1, 2. а) Чь гӧһастьн дьԛәԝьмә, чахе мәрьв әʹмьрда мәзьн дьбә? б) Чьрʹа хьзмәткʹаред Хԝәде ԝәʹде бәре, шабун дьстандьн жь калбун-пирбуне?

 САЛ дәрбаз дьбьн, әʹмьр жи те гӧһастьне. Мәрьв ԛьдум дькʹәвә у ԛәԝат жь ԝи дьчә. Чахе хԝә нәйникеда дьньһерʹьн, дьвиньн ԝәки сьфәте ԝан ԛӧрчʹьми йә, пʹоре ԝан сьпи дьбә у дадьԝашә. Щарна жи әԝана зу тьшта бир дькьн. Ле чахе зарʹ мәзьн дьбьн у малбәта хԝә саз дькьн, һәләԛәтийа де-бава тʹәви зарʹа те гӧһастьне. Ԝи чахи жи те гӧһастьне чахе нәби ԝанарʹа дьбьн. Бал һьнә мәрьва, йед кӧ әʹмьрда мәзьн дьбьн у нахәбьтьн, һʹәму тьшт те гӧһастьне.

² Калбун-пирбун, дькарә бьбә щерʹьбандьн бона мәрьва (Ԝаиз 12:1-8). Ԝәрен биньнә бира хԝә хьзмәткʹаред Хԝәде ԝәʹде бәре. Рʹаст ә ԝана нькарьбу хԝә жь мьрьне хьлаз кьрана, ле ԝана жь әʹмьре хԝә билани у сәрԝахти стандьн у әԝе йәке рʹьһʹәтийа дьл да ԝан ԝәʹде калбун-пирбуне (Дәстпебун 25:8; 35:29; Ибо 12:12; 42:17). Чь али ԝан кьр шабуне ӧнда нәкьн жь бо калбун-пирбуна хԝә? Аликʹарикә мәзьн әԝ бу, кӧ әԝана бь ԝан принсипа дьжитьн, кʹижан әм ньһа Кʹьтеба Пирозда дьвиньн (Зәбур 119:105; 2 Тимотʹейо 3:16, 17).

3. Чь ширәт Паԝлосе шанди да мәрьвед әʹмьрда мәзьн?

³ Кʹьтеба Титода, Паԝлосе шанди ширәта керһати да мәрьвед әʹмьрда мәзьн. Әԝи ньвиси: «Каләмер бьра хԝәгьрти, гьран у маԛул бьн, баԝәрийе, һʹьзкьрьне у сәбьреда сәрхԝә бьн. Пирәжьн жи бьра ӧса пʹәргал бьн, чаԝа ль мәрьвед Хԝәде дькʹәвә, нә бӧхданбеж, мела  ԝан нә сәр вәхԝарьне бә. Ле бьра хԝәйед ширәтед ԛәнщ бьн» (Тито 2:2, 3). Һәрге гӧһ бьдьн ԝан ширәта, әме бькарьбьн бь мерхаси рʹасти ԝан чәтьнайа бен, йед кӧ калбун-пирбун пешда тиньн.

4, 5. Ньһерʹандьна һьнә де-ба чь щурʹәйи йә, чахе зарʹ жь ԝан щьһе дьбьн? Чь али һьнә де-бава кьр ԝәки чәтьн дәрбаз нәкьн чуйина зарʹа?

⁴ Гәрәке һини гӧһастьнед тʹәзә бьн. Чахе зарʹ мәзьн дьбьн, әԝана жь де-баве хԝә щьһе дьбьн у малбәта хԝә саз дькьн. Бона гәләк де-бава әԝ йәк дьдә кʹьфше, кӧ әԝана ида кал пир дьбьн. Рʹаст ә де-бав ша дьбьн кӧ зарʹед ԝан мәзьн бунә, ле йәкә бона ԝан бәрхԝә дькʹәвьн. Әԝана дьшьрмиш дьбьн, гәло бь рʹастийе ԝана һәр тьшт кьрийә, сәва зарʹед ԝан бькарьбьн бе аликʹарийа ԝан бьжин. Де-бав бира зарʹа дькьн, чьмки щийе зарʹа те кʹьфше.

