1, 2. Наве ԝан мәрьва бежә, йед кӧ Йаһоԝа бьжарт ча достед хԝәйи незик.

ТӘЙЕ тʹәви кʹижан мәрьви бьхԝәста һәвалти бькьра? Һьлбәт тәйе бьхԝәста тʹәви мәрьвәки ӧса һәвалти бькьра, ԝәки ньһерʹандьн у дьшьрмишбуна ԝи мина йа тә буйа. У диса мәрики ӧса ԝе тә хԝәш бьһата йе кӧ мьлук, һʹәлал у ԛәнщ буйа.

² Дь нав тʹәрихийеда Йаһоԝа һьнә мәри бьжартьн, ԝәки бьбьнә достед ԝи. Мәсәлә, Йаһоԝа дәрһәԛа Бьраһим пʹехәмбәр гот, кӧ әԝ досте ԝи йә. (Бьхунә Ишайа 41:8; Аԛуб 2:23.) Дәрһәԛа Даԝьд пʹехәмбәр Йаһоԝа гот: «Мьн . . . мәрик дьле хԝәрʹа дит», чьмки Даԝьд мәрики ӧса бу, кӧ Хԝәде хԝәш дьһат (Кʹаред Шандийа 13:22). Ле дәрһәԛа Данийел пʹехәмбәр те готьне, кӧ Йаһоԝа әԝ һʹәсаб кьр ча йәки әʹзиз (Данийел 9:23).

3. Йаһоԝа сәва чь һьнә мәри бьжарт ча достед хԝә?

³ Чьрʹа Йаһоԝа, Бьраһим, Даԝьд у Данийел пʹехәмбәр, һʹәсаб дькьр достед хԝә? Йаһоԝа готә Бьраһим: «Тә гӧһдарийа мьн кьр» (Дәстпебун 22:18, ПКʹМ). Жь вьр те кʹьфше, кӧ Йаһоԝа незики ԝан мәрьва дьбә, йед кӧ бь мьлуктийе гӧрʹа ԝи дькьн. Щьмәʹта Исраелирʹа жи Йаһоԝа гот: «Готьна мьн гӧһдари бькьн у әзе жь ԝәрʹа бьбьм Хԝәде у һуне жи жь мьнрʹа бьбьн нәтәԝә [щьмәʹт]» (Йерәмйа 7:23). Һәрге тӧ гӧрʹа Йаһоԝа бьки, те жи бькарьби бьби досте ԝи.

4, 5. Ча Йаһоԝа ԛӧльхкʹаред хԝә ԛәԝи дькә?

⁴ Һәла дьшьрмиш бә, те чьԛас кʹаре бьстини һәрге бьби досте Хԝәде. Дь Кʹьтеба Пирозда ньвисар ә кӧ Йаһоԝа һʹәму тьшти дькә, ԝәки али ԝан мәрьва бькә, «йед кӧ дьлед ԝан бь ԝирʹа йәк ьн» (2 Дирок 16:9). Ле ча Йаһоԝа дькарә тә ԛәԝи кә? Дь кʹьтеба Зәбура 32:8-да дәрһәԛа ве йәке ӧса те готьне: «Әзе тә пәрԝәрдә [һин] бькьм у рʹейа кӧ тӧ дь ԝеда һәрʹә, рʹе тә бьдьм; әзе ширәта бьдьм тә, чʹәʹве мьн ль сәр тәда йә».

⁵ Бь рʹастийе жи, хәмкьрьна Йаһоԝа чьԛас бь дьловани йә! Һәрге тӧ ԛайил би, әԝ ԝе рʹебәрийе тә бькә у чʹәʹве ԝи ԝе ль сәр тә бә. Хԝәде дьхԝазә дь чәтьнайада у щерʹьбандьнада али тә бькә. (Бьхунә Зәбур 55:22.) Ләма жи һәрге тӧ бь тʹәмамийа дьле хԝә Йаһоԝарʹа ԛӧльх дьки, тӧ жи дькари мина Зәбурбеж бь баԝәрийе бежи: «Хӧдан һәр тьм даним пешийа хԝә, ԛәт наләрьзьм; жь бәр кӧ әԝ ль алийе мьни рʹаства сәкьнийә» (Зәбур 16:8; 63:8). Бәле, Йаһоԝа дькарә али тә бькә, ԝәки тӧ ӧса бьжийи кӧ Хԝәде хԝәш бейи. Ле ча әм ида пеһʹәсийан дьжмьне Хԝәде һәйә, кӧ дьхԝазә рʹе мә бьгьрә, ԝәки әм нькарьбьн дьле Хԝәде ша кьн.

