1. Әм чь гәрәке бькьн, ԝәки избат бьн, кӧ һʹәбандьна мә Йаһоԝа хԝәш те у чьрʹа?

 ИСА гот: «Йед рʹаст дьһʹәбиньн ԝе бь рʹӧһʹ у рʹастийе Баве бьһʹәбиньн, чьмки Бав йед аһа дьһʹәбиньн дьгәрʹә» (Йуһʹәнна 4:23; 6:44). Әм гәрәке «бьзаньбьн кӧ чь ль Хӧдан хԝәш те» (Әфәси 5:10). Ле нә һәртʹьм һеса йә әԝе йәке бькьн. Шәйтʹан һәр тьшти дькә, сәва кӧ мә бьхальфинә, ԝәки әм ԝан тьшта бькьн, чь кӧ Йаһоԝа хԝәш найе (Әʹйанти 12:9).

2. Гьли кә, чь ԛәԝьми незики Чʹийайе Синайе.

² Мире-щьна чь дькә, сәва кӧ мә бьхальфинә? Әԝ ӧса дькә, ԝәки әм ԛәнщи у хьрабийе жь һәв дәрнәхьн. Һәла биньнә бира хԝә чь ԛәԝьми, чахе щьмәʹта Исраел незики Чʹийайе Синайе бу. Муса һьлкʹьшийа сәр чʹийе, у щьмәʹт һивийе бу, кʹәнге әԝ пашда вәгәрʹә. Ԝәхт дәрбаз бу, әԝана ԝәстийан һивийа ԝи бьн у готьнә Һарун, ԝәки хӧданәки бона ԝан чекә. Һарун жь зер гольк чекьр у щьмәʹте щәжьн дәрбаз кьр. Әԝана дорʹа гольке дьрʹәԛьсин у сәре хԝә бәр датанин. Әԝана дьфькьрин, ԝәки бь ԝе йәке кӧ сәре хԝә бәр гольке датиньн, ӧса Йаһоԝа дьһʹәбиньн. Ләма жи ԝана әԝ щәжьн нав кьрьн «щәжьна Хӧдан», ле ԝана рʹаст нәдькьр. Йаһоԝа әԝ йәк һʹәсаб кьр ча пʹутпʹарьсти,  ләма жи гәләка жь ԝан ԛьрʹ кьр (Дәркʹәтьн 32:1-6, 10, 28). Жь ԝе ԛәԝьмандьне әм чь дькарьн һин бьн? Һаш хԝә һәбьн, ԝәки нәйенә хапандьне. «Дәсте хԝә ль йе мьрдар нәхьн» у бьра Йаһоԝа ԝә һин кә ԛәнщи жь хьрабийе һәв дәрхьн (Ишайа 52:11; Һәзәԛел 44:23; Галати 5:9).

3, 4. Чьма керһати йә һе зедә пебьһʹәсьн дәрһәԛа ԝе йәке, ԝәки щәжьн жь кʹӧ пешда һатьнә?

³ Чахе Иса сәр әʹрде бу, әԝи шагьртед хԝә һин дькьр, ԝәки әԝана һʹәбандьна рʹастда мәсәла баш бьһельн. Паши мьрьна ԝи, шагьрта бәрдәԝам дькьрьн шагьртед тʹәзә дәрһәԛа принсипед Йаһоԝа һин кьн. Ле паши мьрьна шагьртед Иса, шагьртед дәрәԝ дәстпекьрьн нав щьватед Мәсиһитида һинкьрьн у әʹдәтед ԛәлп, ӧса жи щәжьнед пʹутпʹарьста бәла кьн. Әԝана һәла һе жи щәжьнед пʹутпʹарьста нав кьрьн ча щәжьнед Мәсиһити (Кʹаред Шандийа 20:29, 30; 2 Тʹесалоники 2:7, 10; 2 Йуһʹәнна 6, 7). Гәләк жь ԝан щәжьна һʹәта ньһа жи бәлабуйи нә, у әԝана жь һʹәбандьна ԛәлп у жь щьна нә *(Әʹйанти 18:2-4, 23).