⁵ Рʹаст ә зарʹ мәзьн дьбьн у малбәта хԝә саз дькьн, ле де-бав йәкә бәрдәԝам дькьн бәрхԝә кʹәвьн, бона зарʹед хԝә. Дайикәк дьбежә: «Һәрге әз һәртʹьм пебьһʹәсийама дәрһәԛа ԝан у мьн бьзаньбуйа кӧ әԝана баш ьн, әзе ша бума». Бавәк гьли дькә: «Чахе ԛиза мә мер кьр у жь мал чу, мәрʹа гәләк чәтьн бу. Мала мә перʹа-перʹа вала бу, әм һини ԝе йәке һатьбун, ԝәки мә бейи һәв сафикьрьн нәдькьрьн». Ле гәло әԝ де-бав ча һини ԝе йәке бун, кӧ зарʹед ԝан ида тʹәви ԝан нажин? Аликʹарикә мәзьн әԝ бу, кӧ ԝана дәстпекьр бона мәрьвед дьн хәм кьн у али ԝан бькьн.

6. Чь дькарә али де-бава бькә, рʹаст сәр дәрәщед малбәте бьньһерʹьн?

⁶ Чахе зарʹ дьзәԝьщьн, рʹола де-бава те гӧһастьне. Кʹьтеба Дәстпебун 2:24-да те готьне: «Ләма мере де у баве хԝә бьһелә, хԝә ль жьна хԝә бьгьрә у бьбьнә  бәдәнәк». Гӧһдайина принсипед Хԝәде у сәрԝертийа рʹаст ԝе али де-бава бькә, сәр һәр тьшти рʹаст бьньһерʹьн (1 Корьнтʹи 11:3; 14:33, 40).

7. Бавәки, ԛизед кʹижани мер кьрьн, чь щурʹә хԝә да кʹьфше?

⁷ Жьн-мерәки тʹәхмин кьрьн, ԝәки паши ԝе йәке ча дӧ ԛизед ԝан мер кьрьн, мал гәләк вала бу. Бав серида сәр зәʹвед хԝә дьхәйиди. Ле чахе әԝи дәстпекьр бьфькьрә дәрһәԛа ԝе йәке кӧ мер сәре малбәте йә, әԝи фәʹм кьр, ԝәки зәʹвед ԝи бона малбәта хԝә щабдар ьн. Ләма жи чахе ԛизед ԝи жь ԝи ширәт дьхԝәстьн, әԝи жь ԝан дьпьрси, дәрһәԛа ԝе йәке мере ԝан чь дьшьрмиш дьбьн у әԝи пьштгьрийа зәʹвед хԝә дькьр. Ньһа зәʹвед ԝи, ԝи һʹәсаб дькьн ча баве хԝә у һәвале хԝә, жь кʹижана бь шабуне дькарьн ширәта һьлдьн.

8, 9. Ча һьнә де-бав ԛәбул дькьн әԝе йәке, кӧ зарʹед ԝан жь ԝана башԛә дьбьн?

⁸ Чь һун гәрәке бькьн, һәрге әԝед кӧ тʹәзә зәԝьщи нә, ньһерандьна ԝәрʹа ԛайил ниньн, ле тьштәки ӧса накьн чь кӧ мьԛабьли принсипед Кʹьтеба Пироз ә? Мер у жьн зарʹед кʹижана кӧ зәԝьщи нә, гьли дькьн: «Әм һәр гав али ԝан дькьн ньһерʹандьна Йаһоԝа һьлдьн һʹәсаб. Ле һәрге әм ԛайил ниньн тʹәви ньһерʹандьна ԝан, әм накʹәвьнә шәрʹ-дәʹԝа тʹәви ԝан, әм дьхәбьтьн сәр ԝе йәке, ԝәки пьштгьрийе у аликʹарийе бьдьнә зарʹа».

