1. Һәрге әм рʹаст Хԝәдерʹа ԛӧльх кьн, әме чь кʹаре бьстиньн?

ЙАҺОԜА Хԝәде бона мә гәлә хәм дькә у дьхԝазә, ԝәки әм жь рʹебәрийа ԝийә бь һʹьзкьрьне кʹаре бьстиньн. Һәрге әм рʹаст Хԝәдерʹа ԛӧльх кьн, әме бәхтәԝар бьн у бькарьбьн хԝә жь проблема хԝәй кьн. Әме ӧса жи кʹәрәм у аликʹарийа ԝи бьстиньн (Ишайа 48:17). Рʹожа иройин бь сәда һʹәбандьн һәнә у һәр кәс жь ԝан дьбежьн, кӧ әԝана рʹастийе дәрһәԛа Хԝәде һин дькьн. Ле һинкьрьнед ԝан дәрһәԛа ԝе йәке, кӧ кʹи йә Хԝәде у әԝ чь жь мә дәʹԝа дькә, жь һәв гәлә щӧда дьбьн.

2. Ча әм дькарьн бьзаньбьн кʹижан ә һʹәбандьна рʹаст кӧ Йаһоԝа ԛәбул дькә, у кʹижан мәсәлә али мә дькә әве йәке фәʹм бькьн?

² Ле ча тӧ дькари бьзаньби, кʹижан ә һʹәбандьна рʹаст кӧ Йаһоԝа ԛәбул дькә? Лазьм нинә һин би йан жи һьмбәри һәв ки һинкьрьнед һʹәму религийа. Тʹәне лазьм ә пебьһʹәси, чь һин дькә Кʹьтеба Пироз дәрһәԛа һʹәбандьна рʹаст. Мәсәлә, дь гәлә ԝәлатада проблемәкә ӧса һәйә, кӧ пʹәрʹед ԛәлп чедькьн. Һәрге тәрʹа шьхӧл бьдана ԝәки тӧ гәрәке пʹәрʹед ԛәлп тедәрхи, тәйе әв йәк ча бькьра? Тәйе дәстпекьра һʹәму щурʹә пʹәрʹед ԛәлп һинбуйайи нас кьра у бира хԝәда щурʹед ԝан хԝәй кьра? Фәʹмдари йә на. Ԝе дьһа аԛьлайи буйа һәрге тә ԝәʹде хԝә хәрщ кьра ль сәр ԝе йәке, кӧ пʹәрʹед рʹаст рʹьнд һинбуйайи нас бьки. Чахе тӧ ида бьзаньби кӧ пʹәрʹед рʹаст чь щурʹәйи йә, тӧйе бькарьби пʹәрʹед ԛәлп жи тедәрхи. Һәма ӧса жи чахе әм һин дьбьн кӧ ча һʹәбандьна рʹаст нас кьн, әме ида бькарьбьн тедәрхьн кӧ һʹәбандьнед ԛәлп кʹижан ьн.

3. Әм чь гәрәке бькьн сәва кӧ Хԝәде хԝәш бен?

 ³ Гәлә фәрз ә ԝәки әм Йаһоԝарʹа ԛӧльх кьн ӧса, ча әԝ дьхԝазә. Гәләк мәри баԝәр дькьн ԝәки Хԝәде һʹәму һʹәбандьна ԛәбул дькә. Ле Кʹьтеба Пироз әве йәке һин накә. Бәс нинә тʹәне бежьн: «Әз Хԝәде баԝәр дькьм!». Паԝлосе шанди дәрһәԛа һьнәка ӧса гот: «Әԝ дьбежьн, кӧ Хԝәде нас дькьн, ле бь кьред хԝә ԝи инкʹар дькьн, һʹәрам у хԝәсәрихԝә нә у һәр кьрьнәкә ԛәнщрʹа бекер ьн» (Тито 1:16). Сәва кӧ әм Хԝәде хԝәш бен, лазьм ә әм һин бьн Хԝәде чь жь мә дәʹԝа дькә, у ԝан дәʹԝакьрьна бьԛәдиньн. Ле кʹи кӧ ԛьрара Хԝәде наԛәдинә, Иса ль сәр ԝан гот «нәһәԛно» (Мәтта 7:21-23). Ча ԛимәте пʹәрʹед ԛәлп тʹӧнә, ӧса жи бь рʹастийе ԛимәте һʹәбандьнед ԛәлп тʹӧнә. Һе зедә, һʹәбандьнед ӧса зийандар ьн.

