1. Жь чь те кʹьфше кӧ бәлакьрьна мьзгине бона Иса фәрз бу? Шьровәкьн.

 ИСА һʹьз дькьр дәрһәԛа Пʹадшатийа Хԝәде хәбәрдә. Чахе әԝ ль сәр әʹрде бу әԝи дьһа зәʹф хәбәрдьда дәрһәԛа Пʹадшатийе, нә кӧ сәр тʹемәкә дьн. Әԝи ԝәʹде хьзмәткьрьне 100 щари зедәтьр бәʹса Пʹадшатийе кьрийә. (Бьхунә Мәтта 12:34.)

2. Чьԛас мәрьв дьбәкә бьһистьн тʹәмийа Иса кӧ Мәтта 28:19, 20-да те готьне, у чьрʹа әм дькарьн әве йәке бежьн?

² Иса паши сахбуне рʹасти 500 мәрьва зедәтьр һат (1 Корьнтʹи 15:6). Дьбәкә ԝи чахи Иса тʹәми да кӧ мьзгине бәла кьн «һʹәму мьләтарʹа». Ле әԝ шьхӧл һеса нибу. a (Бьньһерʹә спартьн.) Әԝи готә ԝан кӧ шьхӧле бәлакьрьна мьзгине ԝе бәрдәԝам бә һʹәта «ахьрийа дьнйайе». У чахе әм мьзгине бәла дькьн, әм әве пʹехәмбәртийе тиньн сери (Мәтта 28:19, 20).

3. Кʹижан се тьшта али мә кьрьнә бәлакьрьна мьзгинеда?

 ³ Паши ве йәке чахе Иса тʹәми да дәрһәԛа бәлакьрьна мьзгине, әԝи гьлийед ӧса гот: «Әз . . . тʹәви ԝә мә» (Мәтта 28:20). Иса соз дайә пәйчуйед хԝә кӧ әԝ ԝе рʹебәрийе ԝи шьхӧли бькә у али ԝан бькә, кӧ мьзгине нав тʹәмамийа дьнйайе бәла кьн. Йаһоԝа тʹәви мә йә жи, чьмки сәва кӧ әм мьзгине бәла кьн әԝи мәрʹа «тьштед ԛәнщ» дайә (Ибрани 13:20, 21). Дь ве тʹемайеда, әме шеԝьр кьн се жь ԝан тьштед ԛәнщ: 1) һащәтед кӧ мә стандийә, 2) методед кӧ мә дайә хәбате, у 3) һинбун кӧ мә стандийә. Пешийе ԝәрен әм хәбәрдьн дәрһәԛа һьнә һащәта, кʹижан мә нава ԝан 100 салада дайә хәбате.

4. Чаԝа щурʹә-щурʹә һащәта али мә кьрьнә бәлакьрьна мьзгинеда?

⁴ Иса, Пʹадше мә, мьзгина дәрһәԛа Пʹадшатийе тʹәви тʹохьм бәрамбәр кьр, кʹижан кӧ щурʹә-щурʹә әʹрдда һатә чандьне (Мәтта 13:18, 19). Сәва кӧ бахчәван әʹрд һазьр кә, әԝ гәләк щурʹә һащәт дьдә хәбате. Ӧса жи, Пʹадше мә мәрʹа һащәт дайә, кʹижан кӧ әм дькарьн бьдьнә хәбате сәва кӧ али мәрьва бькьн кӧ мьзгине ԛәбул кьн. Һьнә һащәт кӧ мә да хәбате тʹәне ԝәʹдәки кьн керһати бун, ле һьнәк жи һʹәта иро жи әм дьдьнә хәбате. Ле әԝ һʹәму һащәт али мә кьрьнә кӧ бәлакьрьна мьзгинеда пешда һәрʹьн.

5. Чь йә бәлге пешанине, у мә әԝ ча дайә хәбате?

⁵ Сала 1933, мә дәстпекьр бьдьн хәбате бәлге пешанине, һащәт кʹижан кӧ али гәләка кьр кӧ дәстпекьн мьзгине бәла кьн. Әԝ бәлг бьчʹук бу, у теда ньвисар бу текстәкә һеса у кьн дәрһәԛа мьзгина жь Кʹьтеба Пироз. Щара текста ве бәлге дьһатә гӧһастьне. Ерленмейере бьра ԝәкә 10 сали бу чахе щара пешьн әԝ бәлг да хәбате. Әԝ гьли дькә: «Хәбәред пешийе тʹьме әԝ бун, ‹Жь кʹәрәма хԝә һун дькарьн әве бәлге бьхуньн?› Паше чахе хԝәйе мале дьхԝанд, мә гәрәке әʹдәбйәт бьһишта у рʹийа хԝә бәрдәԝам кьра».

