Ԛанунед Хԝәде сәр һʹиме принсипа нә. Әԝ принсип рʹастийед сәрәкә нә, жь Кʹьтеба Пироз. Әԝана али мә дькьн, фәʹм кьн, фькьр у ньһерʹандьна Йаһоԝа сәр тьшта. Принсип али мә дькьн, ԝәки әм әʹмьре хԝәда сафикьрьнед баш у тьштед рʹаст бькьн. Әԝана дәрәщед ӧсада али мә дькьн, дәрһәԛа кʹижана Кʹьтеба Пирозда ԛанун нәһатийә дайине.

▸ Сәре 1, абзаса 8

Гӧһдарикьрьн те һʹәсабе, ԝәки әм бь һазьрбуне ԝе йәке дькьн, чь кӧ Йаһоԝа мәрʹа дьбежә. Йаһоԝа дьхԝазә, ԝәки әм жь бо һʹьзкьрьне гӧһдарийа ԝи бькьн (1 Йуһʹәнна 5:3). Һәрге әм Йаһоԝа һʹьз дькьн у итʹбарийа хԝә ԝи тиньн, әме һәр дәрәщада гӧһ бьдьнә ширәтед ԝи. Әме һәла һе ԝи чахи гӧһ бьдьнә ԝи, гава мәрʹа чәтьн бә жи. Һәрге әм гӧһ бьдьнә Йаһоԝа, әме кʹаре бьстиньн, чьмки Йаһоԝа мә һин дькә, ча ида ньһада әʹмьре хԝә баш кьн. Ӧса жи әԝ соз дьдә, ԝәки ахьрийеда әме шабуне бьстиньн жь гәләк кʹәрәмед ԝи (Ишайа 48:17).

▸ Сәре 1, абзаса 10

Йаһоԝа азайа бьжартьне дайә мә һәр кәси, демәк фәрәсәтәки ӧса, ԝәки хԝәха сафикьрьна бькьн. Әԝи әм мина робота ченәкьрьнә (Ԛануна Дӧщари 30:19; Йешу 24:15). Әм дькарьн азайа хԝә бьдьнә хәбате, сәва кӧ бьжартьнед баш бькьн. Ле һәрге әм фәсал нибьн, әме сафикьрьнед нәрʹаст бькьн. Азайа мәйә бьжартьне те һʹәсабе, ԝәки әм гәрәке хԝәха сафи кьн, әм дьхԝазьн Йаһоԝарʹа амьн бьминьн у дьхԝазьн избат кьн, ԝәки бь рʹасти ԝи һʹьз дькьн, йан на.

▸ Сәре 1, абзаса 12

Йаһоԝа принсипед нав-намусийе, йан рʹебәри сәва рʹабун-рʹуньштандьн у кьред мә кʹьфш кьрийә. Жь Кʹьтеба Пироз әм  педьһʹәсьн дәрһәԛа ԝан принсипа у ԝе йәке ча әԝана дькарьн али мә бькьн бь әʹмьрәки баш бьжин (Мәтʹәлок 6:16-19; 1 Корьнтʹи 6:9-11). Әԝ принсип али мә дькьн пебьһʹәсьн, чь бәр чʹәʹве Йаһоԝа рʹаст ә, ле чь на. Әԝ ширәт али мә дькьн, һин бьн чаԝа һʹьзкьрьне бьдьнә кʹьфше, сафикьрьнед рʹаст бькьн у чаԝа һʹәйф бьн һьндава мәрьва. Рʹаст ә, чьԛас ԝәʹдә дьчә, һаԛас нормед ве дьнйайе хьраб дьбьн, ле нормед Йаһоԝа найенә гӧһастьне (Ԛануна Дӧщари 32:4-6; Малахи 3:6). Гава әм гӧһ дьдьнә ԝан ширәта, әԝ йәк мә хԝәй дькә жь зийана физики у емосиали.