⁹ Һьнә ԝәлатед Асйайеда, дайикарʹа чәтьн ә ԛәбул кьн ве йәке кӧ кӧрʹед ԝан ида мәзьн бунә у жь ԝан щьһе дьбьн. Ле һәрге әԝана һьлдьн һʹәсаб тʹәмийед жь Кʹьтеба Пироз, кӧ әԝана гәрәке ԛәдьре мера бьгьрьн ча малхе мале, ԝи чахи ԝанарʹа ԝе һеса бә зьман буке хԝәрʹа жи бьвиньн. Мәсиһик һʹәсаб дькә, ԝәки чуйина кӧрʹед ԝе жь мал, «шабун бу бона ԝе». Чьмки әԝ гәләк ша дьбу чахе дьдит, ԝәки кӧрʹед ԝе щабдарийед хԝә дькарьн биньн сери. Әԝе йәке әʹмьре ԝе у мере ԝе һеса кьр.

10, 11. Кʹижан ширәтед жь Кʹьтеба Пироз али мәрьва дькьн хԝә дур бьгьрьн жь ԝан тʹәлька йед кӧ рʹасти мәрьвед әʹмьрда мәзьн тен?

¹⁰ Чахе мәрьв әʹмьрда мәзьн дьбә у дьбә ԝәкә 50 сали, фькьр у кьред ԝи жи тенә гӧһастьне. Әԝ гӧһастьн сәр һәр кәса бь щурʹе ԝи һʹӧкӧм дьбә. Һьнә меред әʹмьрда мәзьн дьхԝазьн щаһьл бенә кʹьфше, ләма жи кʹьнщед ӧса хԝә дькьн, кӧ нә лайиԛи әʹмьре ԝан ә. Ле гәләк жьн бәр хԝә дькʹәвьн, сәва ԝе йәке кӧ бал ԝана менопауза пешда те, демәк нав организма ԝанда гӧһастьн пешда тен. Чахе мәрьвед әʹмьрда мәзьн флирте дькьн тʹәви щаһьла, әԝ йәк дькарә кʹӧмрʹәшийе у хәйиде пешда бинә бал жьн йан мере ԝан. Ле меред әʹмьрда мәзьн, йед хԝәдехоф у «сәрԝахт», хԝәстьнед хԝәйә нәрʹаст хԝәда дьшәԝьтиньн (1 Пәтрус 4:7). Һәма бь ԝи щурʹәйи, жьнед хԝәдехоф у сәрԝахт, кʹижан меред хԝә  һʹьз дькьн у дьхԝазьн Йаһоԝа хԝәш бен, һәр тьшти дькьн сәва зәԝаща хԝә хԝәй кьн.

¹¹ Пʹадше Ләмуел жь Хԝәде һатьбу һеланкьрьне, ԝәки готьнед пʹайидайине бьньвисә, сәва «кʹӧлфәта әʹсьл» йа кӧ «тʹәмамийа әʹмьре хԝәда . . . ԛәнщийе» дькә, нә кӧ хьрабийе. Чахе жьн әʹмьрда мәзьн дьбә у дьгьһижә ԝәкә 50 сали, әԝ дькарә хәмгин бә у мәʹдәкьри бә. Ле мере Мәсиһи ԝе фәʹм бькә, ԝәки жьна ԝирʹа чьԛас чәтьн ә хәмгин нәбә у мәʹдәкьри нибә жь бо ԝе йәке. Һʹьзкьрьн ԝе ԝи һелан кә пʹайе ԝе бьдә (Мәтʹәлок 31:10, 12, 28).

12. Диса чь чах мер у жьн дькарьн бона һәвдӧ хәм кьн?