4. Чь те һʹәсабе гьлийе Иса дәрһәԛа дӧ рʹийа у һәр рʹек бәрбь чь дьбә?

⁴ Йаһоԝа һәр кәсирʹа мәщале дьдә, ԝәки әԝана әʹмьре һʹәта-һʹәтайе бьстиньн. Сәва кӧ әм дь щьнәта ль сәр әʹрде һʹәта-һʹәтайе бьжин, әм гәрәке Хԝәдерʹа рʹаст ԛӧльх кьн у бьжин ӧса ча әԝ ԛәбул дькә. Йазьх ԝәки мәри ниве зәʹф нахԝазьн әве йәке бькьн. Ләма жи Иса гот: «Дәре тәнгрʹа бькʹәвьнә һьндӧрʹ, чьмки фьрә йә әԝ дәри у бәр ә әԝ рʹийа кӧ дьбә бәрбь ӧндабуне у гәләк ьн әԝед кӧ ԝеда дьчьн. Ле гәләки тәнг ә әԝ дәри у зәʹмәт ә әԝ рʹийа кӧ дьбә бәрбь жийине у һьндьк ьн әԝед кӧ ԝе рʹейе дьбиньн» (Мәтта 7:13, 14). Һʹәбандьна рʹаст, бәрбь әʹмьре һʹәта-һʹәтайе дьбә. Ле һʹәбандьна ԛәлп, бәрбь мьрьне дьбә. Йаһоԝа нахԝазә ԝәки кәсәк жь мәрийа бьмьрә, ләма жи әԝ һʹәму щийа у гьшкарʹа мәщале дьдә, ԝәки бькарьбьн дәрһәԛа ԝи һин бьн (2 Пәтрус 3:9). Бь рʹастийе, әԝ йәк кӧ әм ча Хԝәде дьһʹәбиньн, бона мә дькарә бе һʹәсабе йан әʹмьр йан мьрьн.

5. Ча әм дькарьн нас кьн ԝан мәрийа, кʹи кӧ дь һʹәбандьна рʹастда нә?

⁵ Ча әм дькарьн бьбиньн «рʹийа кӧ дьбә бәрбь жийине»? Иса Мәсиһ гот кӧ һʹәбандьна рʹаст әм дькарьн нас кьн бь кьред ԝан мәрьва, йед кӧ дь ве һʹәбандьнеда ньн. Әԝи ӧса  гот: «Дара ԛәнщ бәре ԛәнщ дьдә», сәрда жи зедә кьр: «Аԝа һуне ԝана жь кьред ԝан нас бькьн» (Мәтта 7:17, 20). Бь щурʹәки майин бежьн, кʹи кӧ дь һʹәбандьна рʹастда ньн, тенә наскьрьне пе баԝәри у кьред хԝә. Рʹаст ә әԝана нәԛәданди нә у шашийа дькьн, ле ча кʹом әԝана һʹәму тьшти дькьн, ԝәки ԛьрара Хԝәде бьԛәдиньн. Ԝәре әм ньһа хәбәр дьн дәрһәԛа шәш тьшта, бь сайа кʹижана әме бькарьбьн нас кьн ԝан мәрийа, кʹи кӧ Хԝәдерʹа рʹаст ԛӧльх дькьн.

6, 7. Ча ԛӧльхкʹаред Хԝәде дьньһерʹьн ль сәр Кʹьтеба Пироз у дь ве йәкеда Иса ча дьбә мәсәлә?

