Аһмәд гәләк дьфькьри дәрһәԛа ԝе йәке, чь кӧ Мьраз готьбу. Рʹаст ә әв щара пешьн нибу чахе Аһмәд дәрһәԛа Кʹьтеба Пироз бьһистьбу, чьмки әԝи тʹьме заньбу, кӧ әв кʹьтебәкә пироз ә. Ле ньһа әԝи дәстпекьр бьфькьрә кӧ һәрге Кʹьтеба Пирозда һәнә пʹехәмбәртийед рʹаст, демәк дәрдькʹәвә, ԝәки әв нә кӧ тʹәне кʹьтебәкә кәвьн у пироз ә. Чь жи һәбу, Аһмәд йәкә дьхԝәст пебьһʹәсийа, һәла әԝед кӧ Кʹьтеба Пироз дьньвисин, жь кʹӧ әв һʹәму избаткьрьнед алийе зандарийеда у ԛәԝьмандьнед тʹәрихийе заньбун. У гәло чаԝа әԝана әв занәбун дьстандьн?

Рʹожа дьн Аһмәд тʹәви кʹӧлфәта хԝә, һатьн щәм Мьраз у Назе. Аһмәд әв пьрса хԝә да Мьраз: «Гәло әԝед кӧ Кʹьтеба Пироз дьньвисин, жь кʹӧ һаԛас сал пешда заньбун, ԝәки әв һʹәму тьшт ԝе бьԛәԝьмьн?»

Мьраз дәстпекьр шьровәкә: «Әԝед кӧ Кʹьтеба Пироз дьньвисин, авторед Кʹьтеба Пироз нибун. Әве йәке әм дькарьн бәрамбәри ԝе йәке бькьн, ча бежи кальк нәвийе хԝәрʹа дьбежә, ԝәки әԝ дәԝса ԝи нәʹме лекә. Кальк дьбежә, ле нәви нет-фькьред ԝи дьньвисә. Ләма жи дькарьн бежьн кӧ бь рʹасти авторе Кʹьтеба Пироз мәри нинә, ле Баве һʹәму инсанәте йә».

Аһмәд пьрси: «Баве һʹәму инсанәте? Гәло әв кʹи йә?»

Мьраз шьровәдькә: «Әв әԝ ә, йе кӧ дәстпебунеда әʹмьр дайә һʹәму мәрийа. У наве ԝи жи һәйә, чаԝа кӧ наве һәр бавәки». Мьраз Кʹьтеба Пироз вәкьр, у жь Зәбура 83:18 ԝирʹа хԝәнд:

• «Бьра мәрьв бьзаньбьн кӧ наве тә Йаһоԝа йә, у ль сәр тʹәмамийа әʹрде йе Һәри Жорьн тʹәне тӧ йи (ДТʹ)».

 Паше Мьраз диса рʹезәк жь Кʹьтеба Пироз нишани Аһмәд кьр, кʹидәре кӧ дәрһәԛа Йаһоԝа те готьне, кӧ әԝ жь дәстпебунеда демәк жь зәманед кәвьнда занә у гьли дькә дәрһәԛа ԝе йәке, чь кӧ ахьрийеда ԝе бьԛәԝьмә (Ишайа 46:10). Сәва кӧ әве рʹезе шьровәкә, Мьраз готе: «Чаԝа кӧ бав жь зарʹа хԝә әʹмьрда һе зедә щерʹьбанди йә у занәбуна ԝи гәләк ә, ӧса жи Йаһоԝа Баве һʹәму инсанәте һе зедә занә. Әԝ бь занәбун у биланийева тʹьжә йә. У тʹӧ кәс жь мә нькарә ве йәкеда бәрамбәри ԝи бә. Әԝ һәла һе дькарә дәрһәԛа ахьрийе жи пʹехәмбәртийе бькә. Ләма жи әм дькарьн бежьн, кӧ Йаһоԝа дькарьбу, әʹламәтийа дәрһәԛа ахьрийе дәрбази ньвискʹаред Кʹьтеба Пироз бькьра».

Аһмәд пьрс дькә: «Демәк ӧса дәрте, ԝәки Йаһоԝа занә чь ахьри һивийа мьн у Хәзале йә?»

Мьраз щаба ԝи да: «Зани бь рʹасти Йаһоԝа ахьрийа һәр мәрьвәки пешда кʹьфш накә. Ле мина бав, әԝ занә чәтьнайед мә, у дьхԝазә али мә бькә».

Мьраз ӧса жи готә Аһмәд, кӧ жь Кʹьтеба Пироз әԝана дькарьн пебьһʹәсьн, һәла чь Йаһоԝа ԝе бькә сәва кӧ малбәта ԝан бәхтәԝар бә, у әʹдьлайе жи бькарьбә хԝәй кә. Хенщи ве йәке, әԝана дькарьн бьвиньн кӧ чаԝа сафикьрьнед ԝан, дькарьн иро у ахьрийеда жи сәр әʹмьре ԝан һʹӧкӧм кьн.

Әв һʹәму соз дьле Аһмәд гьртьн. У әԝи рʹьнд әв йәк фәʹм кьр, чьмки хԝәха жи бав ә, у жь алийе хԝәда һазьр бу һʹәму тьшт бькьра, сәва кӧ ахьрийа зарʹед ԝи баш буйа. Һьнге Мьраз бь шабун дина Аһмәд у Хәзале да сәр ԝан һьнәк созед жь Кʹьтеба Пироз:

• Әԝ «шәрʹа дьдә сәкьнандьне, һәр чар ԛӧлбед дьнйайе» (Зәбур 46:9).

• «Ханийа ава бькьн у рʹуньн у рʹәза дайньн у меԝа ԝе бьхԝьн . . . әԝ ава бькьн у ԝәки дьн кәс рʹунәне; жь бәр кӧ . . . рʹожед нәтәԝа [мьләте] мьн бьбә мина рʹожед даре» (Ишайа 65:21, 22).

•  «Гәньме ԝәлет бьбә бьрʹ-бәʹр, дәрәмәтед ԝи сәре чʹийа бьһʹәжьн» (Зәбур 72:16).

• «Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4).

Әв созед Кʹьтеба Пироз, гәләк дьле Аһмәд гьртьн. Әԝи ԝе бьхԝәста бьжита дьнйакә ӧсада, кʹидәре кӧ нәһәԛи, нәхԝәши, мьрьн ԝе тʹӧнә буйа. У кʹидәре кӧ хԝарьна һәр кәси ԝе тʹер-тʹьжә буйа. Әв гьли, Хәзале жи гәләк хԝәш һатьн, ле ԝерʹа чәтьн бу баԝәрийа хԝә ԝан созед баш бьанийа.

Мьраз готе: «Әз тә рʹьнд фәʹм дькьм Хәзал. Ле һәла бьфькьрә: һәрге гәләк пʹехәмбәртийед жь Кʹьтеба Пироз һур бь һур ида һатьнә сери, нә ахьр әв пʹехәмбәрти жи ԝе бенә сери, ӧса нинә? Чьмки хԝәха авторе Кʹьтеба Пироз, бь гьлийе ӧса мә дьдә баԝәркьрьне: ‹Бьньвисә, чьмки әв хәбәрнә амьн у рʹаст ьн›» (Әʹйанти 21:5).