ГӘЛО ԛә тә еша ԝи щурʹәйи сәр хԝә тʹәхмин кьрийә, чаԝа Линдайе? Йазьх, щарна кьре һьнә хушк-бьра дькарә ӧса дьле һьнәка бешинә, ԝәки әԝ рʹӧһʹанида сьст бьн. Ле гәло тӧ рʹасти тьштәки ӧса һати?

Рʹаст ә Мәсиһи гәрәке һәвдӧ һʹьз бькьн, ле щарна мәрʹа дькарә чәтьн бә бьбахшиньн ԝан хушк-бьра, йед кӧ дьле мә ешандьнә (Йуһʹәнна 13:34, 35). Һәрге жь хушк-бьра кәсәки мә бьдә хәйдандьне, әԝ йәк ешәкә гьран дькә дьле мә у әм дьлтәнг дьбьн (Зәбур 55:12).

Бь рʹасти Кʹьтеба Пироз дьдә кʹьфше, ԝәки щарна ԝе «газьне йәки ль һьндава йәкида һәбә» (Колоси 3:13). Ле чахе тьштәкә ӧса те сәре мә, әԝ дькарә бона мә бьбә щерʹьбандьнәкә мәзьн. Ԝи чахи ԝе чь али мә бькә? Ԝәрен әм се принсипед Кʹьтеба Пироз шеԝьр кьн:

Баве мәйи әʹзмана һʹәму тьшти занә. Йаһоԝа һәр тьшти дьвинә, һәла һе жи чахе һьндава мәда хԝә нәрʹаст дьдьнә кʹьфше, жь бо чь жи әм дьлтәнг дьбьн (Ибрани 4:13). Йаһоԝа жи бәр хԝә дькʹәвә чахе дьвинә, ԝәки әм дьлтәнг дьбьн (Ишайа 63:9). Әԝ тʹӧ щар изьне надә, ԝәки «дәрд-кӧл, тәʹли-тәнги» йед кӧ дькарьн жь хушк-бьред мә пешда бен, «һʹьзкьрьна Хԝәде сәр мә сар кә» (Рʹомайи 8:35, 38, 39). Әм жи гәрәке чʹәʹв бьдьнә Йаһоԝа у изьне нәдьн, ԝәки кәсәк йан тьштәк һәләԛәтийа мә тʹәви ԝи хьраб кә!

Бахшандьн найе һʹәсабе пьштгьрийа хьрабийе бькьн. Чахе әм кәсәки дьбахшиньн, әԝ найе һʹәсабе, ԝәки әм нәһәԛийа ԝи кем дькьн, ԝи һәԛ дәрдьхьн, йан пьштгьрийа хьрабийе дькьн. Бир нәкә, Йаһоԝа тʹӧ щар пьштгьрийа гӧна накә, ле әԝ дьбахшинә, һәрге мәʹнийа бахшандьне һәйә (Зәбур 103:12, 13; Һәбаԛуԛ 1:13). Йаһоԝа мә һелан дькә бахшандьнеда чʹәʹв бьдьнә ԝи. Әԝ «һʹәта-һʹәтайе кʹине нажо» (Зәбур 103:9; Мәтта 6:14).

Чахе әм дьбахшиньн, әԝ йәк кʹаре мәрʹа тинә. Чь щурʹәйи? Бьдә бәр чʹәʹве хԝә дәрәщәкә ӧса. Мәсәлә, тә кәвьрәки дӧ килойе гьртийә дәсте хԝә у дәсте хԝә дьреж кьрийә. Дьбәкә тәрʹа чәтьн нибә һьнә ԝәʹдә ӧса бьгьри. Ле һәрге тӧ дьхԝази һе зедә ԝәʹдә бьгьри, гәло тӧйе чьԛас ԝәʹдә тәйах ки? Чәнд дәԛа, сьһʹәтәке, йан һе зедә? Бешьк ԝе дәсте тә бьԝәстә! Рʹаст ә, гьранийа кәвьр найе гӧһастьне, ле тӧ чьԛас дьреж дьгьри, һаԛас тәрʹа һе чәтьн дьбә. Әԝе йәке әм ӧса жи дькарьн бежьн дәрһәԛа хәйде. Әм чьԛас һе зедә  хәйде дьле хԝәда хԝәй дькьн, һәла һе йа бьчʹук жи, һаԛас һе зедә әм зийане дьдьнә хԝә. Ләма жи Йаһоԝа мә һелан дькә, ԝәки әм һәв бьбахшиньн. Бь рʹасти жи, чахе әм хәйде дьле хԝәда хԝәй накьн, әԝ йәк кʹар ә бона мә (Мәтʹәлок 11:17).

Чь али Линдайе кьр, хәйде жь дьле хԝә дәрхә? Әԝе Кʹьтеба Пироз леколин кьр дәрһәԛа ԝе йәке, чьрʹа лазьм ә бьбахшиньн (Зәбур 130:3, 4). Дьле Линдайе нәрм бу, чахе әԝе хԝәнд әԝ фькьр, кӧ һәрге әм һазьр ьн бьбахшиньн, Йаһоԝа жи ԝе бьбахшинә мә (Әфәси 4:32–5:2). Әԝ фькьр гәләк сәр ԝе һʹӧкӧм бу, ләма жи әԝе гот: «Мьн ӧса тʹәхмин дькьр, те бежи хԝәха Йаһоԝа тʹәви мьн хәбәр дьда».

Ахьрийе Линдайе карьбу хәйде жь дьле хԝә дәрхә. Әԝе бь дьл у щан бахшандә ԝе хушке у ньһа әԝана бунә һәвале һәв. Линдайе дьһа бь хирәт бәрдәԝам кьр Йаһоԝарʹа хьзмәт кә. Дӧдьли нәбә, ԝәки Йаһоԝа дьхԝазә али тә жи бькә.