6. Һьндава һʹәму мәрьва, Мире-щьна чь кьрә бьн шьке?

⁶ Жь сәре 11 әм пеһʹәсийан, кӧ Шәйтʹан Мире-щьна изьна Хԝәде сәрԝертийе бькә, кьрә бьн шьке. Әԝи бӧхдан авитә Хԝәде у жь гьлийе ԝи дьһатә кʹьфше, ԝәки нәрʹаст ә кӧ Йаһоԝа изьне надә Адәм у Һеԝайе хԝәха сафи кьн, чь йә ԛәнщи у чь йә хьраби. Паши ве йәке, чахе Адәм у Һеԝайе гӧнә кьрьн у әʹрд бь зӧрʹәтед ԝан тʹьжә бу, Мире-щьна амьнийа у һʹәлалийа һʹәму мәрьва кьрә бьн шьке. Бь ԝе йәке әԝи дьхԝәст бьгота йан чь, ‹Мәри нә жь бо һʹьзкьрьне Хԝәдерʹа ԛӧльх дькьн. Әз дькарьм һʹәму мәрийа жь Хԝәде дур хьм›. Әԝ йәк кӧ Мире-щьна ӧса дьшьрмиш дьбә, рʹьнд те кʹьфше жь мәсәла мәрики бь наве Ибо. Кʹи бу Ибо у ча Шәйтʹан Мире-щьна амьнийа ԝи кьрә бьн шьке?

7, 8. (а) Ибо чьда нә мина мәрьвед дор-бәре хԝә бу? (б) Ча Мире-щьна амьнийа Ибо кьрә бьн шьке?

 ⁷ Ибо ԝәкә 3 600 сал пешда дьжит. Әԝ мәрики рʹаст бу у дәрһәԛа ԝи Йаһоԝа гьлийед ӧса гот: «Ль дьне йе мина ԝи тʹӧнә, мәрики рʹаст у һʹәлал, әԝ Хԝәде дьтьрсә у жь хьрабийе хԝә дур дьгьрә» (Ибо 1:8, ДТʹ). Ибо һәртʹьм дьле Хԝәде ша дькьр.

⁸ Мире-щьна амьнийа Ибо кьрә бьн шьке. Әԝи Йаһоԝарʹа гот: «Нә тӧ ԝи, мала ԝи у һәр тьште ԝи хԝәй дьки. Тә һʹәму кьред дәсте ԝи бәрәкʹәт кьрийә, у һʹәйԝанед ԝи тә ль сәр әʹрде зедә кьрийә. Ле һәла кʹәрәм кә, дәсте хԝә дьрежи һʹәму һәбуна ԝи бькә. Бь рʹастийе әԝ ԝе ль бәр рʹуйе тә ньфьрʹа тә бькә» (Ибо 1:10, ДТʹ).

9. Ча Йаһоԝа щаба пьрса Мире-щьна да у чьрʹа?

⁹ Шәйтʹан Мире-щьна гот, кӧ Ибо тʹәне сәва кʹара хԝә Хԝәдерʹа ԛӧльх дькә. Мире-щьна ӧса жи гот, кӧ һәрге Ибо бе щерʹьбандьне, әԝе Хԝәде инкʹар кә. Ле ча Йаһоԝа гәрәке щаба пьрса Мире-щьна бьда? Чьмки амьнийа Ибо кʹәтә бьн шьке, ләма жи Йаһоԝа изьн да Мире-щьна кӧ әԝ Ибо бьщерʹьбинә. Бь ве йәке ԝе рʹьнд бьһата кʹьфше, кӧ бь рʹастийе Ибо Хԝәде һʹьз дькә йан на?

10. Ибо кʹәтә чь щурʹә щерʹьбандьна у әван щерʹьбандьна Ибо ча дәрбаз кьр?

