Хушк у Бьред Дәлал:

Һʹәзкьрьна һьндава Хԝәде у мәрьва мә һелан дькә «һәрʹьн, мәрьвед жь һʹәму мьләта» бькьнә шагьрт у ԝана «бьньхӧминьн» (Мәт. 28:19, 20; Марк. 12:28-31). Һʹәзкьрьна рʹаст, ԛәԝи йә. Һәрге әм һʹәзкьрьна ӧса бьдьнә кʹьфше, әме бькарьбьн али ԝан мәрьва бькьн, дьле кʹижана һазьр ә рʹастийе ԛәбул кьн, йа кӧ дьбә бәрбь әʹмьре һʹәта-һʹәтайе (Кʹар. Шанд. 13:48).

Бәре дина мә һʹәчʹи зәʹф сәр ве йәке бу, ԝәки пешанина бира хԝәда хԝәй кьн у мәрьварʹа әʹдәбйәта бьһельн. Ньһа әм гәрәке сәр ве йәке бьхәбьтьн, кӧ ча тʹәви мәрьва бькʹәвьнә хәбәрдане. Әм дьхԝазьн мәрьварʹа һʹәзкьрьне бьдьнә кʹьфше бь ве йәке, кӧ тʹәви ԝан дәрһәԛа тьштед ӧса хәбәр дьн, чь кӧ ԝанрʹа һʹәԝас ә. Әв йәк те һʹәсабе һазьр бьн, кӧ ньһерʹандьн у һʹәԝщед һәр кәси һьлдьн һʹәсаб. Гәло әва брошура ча дькарә ве йәкеда али мә бькә?

Ве брошуреда 12 дәрс һәнә, кʹижан кӧ мә һин дькьн ԝан һʹӧнӧр у фәрәсәта нав хԝәда пешда биньн, йед кӧ ԝе али мә бькьн һʹәзкьрьне һьндава мәрьвада бьдьнә кʹьфше у шагьрта һазьр кьн. Һәр дәрс сәр һʹиме дәрәщәкә жь Кʹьтеба Пироз ә, кʹижанида Иса йан жи хьзмәткʹарәки ԛьрʹна йәке, хьзмәтийеда фәрәсәтәкә мәхсус дьда кʹьфше. Нета мә әԝ нинә кӧ пешанина әзбәри кьн, ле әԝ ә, кӧ һʹәзкьрьне мәрьварʹа бьдьнә кʹьфше. Әв һʹәму һʹӧнӧр у фәрәсәт бона щурʹә-щурʹә дәрәщед хьзмәтийеда гәләк фәрз ьн, ләма жи әме шеԝьр кьн кӧ ча әв һәр һʹӧнӧр у фәрәсәт али мә дькьн, ԝәки хәбәрдане дәстпекьн, сәрледанед дӧбарә бькьн у һинбунед Кʹьтеба Пироз дәрбаз кьн.

Ԝәʹде шеԝьркьрьна һәр дәрсәке, рʹьнд бьфькьрьн дәрһәԛа ве йәке, кӧ ча һун дькарьн мьһала хԝәда фьлан һʹӧнӧри йан фәрәсәти, ԝәʹде хәбәрдана тʹәви мәрьва бьдьнә кʹьфше. Һәр тьшти бькьн, ԝәки һʹәзкьрьна хԝә һьндава Йаһоԝа у мәрьва дьһа ԛәԝи кьн. Әв һʹәзкьрьн жь һәр тьшти зедәтьр ԝе али ԝә бькә, кӧ бьгьһижьнә нета хԝә, демәк шагьрта һазьр кьн.

Әм гәләк ԛимәт дькьн кӧ ԛәдьрәки ӧса мәзьн мәрʹа һатийә дайине, ԝәки мьл бь мьл тʹәви ԝә һәвкʹарийе бькьн (Сефн. 3:9). Бьра Йаһоԝа кʹәрәмед мәзьн сәр ԝәда бьбаринә, кӧ һун бәрдәԝам дькьн һʹәзкьрьне һьндава мәрьва бьдьнә кʹьфше у шагьрта һазьр кьн!