1. Кʹижан ә һʹӧнӧре Хԝәдейи сәрәкә, у занәбуна ԝе йәке мә бәрбь чь һелан дькә?

 КʹЬТЕБА ПИРОЗ дьбежә кӧ «Хԝәде һʹьзкьрьн ә» (1 Йуһʹәнна 4:8). Ле әԝ бь рʹастийе чь те һʹәсабе? Һʹьзкьрьн нә кӧ тʹәне һʹӧнӧрәк жь һʹӧнӧред ԝийи баш ә, ле әԝ һʹӧнӧре ԝийи сәрәкә йә. Нә кӧ тʹәне һʹьзкьрьна ԝи һәйә, ле әԝ хԝәха һʹьзкьрьн ә. Йаһоԝа чь жи дькә, һʹәму тьшти жь һʹьзкьрьне дькә. Әм чьԛас жь Йаһоԝа рʹази нә, кӧ әԝи жь һʹьзкьрьне тʹәмамийа гәрдуне у һʹәму бинбәр чекьр!

2. Һʹьзкьрьна Хԝәде чь гӧмане дьдә мә? (Бьньһерʹә шькьле әʹԝльн.)

² Йаһоԝа һьндава әʹфьринед хԝә ԛәнщ ә у бь һʹьзкьрьн ә. Гӧмана мә һәйә, кӧ ԛьрара ԝи бона инсанәте ԝе бь щурʹе лапи баш бе сери, чьмки әԝ мә һʹьз дькә. Ахьрийа ве йәке ԝе бәхтәԝарийа реали бә, бона ԝан йед кӧ гӧрʹа ԝи дькьн. Мәсәлә, Йаһоԝа жь бо һʹьзкьрьне, «рʹожәк кʹьфш кьрийә, кʹижанеда ԝе диԝана дьне рʹаст бь дәсте мәрьвәки бькә, йе кӧ әԝи кʹьфш кьрийә», демәк, Иса Мәсиһ (Кʹаред Шандийа 17:31). Әм баԝәр ьн кӧ әԝ диԝан әʹсә ԝе бьбә. У әв бона мәрьвед гӧһдар те һʹәсабе ахьрийа пʹьрʹ баш, кʹижан кӧ ԝе һʹәта-һʹәтайе бә.

3. Дьнйа ԝе ча буйа, һәрге Хԝәде инсанәт һʹьз нәкьра?

³ Гәло ахьрийа инсанәте ԝе ча буйа, һәрге Хԝәде инсанәт һʹьз нәкьра? Мәрьва ԝе диса жи хԝәха сәрԝерти бькьрана у бьн һʹӧкӧме Шәйтʹанда буна, кʹижан кӧ беһʹьзкьрьн ә у зӧлм ә. (2 Корьнтʹи 4:4; 1 Йуһʹәнна 5:19; бьхунә Әʹйанти 12:9, 12.) Бәле, ахьри ԝе гәләк хьраб буйа, һәрге Йаһоԝа әм һʹьз нәкьрана!

4. Чьрʹа Йаһоԝа изьн да Шәйтʹан кӧ мьԛабьли сәрԝертийа ԝи дәре?

⁴ Чахе Шәйтʹан мьԛабьли сәрԝертийа Йаһоԝа дәркʹәт, әԝи ӧса жи де-баве мәйә пешьн һелан кьр бәрбь ԝе йәке. Әԝи кьрә бьн шьке изьна Хԝәде кӧ бьбә Хԝәдайе һʹәму Зорайе. Шәйтʹан гот кӧ сәрԝертийа ԝи ԝе һе баш бә, нә кӧ йа Хԝәде (Дәстпебун 3:1-5). Бь билани бу, кӧ Йаһоԝа сәр ԝәʹдәки кьн изьн да Шәйтʹан, ԝәки гьлийед хԝә избат кә. Ле ахьри зәлал те кʹьфше, кӧ нә мәрьв нә жи Шәйтʹан нькарьн бьбьнә сәрԝеред баш.