⁴ Нав тʹәмамийа дьнйайеда әʹмьре мәрьвада щәжьн щийе гәләк фәрз дьгьрьн. Һәрге тӧ дьһа зедә пебьһʹәси дәрһәԛа ньһерʹандьна Йаһоԝа һьндава щәжьна, һьнге тӧйе бькарьби фәʹм ки, кӧ лазьм ә ньһерʹандьна хԝә һьндава щәжьна бьгӧһези. Әв йәк дькарә нә һеса бә, ле баԝәр бә, ԝәки Йаһоԝа ԝе али тә бькә. Ԝәрә әм шеԝьр кьн, һьнә щәжьнед гәләк бәлабуйи жь кʹӧ пешда һатьнә, у паше әме бькарьбьн фәʹм кьн ньһерʹандьна Йаһоԝа.

5. Кʹижан дәрәщә избат дькьн, ԝәки Иса 25 Кануна Пешьнда нәһатийә буйине?

⁵ Нав тʹәмамийа дьнйайе гәләк щийада 25 Кануна Пешьн щәжьна буйина Иса дәрбаз дькьн, чьмки дьфькьрьн, ԝәки Иса ве рʹоже һатийә буйине. Кʹьтеба Пирозда найе готьне, ԝәки Иса кʹижан рʹоже у кʹижан мәһеда һатийә буйине, ле әԝ әʹйан дькә, ԝәки Иса кʹижан дәмсаледа һатийә буйине. Луԛа ньвиси, ԝәки чахе Иса Бәйтләһʹмеда һатә буйине, ԝи чахи «шьван һәбун, кӧ ԝе шәве хԝәйитийа кәрийе пәзед хԝә дькьрьн» (Луԛа 2:8-11). Мәһа Кануна Пешьн Бәйтләһʹмеда сар ә, баран дьбарә у щарна бәрф жи дькʹәвә, ләма жи әм дькарьн бежьн, ԝәки шьван ԝе нькарьбуна шәв тʹәви кәрийед пәзед хԝә дәрва бьмана. Әм жь ԝе йәке чь педьһʹәсьн? Иса һатә буйине чахе һәԝа хԝәш бу, ләма жи фәʹмдари йә, ԝәки әԝ мәһа Кануна Пешьн нибу. Ча Кʹьтеба Пироз ӧса жи тʹәрихи дьдә кʹьфше, ԝәки Иса һатийә буйине мәһа Илоне йан жи Щотмәһе.

6, 7. а) Гәләк әʹйдед бәлабуйи, йед кӧ буйина Исава гьредайи нә, жь кʹӧ пешда һатьн? б) Чь гәрәке сәва мә бьбә мәʹни, ԝәки пʹешкʹеша бьдьнә һәв?

⁶ Ԝәки ӧса йә, ле әʹйда буйина Иса, жь кʹӧ пешда һатийә? Әв жь щәжьна пʹутпʹарьста һатийә, щәжьна Рʹомайа Сатурнал, әв щәжьн бона Сатурн бу, хӧдане әʹрдбещәркьрьне. «Әнсиклопедийа Америкайеда» һатийә готьне: «Щәжьна Сатурнал, йе кӧ Рʹомайи мәһа Кануна Пешьнда дәрбаз дькьрьн, ча мәсәлә бу сәва әʹйд-ԛәйдед Щәжьна Буйина Иса. Мәсәлә, һьнә ԛәйдед ԝе щәжьне әԝ бун, ԝәки ԝана кʹеф дькьр, тьшт пʹешкʹеши һәв дькьрьн, у мум ведьхьстьн». Ӧса жи 25 Кануна Пешьн щәжьна буйина хӧдане тәʹве дәрбаз дькьрьн, наве кʹижани Митра бу, у Фарьса әԝ дьһʹәбандьн.

 ⁷ Һʹәчʹи зәʹф мәрьв рʹожа иройин чахе Щәжьна Буйина Иса дәрбаз дькьн, ԛә нә жи дьфькьрьн, кӧ әԝ йәк жь һʹәбандьна ԛәлп пешда һатийә. Әԝана Щәжьна Буйина Иса һʹәсаб дькьн ча мәщал, ԝәки тʹәви малбәта хԝә ԝәʹдә дәрбаз кьн, хԝарьна хԝәш бьхԝьн у һәврʹа пʹешкʹеша бьдьн. Әм малбәт у һәвалед хԝә һʹьз дькьн, у Йаһоԝа дьхԝазә, ԝәки хьзмәткʹаред ԝи һьндава һәв дәствәкьри бьн. Кʹьтеба 2 Корьнтʹи 9:7-да те готьне, ԝәки «Хԝәде йе бь дьл у әшԛ дьдә һʹьз дькә». Йаһоԝа нахԝазә, ԝәки әм тʹәне ԝәʹде щәжьна һәвдӧрʹа  пʹешкʹеша бьдьн. Щьмәʹта Йаһоԝа щәжьнава гьредайи нинә, әԝана һәртʹьм ша нә тьшта пʹешкʹеши һәв кьн у тʹәви нәфәр у һәвалед хԝә ԝәʹдә дәрбаз кьн, у кʹара хԝә ԝе йәкеда нагәрʹьн. Әԝана жь бо һʹьзкьрьне пʹешкʹеша дьдьн (Луԛа 14:12-14).