¹⁰ Мире-щьна, Ибо бь гәлә щурʹә щерʹьбанд. Ниве жь һʹәйԝанед ԝи һатьнә тʹаланкьрьне, йед дьн жи һатьнә кӧштьне. Хӧламе ԝи жи ниве зәʹф һатьнә кӧштьне. Бь ве йәке Ибо, дь алийе һәбунеда кʹәтә һʹаләки гьран. Паше Ибо диса бебәхтикә гьран дит, дәһ зарʹед ԝи ԝәʹде багәра ԛайим, мьрьн. Дь нава ван һʹәму щерʹьбандьнада Ибо «гӧнә нәкьр у дь тʹӧ тьштәки хьрабда Хԝәде нәһәԛ нәкьр» (Ибо 1:22, ДТʹ).

11. (а) Шәйтʹан Мире-щьна диса ча Ибо нәһәԛ кьр, у Йаһоԝа ча щаб да? (б) Ибо әв нәхԝәшийа гьран ча дәрбаз кьр?

¹¹ Ле әве йәке, Шәйтʹан Мире-щьна нәда сәкьнандьне. Әԝ ӧса дьшьрмиш дьбу: «Ибо һʹәму һәбука хԝә, хӧлам у зарʹед хԝә ӧнда кьр, нәһатә шкенандьне, ле һәрге ԝи бь нәхԝәшикә гьран нәхԝәш бехьн, әԝе Хԝәде инкʹар кә». Йаһоԝа изьн  да Мире-щьна, ԝәки әԝ Ибо бь нәхԝәшикә мьрʹдарʹ у гьран нәхԝәш бехә. Ле һәла һе әв нәхԝәшийа гьран жи, баԝәрийа Ибо нәда ӧндакьрьне. Әԝи бь баԝәрбуне гот: «Һʹәта мьрьне беԛӧсуртийа хԝә наһельм!» (Ибо 27:5, ДТʹ).

12. Ча Ибо бь кьред хԝә избат кьр, кӧ Мире-щьна дәрәԝин ә?

¹² Ибо ньзаньбу, кӧ Мире-щьна йә сәбәбе кӧл-дәрдед ԝи. Әԝ нә жи һаш ве пьрса фәрз һәбу, йа кӧ Мире-щьна дәрһәԛа сәрԝертийа Хԝәде пешда анибу. Ибо тʹьре, кӧ Йаһоԝа йә сәбәбе кӧл-дәрдед ԝи (Ибо 6:4; 16:11-14). Ле йәкә Ибо амьн ма Хԝәдерʹа. Бь амьнийа хԝә, әԝи Мире-щьнарʹа избат кьр, ԝәки әԝ нә бона кʹара хԝә, ле бь һʹьзкьрьн Хԝәдерʹа ԛӧльх дькә.

13. Амьнийа Ибо бу мәʹнийа чь?

¹³ Амьнийа Ибо бу мәʹни, ԝәки Йаһоԝа щаба пьрса Мире-щьна бьдә. Ибо бь рʹастийе жи бу досте Хԝәде у Йаһоԝа сәва амьнийа ԝи, әԝ хәлат кьр (Ибо 42:12-17).

14, 15. Чьрʹа әм дькарьн бежьн, кӧ пьрса Мире-щьна нә кӧ тʹәне Ибо дькʹәвә, ле ӧса жи һʹәму мәрьва?

¹⁴ Пьрса кӧ Мире-щьна дәрһәԛа амьнийе рʹакьр, нә тʹәне Ибо дькʹәт, әв пьрс тә жи дькʹәвә. У әв йәк рʹьнд те кʹьфше жь Мәтʹәлок 27:11-да, кʹидәре Йаһоԝа дьбежә: «Кӧрʹе мьн, сәрԝахт бә у дьле мьн ша кә, ԝәки әз бькарьбьм щаба ԝи бьдьм кʹи кӧ мьн рʹәзил дькә (ДТʹ)». Әв гьли, йед кӧ бь сәда сал паши мьрьна Ибо һатьн ньвисаре, нишан дькьн кӧ Шәйтʹан Мире-щьна диса жи Хԝәде беһӧрмәт дькә у ԛӧльхкʹаред ԝи нәһәԛ дькә. Чахе әм бь әʹмьрәки ӧса дьжин, йе кӧ Хԝәде хԝәш те, бь ве йәке әм щаба пьрса Мире-щьнайә дәрәԝ дьдьн у дьле Йаһоԝа ша дькьн. Әв йәк ча ль сәр тә һʹӧкӧм дьбә? Бь рʹастийе жи ԛәдрәки гәләк мәзьнә, кӧ әм дькарьн щаба пьрса Мире-щьнайә дәрәԝ бьдьн, һәла һе ԝи чахи жи һәрге лазьм бә тьштәки дь әʹмьре хԝәда бьгoһезьн!