▸ Сәре 1, абзаса 17

Исафа мә али мә дькә, әм тедәрхьн чь рʹаст ә у чь хьраб ә. Йаһоԝа исаф дайә мә һʹәмуйа (Рʹомайи 2:14, 15). Әм гәрәке исафа хԝә анәгори принсипед Йаһоԝайә намусийе һин кьн, сәва әв рʹаст бьхәбьтә. Ахьрийе, исафа мә ԝе али мә бькә сафикьрьнед ӧса бькьн, кӧ Хԝәде хԝәш бен (1 Пәтрус 3:16). Исафа мә дькарә рʹебәрийе мә бькә, ԝәки әм сафикьрьнед беаԛьлайи нәкьн, йан жи чахе әм тьштәки нәрʹаст дькьн, исаф дькарә мә бьчәрчьринә. Дькарә ӧса бьԛәԝьмә, ԝәки исафа мә сьст бә, ле пе аликʹарийа Йаһоԝа әм диса жи дькарьн исафа хԝә ԛәԝи кьн. Исафа тʹәмьз али мә дькә, ԝәки һʹьше мәда әʹдьлайи бә у әм ԛәдьре хԝә бьзаньбьн.

▸ Сәре 2, абзаса 3

Хофа бәр Хԝәде те һʹәсабе, ԝәки әм ӧса ԝи һʹьз дькьн у ԛәдьре ԝи дьгьрьн, кӧ нахԝазьн дьле ԝи бешиньн. Хофа бәр Хԝәде али мә дькә тьштед рʹаст бькьн у тьштед хьраб инкʹар кьн (Зәбур 111:10). Әԝ мә һелан дькә гӧһ бьдьнә һәр тьшти, чь кӧ Йаһоԝа жь мә дәʹԝа дькә. Ӧса жи әԝ али мә дькә биньн сери созед кӧ мә дайә Йаһоԝа, чьмки әм ԛәдьре ԝи заньн. Хофа бәр Хԝәде һʹӧкӧм дькә сәр һʹьш-аԛьле мә, сәр ԝе йәке ча әм хԝә дьдьнә кʹьфше һьндава мәрьвед дьн у сәр бьжартьна мәйә һәр рʹожи.

▸ Сәре 2, абзаса 9

Тʹобәкьрьн әԝ ә, чахе мәрьв бәр хԝә дькʹәвә, чьмки тьштәки нәрʹаст кьрийә. Әԝед кӧ Хԝәде һʹьз дькьн, тʹобә дькьн чахе фәʹм дькьн, ԝәки тьштәки ӧса кьрьнә, кӧ мьԛабьли нормед Йаһоԝа йә. Һәрге мә тьштәк нәрʹаст кьрийә, әм гәрәке жь Йаһоԝа һиви кьн, ԝәки сәр һʹиме ԛӧрбана Иса бьбахшинә мә (Мәтта 26:28; 1 Йуһʹәнна 2:1, 2). Чахе әм бь дьл у щан тʹобә дькьн у ида тьштед хьраб накьн, ԝи чахи әм дькарьн баԝәр бьн, ԝәки Йаһоԝа ԝе мә бьбахшинә. Әм гәрәке ида хԝә нәһәԛ нәкьн сәва шашийед хԝәйә бәре (Зәбур 103:10-14; 1 Йуһʹәнна 1:9; 3:19-22). Әм гәрәке һʹәму ԛәԝата хԝә бьдьнә хәбате, сәва кӧ жь шашийед хԝә дәрсе һин бьн, фькьред нәрʹаст инкʹар кьн у пе нормед Йаһоԝа бьжин.