⁶ Һинкьрьнед ԛӧльхкʹаред Хԝәде ль сәр һʹиме Кʹьтеба Пироз ьн. Дь Кʹьтеба Пирозда ньвисар ә: «Тʹәмамийа ньвисаре жь бина бәр Хԝәде йә у керһати йә бона һинкьрьне, леһьлатьне, рʹасткьрьне у ширәткьрьна жийина рʹастийеда, ԝәки мәрьве Хԝәде бекемаси бә, бона һʹәму кьрьнед ԛәнщ һазьр сәкьни бә» (2 Тимотʹейо 3:16, 17). Паԝлосе шанди мәсиһийарʹа ӧса ньвиси: «Гава ԝә жь мә хәбәра Хԝәде бьһист, ԝә нә кӧ чаԝа хәбәра мәрьвайе, ле чаԝа хәбәра Хԝәде ԛәбул кьр, рʹаст жи ӧса йә» (1 Тʹесалоники 2:13). Ча те кʹьфше баԝәри у һинкьрьнед һʹәбандьна рʹаст ль сәр һʹиме дьшьрмишбун у әʹрф-әʹдәтед мәрьва ниньн. Әԝ тʹәне ль сәр һʹиме Хәбәра Хԝәде нә, демәк Кʹьтеба Пироз.

⁷ Дь ве пьрседа Иса Мәсиһ мәсәләкә баш мәрʹа һишт, чьмки һинкьрьнед ԝи тʹьме ль сәр һʹиме Хәбәра Хԝәде бун. Дь дӧакьрьнеда Баве хԝәйи әʹзманарʹа әԝи гот: «Хәбәра тә рʹасти йә» (Йуһʹәнна 17:17). Иса баԝәрийа хԝә Хәбәра Хԝәде дьани у һинкьрьнед ԝи һәма рʹаст жь Хәбәра Хԝәде бун. Әва йәка әм жь кʹӧ заньн? Чахе Иса дьхԝәст жь Хәбәра Хԝәде тьштәк бьгота әԝи тʹьме дьгот: «Ньвисар ә». Паше Хәбәра Хԝәде дьгот (Мәтта 4:4, 7, 10). Рʹожа иройин жи ԛӧльхкʹаред Хԝәде жь хԝә һин накьн. Әԝана баԝәр дькьн кӧ Кʹьтеба Пироз Хәбәра Хԝәде йә, у һинкьрьнед хԝә бь тʹәмами ль сәр ве кʹьтебе һʹин дькьн.

8. Чь те һʹәсабе Йаһоԝарʹа ԛӧльх ки?

⁸ Кʹи кӧ дь һʹәбандьна рʹастда нә, тʹәне Йаһоԝарʹа ԛӧльх дькьн у наве ԝи әʹйан дькьн. Иса Мәсиһ гот: «Бьпʹәрьзә [ԛӧльх кә, ДТʹ] Хԝәдайе хԝә Йаһоԝа у бь тʹәне жь ԝирʹа  хьзмәте бькә» (Мәтта 4:10, АБ). Ләма жи ԛӧльхкʹаред Хԝәде бәр тʹӧ кәси сәре хԝә данайньн пештьри Йаһоԝа Хԝәде. Әԝана Йаһоԝарʹа ԛӧльх дькьн у мәрийарʹа гьли дькьн кӧ наве Хԝәдайе рʹаст чь йә у әԝ йәки ча нә. Дь кʹьтеба Зәбур 83:18-да, ньвисар ә: «Наве тә, Йаһоԝа йә! У йе кӧ ль сәр тʹәваһийа Гәрдуне Һәри Бьльнд ә, тʹәне тӧ йи (АБ)». Иса али мәрийа дькьр ԝәки әԝана Хԝәде нас кьн, у бь ве йәке мәсәлә мәрʹа һишт. Дӧакьрьнеда әԝи гот: «Мьн наве тә жь ԝан мәрьварʹа әшкәрә кьр йед кӧ тә жь дьнйайе дан мьн» (Йуһʹәнна 17:6, ИМ). Һәма ӧса рʹожа иройин ԛӧльхкʹаред рʹаст, һин дькьн мәрийа дәрһәԛа наве Хԝәде, ԛьрара ԝи у ӧса жи хәйсәт-һʹӧнӧред ԝи.

9, 10. Мәсиһийед рʹаст бь чь щурʹәйи һьндава һәв һʹьзкьрьне нишан дькьн?

