ХӘМГИНИ; һәр кәс дькарә хәмгин бә, һәла һе хьзмәткʹаред Хԝәде жи. Зәбурбеж ньвиси: «Хәмед мьн зедә дьбун» (Зәбур 94:19, ДТʹ). Иса гот, ԝәки рʹожед ахьрийе ԝе дьһа чәтьн бә Йаһоԝарʹа хьзмәт кьн, жь бо «хәмед ве дьнйайева гьредайи» (Луԛа 21:34). Ле дәрһәԛа тә чь дькарьн бежьн? Гәло тӧ жь бо чәтьнайед пʹәрава, малбәтева йан сьһʹәт-ԛәԝа-тева гьредайи, бәр хԝә дькʹәви? Ле Йаһоԝа ча дькарә али тә бькә, ԝәки ԝан чәтьнайада тәйах ки?

Тʹәне бь сайа ԛәԝата хԝә, әм нькарьн нав чәтьнайада тәйах кьн. Паԝлосе шанди ньвиси: «Әм бь һәр аԝайи дь тәнгаһийеда нә, . . . әм һәйьри дьминьн . . . әм ль әʹрде һатьнә хьстьн». Паԝлос ӧса жи дьбежә: «Ле әм нә пʹәрчʹьԛи нә, . . . әм нә беһеви нә, . . . әм нә һәлакбуйи нә». Гәло чь али мә дькә сәбьр кьн? Зорайийа ԛәԝате кӧ жь Хԝәдайе Һʹьмзор ә, демәк жь Йаһоԝа (2 Корьнтʹи 4:7-9, ИМ).

Бинә бира хԝә, ԝәки чаԝа бәре Хԝәде «зорайийа ԛәԝате» дьда тә. Гәло ӧса ԛәԝьми йә, ԝәки паши готаре, рʹазибуна тә һьндава Йаһоԝа сәва һʹьзкьрьна ԝийә амьн, дьһа кʹур буйә? Чахе тә мәрьварʹа дәрһәԛа созе Йаһоԝа һьндава Щьнәте гьли дькьр, гәло ԝи чахи баԝәрийа тә һе ԛәԝи нәдьбу? Чахе әм тенә щьвате у ӧса жи чахе дәрһәԛа баԝәрийа хԝә мәрьварʹа гьли дькьн, әм ԛәԝате дьстиньн, йа кӧ али мә дькә сәбьр кьн ԝәʹде чәтьнайа у хәмгинийа. Ӧса әм рʹьһʹәтийа дьл дьстиньн, сәва кӧ бәрдәԝам кьн бь шабуне Йаһоԝарʹа хьзмәт кьн.

Дьбәкә тӧ тʹәхмин дьки, ԝәки гәләк шьхӧл стуйе тәда нә. Мәсәлә, Йаһоԝа жь мә дәʹԝа дькә, бәре пешьн Пʹадшатийа Хԝәде бьгәрʹьн, у шьхӧлед рʹӧһʹанива бь хирәт мьжул бьн (Мәтта 6:33; Луԛа 13:24). Ле чь бькьн һәрге мьԛабьлибун, сьһʹәт-ԛәԝата нәбаш, йан чәтьнайед малбәтеда, ԛәԝате жь мә дьстиньн? Дьԛәԝьмә хәбата тә ԝәʹдә у ԛәԝате тәрʹа наһелә, ԝәки сәва щьвате хәрщ ки? Әԝ йәк, кӧ шьхӧле тә гәләк ьн, ле ԝәʹдә у ԛәԝата тә һьндьк ә, дькарә тә дьлтәнг кә. Дьбәк тӧ ӧса бьфькьри, ԝәки Йаһоԝа жь тә һаԛаси дьхԝазә, чь кӧ жь ԛәԝата тә дәр ә.

Йаһоԝа мә фәʹм дькә. Әԝ тʹӧ щар һаԛас жь мә дәʹԝа накә, чьԛас кӧ әм нькарьн бькьн. У әԝ занә, ԝәки мәрʹа ԝәʹдә лазьм ә, сәва кӧ әм алийе физики у емосийалида ԛәнщ бьн (Зәбур 103:13, 14).