▸ Сәре 2, абзаса 18

Һәрге әԝ мәрьв, кʹижани гӧне гьран кьрийә, тʹобә накә у нахԝазә пәй нормед Йаһоԝа һәрʹә, әԝ ида нькарә бьбә әндәме щьвате. Әԝ гәрәке жь щьвате бе дәрхьстьне. Чахе кәсәк жь щьвате те дәрхьстьне, әм гәрәке ида тʹәви ԝи шьхӧлкʹарийе нәкьн у хәбәр нәдьн (1 Корьнтʹи 5:11; 2 Йуһʹәнна 9-11). Дәрхьстьна жь щьвате наве Йаһоԝа у щьвате хԝәй дькә (1 Корьнтʹи 5:6). Әԝ щәзакьрьн ӧса жи дькарә али ԝи мәрьви бькә, ԝәки диса вәгәрʹә бал Йаһоԝа (Луԛа 15:17).

▸ Сәре 3, абзаса 19

Йаһоԝа мә һʹьз дькә у дьхԝазә али мә бькә. Ләма жи әԝ бь сайа Кʹьтеба Пироз у мәрьвед кӧ Хԝәде һʹьз дькьн, тʹәмийа, рʹебәрийа у ширәта дьдә мә. Әм, ча мәрьвед гӧнәкʹар, һʹәԝще ԝе аликʹарийе нә (Йерʹәмйа 17:9). Чахе әм бь ԛәдьр ьн у гӧһ дьдьнә рʹебәрийа ԝан бьра, йед кӧ жь Йаһоԝа һатьнә кʹьфшкьрьне, бь ԝе йәке әм ԛәдьре Йаһоԝа дьгьрьн у гӧрʹа ԝи дькьн (Ибрани 13:7).

▸ Сәре 4, абзаса 2

Жь бо ԝе йәке кӧ әм гӧнәкʹар ьн, бабахи у хԝәһʹьзи һеса дькарә бал мә пешда бе. Ле Йаһоԝа жь мә дәʹԝа дькә, ԝәки әм мьлук бьн. Гәләк щар әм дькарьн мьлуктийе һин бьн чахе фәʹм дькьн, кӧ әм һьмбәри Йаһоԝа чьԛас бьчʹук ьн (Ибо 38:1-4). Сәва кӧ мьлук бьн, фәрз ә һин бьн һе зедә дәрһәԛа мәрьва бьфькьрьн у сәва ԝана дьһа хәм кьн, нә кӧ сәва хԝә. Бабахи мәрьва һелан дькә, хԝә жь мәрьвед дьн четьр һʹәсаб кьн. Мәрьве мьлук ньһерʹандьна хԝә һьндава хԝә рʹаст хԝәй дькә. Әԝ шашийед хԝә дьдә рʹуйе хԝә, бахшандьне дьхԝазә у ширәта ԛәбул дькә. Мәрьве мьлук итʹбарийа хԝә Йаһоԝа тинә у гӧһ дьдә рʹебәрийед ԝи (1 Пәтрус 5:5).

▸ Сәре 4, абзаса 4

Сәрԝерти изьн дьдә, ԝәки ԛьрар у сафикьрьна бькьн. Сәрԝере һәри жорьн сәр әʹрде у сәр әʹзман, Йаһоԝа йә. Нав дьнйалькеда Йаһоԝа һәри һьмзор ә, чьмки әԝи һʹәму тьшт әʹфьрандийә. Әԝ һәр гав сәрԝертийа хԝә сәва кʹара әʹфьринед хԝә дьдә хәбате. Йаһоԝа щабдарийе дьдә һьнә мәрьва, ԝәки сәва мә хәм бькьн. У әԝ дьхԝазә, ԝәки әм тʹәви ԝан мәрьва шьхӧлкʹарийе бькьн, мәсәлә тʹәви де-бава, рʹуспийед щьвате у ӧса жи мәрьвед диԝане (Рʹомайи 13:1-5; 1 Тимотʹейо 5:17). Ле чахе ԛанунед мәрьва мьԛабьли ԛанунед Хԝәде нә, һьнге әм гӧһ дьдьнә Хԝәде, нә кӧ мәрьва (Кʹаред Шандийа 5:29). Чахе әм ԛәбул дькьн ԝан сәрԝера, кʹижана Йаһоԝа дьдә хәбате, ӧса әм нишан дькьн, ԝәки ԛәдьре сафикьрьнед ԝи дьгьрьн.