5. Жь тʹәрихийа инсанәте чь әʹйан избат бу?

⁵ Иро дьнйа һе хьраб дьбә. Нава ԝан 100 салед пашԝәхтийеда, дь шәрʹада 100 милйон мәрьва зедәтьр һатьнә кӧштьне. Кʹьтеба Пироз дьбежә дәрһәԛа «рʹожед ахьрийеда»: «Мәрьвед хьрабә хԝәйифел ԝе хьрабийеда пешда һәрʹьн» (2 Тимотʹейо 3:1, 13). Кʹьтеба Пирозда ӧса жи те готьне: «Йа Хӧдан, дьзаньм кӧ, рейа мьров нә дь дәсте ԝида йә; гавед хԝә рʹасткьрьн, нә дь дәсте мьрове кӧ дьмәшә дә йә» (Йерәмйа 10:23). Тʹәрихийе зәлал избат кьр кӧ әԝ гьли рʹаст ьн. Чахе Йаһоԝа мәрьв чекьр, әԝи әԝ фәрәсәт йан жи изьн нә да ԝан, кӧ бейи рʹебәрийа ԝи хԝәха сәр хԝә сәрԝертийе бькьн.

6. Чьрʹа Хԝәде һишт кӧ зӧлми һәбә?

⁶ Йаһоԝа кӧ һишт зӧлми сәр ԝәʹдәки кьн һәбә, бь ԝе йәке әԝи ӧса жи избат кьр кӧ тʹәне сәрԝертийа ԝи баш ә. Ахьрийеда Хԝәде ԝе һʹәму зӧлмийе кʹӧта кә. У һәрге паши ԝе йәке диса кәсәк сәрԝертийа ԝийә бь һʹьзкьрьн бькә бьн шьке, ԝе Хԝәдерʹа ида лазьм нибә избаткьрьна ԝи кәси. Хԝәде дькарә тʹәрихийа инсанәте бьдә хәбате ча избаткьрьн, кӧ мәрьвед мьԛабьл гәрәке дәрберʹа бенә кʹӧтакьрьне. Зӧлми ԝе тʹӧ щар ида тʹӧнә бә.

7, 8. Хԝәде ча һʹьзкьрьна хԝә дайә кʹьфше?

⁷ Йаһоԝа һʹьзкьрьна хԝә бь щурʹә-щурʹә әʹйан кьр. Бьфькьрьн дәрһәԛа мәзьнбун у бәдәԝбуна гәрдуна мә. Әԝ бь милйарда галактика йә, у дь һәр галактикәкеда бь милйарда стәйрк у планет һәнә. Дь галактика мәда, йәк жь стәйрка әԝ һәйә тәʹв. Бе тәʹв жийин сәр әʹрде ԝе тʹӧнә буйа. Һʹәму әԝ әʹфьрин әʹйан дькьн Йаһоԝа чаԝа Әʹфьрандаре мә, у дьдьнә кʹьфше һʹӧнӧред ԝи, мәсәлә ԛәԝат, билани, у һʹьзкьрьна ԝи. Бәле, «рʹаст жь әʹфьрандьна дьнйайеда һʹӧнӧред ԝийә нәхӧйа, аԝа готи ԛӧдрәта ԝийә һʹәта-һʹәтайе у Хԝәдетийа ԝи бь әʹфьрина хӧйа дьбьн, зәлал тенә дитьне» (Рʹомайи 1:20).

⁸ Йаһоԝа әʹрд чекьр хут бона жийине. Һʹәму тьшт чь кӧ сәр әʹрде йә кʹаре тинә һʹәйԝанарʹа у мәрьварʹа. Хԝәде бахчеки бәдәԝ чекьр бона мәрьва, у һʹьш у бәдәна беԛьсур да ԝан, сәва кӧ әԝана һʹәта-һʹәтайе бьжин. (Бьхунә Әʹйанти 4:11.) У һе зедә, «йе кӧ хԝарьне дьдә һʹәму щанан әԝ ә, кʹәрәма ԝи һәр у һәрә» (Зәбур 136:25, ИМ).

