Мьраз, жь Аһмәд у Хәзале пьрс дькә: «Дьбәкә һун тʹәви мьн ԛайил бьн, кӧ зарʹ рʹәнге де-баве хԝәда ньн, ӧса нинә?»

Аһмәд ле вәгәрʹанд у готе: «Бәле әв ӧса нә. Әз жи тʹьме дьбежьм, кӧ ԛиза мә һәма рʹәнге дийа хԝәда йә. Хәйсәт-һʹӧнӧред ԝе жи мина йе де нә».

Мьраз бәрдәԝам кьр: «Бь рʹасти жи әв ӧса нә. Әв йәк әм дькарьн дәрһәԛа Әʹфьрандаре хԝә жи бежьн. Һәрге әм бьфькьрьн сәр ԝе йәке кӧ чаԝа мәри һатьнә чекьрьне у сәр әʹфринед Хԝәдейә дьн, ԝи чахи әме бькарьбьн хәйсәт-һʹӧнӧред Йаһоԝа бьвиньн, демәк Әԝ, йәки ча нә».

Аһмәд гот: «Пәй, әв чьԛас һʹәԝас ә. Әз тʹӧ щар дәрһәԛа ве йәке нәдьфькьрим».

Мьраз готе: «Кʹьтеба Пироз жи әве йәке дьбежә. Бьньһерʹә кʹьтеба Рʹомайи 1:20-да чь ньвисар ә: ‹Рʹаст жь әʹфьрандьна дьнйайеда һʹӧнӧред ԝийә нәхӧйа, аԝа готи ԛӧдрәта ԝийә һʹәта-һʹәтайе у Хԝәдетийа ԝи бь әʹфьрина хӧйа дьбьн, зәлал тенә дитьне›». Аһмәд дьхԝәст мәʹна ван гьлийа пебьһʹәсийа.

Мьраз бәрдәԝам дькә: «Дә пʹак, ԝәрен әм бьфькьрьн сәр ԝе йәке, кӧ чаԝа бав һьндава зарʹед хԝә һʹәзкьрьне дьдә кʹьфше. Тӧ хԝәха жи зани ԝәки баве баш мина тә, тʹьме хәм дькә бона зарʹед хԝә. Рʹаст ә щарна зарʹ нә гӧһдар ьн, йан жи һьндава баведа хԝә беԛәдьр ьн, ле йәкә бав диса жи ԝана һʹәз дькә у сәва ԝан хәм дькә. Гәло чьрʹа бав һьндава зарʹа, ӧса хԝә кʹьфш дькә? Чьмки Йаһоԝа де-бав ӧса әʹфьрандьнә, ԝәки һʹәзкьрьне һьндава зарʹед хԝәда бьдьнә кʹьфше у һәләԛәтийа незик хԝәй  кьн. У жь ԝе йәке һʹәзкьрьна Йаһоԝа һьндава мәда те кʹьфше».

Мьраз зедә дькә: «Һәрге мә Йаһоԝа нас нәкьра жи, әԝ ԝе йәкә дәрһәԛа мә хәм кьра. Кʹьтеба Мәтта 5:45-да ӧса ньвисар ә: ‹Баве . . . Әʹзмана . . . тәʹва хԝә дәрдьхә һьн сәр ԛәнща, һьн жи сәр хьраба у баране дьбаринә һьн сәр рʹаста, һьн жи сәр нәрʹаста›. Һәр кәс жь мә һʹәԝще баран у тәʹве йә, ӧса нинә? Чьмки әʹмьре мә ван тьштава гьредайи йә, у бь аликʹарийа ԝан тьшта бәред сәва хԝарьне шин дьбьн. У фьрԛи тʹӧнә һәла әм рʹазибуна хԝә Йаһоԝарʹа дьдьнә кʹьфше, йан на. Әԝ диса жи бәрдәԝам дькә дәрһәԛа мә хәм дькә. Демәк әв йәк избат дькә, кӧ Йаһоԝа, Хԝәдайе һʹәзкьрьн ә. Ӧса нинә? Хенщи ве йәке, Кʹьтеба Пироз жи дьбежә, кӧ һʹәзкьрьн әв һʹӧнӧре ԝийә сәрәкә йә, у әԝ хәйсәте ԝи дьдә кʹьфше. Кʹьтеба 1 Йуһʹәнна 4:8-да әм дьхуньн, кӧ ‹Хԝәде һʹьзкьрьн ә›».

Паше Мьраз дина Аһмәд да сәр һʹӧнӧрәки ӧса чаԝа һәԛи, у готе: «Чаԝа баве баш, тӧ жи зарʹед хԝә һʹәз дьки у сәва ԝан хәм дьки. Тӧ ӧса жи ԝана һин дьки, кӧ ԛәдьре мәрийа бьзаньбьн, у һʹәму тьшти дьки кӧ әԝана ӧса мәзьн бьн, ԝәки бьбьнә мәрьвед щабдар. Һәр кәс һьн сәва хԝә, һьн жи сәва малбәта хԝә, һәԛийе дьхԝазә. Ләма жи әм һивийе нә, кӧ мәрьв һьндава мә бь һәԛийе хԝә кʹьфш кьн, у һәста мәйә һәԛийе, һьлдьн һʹәсаб. Ча тӧ дьшьрмиш дьби, чьрʹа? Чьмки әм хәйсәт-һʹӧнӧред Әʹфьрандаре хԝә дьдьнә кʹьфше».