⁹ Ԛӧльхкʹаред Хԝәде һьндава һәв һʹьзкьрьна һʹәлал у нәхԝәһʹьзи нишан дькьн. Иса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:35). Мәсиһийед пешьн жи һʹьзкьрьна ӧса һьндава һәв нишан дькьрьн. Бь рʹастийе жи һʹьзкьрьна кӧ Хԝәде дьхԝазә ԝәки бал мә һәбә, али мә дькә ԝәки әм һʹьз бькьн һʹәму мьләта у тʹәви ԝан дь әʹдлайеда бьн, у һьлнәдьнә һʹәсаб кӧ әԝана мәринә кʹәсиб йан дәԝләти нә, мәрьвнә навдар ьн йан бәләнгаз ьн. Әв һʹьзкьрьн мәрийа бьратийа рʹастда ԛәԝи гьредьдә. (Бьхунә Колоси 3:14.) Ле әв мәри кʹи кӧ дь һʹәбандьна ԛәлпда ньн, щәм ԝана бьратийа ӧса бь һʹьзкьрьн тʹӧнә. Әве йәке әм жь кʹӧ заньн? Әԝана һәвдӧ дькӧжьн жь бо ве йәке кӧ әԝана жь щурʹә-щурʹә мьләта у бәрәка ньн. Ле мәсиһийед рʹаст чʹәк һьлнадьнә дәсте хԝә, сәва кӧ кәсәки жь бьратийа хԝә йан жи мәрьвед дьн бькӧжьн. Дь Кʹьтеба Пирозда ньвисар ә: «Зарʹед Хԝәде у зарʹед Мирещьн бь ве йәке жь һәв тенә фьрԛикьрьне: Әԝе кӧ рʹастийе накә, әԝ нә жь Хԝәде йә у ӧса жи әԝе кӧ бьре хԝә һʹьз накә. . . . Гәрәке әм һәвдӧ һʹьз бькьн. Мина Ԛайин нибьн, кӧ жь Йе Хьраб бу у бьре хԝә кӧшт» (1 Йуһʹәнна 3:10-12; 4:20, 21).

¹⁰ Ле һʹьзкьрьна һʹәлал найе һʹәсабе тʹәне кәсәки нәкӧжи, әв тьштәки һе зедә йә. Мәсиһийед рʹаст һазьр ьн ԝәʹде хԝә,  ԛәԝата хԝә у хәрщед хԝә бьдьн, сәва кӧ али һәв бькьн у һәвдӧ бьшьдиньн (Ибрани 10:24, 25). Әԝана дь тәнгасийада али һәв дькьн у һьндава мәрьва, рʹаст у һʹәлал ьн. Мәсиһийед рʹаст дь әʹмьре хԝәда пек тиньн әве ширәта жь Кʹьтеба Пироз: «Һʹәмуйарʹа ԛәнщийе бькьн» (Галати 6:10).

11. Чьрʹа фәрз ә, кӧ Иса Мәсиһ ԛәбул кьн ча мәщала хьлазкьрьнейә тʹәк дь алийе Хԝәдеда?

¹¹ Мәсиһийед рʹаст, Иса Мәсиһ ԛәбул дькьн ча мәщала хьлазкьрьнейә тʹәк дь алийе Хԝәдеда. Дь Кʹьтеба Пирозда ньвисар ә: «Бь кәсәки майин хьлазбун тʹӧнә, чьмки бьн пʹәрʹе әʹзменда навәки дьн мәрьварʹа нәһатийә дайине, кӧ әм бькарьбьн бь ԝи хьлаз бьн» (Кʹаред Шандийа 4:12). Ча әм жь сәре 5 пеһʹәсийан, Иса әʹмьре хԝә сәва мәрьвед гӧһдар ча кʹьрʹин бәрва да (Мәтта 20:28). Хенщи ве йәке Хԝәде, Иса дь Пʹадшатийа әʹзманада кʹьфш кьр ча Пʹадша, сәва кӧ әԝ ль сәр тʹәмамийа дьнйайе сәрԝертийе бькә. Һәрге әм дьхԝазьн һʹәта-һʹәтайе бьжин әм гәрәке гӧрʹа Иса бькьн у һинкьрьнед ԝи бьԛәдиньн, чьмки Хԝәде әве йәке жь мә дәʹԝа дькә. Ләма жи дь Кʹьтеба Пирозда ньвисар ә: «Әԝе кӧ Кӧрʹ баԝәр дькә, жийина ԝийә һʹәта-һʹәтайе һәйә. Әԝе кӧ гӧрʹа Кӧрʹ накә, әԝ жийине набинә» (Йуһʹәнна 3:36).