8. Чахе Иса тʹәзә һатьбу буйинә, гәло стәйрнаса һьнге пʹешкʹеш Исарʹа анин? Шьровәкә.

⁸ Нав мәрьвада бәлабуйи йә, ԝәки гава Иса тʹәзә афьрʹда һатьбу буйине, се мера пʹешкʹеш ԝирʹа анин. Ләма жи гава әʹйда буйина Иса дәрбаз дькьн, әԝе йәке дькьнә мәʹни, ԝәки пʹешкʹеша бьдьнә һәв. Әԝ йәк рʹаст ә, ԝәки чәнд мера тʹәсәлийа Иса кьрьн у ԝирʹа пʹешкʹеш анин. Ԝәʹде бәре әԝ йәк тьштәки тʹәбийәти бу, кӧ пʹешкʹеша бьдьнә мәрьвед навдар (1 Пʹадшати 10:1, 2, 10, 13). Ле тӧ зани, ԝәки әԝ мер стәйрнас бун, мәрьвед кӧ сербазийева мьжул дьбун у Йаһоԝа нәдьһʹәбандьн? Һьн жи, чахе стәйрнаса тʹәсәлийа Иса кьрьн, әԝ тʹәзә дийа хԝәрʹа нәбьбу, у нә жи афьрʹда бу. Әԝана тʹәсәлийа ԝи кьрьн, чахе әԝ ида «кӧрʹьк» бу у малда дьжит (Мәтта 2:1, 2, 11).

9. Кʹьтеба Пирозда дәрһәԛа рʹожа буйина кʹижан мәрьва, те готьне?

⁹ Рʹожа кӧ зарʹ те буйине, рʹожа шабуне йә (Зәбур 127:3). Ле әԝ йәк найе һʹәсабе, ԝәки әм гәрәке һәр сал рʹожа буйине дәрбаз кьн. Бьфькьрә дәрһәԛа ԝе йәке: Кʹьтеба Пирозда тʹәне дәрһәԛа дӧ мәсәлед рʹожа буйине те готьне. Йәк жь ԝан рʹожа буйина Фьрәԝьне Мьсьре бу у йа дӧда рʹожа буйина Һеродәс Антипас Пʹадша бу. (Бьхунә Дәстпебун 40:20-22; Марԛос 6:21-29.) Жь ԝан сәрԝера тʹӧ кәс хьзмәткʹаре Йаһоԝа  нибу. Кʹьтеба Пирозда найе готьне, ԝәки кәсәк жь хьзмәткʹаред Йаһоԝа рʹожа буйина хԝә дәрбаз кьрийә.

10. Ньһерʹандьна Мәсиһийед бәре сәр щәжьна рʹожа буйине чь щурʹәйи бу?

¹⁰ «Әнсиклопедийа Ԝорлд Букда» (Thе Ԝorld Book Еncyclopеdia) те готьне, ԝәки Мәсиһийед бәре «әʹйда рʹожа буйине һʹәсаб дькьрьн ча әʹйда пʹутпʹарьста». Әʹйдед ԝи щурʹәйи сәр һʹиме һʹәбандьна ԛәлп бун. Мәсәлә, Йунанийед бәре баԝәр дькьрьн, ԝәки һәр мәрьв дьһатә хԝәйкьрьне алийе рʹӧһʹәкида, йе кӧ ԝәʹде буйина ԝи дьһат, ԝәки ԝи хԝәй кә. Мәрьв дьфькьрин, ԝәки әԝ рʹӧһʹ гьредайи бу тʹәви хӧданәки, йе кӧ рʹожа буйина ԝи мәрьви, дьһатә буйине. Ләма жи мәрьв баԝәр дькьрьн, һәрге әԝана дьхԝазьн кӧ тʹәмамийа әʹмьре хԝә хԝәйкьри бьн, гәрәке рʹожа буйина хԝә дәрбаз кьн. Хенщи ԝе йәке, һʹәбандьна пʹутпʹарьстада, рʹожа буйине гьредайи йә тʹәви стәйрнасийе у һороскопе.

