Аһмәд гәләк ша бу чахе пеһʹәсийа дәрһәԛа һʹәму созед Йаһоԝа. Ле әԝи һʹәта хьлазийе фәʹм нәдькьр, кӧ чаԝа ԛәԝата кәсәки дькарә бьгьһиже, ԝәки әв һʹәму соза бинә сери. Мьраз дәстпекьр шьровәкә, кӧ чаԝа Йаһоԝа дькарә һʹәму созед хԝә бинә сери. Ләма жи әԝи готә Аһмәд, кӧ әԝана дькарьн бьфькьрьн сәр фькьрәкә ӧса, ԝәки тʹӧ тьшт бе мәʹни у хԝәха нәһатийә чекьрьне.

Мьраз готе, ԝәки дәрһәԛа ве йәке Кʹьтеба Пирозда те шьровәкьрьне, у дина ԝи да сәр ве рʹезе жь Кʹьтеба Пироз:

• «Һәр маләк бь дәсте йәки те чекьрьне» (Ибрани 3:4).

Аһмәд гот: «Бәле, әв йәк рʹаст ә. Чьмки ԛә маләк жи хԝәха найе чекьрьне, һәрге кәсәк ава нәкә».

Мьраз бәрдәԝам кьр: «Диса жи сәрда дькарьм мәсәләкә ӧса биньм, ԝәки тʹӧ хԝарьнәк жи хԝәха найе һазьркьрьне, һәрге кәсәк ченәкә».

Паши ве йәке, Мьраз кьрә бира Аһмәд, кӧ һʹәму тьштед дор-бәре мә, жь хани дьһа мәзьн ьн у чекьрьнеда жи дьһа чәтьн ьн. Әԝи готе: «Һәла дина хԝә бьдә кӧлиркед бәдәԝ у назьк, чʹийайед мәзьн, бәʹра нәрʹьһʹәт, у сәр дьнйа мәйә мәзьн у мәхсус. Һәрге сәва кӧ хани ава бә лазьм ә сазкʹар, у бона һазьркьрьна хԝарьне ашпеж, ле тьштед дьн дьнйайеда ча һатьнә чекьрьне? Гәло бона ԝан Сазкʹар йан жи Әʹфьрандар нә лазьм бу?»

Аһмәд гьлийе Мьразрʹа ԛайил бу, чьмки чь кӧ әԝи дьгот рʹаст бу.

 Мьраз бәрдәԝам кьр: «Кʹьтеба Пироз дьбежә, кӧ бь рʹасти һәйә Сазкʹар йан жи Әʹфьрандар, йе кӧ һʹәму тьшт әʹфьрандийә. Фәʹмдари йә кӧ Әʹфьрандаре һʹәму тьшта, гәрәке пʹьрʹ ԛәԝи у һьмзор бә. Ләма жи Кʹьтеба Пироз сәр ԝи дьбежә Хԝәде. Сәр зьмане Кʹьтеба Пирозә орижинале, әв хәбәр те һʹәсабе «Йәки Ԛәԝат» йан жи «Һьмзор». Рʹаст ә иро мәри гәләкарʹа дьбежьн ‹хԝәде›, ле чьмки Йаһоԝа һʹәму тьшт әʹфьрандийә, ләма жи тʹәне әԝ һежа йә, ԝәки бе навкьрьне чаԝа Хԝәдайе Һьмзор».

Аһмәд гәләк әʹщебмайи ма, кӧ чаԝа Кʹьтеба Пироз шьровәдькә гәләк кьред Йаһоԝайи баш. Аһан әв һьнә мәсәлә нә, йед кӧ Мьраз нишани Аһмәд кьр:

• «Дәстпебунеда Хԝәде әʹрд у әʹзман әʹфьрандьн» (Дәстпебун 1:1).

• «Бьзаньбьн кӧ Хӧдан ә [Йаһоԝа йә, ДТʹ] Хԝәде, әԝи әм хӧльԛандьн, әм мьлкʹе Ԝи нә» (Зәбур 100:3).

• «Әʹзман бона рʹумәта Хԝәде дьбежьн, әʹрше әʹзмен шьхӧлед дәсте Ԝи кʹьфш дькьн» (Зәбур 19:1).

• «Йе кӧ одәйед хԝәйи жорин ль әʹзмана ава кьрийә у ԛӧба хԝә сәр әʹрде данийә у йе кӧ банги [гази] авед бәʹре дькә у ԝан ль рʹуйе әʹрде рʹьжандьнә әԝ ә; наве ԝи Хӧдан ә [Йаһоԝа йә, ДТʹ]» (Амос 9:6).

 Бәле, Йаһоԝа Хԝәде Әʹфьрандаре һʹәму тьшта йә. Әԝи нә кӧ тʹәне тʹәбийәт әʹфьрандийә, ле ӧса жи әʹмьр дайә. Дәрһәԛа Йаһоԝа, Кʹьтеба Пироз ӧса дьбежә: «Чьмки канийа жийане ль щәм Тә йә» (Зәбур 36:9). Ләма жи әԝ ә Жийиндар у Әʹфьрандаре мә. У чьмки Йаһоԝа йә Әʹфьрандар у Канийа жийине, ләма жи әм дькарьн бежьн кӧ әв Баве мәйи әʹзмана йә. Аһан чьрʹа Кʹьтеба Пироз ӧса дьбежә: Гәло «баве мә һʹәмуйа нә йәк ә? . . . Хԝәдайәки мә нә әʹфьрандьн?» (Малахи 2:10).

Аһмәд ԛайил бу у гот: «Бь рʹасти жи әв ӧса нә. Чахе сәр тьштед дор-бәре хԝә дьньһерʹи у дьфькьри сәр ван тьшта, һьнге фәʹм дьки кӧ тʹӧ тьшт бе мәʹни у хԝәха нәһатийә чекьрьне. Чьмки Әʹфьрандар, йан жи Жийиндаре ван тьшта гәрәке һәбуйа».

Кʹӧлфәта Аһмәд, Хәзале жи бь шабун зедә кьр: «Бәле, һәрге әԝи карьбу һʹәму тьшти бьәʹфьринә, демәк ԛәԝата ԝи дьгьһижә ԝе йәке, кӧ ԝан һʹәму созед хԝә жи бинә сери, дәрһәԛа кʹижана кӧ Кʹьтеба Пирозда те готьне!»

Һʹәму тьштед кӧ Аһмәд у Хәзал ԝе рʹоже бьһистьн, гәләк бь логики у фәʹмдари дьһатьнә кʹьфше. Ле әԝана дьхԝәстьн пебьһʹәсийана, кӧ әв Әʹфьрандаре Һьмзор йәки чаԝа нә.