ДЬ КʹЬТЕБА Пирозда найе готьне дәрһәԛа рʹожа буйина Иса. Ле әԝ әшкәрә дькә, ԝәки Иса нәжи зьвьстане һатә буйине.

Гәло дь шәһәре Бәйтләһʹмеда, кʹидәре кӧ Иса һатә буйине, зьвьстане һәвва ча бу? Дь мәһа Кислеведа ль гора салнәʹма Ибранийа (Ноембьр/Десамбьр), һәвва гәлә сар бу у баран дьбари. Паши мәһа Кислеве, мәһа Тебет дьһат (Десамбьр/Йануйайе). Әв жи мәһәкә гәлә сар бу у ль сәр чʹийа жи щар-щара бәрф дьбари. Ԝәрә әм ньһа бьньһерʹьн, кӧ чь Кʹьтеба Пироз дьбежә дәрһәԛа һәввайе дь ԝан щийада.

Дь кʹьтеба Әзрада ньвисар ә, кӧ дь мәһа Кислеведа, бь рʹастийе жи һәвва гәләк сар бу у баран дьбари. Әзра ньвисийә, кӧ «дь мәһа нәһа [Кислев] рʹожа бистида», щьмәʹт ль Оршәлиме тʹоп бьбу. Сәрда жи әԝ зедә дькә, ԝәки мәри жь бо барана ԛәԝи дьләрьзин у дьготьн, кӧ ԝәхте баране дәстпебун у әԝана нькарьбун ль дәрва бьсәкьнийана (Әзра 10:9, 13; Йерәмйа 36:22). Аһан, ньһа фәʹмдари йә кӧ чьрʹа зьвьстане, шьванед ԝан щийа тʹәви кәрийед хԝә, шәв дәрва нә дьман.

 Дь Кʹьтеба Пирозда те готьне, кӧ ԝе шәве чахе Иса һатә буйине, шьван ль чоле бәр пәзед хԝә бун. Луԛайе ньвискʹар ньвисийә, кӧ незики Бәйтләһʹме, шьван «шәв ль чоле ль бәр кәрийед хԝә дьман у бь нобәдари чʹәʹвньһерʹийе ль кәрийед хԝә дькьрьн» (Луԛа 2:8-12). Дина хԝә бьде, кӧ шьван нә кӧ тʹәне рʹож дьһатьнә чоле, ле әԝана ль ԝьр дьман, у кәрийед ԝан жи шәв дь чоледа бун. Гәло шьван зьвьстане ԝәʹде һәвва сар, дь чоледа дәрва ԝе бьжитана? Фәʹмдари йә, ԝәки на! Ләма жи әв әʹламәтийед дәрһәԛа рʹожа буйина Иса, дьдьнә кʹьфше, ԝәки Иса зьвьстане нәһатә буйине *.

Хәбәра Хԝәде рʹастә-рʹаст мәрʹа дьбежә, дәрһәԛа рʹожа мьрьна Иса, ле дәрһәԛа рʹожа буйина ԝи, тʹәне һьнә тьшт дәрбази мә дькә. Әв йәк гьлийед Сулеймане Пʹадша тинә бира мә, йе кӧ гот: «Наве ԛәнщ жь рʹуне бинхԝәш» баштьр ә «у рʹожа мьрьне, жь рʹожа буйине . . . хԝәштьр ә» (Ԝаиз 7:1). Ләма жи Кʹьтеба Пироз дәрһәԛа ԛӧльхкьрьн у мьрьна Иса, һур бь һур гьли дькә, ле дәрһәԛа рʹожа буйина ԝи, тʹәне һьнә әʹламәтийа дьдә.