¹² Чахе ԝә зарʹед хԝә мәзьн дькьр, ԝә хԝәстьне хԝә да алики, сәва кӧ һәр тьшти бона зарʹа бькьн. Ле ньһа чахе зарʹ жь ԝә щьһе бунә, ԝәʹдә йә бона һәвдӧ хәм бькьн. Мерәк гьли дькә: «Чахе ԛизед мьн мер кьрьн у жь мал чун, мьн дьһа дәстпекьр бона жьна хԝә хәм бькьм». Мерәки дьн дьбежә: «Әм сәва сьһʹәт-ԛәԝата һәвдӧ хәм дькьн у дькьнә бира һәв, ԝәки гәрәке сьһʹәт-ԛәԝата хԝәйә физики ԛәԝи кьн, мәсәлә гимнастикайева мьжул бьн». Сәва кӧ тʹәнебуне тʹәхмин нәкьн, әԝана һәвала у хушк-бьред щьвате тʹәглифи мала хԝә дькьрьн. Һәрге бона йед дьн хәм кьн әԝ йәк бь рʹастийе кʹәрәме тинә. Бь ԝе йәке әм ӧса жи Йаһоԝа ша дькьн (Филипи 2:4; Ибрани 13:2, 16).

13. Һәрге мер у жьн дьлвәкьри у рʹаст ьн һьндава һәв, ча әԝ йәк дькарә али ԝан бькә, ԝәʹде калбун-пирбуне жи?

¹³ Изьне нәдьн кӧ жь бо кемасийа хәбәрдане, һун һьндава һәвдӧ сар бьн. Дьлвәкьри бьн һьндава һәвда (Мәтʹәлок 17:27). Мерәк дьбежә: « Әм һәр тьшти дькьн, сәва кӧ бона һәв хәм кьн у ԛәдьре һәв бьгьрьн, чьмки әԝ йәк али мә дькә, һе һәв фәʹм бькьн». Жьна ԝи тʹәви гьлийед ԝи ԛайил дьбә, у сәрда зедә дькә: «Чахе әм әʹмьрда мәзьн бун мә фәʹм кьр, ԝәки чьԛас һʹәԝас ә тʹәвайи чайе вәхԝьн, хәбәр дьн йан тьштәки дьн бькьн». Әԝ йәк кӧ һун дьлвәкьри нә у рʹаст ьн, дькарә һәләԛәтийа ԝә зәԝащеда  ԛәԝи кә. У ӧса жи дькарә али ԝә бькә хԝә жь тиред Шәйтʹан хԝәйи кьн, йе кӧ дьхԝазә малбәт хьраб кә.

14. Пирька Тимотʹейо чь кьр, сәва кӧ Тимотʹейо чаԝа Мәсиһи мәзьн бә?

¹⁴ Нәби «кʹофийа» кал пира нә (Мәтʹәлок 17:6). Хәбәрдана тʹәви нәбийа, бь рʹастийе шабуне тинә у рʹьһʹәтийе дькә дьл. Кʹьтеба Пирозда тьштед баш тенә готьне дәрһәԛа Лойисе дийа Әйньке, кʹижане тʹәви ԛиза хԝә, нәбийед хԝәйи бьчʹук Тимотʹейорʹа дәрһәԛа баԝәрийа хԝә гьли дькьр. Әԝ зарʹ мәзьн бу у заньбу, ԝәки дийа ԝи у пирька ԝи рʹастийа жь Кʹьтеба Пироз ԛимәт дькьн (2 Тимотʹейо 1:5; 3:14, 15).

15. Кальк-пирьк чь дькарьн бькьн бона ширәткьрьна нәбийа, ле чь гәрәке нәкьн?

¹⁵ Кальк у пирьк дькарьн ԝи алида аликʹарийе бьдьн. Де-бавно ԝә ида зарʹед хԝәрʹа гьли кьрийә дәрһәԛа нормед Йаһоԝа. Ньһа һун дькарьн нәбийед хԝәрʹа әԝе йәке гьли кьн! Гәләк щар нәби бь дьл у щан гӧһ дьдьн ԝан сәрһатийа, кʹижани кальк-пирьк ԝанарʹа гьли дькьн. Кальк-пирьк нахԝазьн щабдарийа бава һьлдьнә сәр хԝә, сәва кӧ рʹастийе бькьн дьле нәбийед хԝә (Ԛануна Дӧщари 6:7). Ле әԝана дькарьн аликʹарийе ԝе йәкеда бьдьнә ԝи. Мина зәбурбеж әԝана жи дькарьн дӧа бькьн у бежьн: «Калти у рʹу-рʹәмантийа мьнда жи мьн нәһели, Хԝәдейо, һʹәта ԛәԝата Тә ньсьле майинрʹа бежьм у ԛӧдрәта Тә һʹәму һатийарʹа» (Зәбур 71:18; 78:5, 6).

