БӘНДӘ сәр әʹрде зедә дьбун, у пәй ве йәкерʹа гӧнә у зӧлми жи зедә дьбу. Һьнге тʹәне пʹехәмбәрәк һәбу, әв Һәнох бу, йе кӧ пʹехәмбәрти дькьр, ԝәки рʹожәк ԝе бе чахе Хԝәде мәрьвед зӧлм ԛьрʹ кә. Ле йәкә зӧлми ль һәв зедә дьбу. Һьнә мәләк мьԛабьли Хԝәде рʹабун, әԝана жь әʹзмана пәйа бунә сәр әʹрде, хԝә кьрьн дьлԛе мәрийа у зәԝьщин тʹәв жьна. Ԝәʹдә шунда ԝанрʹа зарʹ дьбун. Әв зарʹ тәʹрьки дьбун, һьм жи пʹьрʹ ԛәԝат у зӧлм дәрдькʹәтьн. Наве ԝан Нәфил бу. Әԝана зӧлми у хунрʹетьн сәр әʹрде зедә кьрьн. Хԝәде гәләк бәрхԝә кʹәт у дьле ԝи гәләк ешийа, чахе әԝи ван тьшта дит.

Паши Һәнох, мәрик сәр әʹрде дьжит, йе кӧ чʹәʹв нәдьда мәрьвед зӧлм у мина ԝан нибу, наве ԝи Нӧһ бу. Әԝ у малбәта ԝи һʹәму тьшти дькьрьн, ԝәки бәр чʹәʹве Хԝәде рʹаст бьжин. Хԝәде сафи кьр мәрьвед зӧлм ԛьрʹ кә, ле Нӧһ у һʹәйԝана хьлаз кә. Ләма жи әԝи әʹмьр кьр, ԝәки Нӧһ гәмийа пʹьрʹ мәзьн ава кә, йе кӧ ԝе дьреж у чаргошә буйә. Гәмийеда, Нӧһ нәфәред хԝәва у ӧса жи щурʹә-щурʹә һʹәйԝан дькарьбун ԝәʹде Селава тʹәмамийа дьнйайе, хьлаз буна. Нӧһ гӧрʹа Хԝәде кьр. Ԝәкә 40 йан 50 сал, Нӧһ гәми ава дькьр, әԝи ӧса жи «рʹасти даннасин дькьр» (2 Пәтрус 2:5). Нӧһ әʹлами мәрийа дькьр, дәрһәԛа незикайа Селаве, ле тʹӧ кәс гӧһ нәдьда ԝи. Аһан ԝәʹдә һат, ԝәки Нӧһ нәфәред хԝәва у ӧса жи һʹәйԝан бькʹәвьнә гәмийе. Чахе Хԝәде пәй ԝанрʹа дәри дада, хӧшинийа баране дәстпебу.

Ԝәкә 40 шәви у 40 рʹожи хӧшинийа баране бу, у әʹрд тʹәмам кʹәтә бьн аве. Мәрьвед зӧлм ԛьрʹ бун. Чәнд мәһ шунда, ав дакʹәт у гәми сәр чʹийе сәкьни. Һьнә ԝәʹдә шунда, әԝед кӧ гәмийеда бун, дәркʹәтьн. Гәмийеда әԝана ԝәкә саләке ман. Нӧһ, жь Йаһоԝа гәләк рʹази бу кӧ әԝана хьлаз бун. Ләма жи, әԝи ԛӧрбан Йаһоԝарʹа ани. Хԝәде ԛәбул кьр әв ԛӧрбан, у соз да Нӧһ у нәфәред ԝи, кӧ ида тʹӧ щар әʹрде у һʹәму бинбәра пе Селаве ԝе ԛьрʹ нәкә. Чаԝа дьлбини сәва ԝан, Йаһоԝа нишанәк ԝанарʹа кʹьфш кьр, әв кʹәскәсор бу.

Паши Селаве, Хԝәде тʹәмийед тʹәзә да мәрийа. Әԝи изьн да ԝана бьхԝьн гоште һʹәйԝана, ле изьн нәда кӧ хунева бьхԝьн. Хԝәде ӧса жи готә зӧрʹәтед Нӧһ, ԝәки әԝана бәла бьн сәр тʹәмамийа әʹрде, ле һьнәка жь ԝан гӧрʹа Хԝәде нәкьрьн. Бьн сәрԝертийа Нәмруд, мәри тʹоп бун, ԝәки шәһәре Бабилонеда дәстпекьн бьрща мәзьн ава кьн. Әԝана рʹьнд заньбун тʹәмийед Хԝәде кӧ гәрәке сәр тʹәмамийа әʹрде бәла бьн, ле йәкә әԝана тʹәмийа Хԝәде инкʹар кьрьн. Ләма жи Хԝәде зьмане ԝан тʹәви һәв хьст, у ԝана дәстпекьр хәбәр дьн сәр щурʹә-щурʹә зьмана. Жь фәʹмнәкьрьна зьмане һәв, әԝана авакьрьна бьрще данә сәкьнандьне, у жь һәв бәла бун.

​—Сәр һʹиме кʹьтебед Дәстпебун сәре 6 һʹәта 11; Щьһуда 14, 15.