▸ Сәре 4, абзаса 7

Йаһоԝа бьред щерʹьбанди, демәк рʹуспийа, дьдә хәбате, ԝәки бона щьвате хәм кьн (Ԛануна Дӧщари 1:13; Кʹаред Шандийа 20:28). Әԝана али мә дькьн, ԝәки әм һәләԛәтийа хԝә тʹәви Йаһоԝа ԛәԝи хԝәй кьн у ӧса жи, ԝәки һʹәбандьна мә бь әʹдьлайи у организә бә (1 Корьнтʹи 14:33, 40). Сәва кӧ бьра бь сайа рʹӧһʹе пироз бенә  кʹьфшкьрьне ча рʹуспи, әԝана гәрәке анәгори дәʹԝакьрьнед жь Кʹьтеба Пироз бьжин (1 Тимотʹейо 3:1-7; Тито 1:5-9; 1 Пәтрус 5:2, 3). Әм бь шабун тʹәви рʹуспийа шьхӧлкʹарийе дькьн, чьмки әм итʹбарийа хԝә тʹәшкиләта Хԝәде тиньн у пьштгьрийа ԝи дькьн (Зәбур 138:6; Ибрани 13:17).

▸ Сәре 4, абзаса 8

Йаһоԝа щабдари дайә де-бава, ԝәки әԝана мьԛати зарʹ у малбәта хԝә бьн. Ӧса жи Кʹьтеба Пирозда те готьне, ԝәки мер малхе мале йә. Һәрге малбәтеда бав тʹӧнә, ԝи чахи щабдарийа малхе мале, де һьлдьдә сәр хԝә. Әԝ щабдари те һʹәсабе, ԝәки сәва хԝарьне, кʹьнща у щийе жийине хәм бькьн. Гәләк фәрз ә, ԝәки малхе мале али нәфәред хԝә бькә, ԝәки әԝана Йаһоԝарʹа хьзмәт кьн. Мәсәлә әԝ али ԝан дькә, сәва әԝана һәртʹьм бенә сәр щьвата, дәркʹәвьнә хьзмәтийе у тʹәвайи Кʹьтеба Пироз һин бьн. Ӧса жи малхе мале щабдар ә малбәтеда сафикьрьна бькә. Әԝ һәртʹьм дьхԝазә мина Иса ԛәнщ у сәрԝахт бә, ле нә кӧ сәрт у бабах бә. Әԝ йәк малбәтеда һʹьзкьрьне пешда тинә у һәр нәфәре мале, хԝә бехофийеда тʹәхмин дькә у һәләԛәтийа ԝан тʹәви Йаһоԝа дьһа ԛәԝи дьбә.

▸ Сәре 4, абзаса 12

Кʹома Рʹебәрийе, әԝ һәйә кʹома жь чәнд мера, һевийа кʹижана жийина сәр әʹзмана йә у Хԝәде бь сайа ԝан рʹебәрийа щьмәʹта хԝә дькә. Ԛьрна йәкеда, Йаһоԝа бь сайа Кʹома Рʹебәрийе, рʹебәри щьвата Мәсиһийа дькьр, бона һʹәбандьн у хьзмәткьрьне (Кʹаред Шандийа 15:2). Рʹожа иройин бьред кӧ Кʹома Рʹебәрийеда хьзмәт дькьн, щабдарийа һьлдьдьн сәр хԝә, ԝәки рʹебәри у тʹәмийа бьдьнә щьмәʹта Хԝәде у ԝана хԝәй кьн. Чахе әԝ бьра сафикьрьна дькьн, әԝана гӧһ дьдьнә рʹебәрийед жь Хәбәра Хԝәде у рʹӧһʹе пироз. Иса сәр ԝан меред амьн дьгот, «хӧламе амьн у сәрԝахт» (Мәтта 24:45-47).