16. Кальк у пирьк чь дькарьн бькьн, ԝәки рʹийе ԝанда чәтьнайи нава малбәтеда пешда нәй?

¹⁶ Йазьх, ле гәләк щар кальк у пирьк рʹу дьдьнә нәбийед хԝә. Ләма жи ӧса дьԛәԝьмә, ԝәки ортʹа ԝан у де баве зарʹа шәрʹ-дәʹԝ пешда те. Чахе кальк-пирьк һьндава нәбийа ԛәнщ ьн, нәби һеса дькарьн дьле хԝә кальк-пирькед хԝәрʹа вәкьн, нә кӧ де-баве хԝәрʹа. Гава де-бав  зарʹед хԝәрʹа дькьнә шәрʹ, зарʹ баԝәр ьн ԝәки кальк-пирьк ԝе пьшта ԝан бьгьрьн, нә кӧ пьшта де-баве ԝан. Чь гәрәке бькьн ԝе дәрәщеда? Ԝе дәрәщеда биланийе бьдьнә кʹьфше у ширәта бьдьнә нәбийе хԝә, ԝәки әԝана һәр тьшти рʹаст де-баве хԝәрʹа гьли кьн. Ԝанарʹа шьровәкьн, һәрге әԝана ӧса бькьн, әԝана бь ԝе йәке дькарьн дьле Йаһоԝа ша кьн (Әфәси 6:1-3). Һәрге лазьм бә һун дькарьн бежьн нәбийед хԝә, кӧ дькарьн пешда тʹәви де-баве ԝан хәбәр дьн, сәва кӧ әԝана гӧһ бьдьнә ԝан. Бь дьл у щан гьли кьн нәбийе хԝәрʹа дәрһәԛа ԝан занәбун у щерʹьбандьна, йед кӧ ԝә әʹмьре хԝәда стандийә. Хәбәрдана ӧса ԝе кʹаре бинә нәбийед ԝәрʹа.

17. Мәрьвед әʹмьрда мәзьн, чьда дькарьн чʹәʹв бьдьнә зәбурбеж?

¹⁷ Сал дәрбаз дьбьн у мәрьв фәʹм дькә, ԝәки ньһа нькарә һаԛас бькә чьԛас бәре дькьр у нькарә бькә әԝ чь кӧ ньһа дьхԝазә бькә. Ле мәрьв ча гәрәке бьньһерʹә сәр ԝе йәке кӧ әԝ кал йан пир дьбә? Щарна мәрьв хԝә ӧса тʹәхмин дькә те бежи һәла һе 30 сали йә, ле чахе хԝә нәйникеда дьньһерʹә дьбинә, ԝәки әԝ йәк ӧса нинә. Дьлтәнг нәбә. Зәбурбеж Йаһоԝарʹа дӧа дькьр: «Дь пирбунеда тӧ мьн жь хԝә нәвежә, гава кӧ әз жь тʹаԛәте кʹәтьм, тӧ мьн бәрнәдә!» Гәрәке бьхәбьтьн сәр ве йәке, кӧ чʹәʹв бьдьнә хирәта зәбурбеж, сәва кӧ нав хԝәда әԝе хирәте пешда биньн. Әԝи гот: «Бәле әз һәргав һевидар ьм, жь бо тә пәсьндар у спасдар ьм» (Зәбур 71:9, 14, ИМ).

18. Мәсиһийед әʹмьрда мәзьн чаԝа дькарьн ԝәʹде хԝә бь хирәт у рʹаст бьдьнә хәбате?