9. Рʹаст ә Йаһоԝа Хԝәдейе һʹьзкьрьн ә, ле әԝ чь нәфрʹәт дькә?

⁹ Йаһоԝа Хԝәдайе һʹьзкьрьн ә, ле йәкә әԝ хьрабийе нәфрʹәт дькә. Мәсәлә, Зәбур 5:4-6-да дәрһәԛа Йаһоԝа те готьне: «Тӧ нә Хԝәдайе кӧ жь хьрабийе һʹьз дькә . . . Һʹәму кәсед кӧ гӧнәһан дькьн дькәрьһи [нәфрʹәт дьки]», (ИМ). Хԝәде ӧса жи нәфрʹәт дькә мәрьвед кӧ хуне дьрʹежьн у дәрәԝин ьн.

10, 11. а) Ԝе чь бьԛәԝьмә сәре мәрьвед зӧлм? б) Йаһоԝа ԝе ча кʹәрәм кә мәрьвед гӧһдар?

¹⁰ Йаһоԝа ԝе ԝәʹдәда, дьнйайе жь зӧлмийе тʹәмьз кә, чьмки Хԝәде һʹьзкьрьн ә, у зӧлми бәр чʹәʹве ԝи рʹәш ә. Хәбәра Хԝәде соз дьдә: «Ԝе хәраб бен бьррин у аветьн бәле һевидаред Хӧдан, ԝәлат мирас дьстиньн». Дьжмьнед Хԝәде ԝе мина ду бькʹьшьн, бәла бьбьн у һәрʹьн (Зәбур 37:9, 10, 20, ИМ).

¹¹ Хәбәра Хԝәде ӧса жи соз дьдә: «Йед рʹаст ԝәлат мьраз дьстиньн, һәр у һәр ль ԝе дәре рʹудьньн» (Зәбур 37:29, ИМ). Мәрьвед амьн ԝе «жь зедәһийа аштийе бьбиньн ләзәт» (Зәбур 37:11, ИМ). Чьрʹа? Чьмки баве мәйи һʹьзкьри чь кӧ бона хьзмәткʹаред ԝи һәри баш ә тʹьме ве дькә. Кʹьтеба Пироз мәрʹа дьбежә: «Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4). Ахьрикә чьԛас баш һивийа ԝан ә, йед кӧ гӧһдар ьн у ԛимәт дькьн һʹьзкьрьна Хԝәде!

12. Кʹи йә мәрьве «беԛьсур»?

¹² Кʹьтеба Пироз мәрʹа дьбежә: «Чʹәʹвньһерʹийе ль мьровед кʹамьл [беԛьсур, ДТʹ] бькә у ль мьровед рʹаст бьньһерʹә; жь бәр кӧ пешәрʹожа ԝан ашти йә. Ле кәсед кӧ сәри һьлдане, әԝе һʹәму бь һәврʹа тʹӧнә бьбьн пешәрʹожа хьраба, ԝе бе ԛуткьрьн» (Зәбур 37:37, 38, АБ). Йе «беԛьсур» Йаһоԝа у Кӧрʹе ԝи нас дькә, у ԛьрара Хԝәде тинә сери. (Бьхунә Йуһʹәнна 17:3.) Әԝ ԛайим баԝәр ә кӧ «дьнйайе жи дәрбаз бә, һавьжийа ԝе жи, ле әԝе кӧ әʹмьре Хԝәде дьԛәдинә ԝе һʹәта-һʹәтайе бьминә» (1 Йуһʹәнна 2:17). Чьмки хьлазийа дьнйайе незик ә, ләма жи гәләк фәрз ә кӧ әм һивийа Хӧдан бьн у рʹийа ԝида һәрʹьн (Зәбур 37:34).

13. Кʹижан кьре Йаһоԝайи гьринг дьдә кʹьфше, кӧ әԝ мә һʹьз дькә?