▸ Сәре 4, абзаса 15

Щарна щьватеда хушкарʹа дькарьн шьхӧләкә ӧса бьдьн, чь кӧ гәрәке бьра бькә. Чахе хушк әԝи шьхӧли дькә, әԝ сәре хԝә гьредьдә у бь ԝе йәке ԛәдьр һьндава нормед Йаһоԝа дьдә кʹьфше. Ле тʹәне һьнә дәрәщада лазьм ә хушк сәре хԝә гьредьн. Мәсәлә, хушк сәре хԝә гьредьдә, чахе һинбуна Кʹьтеба Пироз дәрбаз дькә у ԝе дәме мере ԝе йан жи бьре ньхӧманди ԝедәре йә (1 Корьнтʹи 11:11-15).

▸ Сәре 4, абзаса 17

Әм тʹәвнәбуйине хԝәй дькьн чахе тʹәви пьрсед политикева гьредайи набьн (Йуһʹәнна 17:16). Щьмәʹта Йаһоԝа пьштгьрийа Пʹадшатийа ԝи дькә. Әм жи мина Иса, накʹәвьнә нав шьхӧле ве дьнйайе.

Йаһоԝа тʹәми дайә мә, кӧ әм «гӧрʹа сәрԝер у һʹӧкӧмәта бькьн» (Тито 3:1, 2; Рʹомайи 13:1-7). Ле ӧса жи ԛануна Хԝәдеда те готьне, ԝәки әм гәрәке нәкӧжьн. Ләма исафа Мәсиһийа изьне надә ԝан, ԝәки һәрʹьнә шәрʹ. Һәрге мәщала Мәсиһи һәйә, кӧ дәԝса һәрʹә әскәрийе, ԛӧльха бажарванийе бьԛәдинә, әԝ диса жи гәрәке һьлдә һʹәсаб, гәло исафа ԝи изьне дьдә ԝи, әԝи шьхӧли бькә.

Әм тʹәне бәр Йаһоԝа сәре хԝә датиньн, чьмки әԝ Әʹфьрандаре мә йә. Рʹаст ә әм ԛәдьре симболед дәԝләте дьгьрьн, ле әм һӧрмәте надьнә бәйрәԛе у кʹьламед насионали настьрен (Ишайа 43:11; Данийел 3:1-30; 1 Корьнтʹи 10:14). Ӧса жи хьзмәткʹаред Йаһоԝа хԝәха сафи дькьн, ԝәки ԝәʹде бьжартьна сәрԝера, дәнге хԝә сәва ԝан нәдьн, чьмки мә дәнге хԝә ида сәва сәрԝертийа Хԝәде дайә (Мәтта 22:21; Йуһʹәнна 15:19; 18:36).

▸ Сәре 5, абзаса 2

Әв дьнйа, фькьр у ньһерʹандьна Мире-щьна бәла дькә. Ньһерʹандьна ӧса, буйә тьштәки тʹәбийәти сәва мәрьвед кӧ Йаһоԝа һʹьз накьн, чʹәʹв надьнә ԝи у нормед ԝи пьшт гӧһе хԝәва давежьн (1 Йуһʹәнна 5:19). Ньһерʹандьн у кьред ԝи щурʹәйи рʹӧһʹе ве дьнйайе дьдьнә кʹьфше  (Әфәси 2:2). Щьмәʹта Йаһоԝа һәр тьшти дькә, сәва кӧ нәкʹәвә бьн һʹӧкӧме рʹӧһʹе ве дьнйайе (Әфәси 6:10-18). Дәԝсе, әм хԝә рʹийа Йаһоԝа дьгьрьн у дьхәбьтьн, ԝәки нет-фькьред ԝи хԝәй кьн.

