Чахе әм мәрийарʹа дәрһәԛа Йаһоԝа хәбәр дьдьн, щарна жь бо ве йәке әԝана дькарьн ԛәрфе хԝә мә бькьн йан жи ль сәр мә һерс кʹәвьн. У әв йәк дькарә ль сәр мә ӧса һʹӧкӧм кә, ԝәки әме ида нәхԝазьн дәрһәԛа Йаһоԝа хәбәр дьн. Тʹәви тә ԛә тьштед ӧса ԛәԝьмийә?~ Кʹьтеба Пироз гьли дькә дәрһәԛа хортәки, йе кӧ Йаһоԝа һʹьз дькьр, ле һьндьк мабу әԝи даннасинкьрьна хԝә бьда сәкьнандьне. Наве ԝи Йерәмийа бу. Дьхԝази һе зедә дәрһәԛа ԝи пебьһʹәси? Ԝәре әм бьньһерʹьн.

Чахе Йерәмийа һе гәләк щаһьл бу, Йаһоԝа готә ԝи, ԝәки әԝ гәрәке мәрийа әʹлам кә, кӧ шьхӧлед хԝәйә хьраб бьһельн. Йерәмийарʹа чәтьн бу әве йәке бькә, у әԝ тьрсийа. Әԝи готә Йаһоԝа: ‹Әз ньзаньм чь у ча бежьм. Нә әз һе гәләк щаһьл ьм›. Ле Йаһоԝа готе: ‹Нәтьрсә. Әзе али тә бькьм›.

 Паши ԝе йәке Йерәмийа дәстпекьр бежә мәрийа, кӧ һәрге әԝана шьхӧлед хԝәйә хьраб нәһельн у нәйенә гӧһастьне, һьнге әԝана ԝе бенә щәзакьрьне. Ча тӧ дьшьрмиш дьби, мәри гӧһ данә Йерәмийа у шьхӧлед хьраб һиштьн?~ На. Әԝана дәстпекьрьн ԛәрфе хԝә ԝи бькьн у ль сәр ԝи һерс кʹәвьн. Һьнәка жи һәла һе дьхԝәстьн әԝи бькӧжьн! Ле гәло һьнге Йерәмийа чь ль сәр хԝә тʹәхмин кьр, ча дьшьрмиш дьби?~ Әԝ тьрсийа у гот: ‹Әз ида дәрһәԛа Йаһоԝа тʹӧ щар хәбәр надьм›. Ле бь рʹастийе, әԝи шьхӧле даннасинкьрьна хԝә да сәкьнандьне?~ На, әԝ нәсәкьни. Йерәмийа гәләк Йаһоԝа һʹьз дькьр, ләма жи нькарьбу хԝә кәр кьра у хәбәр нәда дәрһәԛа Йаһоԝа. У чьмки Йерәмийа шьхӧле хԝә нәда сәкьнандьне у дәсте хԝә данәхьст, Йаһоԝа әԝ гӧман кьрийә кӧ ԝе хьлаз кә.

Мәсәлә, щарәке һьнә мәрьвед хьраб Йерәмийа гьртьн у авитьнә чʹәла кʹур, йа кӧ бь һʹәрʹийе тʹьжә бу. Ль ԝьр Йерәмийа бе хԝарьн у ав һиштьн. Әԝ меред хьраб дьхԝәстьн ԝәки Йерәмийа дь чʹәледа бьмьрийа. Ле бь аликʹарийа Йаһоԝа әԝ хьлаз бу!

Тӧ чь дәрс дькари сәва хԝә жь Йерәмийа һьлди?~ Рʹаст ә щарна әԝ дьтьрсийа жи, ле йәкә нәдьсәкьни у тʹьме дәрһәԛа Йаһоԝа хәбәр дьда. Чахе тӧ жи мәрийарʹа хәбәр ди дәрһәԛа Йаһоԝа, дьԛәԝьмә әԝана ԝе ԛәрфе хԝә тә бькьн йан жи ль сәр тә һерс кʹәвьн. Жь бо ве йәке дьбәкә тӧ дәстпеки бьтьрси у бьхәльфи. Ле чь жи һәбә тʹӧ щар нәсәкьнә у дәрһәԛа Йаһоԝа тʹьме мәрийарʹа хәбәр дә. Һьнге чаԝа кӧ Йаһоԝа али Йерәмийа кьр, ԝе али тә жи бькә.