¹³ Рʹаст ә әм мәринә гӧнәкʹар ьн, ле әм дькарьн гӧрʹа Хԝәде бькьн. Әм ӧса жи дькарьн незики Йаһоԝа бьн, бь сайа ԛӧрбана Иса. Әв ԛӧрбан кьре Йаһоԝайи гьринг ә жь һʹьзкьрьне. Йаһоԝа Иса кьрә ԛӧрбан чаԝа кʹьрʹин, ԝәки мәщала мәрьвед гӧһдар һәбә, кӧ жь гӧнә у мьрьне хьлаз бьн. (Бьхунә Рʹомайи 5:12; 6:23.) Гәлә ԝәхт Иса ль әʹзмана амьн бу Хԝәдерʹа, ләма жи Йаһоԝа баԝәр бу кӧ әԝ ԝе сәр әʹрде жи амьн бьминә. Чаԝа Баве һʹьзкьри, Йаһоԝарʹа чәтьн бу чахе әԝи дьдит ча кӧрʹе ԝи дьзериньн. Иса пьштгьрийа Йаһоԝа кьр, кӧ изьна ԝи һәйә сәрԝертийе бькә, у да кʹьфше кӧ мәрьве беԛьсур дькарә Хԝәдерʹа амьн бьминә һәла һе чәтьнайед гьранда жи.

14, 15. Мьрьна Иса чь кʹар ани мәрьварʹа?

¹⁴ Иса чьԛас жи рʹасти щерʹьбандьнед гьран дьһат, ле йәкә амьн дьма у пьштгьрийа сәрԝертийа Йаһоԝа дькьр. Әм гәрәке гәләк рʹази бьн сәва ве йәке кӧ Иса бь сайа мьрьна хԝә һәԛе кʹьрʹине да, чьмки әве йәке мәщал да мәрьва кӧ бьжин һʹәта-һʹәтайе дьнйа тʹәзәда! Паԝлосе шанди шьровәкьр, кӧ һʹьзкьрьна Йаһоԝа у Иса һатә кʹьфше жь ԛӧрбана Иса. Әԝи гот: «Чьмки гава әмә һе бечʹарә бун, Мәсиһ бона мә нәпʹака ԝәхтда мьр. Дәгмә бона мәрьвәки рʹаст йәк бьмьрә, бәлки бона мәрьвәки ԛәнщ йәке бьԝерә бьмьрә, ле бәле Хԝәде һʹьзкьрьна хԝә һьндава мәда һьнге да кʹьфше, гава әмә һе гӧнәкʹар бун, Мәсиһ бона мә мьр» (Рʹомайи 5:6-8). Йуһʹәннайе шанди ньвиси: «Бь ве йәке һʹьзкьрьна Хԝәде һьндава мәда хӧйа бу, гава кӧ әԝи Кӧрʹе хԝәйи Тайе Тʹәне шандә дьнйайе, ԝәки әм бь ԝи бьжин. Һʹьзкьрьн әв ә, нә кӧ мә Хԝәде һʹьз кьр, ле әԝи әм һʹьз кьрьн у Кӧрʹе хԝә  шанд чаԝа мәщала бахшандьна гӧнед мә» (1 Йуһʹәнна 4:9, 10).

¹⁵ Иса гот кӧ «Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16). Рʹаст ә Йаһоԝарʹа гәләк чәтьн бу, ле йәке әԝи кӧрʹе хԝә да ча кʹьрʹин. Әв йәк мәрʹа әʹйан дькә, кӧ әԝ мә чьԛас һʹьз дькә. У әԝ һʹьзкьрьн ԝе һʹәтаһʹәтайе бә. Паԝлос ньвиси: «Әз әʹсәйи заньм кӧ нә мьрьн, нә жийин, нә мьлйакʹәт, нә шәхсәк, нә тьштед һазьр, нә тьштед ԝе бен, нә тʹӧ ԛәԝат, нә йед жорьн, нә йед жерьн у нә жи әʹфьринәки майин дькарә һʹьзкьрьна Хԝәде сәр мә сар кә, йа кӧ бь дәсте Хӧдан Мәсиһ Иса» (Рʹомайи 8:38, 39).