11. Чь Йаһоԝа дьфькьрә дәрһәԛа ԝе йәке, ча әм гәрәке мәрʹданийе бьдьнә кʹьфше?

¹¹ Гәләк мәрьв һʹәсаб дькьн, ԝәки рʹожа буйине гәләк мәхсус ә у һәр кәс гәрәке ԝи мәрьви бьмбарәк кә, пʹешкʹеша бьдә ԝи, у һʹьзкьрьне ԝирʹа әʹйан кә. Ле дәԝса кӧ тʹәне рʹожәкә мәхсус һʹьзкьрьне бьдьнә кʹьфше һьндава нәфәр у һәвалед хԝә, әм дькарьн тʹәмамийа сале әԝе йәке бькьн. Йаһоԝа дьхԝазә, ԝәки әм һәр гав ԛәнщ у мәрʹд бьн. (Бьхунә Кʹаред Шандийа 20:35.) Әм нә тʹәне рʹожа буйина хԝә, ле һәр рʹож рʹази нә сәва пʹешкʹеша жийине (Зәбур 8:3, 4; 36:9).

12. Ча дькарә рʹожа мьрьне жь рʹожа буйине баштьр бә?

¹² Кʹьтеба Ԝаиз 7:1-да те готьне: «Наве ԛәнщ жь рʹуне беһнхԝәш, у рʹожа мьрьне, жь рʹожа буйина зьламәки  хԝәштьр ә». Ча дькарә рʹожа мьрьне жь рʹожа буйине баштьр бә? Чахе әм һатьнә буйине, мә һе тʹӧ тьшт әʹмьре хԝәда нәкьрьбу, нә тьштед баш нә жи хьраб. Ле чахе әм әʹмьре хԝә тʹәсмили Йаһоԝа дькьн у мәрьварʹа ԛәнщийе дькьн, ӧса әм «наве ԛәнщ» хԝәрʹа ԛазанщ дькьн, у Йаһоԝа ԝе ԝи чахи жи мә бир нәкә, һәрге әм бьмьрьн (Ибо 14:14, 15). Хьзмәткʹаред Йаһоԝа, нә сала хԝә дәрбаз дькьн нә жи йа Иса. Иса тʹәне тʹәмик да,  ԝәки щәжьнәке дәрбаз кьн, әԝ һәйә Евара Биранина Мьрьна ԝи (Луԛа 22:17-20; Ибрани 1:3, 4).

13, 14. Щәжьна Һекәсор тʹәви чь гьредайи йә?

¹³ Гәләк мәрьв баԝәр дькьн, ԝәки щәжьна һекәсор гьредайи йә тʹәви сахкьрьна Иса. Ле бь рʹасти щәжьна Һекәсор гьредайи йә тʹәви хӧдан Әостра, хӧдане Англо-Саксона, демәк хӧдане рʹонкайе у баһаре. «Кʹьтеба Фәрәнгока Чʹирокада» (The Dictionary of Mytology) те готьне, ԝәки әԝ ӧса жи хӧдане бәрдарийе дьһатә һʹәсабе. Һьнә әʹдәт у ԛәйдед Һекәсоре гьредайи нә тʹәви ԝи хӧдани. Мәсәлә, «Әнсиклопедийа Британикада» (Encyclopædia Britannica) те готьне, ԝәки һек «дьһатә һʹәсабе симбола дәстпебуна әʹмьр у сахбуйине». Ле кʹеврушк, һʹәбандьна пʹутпʹарьстада гәләк сал дьһатә һʹәсабе ча симбола бәрдарийе. Әʹйан ә, ԝәки щәжьна Һекәсор тʹәви сахкьрьна Иса, гьредайи нинә.