6. Чаԝа бәлге пешанине кʹар ани?

⁶ Бәлге пешанине щурʹә-щурʹә тьштада али мьзгинвана кьр. Мәсәлә, һьнә мьзгинвана гәләк дьхԝастьн мьзгине бәла кьн, ле ԝана шәрм дькьрьн, у ньзаньбун чь хәбәрдьн ԝәʹде хьзмәтийе. Һьнә мьзгинванед дьн жи гәләк мерхас бун, у ԝана чь кӧ заньбун нава чәнд дәԛада гьли дькьрьн хԝәйе малерʹа. Ле чь кӧ ԝана дьгот тʹьме бь тактики нибу. Әԝ бәлге пешанине али һʹәму мьзгинвана кьр кӧ зәлал у һеса мьзгине дәрбази мәрьва кьн.

7. Чь һьнә кемаси һәбун ԝәʹде хәбьтандьна бәлге пешанине?

⁷ Хәбьтандьна бәлге пешанинеда һьнә кемаси жи һәбун. Хушка Греис Естеп гьли кьр: «Щара жь мә дьпьрсин, ‹Ижа, әԝ чь те һʹәсабе? Һун нькарьн хԝәха мьнрʹа бежьн дәрһәԛа ве йәке?›» Ӧса жи, һьнәк мәрьва нькарьбун бьхԝандана чь ньвиси бу дь ви бәлгида. Һьнәка жи әв бәлг тʹәне һьлдьдан у дәри дадьдан. Һьнәкарʹа жи хԝәш нәдьһат мьзгина мә, у ԝана әв бәлг дьԛәльшандьн. Рʹаст ә чәтьнайед ӧса һәбун, ле йәкә әви бәлги али мьзгинвана кьр кӧ мәрьварʹа мьзгине бәла кьн, у әʹйан бьн чаԝа мьзгинванед Пʹадшатийе.

8. Бәре фонографа дәста мә ча дайә хәбате? (Бьньһерʹә шькьле әʹԝльн.)

⁸ Һащәтәкә дьн кӧ паши сала 1930 мә дьда хәбате, әԝ һәбу фонографа дәста. Һьнәк хушк-бьред мә әв фонографа дәста нав дькьрьн Һарун, чьмки әве фонографе дәԝса ԝана хәбәр дьда. (Бьхунә Дәркʹәтьн 4:14-16.) Һәрге хԝәйе мале ԛайил бу кӧ бьбьһе, хьзмәткʹара ведьхьстьн готарәкә кьн сәр һʹиме Кʹьтеба Пироз, у паше һьнә әʹдәбйәт дьданә ԝан. Щара тʹәмамийа малбәте тʹәвайи тʹоп дьбун, сәва кӧ готаре  бьбьһен. Сала 1934, тʹәшкиләта мә дәстпекьр бона хьзмәткьрьне хԝәха фонографед дәста чекә. Ахьрийеда, бьра бона фонографе 92 щурʹә-щурʹә готар ньвисин.

9. Фонографа дәста чь кʹар ани?

⁹ Чахе Һилари Гослин йәк жь ԝан готара бьһист, әԝи әԝ фонографа дәста сәр һʹәфтеки хԝәст, сәва кӧ щинаред ԝи жи бьбьһен мьзгина жь Кʹьтеба Пироз. Ахьрийеда, һьнәк жь ԝан мәрьва кʹе бьһистьн әԝ готар хԝәстьн һе зедә рʹастийе бьзаньбьн, у һатьнә ньхӧмандьне. Дӧ ԛизед бьре Гослин ахьрийеда Мәкʹтәба Гиләд хьлаз кьрьн у бунә мисйонер. Фонографа дәста жи мина бәлге пешанине али гәләк хьзмәткʹара кьрийә, кӧ дәстпекьн мьзгине бәла кьн. Паше, бь сайа Мәкʹтәба Даннасинкьрьне Пʹадша дәстпекьр щьмәʹта хԝә һин кә, сәва кӧ әԝана бьбьнә дәрсдаред баш.