16. Чь йә Пʹадшатийа Мәсиһити, у Йаһоԝа кʹе кʹьфш кьрийә ча Сәрԝер?

¹⁶ Сәрԝертийа Хԝәде, демәк Пʹадшатийа Мәсиһити, ӧса жи избат дькә һʹьзкьрьна Йаһоԝа һьндава мәрьва. Ле чаԝа? Йаһоԝа ида Сәрԝер кʹьфш кьрийә кʹижан кӧ мәрьва һʹьз дькә, у һатийә һинкьрьне кӧ ча пʹадшатийе бькә. Әԝ пʹадша һәйә Иса Мәсиһ (Мәтʹәлок 8:31). Һьн жи, Йаһоԝа 144 000 мәрьв бьжарт ьн, кӧ ль әʹзмана сәрԝертийе бькьн тʹәви Иса Мәсиһ. Ча баш ә кӧ әԝана ԝе һʹале мәрьва рʹьнд бьзаньбьн (Әʹйанти 14:1). Чахе Иса ль сәр әʹрде бу, нета ԝийә сәрәкә әԝ бу, кӧ мәрьва дәрһәԛа Пʹадшатийе һин кә. Әԝи ӧса жи шагьртед хԝә һин дькьр, кӧ ӧса дӧа бькьн: «Баве мәйи әʹзмана! Наве тә пироз бә. Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:9, 10). Әм һивийе нә кӧ чахе дӧайед ԝи щурʹәйи бенә сери, демәк чахе Пʹадшатийа Хԝәде мәрьварʹа һʹәму кʹәрәма бинә!

17. Чь фьрԛи һәйә ортʹа сәрԝертийа Иса у мәрьвада?

¹⁷ Фьрԛикә мәзьн һәйә ортʹа сәрԝертийа Исайә бь һʹьзкьрьн у йа мәрьвада. Жь сәрԝертийа мәрьва гәләк шәрʹ бун у бь милйона мәрьв ԛьрʹ бун. Ле Пʹадшайе мә Иса бь рʹастийе мә һʹьз дькә у чʹәʹв дьдә Хԝәде һʹӧнӧред башда, илаһи һʹьзкьрьнеда (Әʹйанти 7:10, 16, 17). Иса гот: «Ԝәрьнә щәм мьн һʹәмуйед ԝәстийайи у баргьран у әзе рʹьһʹәтийе бьдьмә ԝә. Нире мьн һьлдьнә сәр хԝә у жь мьн һин бьн, чьмки әз шкәсти мә у дьлмьлаһим ьм у һуне хԝәрʹа рʹьһʹәтийе бьбиньн. Чьмки нире мьн рʹьһʹәт ә у баре мьн сьвьк әр (Мәтта 11:28-30). Әԝ соз чьԛас бь һʹьзкьрьн ьн!

18. а) Жь сала 1914 чь дьԛәԝьмә? б) Тʹема дьнда әме дәрһәԛа чь шеԝьр кьн?

¹⁸ Кʹьтеба Пироз әʹйан дькә кӧ Пʹадшатийа Хԝәде дәстпекьр сәрԝертийе бькә сала 1914-да. Һьнгеда дәстпебу тʹопкьрьна ԝан, йед кӧ ԝе ль әʹзмана тʹәви Иса сәрԝертийе бькьн, демәк йед рʹункьри, у ӧса жи тʹопкьрьна «әʹлаләтәкә . . . мәзьн», демәк әԝ мәрьв йед кӧ ԝе хьлаз бьн жь кʹӧтакьрьна ве дьнйайе у бькʹәвьнә дьнйа тʹәзә (Әʹйанти 7:9, 13, 14). Гәло әԝ әʹлаләтәкә мәзьн иро чьԛас мәзьн буйә? Йаһоԝа жь ԝан чь дәʹԝа дькә? Тʹема дьнда әме ԝан пьрса шеԝьр кьн.