹньма бь агьр, демәк әԝ щи кʹидәре кӧ щәфе ԝи һе хьраб бьн. Дәԝсе әԝ дьфькьри кӧ Ԝаре Мьрийа щийе рʹьһʹәтийе йә.
Әм бь щурʹәки дьн жи дькарьн пебьһʹәсьн кӧ мьри чь һʹалида ньн. Әм дькарьн леколин кьн һьнә сәрһатийед жь Кʹьтеба Пироз, йе кӧ бь рʹебәрийа Хԝәде һатьнә ньвисаре, дәрһәԛа һʹәйшт мәрьва, йед кӧ жь мьрьне вәгәрʹийанә жийине. Бьньһерʹә чаргошә « Сахкьрьна Һʹәйшт Мәрьва кӧ Кʹьтеба Пирозда Те Гьликьрьне».
Жь ԝан һʹәйшта тʹӧ кәси паши сахбуне гьли нәкьр, кӧ әԝ щийе гәләк башда бу йан жи щийе щәфа у чәрчьрандьнеда бу. Һәрге әԝ мәрьвед кӧ сах бун, щийед ԝи щурʹәйида буна, гәло ԝана ԝе мәрьварʹа гьли нәкьрана? У гәло ԝе әԝ йәк дь Кʹьтеба Пирозда нәһата ньвисаре, сәва кӧ гьшк бьзаньбьн? Кʹьтеба Пирозда кӧ бь рʹебәрийа Хԝәде һатә ньвисаре, тьштед ӧса нәньвисар ә. Чьмки тʹӧ тьшт тʹӧнә бу кӧ ԝан һʹәйшт мәрьва бьготана. Чьрʹа? Чьмки әԝана һаш жь хԝә тʹӧнә бун, мәсәлә чаԝа кӧ хәԝна кʹурда. У Кʹьтеба Пироз щара мьрьне бәрамбәр дькә тʹәви рʹазане. Мәсәлә, чахе Лазар мьр, Иса гот кӧ әԝ рʹаза йә (Йуһʹәнна 11:11-14).
Ле гәло чь гӧман һәйә бона мьрийа? Гәло әԝана дькарьн һʹьшйар бьн жь ве рʹазане?
a Паԛьжкьрьне һʹәсаб дькьн, кӧ йанчь паши мьрьне бәдәна мәрьв ԝәхтәки дьчәрчьрә, сәва кӧ жь гӧнед хԝә паԛьж бә, пешийа кӧ һәрә ль әʹзмен.
b Хәбәра «Ԝаре Мьрийа» йан жи «дийаре мьрийа» һатийә ԝәлгәрʹандьне жь хәбәра Ибрани «Шеол» у хәбәра Йунани «Һадес». Һьнәк ԝәлгәрʹандьнед Кʹьтеба Пирозда дьдьнә хәбате хәбәра «щәʹньм», ле әԝ фькьр кӧ мьри щикида нав агьрда дьчәрчьрьн, ль гора Кʹьтеба Пироз нинә.
