Һʹәму тьшт чь кӧ Мьраз дәрһәԛа Йаһоԝа гьли кьр, сәр Аһмәд гәләк һʹӧкӧм кьр. Ле йәкә әԝ диса жи дәрһәԛа тьштәки бәр хԝә дькʹәт, ләма жь Мьраз пьрси: «Һәрге Йаһоԝа Хԝәдайе ӧса Һьмзор ә, у Бавәки бь һʹәзкьрьне тʹьжә йә, гәло чьрʹа әԝ дьһелә кӧ сәр әʹрде һаԛас кӧл-дәрд һәбьн? У чьрʹа һаԛас проблемед мә һәнә?»

Мьраз щаба Аһмәд дьдә: «Әв бь рʹасти жи пьрсәкә гәләк баш ә, у гәләк мәри дәрһәԛа ве йәке дьфькьрьн. Чахе дәрһәԛа һʹӧнӧред Йаһоԝа педьһʹәси, һьнге фәʹм дьки ԝәки әԝ тьштед хьраб кӧ дьнйайеда дьԛәԝьмьн, хԝәстьна Хԝәде нибу. Ләма жи, сәва кӧ фәʹм бькьн ԝәки чьрʹа иро һʹале дьнйайе ӧса нә, гәләк фәрз ә пебьһʹәсьн һәла сәре-серида нета Хԝәде сәва әʹрде чь бу, у чь сәр нета ԝи һʹӧкӧм кьр».

Паше Мьраз рʹезәк жь Кʹьтеба Пироз Аһмәдрʹа хԝәнд, йе кӧ дьда кʹьфше һәла чь Йаһоԝа сәр хԝә тʹәхмин дькьр, чахе сәва мәрийа әʹрд әʹфьранд. Ве рʹезеда ӧса һатийә ньвисаре:

• «Хԝәде дина хԝә да һʹәму кьрьна хԝә кӧ ва йе әԝ гәләки ԛәнщ бун» (Дәстпебун 1:31).

Әʹфьрандьна Йаһоԝайә лапи мәхсус сәр әʹрде, щоте пешьн бу, Адәм у Һеԝа. Хԝәде ԝана мина әʹфринед дьнена беԛьсур әʹфьрандьн, сәва кӧ әԝана бькарьбьн сәр әʹрде һʹәта-һʹәтайе бьжин. Хԝәде ԝана бахче бәдәԝда, Еденеда щиԝар кьрийә. Ԝедәре щәм ԝана һʹәму тьшт һәбу, чьда кӧ әԝана һʹәԝщә бун сәва кӧ бь әʹмьрәки  бәхтәԝар бьжин. Тьштәк жь ԝана кем нибу (Дәстпебун 2:8, 9). Хенщи ве йәке, Йаһоԝа ԝанарʹа готьбу, кӧ ль һәв зедә бьн, әʹрде тʹьжи кьн у хԝәйитийе ле бькьн (Дәстпебун 1:28). Әв йәк дьһатә һʹәсабе, кӧ ахьрийеда әʹрд педа гәрәке бьбуйа щьнәт, кʹидәре кӧ мәрьвед кʹамьл бәхтәԝарийеда бьжитана. Бь рʹасти жи әв ахьрикә чьԛас баш бу!

Аһмед пьрси: «Ле гәло, чь ԛәԝьми?» Һьнге Мьраз пе Кʹьтеба Пироз щаба ԝи да:

• «Аԝа чаԝа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12).

Мина Бавәки бь һʹәзкьрьне тʹьжә, Йаһоԝа Хԝәде сәва Адәм у Һеԝайе һьнә норм йан жи принсип кʹьфш кьрьн. Әв норм у принсип дькарьбун али ԝан кьра, кӧ бьжитана у хԝәйитийа щьнәте бькьрана (Дәстпебун 2:15-17). У ча Бавәки билан, Йаһоԝа зор нәдьда ԝан ԝәки әԝана һәма ӧса бькьн, чаԝа кӧ әԝи дьгот. Ле Йаһоԝа мәщал да ԝан, кӧ әԝана хԝәха һʹәзкьрьна хԝә һьндава Хԝәдеда нишан кьрана, у сафи кьрана гӧрʹа ԝи бькьн йан на. Азайа мә жи йа бьжартьне һәйә, чаԝа кӧ йа Адәм у Һеԝайе һәбу. Ле гәло ԝана чь бьжарт?

Йазьх, ле Адәм у Һеԝайе гӧрʹа Әʹфьрандаре хԝә нәкьрьн. Әԝана бьжартьн әԝ, чь кӧ дьле ԝан хԝәст. Бь ве йәке әԝана гӧнә кьрьн у кʹамьлбуна хԝә ӧнда кьрьн. Ахьрийе Адәм у Һеԝа кал пир бун, у мьрьн. Әв йәк жь бо нәгӧһдарикьрьна ԝан ԛәԝьми, чаԝа кӧ Хԝәде пешда ԝанарʹа готьбу (Дәстпебун 2:17).

Әм һʹәмушк зӧрʹәтед Адәм у Һеԝайе нә, ләма жи әм гӧнәкʹар ьн, кал пир дьбьн у дьмьрьн. Ле Мьраз, Аһмәд  да баԝәркьрьне кьр, кӧ нет-мәрәме Хԝәде бона мәрийа нәһатә гӧһастьне. Йаһоԝа ча Бав бь һʹәзкьрьне тʹьжә, дьхԝазә ԝәки мәри щьнәтеда сәр әʹрде бәхтәԝарийеда бьжин. Мьраз, рʹезәк жь Кʹьтеба Пироз нишани Аһмәд кьр:

• «Рʹасте бьжин ль сәр әʹрде у кʹамьле ль сәр ԝе бьминьн» (Мәтʹәлок 2:21).

Мьраз кьрә бира ԝан, дәрһәԛа һʹәму созед Йаһоԝайи пʹьрʹ баш, йед кӧ Кʹьтеба Пирозда ньвисар ьн. Ԝәки щьнәтеда нәхԝәши, еш-ешук, чәрчьрандьн у мьрьн ԝе тʹӧнә бә. Щәм һәр кәси, хԝарьн ԝе тʹер-тʹьжә бә у малед баш жи ԝе һәбьн. Әв һʹәму кʹәрәм, пʹарәкә жь ԝе нета Йаһоԝайә пешьн ә, ԝәки һәр кәс ԝе щьнәтеда һʹәта-һʹәтайе бьжин. Мьраз жь Кʹьтеба Пироз рʹезәк хԝәнд:

• «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).

Әв ә созе Йаһоԝа Хԝәде, у әԝе бе сери.