12. Чь те һʹәсабе жь ве дьнйайе нибьн?

¹² Мәсиһийед рʹаст нә жь ве дьнйайе нә. Чахе Иса бәр сәрԝере Рʹоме Пилато сәкьнибу, гот: «Пʹадшатийа мьн нә жь ве дьнйайе йә» (Йуһʹәнна 18:36). Һʹәму мәсиһийед рʹаст кʹижан ԝәлатида жи бьминьн, әԝана хԝә һʹәсаб дькьн бьнәлийед Пʹадшатийа әʹзмана у ләма жи хԝә жь шьхӧлед политика ве дьнйайе хԝәй дькьн у дур дьгьрьн. Мәсиһийед рʹаст накʹәвьнә нав шәрʹ-дәʹԝа. Хенщи ве йәке әԝана мьԛабьли ԝан дәрʹнайен, кʹи кӧ дькʹәвә нав шьхӧле политике, йан жи кʹи дьхԝазә дь шьхӧле политикеда хԝә пешда бьбә, мәсиһийед рʹаст нә жи дәнге хԝә дьдьн сәва кӧ кәсәки бьжберьн ча сәрԝер. Рʹаст ә мәсиһийед рʹаст хԝә жь политике дур дьгьрьн, ле әԝана бь ԛануне ви ԝәлати дьжин. Ле гәло чьрʹа? Чьмки Хәбәра Хԝәде тʹәмикә ӧса дьдә ԝана, ԝәки «гӧрʹа ԝан һʹӧкӧмәтийада» бьн, «кӧ сәр» ԝанрʹа нә (Рʹомайи 13:1). Ле чахе ԛануна ԝәлат дәʹԝа дькә  ԝәки мәсиһи гәрәке тьштәки ӧса бькьн кӧ мьԛабьли ԛануна Хԝәде йә, һьнге мәсиһийед рʹаст пәй мәсәла шагьрта дьчьн йед кӧ готьн: «Әм гәрәке гӧрʹа Хԝәде бькьн, нә кӧ йа мәрьва» (Кʹаред Шандийа 5:29; Марԛос 12:17).

13. Ча мәсиһийед рʹаст дьньһерʹьн ль сәр Пʹадшатийа Хԝәде, у жь бо ве йәке әԝана чь шьхӧли дькьн?

¹³ Мәсиһийед рʹаст даннасин дькьн кӧ тʹәне Пʹадшатийа Хԝәде дькарә һʹәму проблемед инсанәте сафи кә.  Иса Мәсиһ гот: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14). Мәсиһийед рʹаст мәрийа һелан накьн кӧ гӧмана хԝә бьдьнә сәр сәрԝеред мәрьвайи, дәԝсе әԝана даннасин дькьн кӧ тʹәне Пʹадшатийа Хԝәде һәйә гӧмана мәрийа, кӧ дькарә һʹәму проблемед ԝан сафи кә (Зәбур 146:3). Иса Мәсиһ әм һин кьрьн, ԝәки дәрһәԛа ве сәрԝерийе дӧа бькьн. Әԝи гот: «Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:10). Дь Хәбәра Хԝәдеда пешда һатийә пʹехәмбәртикьрьне кӧ әв Пʹадшатийа әʹзмана ԝе «һʹәму ван пʹадшатийа [йе кӧ иро һәнә] алт кә у кӧтасийа ԝан бинә, ле әԝ хԝәха ԝе һәр у һәр бьминә» (Данийел 2:44, ДТʹ; Әʹйанти 16:14; 19:19-21).

14. Бь дьшьрмишбуна тә, кʹижан һʹәбандьн рʹаст ә?

