Мьраз хәбәрдана хԝә дьреж кьр у гот, ԝәки чь кӧ Хԝәде әʹфьрандийә хәйсәт-һʹӧнӧред ԝийи дьн жи әʹйан дькьн. Әԝи Аһмәд у Хәзалерʹа жь Кʹьтеба Пироз рʹезәк хԝәнд.

• «Хӧдано, чьԛаси гәләк ьн кьред Тә! Һәр тьшт бь сәрԝахтийа Тә чебуйә, әʹфьринед Тәва әʹрд тʹьжи йә» (Зәбур 104:24).

«Хенщи ве йәке, һәла һе кʹезькед бьчʹук жи дәрһәԛа биланийа Йаһоԝа Хԝәде шәʹдәтийе дьдьн. Мәсәлә, Кʹьтеба Пироз дина мә дьдә сәр ԝе йәке, кӧ биланийа мурьстанга инстинкти йә, йан зькмаки йә».

Мьраз ӧса жи кьрә бира Аһмәд, у гот кӧ һәрге әм дина хԝә бьдьнә мурьстанга, әме бьвиньн ԝәки чаԝа әԝана пе дәве хԝә бәлга кәр дькьн, паше һьлдьдьн сәр пьшта хԝә, у дьбьнә малед хԝә. Ле бь тʹәхмина тә, әԝана жь кʹидәре заньн чь бькьн? Йәк жь ньвискʹаред Кʹьтеба Пироз ӧса шьровәкьр, ԝәки «йе һәрә сәрԝахт ьн». Ле гәло кʹи мурьстанг ӧса әʹфьрандьн? Кʹи әв билани кьрә нава ԝан? Кʹьтеба Пироз дьбежә, ԝәки Йаһоԝа, Әʹфьрандаре әʹрд у әʹзмен ԝана бь ви щурʹәйи әʹфьрандьнә (Мәтʹәлок 30:24, 25).

Аһмәд ԝәкʹьланд: «Бәле, әз тʹәви тә ԛайил ьм. Чьмки әʹфринед ӧса, чаԝа мурьстанг бь инстинкти билан ьн, у әԝана нькарьбун хԝәха бе Әʹфьрандар бьһатана чекьрьне».

Паше Мьраз пьрсәкә ӧса да Аһмәд у Хәзале, чь кӧ ль сәр ԝан гәләк һʹӧкӧм кьр: «Гәло һун фәʹм дькьн ԝәки әԝ кӧ әм һәнә, биланийа Йаһоԝа Хԝәдева гьредайи йә?»

 Мьраз гьли кьр, ԝәки әԝ хԝәха гәләк әʹщебмайи ма, гава пеһʹәсийа кӧ әʹмьр сәр әʹрде бь кәсәки һатьбу чекьрьне. Мәсәлә, әԝ кӧ әʹрд дор-бәре хԝә у дор рʹегәһа тәʹве дьзьвьрʹә, мәщале чедькә ԝәки әм гәрм бьн. Ле әԝ йәк ӧса жи мәщале дьдә, ԝәки сәр әʹрде чаԝа зьвьстан ӧса жи һавин һәбә. Хенщи ве йәке, сәр әʹрде гәләк ав һәйә, кʹижан кӧ гәләк фәрз ә сәва жийина мәрийа. Халийеда тьштед ӧса керһати һәнә, кӧ чахе ав тʹәв дьбә, һешнайи дькʹьшинә хԝә у шин дьбә.

«Ләма жи әз баԝәр накьм, ԝәки әԝ һʹәму тьшт хԝәха һатийә чекьрьне. Чьмки әз баԝәр дькьм, ԝәки һәма Йаһоԝа Хԝәде, һәйә Канийа биланийа мәзьн. У әԝи һʹәму тьшт ӧса әʹфьрандьн, кӧ сәр әʹрде бькарьбьн бьжин».

Аһмәд у Хәзал тʹәви ԝи ԛайил дьбьн.

Сәр ԝана диса һʹӧнӧрәки Хԝәде һʹӧкӧм кьр, демәк ԛәԝат. Аһмәд хԝәст бьвинә һәла Кʹьтеба Пироз чь дьбежә дәрһәԛа ԛәԝата Хԝәде. Ләма жи Мьраз Кʹьтеба Пироз вәкьр у ԝирʹа әв рʹез хԝәнд:

• «Ах, йа Хӧдан [Йаһоԝа, ДТʹ] . . . Тә әʹзмана у әʹрде бь һеза хԝәйи мәзьн . . . әʹфьрандьн» (Йерәмйа 32:17).

Мьраз бәрдәԝам дькә: «Сәва кӧ әм бькарьбьн һьнәки пебьһʹәсьн кӧ ԛәԝата Йаһоԝа чьԛаси мәзьн ә, ԝәрен әм пебьһʹәсьн һәла ԛәԝата тәʹве чьԛас ә. Чахе дәрва гәләк гәрм ә у һун бәр тәʹве нә, гәло һьнге һун дькарьн тʹәхмин кьн кӧ ԛәԝата тәʹве чьԛаси мәзьн ә?»

Аһмәд щаба хԝә да: «Бәле бәр тәʹве гәләк гәрм ә, илаһи ԝәʹде дәмсала барана». Хәзал жи перʹа ԛайил бу.

 Мьраз ԝанарʹа гьли кьр, ԝәки щарәке әԝи хԝәндьбу, кӧ ортʹа тәʹведа гәрма ԝе дьгьһижә ԝәкә 15 милйон Сәлсийӧс. У һәрге һун ԛаси сәре дәрзийе, кәрик жь тәʹве һьлдьн у дайньн сәр әʹрде, һуне нькарьбьн жь 150 километр һе незик бьсәкьньн! Һәр сәни, тәʹв гәләк енержийа дәрдьхә, у әв енержийа бәрамбәри ԛәԝата тʹәԛандьна сәда милйона бомба дьбә.

Мьраз пьрс дькә: «Һәрге ԛәԝата тәʹве ӧса мәзьн ә, ле гәло ԛәԝата Әʹфьрандар чьԛаси мәзьн ә? Әм нькарьн бьдьнә һʹәсабе хԝә ԛәԝата ԝи. Мәсәлә чахе әм сәр тәʹве дьньһерʹьн, һьнге әм дькарьн бьвиньн кӧ тәʹв әв тьштәки бьчʹук ә бәрамбәри ԝе ԛәԝате, кʹижан кӧ щәм Әʹфьрандаре мә, Йаһоԝа һәйә».

Аһмәд у Хәзал тʹәви Мьраз ԛайил бун, кӧ әв һʹәму тьшт, йед кӧ пʹьрʹ баш ьн, хԝәха нькарьбун бьһатана чекьрьне. Ле бона әʹфьрандьна ван тьшта Әʹфьрандар лазьм буйә. Хенщи ве йәке, әԝана фәʹм кьрьн, ԝәки рʹаст ә Йаһоԝа рʹӧһʹ ә у найе дитьне, ле әԝ бь рʹастийе кәс ә у хәйсәт-һʹӧнӧред ԝийи ԛәданди чаԝа һʹәзкьрьн, һәԛи, билани у ԛәԝат, нава һʹәму әʹфринед ԝида тенә кʹьфше.