¹⁵ Дина хԝә бьде, Мире-щьна гьлийед ӧса гот: «Бәле, мәрьв бона щане хԝә, һәгәр чийи ԝи һәбә, дьдә» (Ибо 2:4). Бь хәбәра «мәрьв», Мире-щьна әшкәрә да кʹьфше кӧ хәйба ԝи, нә кӧ тʹәне Ибо дькʹәт, ле ӧса жи һʹәму мәрьва дькʹәвә. Әва йәка  тьштәки гәлә фәрз ә, чьмки Шәйтʹан Мире-щьна амьнийа тә жи һьндава Хԝәде кьрә бьн шьке. Әԝ дьхԝазә, ԝәки чахе тӧ рʹасти чәтьнайа бейи гӧрʹа Хԝәде нәки у жь рʹийа ԝийә рʹаст дәрейи. Ле ча Мире-щьна дьхԝазә әве нета хԝә бинә сери?

16. (а) Бь чь щурʹәйи Шәйтʹан Мире-щьна дьхԝазә мәрийа жь Хԝәде дур хә? (б) Ча Шәйтʹан Мире-щьна дькарә рʹе тә бьгьрә?

¹⁶ Ча әм жь сәре 10 пеһʹәсийан, Мире-щьна щурʹә-щурʹә метод дьдә хәбате, сәва кӧ мәрийа жь Хԝәде дур хә. Мире-щьна ӧса жи һʹӧщӧми ль сәр мәрийа дькә, «мина шер мьрʹә-мьрʹа ԝи йә, дьгәрʹә кʹа кʹе һʹуфи хԝә кә» (1 Пәтрус 5:8). Әв йәк рʹьнд те кʹьфше илаһи чахе һәвал, бьра-пьсмам йан мәрьвед дьн рʹийа тә дьгьрьн, ԝәки тӧ Кʹьтеба Пироз һин нәби у чь кӧ жь Кʹьтеба Пироз педьһʹәси дь әʹмьре хԝәда нәԛәдини * (Йуһʹәнна 15:19, 20). Хенщи ве йәке Шәйтʹан Мире-щьна ӧса жи: «Хԝә дькә дьлԛе мьлйакʹәте рʹонайи» (2 Корьнтʹи 11:14). Әԝ дькарә ӧса тә бьхальфинә, кӧ тӧ һаш хԝә тʹӧнә би, ча жь рʹийа Хԝәде дәрдькʹәви у жь Хԝәде дур дькʹәви. Мире-щьна ӧса жи дькарә тьштед ӧса бькә, ԝәки дьле мә бьшке, у әм дьшьрмиш бьн кӧ һежайи ԛәбулкьрьна Хԝәде ниньн (Мәтʹәлок 24:10). Дьхԝази Мире-щьна мина «шер» бә, дьхԝази хԝә кʹьфш кә мина «мьлйакʹәте рʹонайи», нета ԝи йәкә, әԝ дьхԝазә избат кә, кӧ ԝәʹде щерʹьбандьна йан чәтьнайа тӧйе ида Хԝәдерʹа ԛӧльх нәки. Ле ча тӧ дькари щаба ве пьрса Мире-щьна бьди у мина Ибо амьнийа хԝә Хԝәдерʹа избат ки?

17. Мәʹни чи йә, ԝәки бь гора ԛанунед Йаһоԝа бьжийи?

