Дьбәкә тә жи дьхԝәст дәстпеки Кʹьтеба Пироз бьхуни, ле жь бо фькьред ӧса тә хԝә жь ве йәке дур дьгьрт. Гәләк мәрьв ча бежи дьтьрсьн Кʹьтеба Пироз бьхуньн. Ле йед дьн пеһʹәсийан ԝәки Кʹьтеба Пироз али ԝан дькә бь жийинәкә бәхтәԝар бьжин. Әԝана ӧса жи пеһʹәсийан кӧ һәйә методәкә ӧса йа кӧ дькарә хԝәндьна Кʹьтеба Пироз һʹәԝас кә. Ле тәйе бьхԝәста Кʹьтеба Пироз бьхԝәнда сәва кӧ пебьһʹәси, һәла әв чь дьбежә?

Ԝәрен әм хәбәр дьн дәрһәԛа ԝан мәрийа йед кӧ тедәрхьстьнә, ԝәки хԝәндьна Кʹьтеба Пироз бь рʹасти жи кʹаре тинә.

Һәзәԛел йе кӧ ԝәкә 20 сали йә, дьбежә: «Бәре әз мина ԝи мәрьви бум, йе кӧ бе нет авте дажо у ньзанә һәрʹә кʹидәре. Ле чахе мьн дәстпекьр Кʹьтеба Пироз бьхуньм әве йәке али мьн кьр нета жийине бьвиньм. Ве кʹьтебеда ширәтед керһати һәнә, кʹижан кӧ әз дькарьм һәр рʹож бьдьмә хәбате».

Фреда, йе кӧ 20 сали зедәтьр ә, дьбежә: «Мьн тʹьме бь критики сәр һʹәму тьшти дьньһерʹи. Ле чахе мьн дәстпекьр Кʹьтеба Пироз бьхуньм, әз һин бум хԝә бьгьрьм. Паше ида мәрийарʹа һеса бу тʹәви мьн һәвалтийе бькьн у ньһа ида гәләк һәвалед мьн һәнә».

Кʹӧлфәта бь наве Йунәс кӧ 50 сали зедәтьр ә, дәрһәԛа Кʹьтеба Пироз тьште ӧса дьбежә: «Әв кʹьтеб али мьн кьр бьбьмә мәрьвәки даһа баш у хәйсәте хԝәйә нәбаш бьгӧһезьм».

Анәгори ԝан хԝәндәвана, бь милйона мәрьвед дьн жи тедәрхьстьн кӧ хԝәндьна Кʹьтеба Пироз дькарә аликʹарийе бьдә, сәва кӧ жийина хԝә бәхтәԝар кьн (Ишайа 48:17, 18). Хенщи ԝе йәке әԝ дькарә али тә бькә (1) сафикьрьнед баш бьки, (2) һәвалед баш бьвини, (3) нәкʹәви бьн стресе, у (4) йа лапә баш әԝ ә, кӧ тӧ рʹасти дәрһәԛа Хԝәде пебьһʹәси. Ширәтед Кʹьтеба Пироз жь Хԝәде нә, ләма жи һәрге тӧ хԝә ль ԝан бьгьри, тӧйе тʹӧ щар шаш нәби. Чьмки Хԝәде тʹӧ щар ширәтед хьраб надә.

Ле гава пешьн әԝ ә, кӧ гәрәке дәстпеки әве кʹьтебе бьхуни. Ле чь ԝе али тә бькә кӧ хԝәндьна Кʹьтеба Пироз тәрʹа һеса у һʹәԝас бә?