¹⁴ Чахе Йаһоԝа дьвинә, кӧ мәрьв әʹйдед һʹәбандьна ԛәлп у сахкьрьна Кӧрʹе ԝи нав һәв дьхьн, гәло әԝ йәк ԝи хԝәш те? Һьлбәт на (2 Корьнтʹи 6:17, 18). Әм заньн, ԝәки Йаһоԝа ԝе тʹӧ щар жь мә дәʹԝа нәкә, ԝәки щәжьна сахкьрьна Иса дәрбаз кьн.

15. Чьрʹа Мәсиһийед рʹаст хԝә дур дьгьрьн жь һьнә әʹйд-ԛәйдед, кӧ мьрийава гьредайи нә?

¹⁵ Мәсиһийед рʹаст хԝә дур дьгьрьн жь әʹйд-ԛәйдед кӧ мьрийава гьредайи нә. Чахе мәрьв дьмьрә, ԛәйдәки ӧса һәйә, ԝәки мәрьвед ԝи тʹәмамийа шәве бәр щьнйазе ԝи дьминьн. Ԝәʹде чʹәʹлкьрьне нәфәред ԝи гәрәке чʹәнгәк хали йан кӧлирка бавежьнә сәр тʹабута  ԝи. Ӧса жи һәнә әʹйд-ԛәйдед ӧса, кӧ тенә кьрьне чәнд рʹожа, мәһа йан сала паши мьрьна мәрьва. Мәсәлә, хԝарьн у вәхԝарьне дьбьн сәр мәзәл йан жи датиньнә ода кӧ щьнйаз теда данибун. Мәрьв әԝ һәр тьшти дькьн, чьмки баԝәр дькьн, йан чь мьри дькарә аликʹарийе йан жи зийане бьдә ԝан. Ле Кʹьтеба Пироз һин дькә, ԝәки мьри «тьштәки ньзаньн». Ләма жи әԝед кӧ дьхԝазьн хԝә нава һʹьзкьрьна Хԝәдеда хԝәй кьн, гәрәке шьхӧлкʹарийе нәкьн нава ԝан әʹйд-ԛәйдед ԛәлпда, йед кӧ мьрийава гьредайи нә (Ԝаиз 9:5, 10).

16, 17. Пешийа кӧ кʹаре дәʹԝате бькьн, гәрәке дәрһәԛа чь бьфькьрьн?

¹⁶ Дәʹԝат әԝ ԛәԝьмандьнәкә мәхсус ә. Нав тʹәмамийа дьнйайеда әʹйд-ԛәйдед дәʹԝата жь һәв щӧдә дьбьн. Мәрьв нә жи дьфькьрьн дәрһәԛа ԝе йәке, кӧ ԛәйдед дәʹԝате жь кʹӧ пешда һатьнә. Ләма жи әԝана ньзаньн, ԝәки һьнәк жь ԝан ԛәйда жь баԝәрийа пʹутпʹарьста пешда һатьнә. Ле Мәсиһийед кӧ дьхԝазьн бькʹәвьнә зәԝаще, гәрәке ԝе йәкеда избат бьн, кӧ дәʹԝата ԝан ԝе Йаһоԝа хԝәш бе. Һәрге әԝана пешда леколин кьн, жь кʹӧ ԛәйдед дәʹԝате пешда һатьнә, ԝи чахи әԝана ԝе бькарьбьн сафикьрьнед рʹаст бькьн (Марԛос 10:6-9).

¹⁷ Мәрьв дьфькьрьн, ԝәки һьнә ԛәйдед дәʹԝата, малбәта тʹәзәрʹа бәхтәԝарийе тиньн (Ишайа 65:11). Мәсәлә, һьнә щийада мәрьв бьрьнщ йан тьштед дьн дьрʹәшиньн сәр сәре бук-зәʹве. Әԝана баԝәр дькьн, ԝәки әԝ йәк ԝе бәхтәԝарийе, зарʹа у әʹмьре дьреж бьдә ԝан, ӧса жи ԝана жь хьрабийе хԝәй кә. Ле Мәсиһи фәсал ьн у хԝә дур дьгьрьн жь ԛәйдед ӧса, йед кӧ рʹелигийед ԛәлпва гьредайи нә. (Бьхунә 2 Корьнтʹи 6:14-18.)

18. Кʹижан принсипед жь Кʹьтеба Пироз әм дькарьн бьдьнә хәбате, чахе кʹаре дәʹԝате дькьн?

