Ә′рд һәйә мала мә. Чахе Йаһоԝа Хԝәде жьн-мере пешьн ә′фьранд, әԝи ԝана ль сәр ә′рде щиԝар кьр, нә кӧ ль сәр ә′змана. Ле ль сәр ә′змана Хԝәде мьлйак′әт ә′фьрандьн, кӧ ль ԝьр бьжин (Ибо 38:4, 7). Йаһоԝа Хԝәде ль сәр ә′рде бахчәки бәдәԝ бь наве Адән чекьр, сәва кӧ Адәм ль ԝьр бьжи (Дәстпебун 2:15-17). Йаһоԝа һ′әму тьшт ӧса чекьр, ԝәки Адәм у зӧр′әтед ԝи ль сәр ә′рде дь бәхтәԝарийеда һ′әта-һ′әтайе бьжин. Бьхунә Зәбур 37:29; 115:16.

Мәрьвед пешьн бь зӧр′әтед хԝә ә′рд гәрәке т′ьжә кьрана. Паше ԝана гәрәке т′әмамийа ә′рде мина бахче Адәне бәдәԝ кьрана у бькьрана щьнәт (Дәстпебун 1:28). Ә′рд т′ӧ щар ԝе нәйе һьлшандьне. Мәрьв һәр гав ԝе ль сәр бьжин. Бьхунә Зәбур 104:5.

Адәм у Һеԝайе гӧр′а Йаһоԝа Хԝәде нәкьрьн, ләма жи Йаһоԝа әԝана жь щьнәте дәрхьстьн. Щьнәт һатә ӧндакьрьне, иди т′ӧ кәси нькарьбу ә′рд бькьра щьнәт. Дь К′ьтеба Пирозда те готьне «дьне данә дәсте хьраба» (Ибо 9:24). Бьхунә Дәстпебун 3:23, 24.

Ле гәло ԛәԝата Йаһоԝа нагьһиже, ԝәки ԛьрара хԝә дәрһәԛа инсанәте бинә сәри? Т′ӧ тьштед ӧса кӧ Йаһоԝа нькарьбә бькә т′ӧнә, чьмки әԝ Хԝәдайе Һьмзор ә (Ишайа 45:18). Хԝәде ԝе һ′әму тьштед кӧ сәре-сәрида дабу мәрийа ԝе диса ԝанар′а вәгәр′инә. Бьхунә Зәбур 37:11, 34.

Чахе Иса дь П′адшатийа Хԝәдеда п′адшатийе бькә, ә′рд ԝе диса бьбә щьнәт. Дь нав шәр′е Һармәгәдонеда Иса т′әви мьлйак′әтед Хԝәде, ԝе ԛьр′а ԝан һ′әму мәрийа к′и кӧ мьԛабьли Хԝәде дәрдьк′әвә, бинә. Паше Иса ԝе Шәйт′ан 1 000 сали бавежә кәле. Дь ви шәр′ида щьмә′та Хԝәде ԝе  хьлаз бә, чьмки Иса ԝе р′ебәрийе ԝан бькә у ԝана хԝәй кә. Әԝана дь щьнәтеда ль сәр ә′рде ԝе һ′әта-һ′әтайе бьжин. Бьхунә Ә′йанти 20:1-3; 21:3, 4.

Дьбәк тӧ жи дьшьрмиш дьби, гәло зӧлми ль сәр ә′рде һ′әта к′әнге ԝе һәбә? Иса мәр′а «нишан» һиштьн, бь сайа чь жи әм иро дькарьн те дәрхьн хьлази ԝе к′әнге бе. Иро һ′але дьнйайе ӧса хьраб ә кӧ һәгәр дьреж бьк′ьшинә, мәрьв ԝе ида нькарьбьн ль сәр ә′рде бьжин. Әв йәк диса жи мәр′а избат дькә, кӧ ньһа әм р′асти жи дь ԝә′де «ахьрийа» ве дьнйайеда дьжин. Бьхунә Мәтта 24:3, 7-14, 21, 22.

Ԝә′де п′адшатийа Исайә 1 000 салийе, әԝе к′ӧтасийа һ′әму кӧл-дәрда бинә (Ишайа 9:6, 7; 11:9). Ԝә′де п′адшатийа хԝә, Иса ԝан мәрийа к′и кӧ Хԝәде һ′әз дькә, ԝе жь гӧнә т′әмьз кә. Ӧса Хԝәде бь Иса һ′әму нәхԝәши, калбун-пирбун у мьрьне ԝе бьдә һьлдане. Бьхунә Ишайа 33:24; Ә′йанти 21:4.

К′и кӧ гӧр′а Хԝәде дькә, ԝе дь щьнәтеда бьжи (1 Йуһ′әнна 2:17). Иса шьхӧл да шагьртед хԝә, ԝәки әԝана мәрьвед мьлук бьбиньн у һин кьн ԝана, ча бьбьнә мәрьвед ӧса, йед кӧ Хԝәде хԝәш тен. Иро Йаһоԝа Хԝәде бь милйона мәрьва һазьр дькә, ԝәки әԝана дь щьнәтеда ль сәр ә′рде бьжин (Сефанийа 2:3). Шә′дед Йаһоԝа ль сәр щьвата һин дьбьн, чаԝа бьбьнә мер у бавед баш, ӧса жи жьн у дайикед баш. Зар′ у де бав ль сәр щьвата т′әвайи Хԝәдер′а ԛӧльх дькьн, у һин дьбьн ча к′аре бьстиньн жь ԝан мьзгинийа, йед кӧ әԝана педьһ′әсьн. Бьхунә Миха 4:1-4.