10, 11. Мә рʹожнамә у радио ча дайә хәбате сәва кӧ мьзгине бәла кьн, у чьрʹа әԝ метод керһати бун?

¹⁰ Щьмәʹта Хԝәде бь рʹебәрийа Иса щурʹә-щурʹә метод дайә хәбате, сәва кӧ мьзгин бьгьһижә гәләк мәрьва. Әԝ метод гәләк фәрз бун, илаһи ви чахи чахе хьзмәткʹар һьндьк бун. (Бьхунә Мәтта 9:37.) Мәсәлә, гәләк сал шунда мә рʹожнамә дьда хәбате сәва кӧ мьзгине бәла кьн. Һәр һʹәфтийе бьре Расел готар сәр һʹиме Кʹьтеба Пироз дьшандә нәшьрхана рʹожнаме. Паше әве нәшьрхане әв готар дьшандә нәшьрханед дь Канадеда, Әԝропаеда у Дәԝләтед Йәкбуйида. Бәрбь сала 1913 готаред бьре Расел һатьнә дәрхьстьне дь 2 000 рʹожнамада у ԝәкә 15 000 000 мәрьва әв рʹожнамә хԝәндьнә.

¹¹ Радиойе жи гәләк кʹар ани бәлакьрьна мьзгинеда. Бьре Рутерфорд 16 Нисане сала 1922, щара пешийе бь радиойе готар хԝәнд, у әв готар ԝәкә 50 000 мәрьва бьһистьн. Паше, мә ида хԝәха радиойа хԝә чекьр, бь наве ԜББР. Мә бәрнама пешьн 24 Сьбате сала 1924 дәрхьст. «Бьрща Ԛәрәԝьлийеда» 1 Кануна Пешьн сала 1924 һатә готьне: «Әм баԝәр ьн кӧ әԝ радио жь ԝан һащәтед кӧ бәре мә дайә хәбате бона бәлакьрьна мьзгине, йа лапә економи у керһати йә». Радиойе жи мина рʹожнаме али мә кьр кӧ мьзгине бәла кьн ԝан щийа, кʹидәре кӧ тʹәне чәнд хьзмәткʹар һәбун.

12. а) Кʹижан щурʹе бәлакьрьна мьзгине дь щийед кӧ гәләк мәрьв ьн тә хԝәш те? б) Чь дькарә али мә бькә кӧ әм нәтьрсьн мьзгине бәла кьн дь щийед кӧ гәләк мәрьв ьн?

¹² Иро бәлакьрьна мьзгине ль ԝан щийа кʹидәре кӧ гәләк мәрьв тʹоп дьбьн методәкә гәләк керһати йә. Лазьм ә гәләк ԛәԝат хәрщ кьн кӧ мәрьварʹа мьзгине бәла кьн, мәсәлә, щийед сәкьнандьна отобуса, тьрена, әʹрәба, у ӧса жи мәйданада у дькʹанада. Ле тӧ дьтьрси мьзгине бәла ки ль ԝан щийа кʹидәре кӧ гәләк мәрьв тʹоп дьбьн? Һәрге әре, дӧа бькә Хԝәдерʹа кӧ али тә бькә. Бьфькьрә ль сәр гьлийед бәрпьрсийаре рʹеви, бьре Манера: «Мә һәр методәкә тʹәзә йа бәлакьрьна мьзгине һʹәсаб дькьр диса щурʹәки баш кӧ чаԝа Йаһоԝарʹа хьзмәт кьн, әԝ щурʹәки баш бу бона избат кьн амьнийа хԝә ԝирʹа, демәк әԝ щерʹьбандьна амьнийа мә бу, у мә дькарьбу нишан кьра кӧ әм һазьр ьн хьзмәт кьн ԝирʹа чаԝа кӧ әԝ жь мә дьхԝазә». Чахе әм тьрса хԝә дьтәмьриньн у методед тʹәзә дьдьнә хәбате бона бәлакьрьна мьзгине, әм баԝәрийа хԝә һьндава Йаһоԝа ԛәԝи дькьн у дьбьнә мьзгинванед баш. (Бьхунә 2 Корьнтʹи 12:9, 10.)