Мьраз ӧса жи Аһмәд у Хәзалерʹа, һьнә рʹезед жь Кʹьтеба Пироз дәрһәԛа Йаһоԝа Хԝәде нишан кьр:

•  «Һʹәму рʹийед ԝи һәԛи нә. Хӧдан амьн ә, нәһәԛи щәм ԝи тʹӧнәйә» (Ԛануна Дӧщари 32:4).

• «Әԝ рʹастийе у һәԛийе һʹьз дькә» (Зәбур 33:5).

Бәле, әм һәԛийе һʹәз дькьн, чьмки Йаһоԝа Әʹфьрандаре мә һәԛийе һʹәз дькә. У әм дьлԛе ԝида һатьнә әʹфьрандьне, демәк нав мәда гәләк хәйсәт-һʹӧнӧред Йаһоԝа һәнә, йед кӧ әм дькарьн щурʹә-щурʹә дәрәщада бьдьнә кʹьфше (Дәстпебун 1:27). Ле Йаһоԝа нәдайә дәсте мә кӧ хԝәха сафи кьн, чь йә һәԛи у чь йә нәһәԛи. Әԝи, норм у ԛанун кʹьфш кьрьн, у дьхԝәст кӧ мәрьв бь ван норм у ԛануна бьжин. Чьмки чахе ԛанунед Йаһоԝа тенә инкʹаркьрьне, һәԛи жи те пʹепәскьрьне.

Мьраз зедә кьр: «Әз дьхԝазьм кӧ һун диса сәр тьштәки бьфькьрьн. Һун заньн кӧ ԛанунед гәләк дәԝләта мина ԝан ԛануна ньн, дәрһәԛа кʹижана Кʹьтеба Пирозда һе һʹәзар сал пешда һатьбун ньвисаре?» Аһмәд у Хәзал әʹщебмайи ман.

Мьраз диса жи гот: «Мәсәлә, ԛанунед гәләк дәԝләта, ԛәдәхә дькьн кӧштьне, дьзийе у ԛавийе. Ԛанунед ви щурʹәйи Кʹьтеба Пирозда һе ԝәкә 3 500 сал пешда һатьбун ньвисаре. Чахе әм ль гора ван ԛанунед һәԛийе дьжин, бь ве йәке әм һәԛийа Йаһоԝа дьдьнә кʹьфше. У әʹмьре мә һе гәләк бәхтәԝар у һʹалхԝәш дьбә».

Ньһа Аһмәд у Хәзале ида фәʹм кьрьн, кӧ Йаһоԝа Хԝәдайе һʹәзкьрьне у һәԛийе йә. Әԝана бәре жи дьшьрмиш дьбун, кӧ һʹәзкьрьн у һәԛи әв һʹӧнӧред гәләк  фәрз ьн, у ԝәки мәрьв гәрәке ван хәйсәта һьндава мәрийа бьдьнә кʹьфше. Аһмәд у Хәзале һәр гав жь алийе хԝәда һʹәму тьшт дькьрьн кӧ бьбьнә де-баве ӧса, йед кӧ һʹәзкьрьне у һәԛийе дьдьнә кʹьфше. Ле ньһа ԝана фәʹм кьр кӧ әв хәйсәт-һʹӧнӧр, бь рʹастийе хәйсәт-һʹӧнӧред Йаһоԝа Хԝәде дьданә кʹьфше.

Чахе Аһмәд дәрһәԛа һʹӧнӧред Йаһоԝа пеһʹәсийа, әв йәк гәләк дьле ԝи гьрт. Чьмки ньһа Йаһоԝа сәва ԝи буйә кәсе зенди, у әв йәк ӧса ԛайим сәр ԝи һʹӧкӧм кьр, кӧ әԝи хԝәст һе рʹьнд чʹәʹв бьдә Йаһоԝа. Әԝ фькьри, кӧ гәрәке жь алийе хԝәда һʹәму тьшти бькә, ԝәки һе зедә һʹәзкьрьне бьдә кʹьфше һьндава кʹӧлфәт у зарʹед хԝә. У ԝәки һьндава мәрьвед дьн жи һʹәзкьрьне у һәԛийе бьдә кʹьфше.

Мьраз бь шабун дьбежә: «Зәʹф баш Аһмәд. Кʹьтеба Пироз жи, хут әве йәке дьбежә. Әз дьхԝазьм жь Кʹьтеба Пироз гьли-готьнәкә кӧ гәләкарʹа нас ә тәрʹа нишан кьм». Мьраз Кʹьтеба Пироз вәдькә у Аһмәдрʹа дьхунә:

• «Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʹа бькьн» (Мәтта 7:12).

Мьраз ӧса жи гот, кӧ хенщи һʹәзкьрьне у һәԛийе, щәм Йаһоԝа диса гәләк хәйсәт-һʹӧнӧред баш һәнә. Аһмәд у Хәзале хԝәстьн һе зедә пебьһʹәсьн дәрһәԛа хәйсәт-һʹӧнӧред Йаһоԝайи баш.