¹⁸ Һьнә хушк-бьред әʹмьрда мәзьн йед кӧ ида нахәбьтьн, әԝе мәщәле дьдьнә хәбате, ԝәки һе зедә пәсьна бьдьнә Йаһоԝа. Мерәки әʹмьрда мәзьн йе кӧ ида нахәбьтә, ӧса гот: «Мьн пешда сафи дькьр чь әз гәрәке  бькьм, чахе ԛиза мьн мәкʹтәбе хьлаз кә. Мьн сафи кьр хьзмәт кьм ча пешәнге һәртʹьм, ләма жи мьн бизнеса хԝә фьрот сәва кӧ һе зедә Йаһоԝарʹа хьзмәт кьм. Мьн дӧа дькьр у жь Хԝәде рʹебәри дьхԝәст». Һәрге ԝәʹдәки ӧса бе кӧ һун жи гәрәке ида нәхәбьтьн жь бо калбун-пирбуне, бьра готьнед Әʹфьрандаре мә дьле ԝә гәрм кьн: «Нета каләпирбуна ԝә жи әз әԝ ьм у һʹәта кӧ пʹоред ԝә сьпи бьбьн, әзе ԝә һьлгьрьм» (Ишайа 46:4).

19. Чь ширәт те дайине ԝан мәрьварʹа йед кӧ әʹмьрда мәзьн ьн?

¹⁹ Гәләк чәтьн ә чахе мәрьв әʹмьрда мәзьн дьбә у нахәбьтә. Паԝлосе шанди ширәт да меред әʹмьрда мәзьн, ԝәки әԝана гәрәке хԝәгьртьне бьдьнә кʹьфше. Ләма жи гәрәке мәщалед һеса нәгәрʹьн бона жийине. Чахе мәрьв әʹмьрда мәзьн дьбә у нахәбьтә, ԝи чахи дьһа лазьм ә хԝәгьртьне бьдьнә кʹьфше. Ләма жи «һәр гав шьхӧле Хӧданда пешда һәрʹьн, бьзаньбьн хәбата ԝә бош-бәтал нинә ль бәр Хӧдан» (1 Корьнтʹи 15:58). Һе зедә али мәрьва бькьн (2 Корьнтʹи 6:13). Гәләк Мәсиһийед әʹмьрда мәзьн, бь дьл у щан хьзмәт дькьн һаԛас, чьԛас кӧ сьһʹәт-ԛәԝата ԝан у әʹмьре ԝан изьне дьдә. Рʹаст ә сал дәрбаз дьбьн, ле мәрьв гәрәке «баԝәрийе, һʹьзкьрьне у сәбьреда» сәрхԝә бьминә (Тито 2:2).

20, 21. а) Рʹожа иройин диса чь дьбә мәʹни, ԝәки мер у жьн жь һәв дьԛәтьн? б) Чь мәсәләкә баш Һанайе һиштийә?

²⁰ Рʹожа иройин жь бо мьрьне жьн йан мер тʹәне дьминьн. Әԝ мәрьв, жьн йан мере кʹижана мьрьнә, заньн ԝәки әԝ ньһа хәԝа кʹурда ньн, ле ԝәхт ԝе бе у әԝана диса ԝе рʹасти ԝан бен (Йуһʹәнна 11:11, 25). Чахе мәрьвед хԝәйи незик ӧнда дьки, әԝ дәрдәки гьран ә. Ча дькарьн тәйах кьн бәр ԝи дәрди? a

 ²¹ Аликʹарикә мәзьн әԝ ә, чахе дьфькьри дәрһәԛа ԝе йәке, ча ԝан дәрәщед чәтьнда хьзмәткʹаред Хԝәде ԝәʹде бәре хԝә данә кʹьфше. Һана һʹәфт сал паши меркьрьна хԝә бу жьнәби. Әԝ ида 84 сали бу чахе Кʹьтеба Пирозда дәрһәԛа ԝе һатьбу лекьрьне. Һана гәләк бәрхԝә дькʹәт бона мьрьна мере хԝә. Ле чь али ԝе дькьр? Әԝе шәв у рʹож хьзмәтийа пироз дькьр пʹарьстгәһа Хԝәдеда (Луԛа 2:36-38). Һанайе кӧ әʹмьре хԝә бь дӧа у хьзмәтийа пироз дәрбаз дькьр, әве йәке дәрде ԝе дәрман дькьр.