13. Чьрʹа ԝәʹде бәлакьрьна мьзгине хәбьтандьна малпәра мә керһати йә? Чь ԛәԝьмандьн һәбун чахе ԝә да хәбате малпәра мә дь хьзмәтийеда?

¹³ Мә гәләкарʹа зәʹф һʹәԝас ә чахе мәрьварʹа гьли дькьн дәрһәԛа малпәра мә jw.org, кʹидәре кӧ әԝана дькарьн бьхуньн у бьдьнә кʹьшандьне әʹдәбйәтед ль сәр һʹиме  Кʹьтеба Пироз сәр 700 зьмана зедәтьр. Һәр рʹож 1.6 милйон зедәтьр мәрьв дькʹәвьнә малпәра мә. Бәреда, бь сайа радиойе мьзгин дьгьһиштә ԝан мәрьва йед кӧ щийед ӧса дьжин, кʹидәре кӧ чәтьн ә бьгьһижьне. Ле иро малпәра мә әԝе йәке дькә.

14. Чь һинбун лазьм бу хьзмәткʹарарʹа, у кʹижан мәкʹтәбе али ԝан кьр кӧ бьбьнә дәрсдаред һе баш?

¹⁴ Әԝ һащәт у методед кӧ мә дәрһәԛа ԝан шеԝьр кьр, гәләк кʹар анинә. Ле мьзгинванарʹа ԝан салада лазьм бу бенә һинкьрьне, кӧ чаԝа хьзмәт бькьн. Мәсәлә, щара хԝәйе мале ԛайил нибу ве йәкерʹа чь кӧ әԝи дь фонографеда дьбьһист. Ле һәбун йед ӧса жи, кʹижана кӧ ԛәбул дькьрьн у дьхԝәстьн һе зедә пебьһʹәсьн. Ләма мьзгинванарʹа лазьм бу кӧ бьзаньбьн, ча бь тактики щаба ԝан бьдьн йед кӧ нәԛайил ьн, у чаԝа бьбьнә дәрсдаред һе баш. Бешьк, рʹӧһʹе Хԝәдейи пироз али бьре Нейтан Нор кьр, кӧ бьвинә ԝәки мьзгинванарʹа лазьм ә һин бьн чаԝа хәбәрдьн ԝәʹде хьзмәтийе. Ләма жи дәстпека сала 1943, щьвата дәстпекьрьн организә кьн Мәкʹтәба Даннасинкьрьне. Әԝе мәкʹтәбе али гәләка кьр кӧ бьбьнә дәрсдаред һе баш.

15. а) Һьнәка сәр хԝә чь тʹәхмин дькьрьн чахе сәр Мәкʹтәба Даннасинкьрьне бь готаре дәрдькʹәтьн? б) Чаԝа созе Йаһоԝа кӧ Зәбур 32:8-да ньвисар ә, ԝә сәр хԝә тʹәхмин кьрийә?

¹⁵ Гәләк бьра һини ԝе йәке нәбун, кӧ сәр сене готаре бьхуньн. Бьре Раму тинә бира хԝә готара хԝәйә пешийе, сала 1944. Әԝ готара дәрһәԛа мәрьвәки бь наве Доәг бу, кӧ дь Кʹьтеба Пирозда ньвисар ә. Раму гьли дькә: «Чоке мьн һәвдькʹәтьн, дәсте мьн дьләрьзин, у дьране мьн дькьрьнә чʹьркә-чʹьрк. Әԝ щара пешьн бу кӧ әз бь готаре дәркʹәтьм бәр кафедьре». Рʹаст ә әԝ нәһеса бу, ле һәла һе зарʹ жи бь готаре дәрдькʹәтьн. Бьре Манера дькә бира хԝә  кӧ чь ԛәԝьми, чахе гәдәки щаһьл щара пешьн бь готаре дәркʹәт: «Әԝ һаԛас бәрхԝәдькʹәт, кӧ чахе дәстпекьр готара хԝә бежә, әԝи кьрә искә-иск. Ле йәкә әԝи хԝәрʹа сафи кьр кӧ нәсәкьнә, у ӧса тʹәмамийа готара хԝә бь искә-иске гот». Дьбәкә һун щаба хԝә надьн сәр щьвата у ль сәр сене дәрнакʹәвьн, чьмки шәрм дькьн, йан жи дьфькьрьн кӧ нькарьн әԝе йәке бькьн. Һәрге ӧса нә, жь Йаһоԝа аликʹарийе бьхԝазьн, кӧ әԝ али ԝә бькә кӧ тьрса хԝә бьтәмьриньн. Әԝ ԝе али ԝә жи бькә, чаԝа кӧ али ԝан кьр, йед кӧ тʹәзә дәркʹәтьн сәр Мәкʹтәба Даннасинкьрьне йа кӧ тʹәзә саз бьбу. (Бьхунә Зәбур 32:8.)

