ЙАҺОԜА хԝә бәрамбәри ԝи шьвани дькә. Әԝ Хәбәра хԝәда мә дьдә баԝәркьрьне: «А вай, әз, әзе миһед [бәрхед] хԝә бьпьрсьм у леколине ль ԝан бькьм» (Һәзәԛел 34:11, 12).

Бәрхед Йаһоԝа кʹе нә? Кьн бежьн, бәрхе Йаһоԝа әԝ мәрьв ьн, кʹе ԝи һʹьз дькьн у ԝирʹа хьзмәт дькьн. Кʹьтеба Пироз дьбежә: «Әм та бьн, дәвәрʹуйа һәрʹьн, бәр Хӧдан Әʹфьрандаре хԝә чок дьн. Чьмки Әԝ ә Хԝәдейе мә, әм жи щьмәʹта мерга ԝи нә у пәзед бәр Ԝи нә» (Зәбур 95:6, 7). Хьзмәткʹаред Йаһоԝа, мина бәрхед кӧ пәй шьване хԝә дьчьн, бь рʹәзәдьли хԝә рʹийа Хԝәде дьгьрьн. Гәло әԝана беԛьсур ьн? На. Щарна ӧса дьбә, ԝәки хьзмәткʹаред Хԝәде дьбьнә мина бәрхед «бәлавбуйи», «ӧндабуйи» у «хальфи» (Һәзәԛел 34:12; Мәтта 15:24; 1 Пәтрус 2:25). Ле чахе мәрьв жь Йаһоԝа дур дькʹәвә, Әԝ һʹәсаб накә, ԝәки һеви тʹӧнә, ле һивийе йә, ԝәки әԝ вәгәрʹә.

 Ле гәло тӧ тʹәхмин дьки, ԝәки Йаһоԝа диса жи Шьване тә йә? Йаһоԝа рʹожа иро ча Шьвантийе дькә у мьԛати бәрхед хԝә дьбә? Ԝәрен әм се дәрәща шеԝьр кьн:

Әԝ рʹӧһʹанида мә тʹер дькә. Йаһоԝа дьбежә: «Әзе ԝан дь чʹерәгәһа ԛәнщда бажом . . . ԝе ль ԝьр, дь чʹерәгәһа ԛәнщда рʹакʹәвьн у ԝе ль . . . чʹерәгәһа ԛәнщда бьчʹерьн» (Һәзәԛел 34:14). Йаһоԝа һәр гав ԝәʹдәда мәрʹа хԝарьна рʹӧһʹани дьдә, йа кӧ мә ԛәԝат дькә. Ле тӧ дькари бини бира хԝә, готарәк йан видеойәкә ӧса, жь кʹижани тә щаба дӧайед хԝә станд? Гәло әԝе йәке тӧ нәдайи баԝәркьрьне, ԝәки Йаһоԝа шәхси бона тә хәм дькә?

Әԝ мьԛати мә дьбә у пьштгьрийа мә дькә. Йаһоԝа соз дьдә: «Йе кӧ ӧнда буйә бьгәрʹьм у йе кӧ һатийә ажотьн шунда биньм у әзе йе шькәсти бьпʹечʹьм у йе кӧ нәхԝәш ә хԝӧрт бькьм» (Һәзәԛел 34:16). Йед кӧ жь бо чәтьнайа сьст бунә, Йаһоԝа бона ԝан хәм дькә у ԝана ԛәԝи дькә. Әԝ бьрʹине ԝан дәрман дькә у али ԝан дькә, ԝәки әԝана ԛәнщ бьн, ԝи чахи жи гава хушк-бьра дьле ԝан дешиньн. Әԝ йед ӧндабуйи пашда вәдьгәрʹинә у али ԝан дькә, йед кӧ тʹәви фькьред хԝәйә нәрʹаст шәрʹ дькьн.

Әԝ бона мә хԝә щабдар һʹәсаб дькә. Йаһоԝа дьбежә: «Жь һʹәчʹи щиһед кӧ дь рʹожа бь әʹԝр у тәʹрида бәлав буйинә, әзе ԝан хәлас бькьм», «әзе ль йе кӧ ӧнда буйә бьгәрʹьм» (Һәзәԛел 34:12, 16). Чахе бәрха Йаһоԝа ӧнда дьбә, Әԝ һʹәсаб накә, ԝәки һеви тʹӧнә. Һәрге бәрхәкә ԝи рʹийа хԝә шаш кьрийә, әԝ дәрһәԛа ԝе йәке занә. Әԝ бәрха хԝә дьгәрʹә у гава дьбинә, ша дьбә (Мәтта 18:12-14). Йаһоԝа дәрһәԛа хьзмәткʹаред хԝәйи амьн дьбежә: «Һун миһед [бәрхед] мьн» ьн (Һәзәԛел 34:31). У йәк жь ԝан бәрха тӧ йи.

Гәло чьрʹа Йаһоԝа тә дьгәрʹә у тʹәглиф дькә, ԝәки тӧ пашда вәгәрʹи? Чьмки дьхԝазә, ԝәки тӧ бәхтәԝар би. Әԝ соз дьдә пәзед хԝә «ԝе бьбьн баранед бәрдарийе» (Һәзәԛел 34:26). У әԝ созе ԝи бош-бәтал нинә. Дьԛәԝьмә тә гәләк щар әԝ йәк сәр хԝә тʹәхмин кьрийә.

Бинә бира хԝә, гава тӧ щара пешийе дәрһәԛа Йаһоԝа пеһʹәсийайи. Мәсәлә, тә чь тʹәхмин кьр, чахе дәрһәԛа наве Йаһоԝа у нетед ԝи пеһʹәсийайи? Те бира тә шабунәкә чьԛас мәзьн бу, чахе тӧ сәр щьвата мәзьн тʹәви хушк-бьра йәктийеда буйи? Чахе тә мьзгинийа хере бәла дькьр ԝан мәрьварʹа, йед кӧ һʹәԝас пешда анин, гәло тә рʹьһʹәти у шабун тʹәхмин нәдькьр?

Тӧ диса жи дькари әԝе шабуне тʹәхмин ки. Хьзмәткʹаред Хԝәде ԝәʹде бәре дӧа дькьрьн: «Мә вәгәрʹинә хԝә, йа Хӧдан у әме бьзьвьрьн; мина бәре, рʹожед мә ну бькә!» (Луринед Йерәмйа 5:21). Йаһоԝа щаба дӧайе щьмәʹте да, әԝана вәгәрʹийанә бал ԝи у шабунәкә мәзьн хьзмәтийеда стандьн (Нәһәмийа 8:17). Йаһоԝа ԝе али тә жи бькә әԝе шабуна хԝә вәгәрʹини.

Ле щарна нәһеса йә вәгәрʹьнә щәм Йаһоԝа. Ләма жи ԝәрә шеԝьр кьн чь чәтьнайи дькарьн пешда бен у ча ԝана сафи кьн.