¹⁷ Һәрге тӧ ӧса бьжийи кӧ дьле Хԝәде ша бьки, бь ԝе йәке тӧ дькари щаба пьрса Мире-щьна бьди. Ле чь лазьм ә сәва ве йәке? Кʹьтеба Пироз дьбежә: «Хӧдан Хԝәдейе хԝә һʹьз бькә, бь тʹәмамийа дьле хԝә, бь тʹәмамийа щанийа хԝә у бь тʹәмамийа  ԛәԝата хԝә» (Ԛануна Дӧщари 6:5, ПКʹМ). Чьԛас һʹьзкьрьна тә һьндава Хԝәде мәзьн бә, һаԛас те бьхԝази, ԝәки бьжи ӧса ча Хԝәде жь тә дьхԝазә. Йуһʹәннайе шанди ньвисийә: «Чьмки бь ве йәке әм һʹьзкьрьна хԝә һьндава Хԝәдеда дьдьнә кʹьфше, гава әм тʹәмийед ԝи дьԛәдиньн». Һәрге тӧ бь тʹәмамийа дьле хԝә Хԝәде һʹьз бьки тӧйе тʹәхмин ки, кӧ «тʹәмийед ԝи нә гьран ьн» (1 Йуһʹәнна 5:3).

18, 19. (а) Кʹижан ьн һьнә жь ван ԛануна, йед кӧ Йаһоԝа дьдә? (Бьньһерʹә чаргошә ль сәр рʹупʹела 122.) (б) Әм жь кʹӧ заньн, кӧ Йаһоԝа жь мә нахԝазә ԝан тьшта, чь кӧ әм нькарьн бькьн?

¹⁸ Ле кʹижан ьн әв ԛанунед Йаһоԝа? Һьнәк жь ван нишан дькьн, ԝәки жь чь әм гәрәке хԝә хԝәй кьн. Дина хԝә бьдә чаргоше ль сәр рʹупʹела 122, наве кʹижани ӧса йә: «Хԝә жь ԝан тьшта дур бьгьрә чь кӧ Йаһоԝа нәфрʹәт дькә». Ль ԝьр тӧйе бьбини, ԝәки Кʹьтеба Пироз чь сущдар дькә. Чахе тӧ дина хԝә бьди ԝе йәке, дьбәк тӧ дьшьрмиш би кӧ һьнә жь ван тьшта, нә хьраб ьн. Ле чахе тӧ дьшьрмиш би ль сәр рʹезед Кʹьтеба Пироз, тӧйе бьбини кӧ ԛанунед Йаһоԝа бь рʹастийе жи чьԛа аԛьлайи нә. Дьбәк тәрʹа гәлә чәтьн бә тьштәки бьгӧһези дь әʹмьре хԝәда у бьжийи ӧса, ча Хԝәде дьхԝазә. Ле һәрге тӧ һʹәму тьшти бьки, сәва кӧ дьле Хԝәде ша бьки, тӧйе бәхтәԝарбуне бьстини (Ишайа 48:17, 18). Бь рʹастийе тӧ дькари бьжийи ӧса, ԝәки дьле Хԝәде хԝәш бейи. Ле әв йәк әм жь кʹӧ заньн?

¹⁹ Йаһоԝа тʹӧ щар жь мә нахԝазә ԝан тьшта, чь кӧ әм нькарьбьн бькьн. (Бьхунә Ԛануна Дӧщари 30:11-14.) Әԝ жь мә четьр занә мәщалед мә, у занә чь әм дькарьн бькьн у чь на (Зәбур 103:14). Хенщи ве йәке Йаһоԝа дькарә ԛәԝате бьдә мә, ԝәки әм бькарьбьн гӧрʹа ԝи бькьн. Паԝлосе шанди ньвисийә: «Ле Хԝәде амьн ә, әԝ наһелә кӧ һун жь ԛәԝата хԝә дәр бенә щерʹьбандьне. Әԝе щерʹьбандьнеда дәлиләке жи бькә, кӧ һун бькарьбьн тәйах кьн» (1 Корьнтʹи 10:13). Йаһоԝа ӧса жи дькарә али тә бькә у «зорайийа ԛәԝате» бьдә тә, ԝәки тӧ бькарьби һʹәму тьшти тәйах ки (2 Корьнтʹи 4:7). Паши ԝе йәке чахе Паԝлосе шанди рʹасти гәлә щерʹьбандьна һат, әԝи бь баԝәрбуне гьлийед ӧса ньвиси: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13).

20. Кʹижан һʹӧнӧред баш тӧ гәрәке нав хԝәда мәзьн ки, у чьрʹа әв йәк гәлә фәрз ә?