16. Чь бу нета Мәкʹтәба Гиләд а) ԝәʹде бәре б) жь сала 2011?

¹⁶ Тʹәшкиләта Йаһоԝа бона һинбуна хьзмәткʹара Мәкʹтәба Гиләд организә кьр. Нета ԝе мәкʹтәбе әԝ бу, кӧ али хушк-бьра бькә кӧ хԝәстьна хԝә мәзьн кьн бәлакьрьна мьзгинеда. Мәкʹтәба Гиләд дәстпебу сала 1943, у жь ԝи ԝәʹдәйи 8 500 шагьрт һатьнә һинкьрьне, у һатьнә шандьне ль 170 ԝәлата. Жь сала 2011-да ве мәкʹтәбеда тенә тʹәглифкьрьне ӧса жи пешәнгед мәхсус, бәрпьрсийаред рʹеви, у йед кӧ дь Бәйтʹәлада хьзмәт дькьн, у ӧса жи мисйонеред кӧ Мәкʹтеба Гиләд дәрбаз нәбьбун.

17. Мәкʹтәба Гиләд чь кʹар ани?

¹⁷ Гәло Мәкʹтәба Гиләд кʹар ани? Әре. Ԝәрә әм пебьһʹәсьн кӧ чь ԛәԝьми Жапонйайеда. Дь мәһа Тʹәбахеда сала 1949, дь ԝи ԝәлатида дәһа кемтьр хьзмәткʹар һәбун. Ле хьлазийа ве сале, 13 мисийонер тʹәви ԝан хьзмәткʹара мьзгин бәла дькьрьн. Иро, Жапонйайеда ида ԝәкә 216 000 хьзмәткʹар һәнә, у ԝәкә ниви жь ԝан пешәнг ьн.

18. Кʹижан мәкʹтәбед мәйә дьн һәнә?

¹⁸ Диса гәләк мәкʹтәбед мә һәнә, мәсәлә, Мәкʹтәба Хьзмәтийе, Мәкʹтәба сәва Пешәнга, Мәкʹтәба сәва Мьзгинванед Пʹадшатийе, Мәкʹтәба сәва Бәрпьрсийаред Мьһале у Жьнед Ԝан, у Мәкʹтәба сәва Әндәмед Комитейа Филиала у Жьнед Ԝан. Әԝан мәкʹтәба гәләк баш һин кьрьн хушк-бьред мә у баԝәрийа ԝан ԛәԝи кьрьн. Рʹасти жи әʹйан ә кӧ Иса бәрдәԝам дькә гәләк мәрьва һин кә.

19. Бьре Рассел чь гот дәрһәԛа шьхӧле бәлакьрьна мьзгине, у ча гьлийед ԝи һатьнә сери?

¹⁹ Пʹадшатийа Хԝәде 100 сала зедәтьр ә кӧ сәрԝертийе дькә. Нава ԝан салада, Пʹадшайе мә Иса Мәсиһ, рʹебәрийа шьхӧле бәлакьрьна мьзгине дькә. Сала 1916, Бьре Рассел баԝәр бу кӧ шьхӧле бәлакьрьна мьзгине ԝе бәла бә нава тʹәмамийа дьнйайе. Әԝи гот: «Әԝ шьхӧл зу пешда дьчә у ԝе һе зу пешда һәрʹә, чьмки ‹мьзгина дәрһәԛа Пʹадшатийе› гәрәке нав тʹәмамийа дьнйайе бе бәлакьрьне» («Фаьтһ он тһә Марщһ» А. Һ. Макмилан, рʹупʹела 69). Иро әԝ шьхӧл нав тʹәмамийа дьнйайе те бәлакьрьне! У әм чьԛас жь Йаһоԝа рʹази нә, кӧ әԝ һʹәму тьшти дьдә мә, сәва кӧ әм ԛьрара ԝи биньн сери!