ЩӘЖЬНЕД навдарә религийайи у йед нә религийайи, йед кӧ рʹожа иройин дь гәлә ԝәлатада дәрбаз дькьн, әԝ нә ль сәр һʹиме Кʹьтеба Пироз ьн. Ле ԝәки ӧса нә, әв һʹәму щәжьн жь кʹӧ һатьнә? Һәрге мәщала тә һәйә кӧ дь кʹьтебханеда леколине бьки, ԝе тәрʹа һʹәԝас бә пебьһʹәси, һәла щурʹә-щурʹә кʹьтеб у әнсиклопеди чь дьбежьн дәрһәԛа ԝан щәжьна йед кӧ дь ԝәлате тәда әʹйан ьн. Ԝәрә әм бьбиньн чәнд мәсәла.

Әʹйда Сала Тʹәзә. Рʹожа дәрбазкьрьна Сала Тʹәзә у ӧса жи әʹйд-ԛәйдед ве рʹожева гьредайи, дь һәр ԝәлатәкида щурʹә-щурʹә ԝәʹдәда те кьрьне у һәр кәс бь щурʹе хԝә дькә. Дәрһәԛа ԝе йәке кӧ әв щәжьн жь кʹӧ һат, «Ԝорлд Бук» әнсиклопедийада ӧса те готьне: «Д.М. сала 46-да, сәрԝере Рʹоме Ийули Сезар, 1 Йануайе (Чьлә) кʹьфш кьр ча рʹожа Щәжьна Сала Тʹәзә». Рʹомайийа әв рʹож тʹәсмили Йанус кьрьн, йе кӧ хӧдане дәргәһ, дәрийа у һʹәму дәстпебуна бу. Ләма жи, ча ԛәдьр бона ви хӧдане  Йанус, наве ве мәһе данинә Йануай. Дӧ рʹуйе Йанус һәбун, йәк пешийе дьньһерʹи йе дьн жи парʹава. Аһан, ча те кʹьфше һʹиме щәжьна дәрбазкьрьна Сала Тʹәзә, жь әʹйд-ԛәйдед нәрʹаст һатийә.

Әʹйда Езди. Әве щәжьне хьлазийа мәһа Кануна Пешьн (Десамбьре) дәрбаз дькьн. Религийа Ездити һин дькә, кӧ әв рʹож һәйә рʹожа буйина хӧдан Йезид (Әздаһ). Дь кʹьтеба «Езди-Религийа у Мьләт», дәрһәԛа ве щәжьне ӧса һатийә ньвисаре: «Рʹожа әʹйда Езди дькʹәвә рʹожа буйина Авеста, хӧдан Митрʹа, йе кӧ дәрбаз дькьрьн мәһа Кануна Пешьн дь һʹәфтийа сьсийада. Ча әʹйан ә 25 Десамбьре, католик ӧса жи дәрбаз дькьрьн рʹожа буйина Иса Мәсиһ (Кьрьсмьс), у 7 Йануайе (Чьлә) жи ль гора салнәма Йулийайа кәвьн, мәсиһи жи әв щәжьн дәрбаз дькьрьн». Жь вьр зәлал те кʹьфше кӧ щәжьна Әʹйда Езди, жь религийайед ԛәлп һатийә.

Рʹожа Мәзәла. Әве рʹоже мәһа Һʹәзиране (Жуйен) дәрбаз дькьн. Мәʹнийа ве рʹожейә фәрз әԝ ә, кӧ мәри дьчьнә ль сәр мәзәле мьрийед хԝә. Ве рʹоже, һәр малбәтәк нане мьрийа дәрдьхә у хԝарьне тиньн ль сәр мәзәла бона мьрийед хԝә. Бь рʹастийе мәри һәрʹә ль сәр мәзәле мьрийед хԝә, дь ве йәкеда тьштәки нәрʹаст тʹӧнә. Чьмки ԛӧльхкʹаред Хԝәдейә рʹаст жи дьчунә ль сәр тʹьрбед мьрийед хԝә, у шина ԝан дькьрьн (Йуһʹәнна 11:31). Ле һьнә щурʹә ԛәйдед кӧ ԝәʹде әʹйда Рʹожа Мәзәла тенә кьрьне, мәсәлә хәбәрдан тʹәви мьрийа у нане мьрийа, бь рʹастийе гьредайи нә тʹәви баԝәрийа нәрʹаст, ԝәки йан чь паши мьрьне әʹмьр бәрдәԝан дьбә. Ԛӧльхкʹаред Йаһоԝа фәʹм дькьн ԝәки мәри шина мьрийед хԝә бькә, һәрʹә ль сәр мәзәл, у мьрийед хԝә бинә бира хԝә, дь ве йәкеда тьштәки нәрʹаст тʹӧнә. Ле әԝана тʹӧщар ԝан әʹйд-ԛәйдед кӧ мьԛабьли ԛанунед Кʹьтеба Пироз дәртен, накьн (Ԝаиз 9:5, 10).

Щәжьнед Дьн. Әм нькарьн хәбәрдьн дәрһәԛа ԝан һʹәму щәжьна йед кӧ дь нав тʹәмамийа дьнйайеда дәрбаз дькьн. Ле фәʹмдари йә кӧ Йаһоԝа ԛәбул накә ван щәжьна, йед кӧ мәрийа йане тʹәшкиләта һӧрмәт дькьн (Йерәмйа 17: 5-7; Кʹаред Шандийа 10:25, 26). Һәрге тӧ бьзаньби һәр әʹйд жь кʹидәре те, тәрʹа һе һеса бә сафи ки, кӧ кʹижан щәжьне Хԝәде ԛәбул дькә у кʹижане на. Фәрз ә әве йәке бини бира хԝә (Ишайа 52:11; Әʹйанти 18:4). Принсипед Кʹьтеба Пироз дәрһәԛа кʹижана кӧ дь сәре 16-да те гьликьрьне, ве али тә бькьн пебьһʹәси, кӧ ча Йаһоԝа дьньһерʹә ль сәр дәрбазкьрьна щурʹә-щурʹә щәжьна.