▸ Сәре 5, абзаса 7

Рʹабәрибун те һʹәсабе, дәркʹәтьна һьмбәри рʹастийа жь Кʹьтеба Пироз. Рʹабәр мьԛабьли Йаһоԝа дәрдькʹәвьн у мьԛабьли Иса, йе кӧ Пʹадше Пʹадшатийа Хԝәде йә. Рʹабәр ӧса жи һʹәму тьшти дькьн, сәва кӧ мәрьв бькʹәвьнә бьн байе ԝан у пьштгьрийа ԝан бькьн (Рʹомайи 1:25). Әԝана дьхԝазьн шьке бькьнә дьле хьзмәткʹаред Йаһоԝа. Чаԝа ԛьрна йәкеда, ӧса жи рʹожа иройин, щьватед Мәсиһийада һьнә мәрьв дьбьнә рʹабәр (2 Тʹесалоники 2:3). Әԝед кӧ Иаһоварʹа амьн ьн‚ хԝә дур дьгьрьн жь рʹабәра. Ӧса жи әм һʹәԝаса хԝә һьндава фькьред рʹабәра пешда найньн у изьне надьнә мәрьва, ԝәки мә һелан кьн, кӧ әм бьхуньн йан бьбьһен фькьред рʹабәра. Әм Йаһоԝарʹа амьн дьминьн у әме тʹәне ԝирʹа хьзмәт кьн.

▸ Сәре 5, абзаса 9

Исраелед бәре, йед кӧ бьн ԛануна Мусада дьжитьн, жь Йаһоԝа һиви дькьрьн, ԝәки гӧнед ԝан бьбахшинә. Ԝана гәньм, бьзьр у һʹәйԝан ча ԛӧрбан бона кʹәԝандьне дьанин. Әве йәке дькьрә бира ԝан, ԝәки Йаһоԝа һазьр ә, гӧне тʹәмамийа щьмәʹте у гӧне һәр кәси башԛә, бьбахшинә. Ле чахе Иса әʹмьре хԝә ча ԛӧрбан да сәва гӧне мә, ида нәлазьм бу ԛӧрбана бона кʹәԝандьне биньн. Иса бу ԛӧрбанәкә беԛьсур, йе кӧ «щарәке бона һәр тʹьм» һатьбу дайине (Ибрани 10:1, 4, 10).

▸ Сәре 7, абзаса 6

Бь Ԛануна Муса изьна щьмәʹте һәбу, ԝәки гоште һʹәйԝана бьхԝьн. Ӧса жи ԝанарʹа тʹәми һатьбу дайине, ԝәки һʹәйԝана бькьнә ԛӧрбан (Ԛануна Кʹаһинтийе 1:5, 6). Ле Йаһоԝа тʹӧ щар нәдьхԝәст, ԝәки  щьмәʹта ԝи берʹәм бә һьндава һʹәйԝана (Мәтʹәлок 12:10). Ләма жи нав Ԛанунеда тʹәмийед ӧса һәбун, ԝәки һьндава һʹәйԝана берʹәм нибьн. Исрайелийарʹа тʹәми һатьбу дайине, ԝәки рʹьнд һʹәйԝанед хԝә хԝәй кьн (Ԛануна Дӧщари 22:6, 7).

▸ Сәре 7, абзаса 6

Фьраксийед хуне. Хун жь чар пʹаред сәрәкә йә; еритросит, лейкосит, тромбосит у плазма. Әԝ чар пʹар тенә пʹарәвәкьрьне сәр пʹаред дьһа һур, йед кӧ һатьнә навкьрьне ча фьраксийа *.

Мәсиһи инкʹар дькьн хуне бь тʹәмами йан йәк жь чар пʹаред ԝейә сәрәкә бәри хԝә дьн. Ле гәло әԝана дькарьн фьраксийед хуне ԛәбул кьн? Кʹьтеба Пирозда дәрһәԛа ԝе йәке әʹйан найе готьне. Һәр Мәсиһи гәрәке хԝәха, пе исафа хԝәйә сәр һʹиме Кʹьтеба Пироз һинкьри, сафи кә.

