ЧАХЕ Паԝлос бу Мәсиһи, әԝи дәстпекьр бь хирәт мьзгинийа хере дәрһәԛа Пʹадшатийа Хԝәде бәла кә. Бәре Паԝлос пәй Мәсиһийа дькʹәт, ле паше хԝәха жи һатә зерандьне. Паԝлос нә дьԝәстийа, һʹәму щийа мьзгинийа Пʹадшатийе бәла дькьр, кʹижан кӧ ԝе пек бинә ԛьрара Йаһоԝайә пешьн.

Паԝлос, ԝәʹде рʹеԝитийа хԝәйә пешьн Листрайеда мәрики кӧ жь буйина хԝә тʹопал бу, ԛәнщ кьр. Щьмәʹта ԝи шәһәри дьшьрмиш бу, ԝәки Паԝлос у Барнабас хӧдан ьн, у дьхԝәстьн ԛӧрбан бьдана ԝан, ле ԝана анщах щьмәʹт да сәкьнандьне. Ле ԝәʹдә шунда, диса жи әве щьмәʹте бь хԝәстьна дьжмьнед Паԝлос, дәстпекьр Паԝлос данә бәр кәвьра, паше жь шәһәр дәрхьстьн у авитьн, чьмки ԝана тʹьре, ԝәки әԝ ида мьрийә. Ле Паԝлос сах ма у ԝәʹдә шунда диса чу Листрайе, ԝәки шагьрта дьлгәрм кә у ԛәԝи кә.

Һьнә Мәсиһийед Ибрани йа хԝә дькьрьн, ԝәки Мәсиһийед нә Ибрани гәрәке хԝә ль ԝан әʹдәта бьгьрьн, кʹижан кӧ жь ԛануна Муса һатьбун һьлдане. Паԝлос бона ве пьрсе чубу ль Оршәлиме щәм рʹуспийа у шагьрта. Бь леколина кʹурә Кʹьтеба Пироз у бь аликʹарийа рʹӧһʹе пироз ԝана әв пьрс сафи кьр у щьватарʹа ньвисин, ԝәки Мәсиһи гәрәке хԝә хԝәй кә жь ԛӧрбанед пʹута, хуне, гоште мьрар у бенамусийе. Ԛәдандьна ван ԛануна «әʹсәйи» бу, ле ԛәдандьна Ԛануна Муса жь ԝана нәдьһатә дәʹԝакьрьне (Кʹаред Шандийа 15:28, 29).

Ԝәʹде рʹеԝитийа дӧда, Паԝлос чубу ль Бәройайе, ньһа әв шәһәр сәр тʹопраха Йунаньстане йә. Щьһуйед ван щийа, бь дьл у щан ԛәбул кьрьн гьлийед Хԝәде у һәр рʹож Кʹьтеба Пироз леколин дькьрьн, у бәрамбәр дькьрьн тʹәви гьлийед кӧ һин дьбун. У Паԝлос диса жь бо пәйкʹәтьне мәщбур бу бьрʹәвә шәһәре Атʹинайе. Ԝедәре Паԝлос мәрьвед хԝәндирʹа мьзгини бәла дькьр. Хәбәрдана ԝи, мәсәла мәʹрифәтийе, сәрԝахтийе у биланийе йә.

Паши рʹеԝитийа сьсийа, Паԝлос чу ль Оршәлиме. Чахе әԝ чу пʹарьстгәһе, Щьһуйа мьԛабьли Паԝлос хәлԛ рʹакьр, у дьхԝәстьн ԝи бькӧштана, ле әскәред Рʹоме нәһиштьн. Ԝана пьрс дьданә Паԝлос, у пеһʹәсийан ԝәки әԝ бажарване Рʹоме йә. Ләма жи әԝ бьрьнә щәм Фәликсе Ԝәлийе Рʹоме, ԝәки әԝ хԝә бьпарезә. Щьһуйа Паԝлос нәһәԛ дькьрьн, ле избатийед ԝан тʹӧнә бун. Паԝлос сәва кӧ нәкʹәвә бьн дәсте Щьһуйа, сәрԝерәки Рʹомейи дьн Фесторʹа, ӧса гот: «Әз дәʹԝа диԝана Ԛәйсәр дькьм». Һьнге Фесто щаб да: «Тӧ дәʹԝа Ԛәйсәр дьки, гәрәке тӧ һәрʹи щәм Ԛәйсәр» (Кʹаред Шандийа 25:11, 12).

Паԝлос бь гәмийе бьрьнә Италйайе, ԝедәре гәрәке диԝана ԝи бькьрана, ле ӧса ԛәԝьми кӧ гәми һурдәхԝәши бу, у Паԝлос мәщбур бу кӧ зьвьстане ль сәр гьрава Малтайе дәрбаз кә. Ахьрийе чахе әԝ һатә Рʹоме, дӧ сала кʹьрʹеда дьжит. Рʹаст ә Паԝлос бьн контрола нобәдарада бу, ле ча һәр гав бь хирәт, дәрһәԛа Пʹадшатийа Хԝәде һʹәму мәрийарʹа, йед кӧ дьһатьнә щәм ԝи, гьли дькьр.

​—Сәр һʹиме кʹьтеба Кʹаред Шандийа 11:22–28:31.