¹⁴ Дәрһәԛа чь жи мә ньһа хәбәр да, пьрса бьдә хԝә: ‹Һинкьрьнед кʹижан һʹәбандьне ль сәр һʹиме Кʹьтеба Пироз ьн? Кʹи наве Хԝәде Йаһоԝа әʹйан дькә? Дь кʹижан һʹәбандьнеда мәри бь рʹастийе һәвдӧ һʹьз дькьн у баԝәрийа хԝә Иса Мәсиһ тиньн? Кʹи хԝә жь шьхӧлед ве дьнйайе дур дьгьрә, у дәрһәԛа Пʹадшатийа Хԝәде даннасин дькә, ԝәки тʹәне әԝ ә гӧмана мәрийа? Жь һʹәму һʹәбандьнед дьнйайе, кʹижан һʹәбандьн ван һʹәму тьшта дькә?› Һʹәму избаткьрьн дьдьнә кʹьфше, ԝәки әв һәнә Шәʹдед Йаһоԝа. (Бьхунә Ишайа 43:10-12.)

15. Хенщи ԝе йәке, ԝәки баԝәр кьн кӧ Хԝәде һәйә, чь диса лазьм ә бькьн?

¹⁵ Сәва кӧ Хԝәде ша бькьн, бәс нинә тʹәне баԝәрийа хԝә ԝи биньн. Чьмки дь Кʹьтеба Пирозда ньвисар ә, кӧ һәла һе щьн жи баԝәр дькьн ԝәки Хԝәде һәйә (Аԛуб 2:19). Әшкәрә йә кӧ әԝана ԛьрара Хԝәде наԛәдиньн у Хԝәде жи ԝана ԛәбул накә. Ле сәва кӧ Хԝәде мә ԛәбул кә, әм нә кӧ тʹәне гәрәке баԝәр бькьн кӧ әԝ һәйә, ле ӧса жи әм гәрәке ԛьрара ԝи бьԛәдиньн. Һе зедә, мәрʹа лазьм ә ԝәки әм жь һʹәбандьна ԛәлп дәрен у хԝә ль һʹәбандьна рʹаст бьгьрьн.

16. Чь әм гәрәке бькьн, һәрге әм һʹәбандьна ԛәлпда гьредайи нә?

 ¹⁶ Паԝлосе шанди нишан кьр, кӧ әм гәрәке тʹәви шьхӧлед һʹәбандьна ԛәлп нибьн. Әԝи ньвиси: «Бона ве йәке Хӧдан дьбежә: ‹Дә рʹабьн жь нава ԝан дәрен, щӧдә бьн. Ль тьштед һʹәрам нәкʹәвьн, у әзе ԝә ԛәбул кьм›» (2 Корьнтʹи 6:17; Ишайа 52:11). Ләма жи мәсиһийед рʹаст жь ԝан һʹәму тьшта хԝә дур дьгьрьн, чь кӧ һʹәбандьна ԛәлпва гьреда йә.

17, 18. Чь йә «Бабилона Мәзьн», у чьрʹа әм гәрәке зускава «жь нава ԝе» дәркʹәвьн?

¹⁷ Кʹьтеба Пироз нишан дькә кӧ һʹәму һʹәбандьнед ԛәлп тʹәвайи тенә навкьрьне «Бабилона Мәзьн» * (Әʹйанти 17:5). Әв нав тинә бира мә шәһәрәки кәвьн демәк Бабилон, кʹидәре паши Селава Дьнйайе һʹәму һʹәбандьнед ԛәлп пешда һатьн. Гәлә һинкьрьн у әʹрф-әʹдәт йед кӧ ньһа нав һʹәбандьна ԛәлпда һәнә, һәма жь шәһәре Бабилоне дәркʹәтьнә. Мәсәлә, бьнәлийед Бабилоне сейәканә баԝәр дькьрьн, йан се кәс Хԝәдекә. Рʹожа иройин жи һинкьрьнәкә фәрз йа гәләк һʹәбандьна, әв һәйә һинкьрьн дәрһәԛа сейәканә. Ле Кʹьтеба Пироз рʹьнд әʹйан дькә у һин дькә кӧ тʹәне Хӧдайәк һәйә, әв Йаһоԝа йә у Иса Мәсиһ жи Кӧрʹе ԝи йә (Йуһʹәнна 17:3). Бьнәлийед Бабилоне ӧса жи баԝәр дькьрьн, кӧ паши мьрьне рʹӧһʹ йан нәфса мәрийа дәрдькʹәвә у дьжи, йан жи дь щәʹньмеда дькарә бьчәрчьрә. Иро һинкьрьн дәрһәԛа ве йәке, кӧ паши мьрьне мәри дьжи йан жи дькарә дь щәʹньмеда бьчәрчьрә, дь гәлә һʹәбандьнада бәла буйә.