²⁰ Сәва кӧ бьжийи ӧса, ԝәки дьле Хԝәде хԝәш бе, бәс нинә тʹәне хԝә жь ԝан тьшта хԝәй ки, чь кӧ Хԝәде нәфрʹәт дькә. Һәрге дьхԝази дьле Хԝәде ша бьки, тӧ гәрәке һʹьз бьки ԝан тьшта, чь кӧ Хԝәде һʹьз дькә (Рʹомайи 12:9). Тәйе нәхԝәста тʹәви мәрьвәки ӧса незик буйайи у һәвалти бькьра, ԝәки дьшьрмишбун у ньһерʹандьна ԝи мина йа тә буйа? Йаһоԝа  жи ӧса дьхԝазә. Ләма жи һʹәму тьшти бькә, ԝәки ԝан тьшта һʹьз бьки, чь кӧ Йаһоԝа һʹьз дькә. Һьнә жь ԝан тьшта чь, кӧ Йаһоԝа ԛимәт дькә, дь кʹьтеба Зәбура 15-да, те шьровәкьрьне. Ль ԝьр те гьли кьрьне дәрһәԛа ԝан мәрьва, йед кӧ Йаһоԝа ԝана достед хԝә һʹәсаб дькә. (Бьхунә Зәбур 15:1-5.) Достед Йаһоԝа дьһельн, ԝәки ԛәԝата Хԝәдейә Пироз али ԝан бькә кӧ һʹӧнӧред баш дь әʹмьре хԝәда пешда биньн. Мәсәлә, бь сайа ве ԛәԝата Хԝәдейә Пироз, әм һʹӧнӧред ӧса нав хԝәда мәзьн дькьн ча «һʹьзкьрьн, шабун, әʹдьлайи, сәбьркьрьн, ширьнайи, ԛәнщи, амьни, мьлукти, хԝәгьртьн» (Галати 5:22, 23).

21. Чь ԝе али тә бькә, ԝәки һʹӧнӧред ӧса нав хԝәда мәзьн ки, йед кӧ Хԝәде хԝәш тен?

 ²¹ Һәрге тӧ һәр-рʹож Кʹьтеба Пироз бьхуни у һин би, әԝе али тә бькә һʹӧнӧред ӧса нав хԝәда мәзьн ки, йед кӧ Хԝәде хԝәш тен. Чахе тӧ пебьһʹәси Хԝәде чь жь тә дәԝа дькә, тӧйе бькарьби бьзаньби кӧ Йаһоԝа ча дьньһерʹә ль сәр щурʹә-щурʹә пьрса. Әв йәк ԝе али тә бькә, ԝәки нет-фькьред тә бьбә мина нет-фькьред Хԝәде (Ишайа 30:20, 21). Һʹьзкьрьна тә һьндава Йаһоԝа чьԛас һе ԛәԝи бә, һаԛас һе зәʹф тӧйе бьхԝази бьжийи ӧса, ԝәки дьле Хԝәде хԝәш бейи.

22. Һәрге тӧ бьжийи ӧса ча Хԝәде хԝәш те, тӧйе чь бини сери?

²² Сәва кӧ бьжин ӧса, ԝәки дьле Хԝәде хԝәш бе, лазьм ә ԛәԝате бьди хәбате. Кʹьтеба Пироз гӧһастьна әʹмьр бәрамбәри ԝе йәке дькә, ча бежьн мәрьве кәвьн бь кьред у хәйсәтед хԝәва, мина кʹьнщ жь сәр хԝә бехьн у мәрьве тʹәзә бь кьред у хәйсәтед тʹәзә, мина кʹьнща тʹәзә хԝә кьн (Колоси 3:9, 10). Дәрһәԛа ԛанунед Йаһоԝа зәбурбеж ӧса ньвиси: «Кәсед кӧ ль гори ԝан бьмәшьн, хәлата ԝан пʹьрʹ мәзьн ә» (Зәбур 19:11, АБ). Тӧ жи дькари баԝәр ки, ԝәки жийина бь хԝәстьна Хԝәде кʹарәкә мәзьн тинә. Һәрге тӧ бьжийи ӧса ча Хԝәде дьхԝазә, бь ве йәке те щаба пьрса Мире-щьнайә дәрәԝ бьди у дьле Йаһоԝа гәлә ша бьки.