22. Чь али һьнә жьнәбийа у меред би кьрийә, ԝәки хәмгин нәбьн?

²² Жьнькәк йа кӧ 72 сали йә у ида 10 сал ә кӧ мере ԝе мьрийә, гьли дькә: «Ньһа мьнрʹа чәтьн ә жь бо ԝе йәке, кӧ тʹӧ кәс кʹеләка мьн тʹӧнә, ԝәки әз дьле хԝә жерʹа вәкьм. Мере мьн һәр щар гӧһ дьда мьн. Мә дәрһәԛа щьвате у хьзмәтийа хԝә хәбәр дьда». Жьнәбикә дьн дьбежә: «Рʹаст ә ԝәʹдә дәрбаз дьбә у кӧл дәрде дьл кем дьбьн, ле әз дькарьм бежьм, ԝәки ԛәнщкьрьна лапә баш әԝ ә, ча тӧ ԝи ԝәʹдәйи дьди хәбате. Ньһа ида тӧ мәрьвед дьн рʹьнд фәʹм дьки, у дькари һе зедә али ԝан бьки». Тʹәви гьлийе ԝе жьнәбийе рʹази бу мерәки би 67 сали: «Чахе али мәрьвед дьн дьки, әԝ йәк али тә дькә, еша дьле хԝә һеса ки».

23, 24. Кʹьтеба Пироз чь дьлгәрми дьдә ԝан мәрьва, йед кӧ жьн йан мере би нә?

²³ Рʹаст ә мьрьн жьн у мер жь һәв дур дьхә, ле Йаһоԝа һәртʹьм тʹәви мә йә. Даԝьд Пʹадша йе кӧ ԝәʹде бәре дьжит, дьстьра: «Тьштәки жь Хӧдан әз дьхԝазьм у әз һʹәйра ве йәкеда мә, тʹәмамийа рʹожед әʹмьре хԝәда, хана Хӧданда әз бьминьм, жь диндара Ԝи әз тʹер нәбьм у һʹәйра Пʹарьстгәһа Ԝида бьм» (Зәбур 27:4).

²⁴ Паԝлосе шанди һелане дьдә, «ԛәдьре жьнәбийа бьгьрә, йед кӧ бь әʹдәти жьнәби нә» (1 Тимотʹейо 5:3).  Әԝ ширәт дьдә кʹьфше, ԝәки әԝ жьнәби бал кʹижана мәрьвед незик тʹӧнә нә, дькарьн аликʹарийа материйали жь щьвате бьстиньн. «Ԛәдьре» жьнәбийа бьгьрьн ӧса жи те һʹәсабе ԝана ԛимәт кьн. Жьнәби у мере би дькарьн дьлгәрмийе бьстиньн жь занәбуна ԝе йәке, кӧ Йаһоԝа ԝан ԛимәт дькә у һәргав пьштоване ԝан ә! (Аԛуб 1:27).

25. Мәрьве әʹмьрда мәзьн чь нет дькарьн дайньн пешийа хԝә?

²⁵ Кʹьтеба Пирозда те готьне: «Рʹу-гӧлийе сьпи кʹофийа рʹумәте йә», у «рʹумәта мәзьна рʹу-гӧлийе сьпи йә» (Мәтʹәлок 16:31; 20:29). Фьрԛи тʹӧнә һун зәԝащеда нә йан тʹәне манә, йәкә һун дькарьн хьзмәткьрьна хԝә Йаһоԝарʹа дайньн щийе пешийе. Чахе һун ӧса бькьн, Йаһоԝа ԝе ԝә ԛәбул кә у һуне бькарьбьн шабуна һʹәта-һʹәтайе бьстиньн сәр әʹрде щьнәтеда, кʹидәре кӧл-дәрдед калбун-пирбуне ԝе тʹӧнә бьн (Зәбур 37:3-5; Ишайа 65:20).