 ¹⁸ Жьн у мере Мәсиһи дьхԝазьн, дәʹԝата ԝана ша дәрбаз бә, бь лайиԛи бә у һʹәԝас бә бона хԝәндийа демәк мевана. Меванед кӧ һатьнә сәр дәʹԝате, гәрәке нә бук-зәʹверʹа нә жи тʹӧ кәсирʹа тьштед хьраб, бемәʹрифәти йан бенамуси нәбежьн (Мәтʹәлок 26:18, 19; Луԛа 6:31; 10:27). Сәр дәʹԝатед Мәсиһийа «кʹӧбар-бабахийа ви әʹмьри» гәрәке нәйе кʹьфше (1 Йуһʹәнна 2:16). Чахе тӧ хԝә бона дәʹԝате һазьр дьки, ӧса бькә, ԝәки пʹаше гава тӧ әве рʹожа мәхсус бини бира хԝә, ша би нә кӧ пʹошман би. (Бьньһерʹә Әʹламәтийа Зедә 28.)

19, 20. Салхи жь кʹӧ пешда һатьнә?

¹⁹ Сәр дәʹԝата у кʹефа ԛәйдә йә салхийа вәхԝьн. Сәр салхийе кәсәк рʹадьбә, хәбәр дьдә у тьштед баш дьбежә, ле мәрьвед дьн кʹаса хԝә һьлдькʹьшиньн у кʹаса һәв дьхьн. Ньһерʹандьна Мәсиһийа сәр ԝе йәке гәрәке чь щурʹәйи бә?

²⁰ Кʹьтебәкеда наве кʹижани «Канийа Информасийа Һʹәмдьнйайе Дәрһәԛа Ичʹкәвәхԝарьне у Әʹдәта» (Intеrnational Handbook on Alcohol and Culturе) те готьне, ԝәки дьԛәԝьмә салхи пешда һатийә жь әʹйд-ԛәйдед пʹутпʹарьста, «кʹижанада тьштед авийә пироз пʹешкʹеши хӧдана дькьрьн». Әԝ йәк дьһатә кьрьне, сәва кӧ дӧа бькьн, ԝәки мәрәм у мьразе ԝан бенә сери. Ԝана дӧайед хԝә бь ԝан гьлийа хьлаз дькьрьн, «һәр бьжи!» йан жи «сьһʹәт ԛәԝат би!» Ԝәʹде бәре мәрьва кʹас һьлдьбьрʹандьн, ԝәки жь хӧданед хԝә кʹәрәма бьхԝазьн. Ле Йаһоԝа кʹәрәма бь ԝи щурʹәйи надә (Йуһʹәнна 14:6; 16:23).

21. Мәсиһи гәрәке хԝә жь чь щурʹә щәжьна дур бьгьрьн?

²¹ Чахе тӧ бәр сафикьрьне сәкьнийи, фьлан щәжьне бьки йан на, бьфькьрә дәрһәԛа ԝе йәке, кӧ ԝедәре чь дькарә бьԛәԝьмә. Мәсәлә, һьнә щәжьн бь сайа рәԛасед бенамусийе дәрбаз дьбьн, йан гәлә ичʹкә вәдьхԝьн, у һәла һе бенамусийе жи дькьн. Щәжьнед ӧса дькарьн щарна пьштгьрийа әʹмьре һомосексуали у лесбиани бькьн, ӧса жи һелан кьн бәрбь натсийонализме. Һәрге әм щәжьнед ԝи щурʹәйида кʹар дькьн, гәло әм бь рʹасти нәфрʹәт дькьн әԝе йәке, чь кӧ Йаһоԝа нәфрʹәт дькә? (Зәбур 1:1, 2; 97:10; 119:37).

22. Чь дькарә али Мәсиһи бькә, ԝәки әԝ сафи кә, фьлан щәжьне дәрбаз кә йан на?

²² Мәсиһи гәрәке фәсал бьн, ԝәки хԝә дур бьгьрьн жь ԝан щәжьна, кʹижан Хԝәде беһӧрмәт дькьн. Паԝлосе шанди ньвиси: «Һәгәр һун бьхԝьн, вәхԝьн, йан чь шьхӧли кӧ һун бькьн, һәр тьшти бона шькьрдайина Хԝәде бькьн» (1 Корьнтʹи 10:31; бьньһерʹә Әʹламәтийа Зедә 29). Бь рʹасти нә һәр щәжьн бенамусийева, һʹәбандьна ԛәлпва йан натсийонализмева гьредайи нә. Һәрге щәжьн мьԛабьли принсипед Кʹьтеба Пироз дәрнайен, әм дькарьн хԝәха сафи кьн, ԝе щәжьне дәрбаз кьн йан на. Әм ӧса жи гәрәке һьлдьн һʹәсаб, сафикьрьна мә ԝе ча һʹӧкӧм бә сәр мәрьвед дьн.