¹⁸ Рʹаст ә һинкьрьнед Бабилоне нав тʹәмамийа дьнйайе бәла бунә, ле Бабилона Мәзьн йа рʹожа иройин, әв һәйә кʹома һʹәму һʹәбандьнед ԛәлп ль тʹәмамийа дьнйайе. Хԝәде пʹехәмбәрти кьр, кӧ әв кʹома һʹәбандьна ԛәлп, ԝе ньшкева бе кʹӧтакьрьне. Ньһа тӧ фәʹм дьки чьрʹа ӧса фәрз ә, ԝәки тӧ жь ԝан һʹәму тьшта, чь кӧ Бабилона мәзьнва гьредайи йә, хԝә дур бьгьри у хԝәй ки. Ләма жи һʹәта ԝәʹдә һе һәйә, Йаһоԝа Хԝәде дьхԝазә ԝәки тӧ зускава «жь нава ԝе» дәркʹәви. (Бьхунә Әʹйанти 18:4, 8.)

19. Чь ԝе тәрʹа бинә ԛӧльхкьрьна Йаһоԝарʹа?

¹⁹ Чахе һьнәк пебьһʹәсьн кӧ тӧ дьхԝази жь һʹәбандьна ԛәлп дәрейи, әԝана дьбәк һәләԛәтийа хԝә тʹәви тә бьԛәтиньн у нахԝазьн тʹәви тә хәбәр дьн. Ле һәрге тӧ Йаһоԝарʹа тʹәви щьмәʹта ԝи ԛӧльх ки, тӧ чь ӧнда ки те ви зедәтьр бьстини. Тӧйе гәлә хушк у бьред рʹӧһʹани хԝәрʹа ԛазьнщ ки, мина шагьртед Исайә пешьн йед кӧ һʹәму тьшт һишт ьн у пәй ԝи чун. Тӧйе бьби пʹара малбәта Йаһоԝайә мәзьн, нава кʹижанида бь милйона мәсиһийед рʹаст һәнә, йед кӧ һʹьзкьрьна һʹәлал у рʹаст һьндава тә ԝе нишан кьн. Хенщи ԝе йәке жи, гӧмана тәйә әʹмьре һʹәта-һʹәтайе дьнйа тʹәзәда, ԝе һәбә. (Бьхунә Марԛос 10:28-30.) У дьԛәԝьмә кӧ ԝәʹдә дәрбаз бә, һьнәк жь ԝан мәрийа кʹи кӧ жь бо баԝәрийа тә һәләԛәтийа хԝә тʹәви тә ԛәтанд, әԝана ԝе бьхԝазьн пебьһʹәсьн дәрһәԛа һинкьрьнед Кʹьтеба Пироз у бьбьнә ԛӧльхкʹаред Йаһоԝа.

20. Чь ахьри һивийа ԝан мәрьва йә, кʹи кӧ хԝә ль һʹәбандьна рʹаст дьгьрьн?

²⁰ Кʹьтеба Пироз һин дькә, кӧ зутьрке Хԝәде әв дьнйа хьраб ԝе кʹӧта кә у дәԝсе дьнйа ну у рʹаст ԝе кʹьфш кә ль сәр кʹижани Пʹадшатийа ԝи ԝе Пʹадшатийе бькә (2 Пәтрус 3:9, 13). Бь рʹастийе жи әʹмьрәки чьԛас баш һивийа мәйә! Дь дьнйа нуда тʹәне һʹәбандьнәкә рʹаст ԝе һәбә. Гәло ԝе аԛьлайи нибә, ԝәки тӧ ида иро һʹәму тьшти бьки чь кӧ лазьм ә, сәва кӧ хԝә ль һʹәбандьна рʹаст бьгьри?