Бинә бира хԝә, кӧ Йаһоԝа хәм дькьр бона Елйас пʹехәмбәр. Чахе Елйас дьлтәнг бу у дьтьрсийа, әԝ рʹәви бәрийе. Гәло жь бо ԝе йәке Йаһоԝа ԝи сущдар кьр у жь ԝи дәʹԝа кьр, ԝәки әԝ пашда вәгәрʹә у хьзмәтийа хԝә бәрдәԝам кә? На. Дӧ щара Йаһоԝа мәләк  шанд, ԝәки әԝ бь нәрми Елйас һʹьшйар кә у нан бьдә ԝи. Һәла һе паши 40 рʹожи жи Елйас диса бәр хԝә дькʹәт у дьтьрсийа. Йаһоԝа ча али ԝи кьр? Йа пешьн, Йаһоԝа Елйас да баԝәркьрьне, ԝәки әԝ дькарә ԝи хԝәй кә. Йа дӧда, Йаһоԝа бь дәнге нәрм у ньмьз дьлбини да ԝи. У ахьрийе Йаһоԝа готә ԝи, ԝәки әԝ тʹәне нәмайә, чьмки диса бь һʹәзара мәрьв, ԝирʹа бь амьнийе хьзмәт дькьн. Зутьрәке Елйас пʹехәмбәр дәстпекьр бь хирәт Йаһоԝарʹа хьзмәт кә (1 Пʹадшати 19:1-19). Әԝ йәк чь мә һин дькә? Чахе Елйас жь бо чәтьнайа дьлтәнг дьбу, Йаһоԝа бь сәбьр у дьлшәԝатийе али ԝи дькьр. Йаһоԝа нәһатийә гӧһастьне. Әԝ бона мә жи ӧса хәм дькә.

Чахе сафи дьки, ԝәки һе зедә Йаһоԝарʹа хьзмәт ки, дәрәщед хԝә һьлдә һʹәсаб. Чьԛас тә бәре дькьр, бәрамбәри хьзмәтийа хԝәйә ньһа нәкә. Мәсәлә, һәрге әԝ мәрьв кʹижан ләщмәйданеда дьрʹәвә, чәнд мәһа йан сала нарʹәвә, паше ԝе нькарьбә перʹа-перʹа мина бәре бьрʹәвә. Пешийе әԝ хԝәрʹа нетед бьчʹук датинә, кʹижан али ԝи дькьн ԛәԝат у сәбьре пешда бинә. Мәсиһи жи мина ԝан ьн, йед кӧ ләщмәйданеда дьрʹәвьн. Әԝана жи хԝәрʹа нетед ӧса датиньн, кʹижан кӧ сәва ԝан рʹеали йә (1 Корьнтʹи 9:24-27). Ԝе баш бә, һәрге тӧ жи нетәкә ӧса дайни пешийа хԝә, йа кӧ рʹеали йә, ԝәки бини сери. Мәсәлә, тӧ дькари хԝәрʹа нете дайни, ԝәки һәрʹи щьвата. Жь Йаһоԝа аликʹарийе бьхԝазә, ԝәки нетед хԝә бини сери. Чахе тӧ рʹӧһʹанида ԛәԝи би, тӧйе «тәʹм» ки у бьзаньби Йаһоԝа ча ԛәнщ ә (Зәбур 34:8). Бир нәкә, ԝәки Йаһоԝа һәр тьшт, чь кӧ тӧ бь һʹьзкьрьне сәва ԝи дьки, ԛимәт дькә (Луԛа 21:1-4).

Йаһоԝа ча ԛәԝат да Щун, ԝәки вәгәрʹә щәм ԝи? Әԝ гьли дькә: «Мьн һәр гав Йаһоԝарʹа дӧа дькьр, ԝәки әԝ аликʹарийе бьдә мьн. Бука мьн мьнрʹа гот, ԝәки шәһәре мәда щьвата мәзьн ԝе дәрбаз бә. Мьн сафи кьр һәма рʹожәки һәрʹьмә щьвате. Мьн шабунәкә пʹьрʹ мәзьн станд, ԝәки диса нав щьмәʹта Йаһоԝада бум! Мьнрʹа һәма әԝ йәк лазьм бу. Ньһа әз диса жи бь шабуне Йаһоԝарʹа хьзмәт дькьм, у ньһа ида жийина мьн бь нет ә. Ньһа әз дьһа рʹьнд фәʹм дькьм, ԝәки әз чьԛас һʹәԝще хушк-бьра у аликʹарийа ԝан бум. Әз гәләк ша мә, ԝәки дәрәнг нибу вәгәрʹьмә щәм Йаһоԝа».