23, 24. Чаԝа әм дькарьн шьровәкьн нәфәред хԝәрʹа, йед кӧ Шәʹдед Йаһоԝа ниньн, ԝәки чьма мә сафи кьрийә һьнә щәжьна дәрбаз нәкьн?

²³ Дьбәкә тә ида сафи кьрийә щәжьнед ӧса дәрбаз нәки, йед кӧ Йаһоԝа беһӧрмәт дькьн. Ле дьбәкә һьнә нәфәред тә, йед кӧ нә Шәʹдед Йаһоԝа нә, дьшьрмиш  бьн, ԝәки тӧ ԝана һʹьз наки, йан жи нахԝази ԝәʹдә тʹәви ԝан дәрбаз ки. Дьбәкә әԝана һʹәсаб дькьн, ԝәки тʹәне ԝәʹде щәжьна, малбәт дькарә тʹәвайи тʹоп бә. Ԝи чахи тӧ чь дькари бьки? Гәләк мәщал һәнә, кӧ тӧ бьди кʹьфше, ԝәки ԝана һʹьз дьки у әԝана бона тә гәләк ԛимәт ьн (Мәтʹәлок 11:25; Ԝаиз 3:12, 13). Тӧ дькари ԝәʹдеки дьн гази ԝан ки, кӧ тʹәвайи ԝәʹдә дәрбаз кьн.

²⁴ Һәрге нәфәред тә дьхԝазьн пебьһʹәсьн чьма тӧ һьнә щәжьна дәрбаз наки, тӧ дькари информасийа жь әʹдәбйәтед мә йан жи жь малпәра jw.org бьвини, йа кӧ ԝе али тә бькә мәʹнийа ԝе йәке шьровәки. Ӧса нәкә, ԝәки әԝана бьфькьрьн кӧ тӧ дьхԝази ԝанарʹа избат ки, ԝәки әԝана нәрʹаст ьн, йан жи зорʹе ԝана бьки бь щуре тә бьфькьрьн. Малбәта хԝәрʹа бьдә кʹьфше, ԝәки һʹәта тә сафикьрьна шәхси бькьра, тә леколин кьрьбу. Зу һерс нәкʹәвә, «бьра хәбәрдана ԝә мәʹрифәти у хԝекьри бә» (Колоси 4:6).

25, 26. Чаԝа де-бав дькарьн али зарʹед хԝә бькьн, ԝәки принсипед Йаһоԝа һʹьз бькьн?

²⁵ Гәләк фәрз ә, ԝәки һәр кәс жь мә рьнд бьзаньбә, ԝәки әм чьрʹа һьнә щәжьна дәрбаз накьн (Ибрани 5:14). Нета мә әԝ ә, ԝәки Йаһоԝа жь мә рʹази бә. Һәрге зарʹед ԝә һәнә, һун гәрәке ԝәʹдә бьвиньн, ԝәки али зарʹед хԝә бькьн, кӧ әԝана принсипед Кʹьтеба Пироз фәʹм бькьн у һʹьз бькьн. Чахе Йаһоԝа, бона ԝан бьбә кәсе рʹеали, ԝи чахи әԝана ԝе бьхԝазьн ԝи хԝәш бен (Ишайа 48:17, 18; 1 Пәтрус 3:15).

²⁶ Йаһоԝа ша дьбә, чахе дьвинә кӧ әм һʹәму тьшти дькьн, ԝәки һʹәбандьна мә бәр чʹәʹве ԝи тʹәмьз у һʹәлал бә (Йуһʹәнна 4:23). Ле гәләк мәрьв дьфькьрьн, ԝәки ве дьнйа ԛәлпда мәрьв нькарә һʹәлал бьминә. Гәло әԝ йәк рʹаст ә? Сәре дьнда әме һе зедә дәрһәԛа ԝе йәке шеԝьр кьн.