Һьнә Мәсиһи сафи дькьн, һʹәму щурʹә фьраксийед хуне инкʹар кьн. Дьбәкә мәʹнийа ԝан әԝ ә, ԝәки Ԛануна Хԝәде жь Исраелийа дәʹԝа дькьр хуна һʹәйԝан «бьрʹежә ль сәр әʹрде» (Ԛануна Дӧщари 12:22-24).

Ле һьнә Мәсиһи щурʹәки майин дьфькьрьн. Исафа ԝана изьне дьдә ԝан кӧ һьнә фьраксийед хуне ԛәбул кьн. Әԝана дьфькьрьн, ԝәки фьраксийед һур, ида найенә һʹәсабе әʹмьре әʹфьрин, жь кʹижани хун һатийә һьлдане.

Чахе дәрһәԛа фьраксийед хуне сафикьрьна дьки, сәр ԝан пьрса бьфькьрә:

• Әз фәʹм дькьм, ԝәки инкʹаркьрьна һʹәму фьраксийед хуне те һʹәсабе, ԝәки әзе ӧса жи инкʹар кьм һьнә дәрманед, кӧ нәхԝәшийа ԛәнщ дькьн, йан жи йе кӧ хуне дьдьнә сәкьнандьне?

•   Чаԝа әзе һʹәкимрʹа шьровәкьм, кӧ чьма әз инкʹар дькьм йан ԛәбул дькьм йәк йан жи чәнд фьраксийед хуне?

Методед ԛәнщкьрьне. Мәсиһи хуна хԝә бәри кәсәки надьн у ӧса жи надьнә хԝәйкьрьне, сәва ԝәʹде операсийа бәри кәсәки дьн йан бәри хԝә дьн. Ле һьнә методед ԛәнщкьрьне һәнә, кʹижанада хуна мәрьве нәхԝәш бона ԝи дьдьнә хәбате. Һәр Мәсиһи гәрәке сафикьрьна шәхси бькә, кӧ хуна ԝи чаԝа гәрәке бе хәбьтандьне ԝәʹде операсийайе, ԝәʹде анализа хуне, йан ԝәʹде методәкә ԛәнщкьрьне. Ԝәʹде ԝан методед ԛәнщкьрьне, хун дькарә сәр һьнә ԝәʹдә жь бәдәне бе дәрхьстьне. (Сәва һе зедә информасийа, бьньһерʹьн «Бьрща Ԛәрәԝьлийе», йа 15 Щотмәһе, сала 2000, рʹупʹелед 30-31.)

Мәсәлә, ԝәʹде методәкә ԛәнщкьрьне йа бь наве һемодилусийа, пешийа кӧ операсийе дәстпекьн, һьнә хун жь бәдәне ԝәʹдәлу дәрдьхьн у дәԝсе препарата ӧса бәрдьдьне, чь кӧ хуне зедә дькә. Ԝәʹде операсийе йан жи пәй операсийе, хуна ԝи, кӧ һатьбу дәрхьстьне, пашда бәри бәдәне дьдьн.

 Методәкә дьн нав дькьн ча ренфузийа. Ԝе методеда хуна мәрьв, йа кӧ ԝәʹде операсийе ле дьчә, тʹоп дьбә, те тʹәмьзкьрьне у ԝәʹде операсийе, йан жи һәма паши операсийайе, диса вәдьгәрʹә бәдәна ԝи.

Һәр һʹәкимәк дькарә бь щурʹе хԝә ԝан метода бьдә хәбате. Ләма жи, пешийе кӧ сәр методәкә ԛәнщкьрьне ԛайил бьн, мәсәлә сәр операсийе, анализа хуне, йан методәкә дьн, Мәсиһи гәрәке пебьһʹәсә, кӧ хуна ԝи ԝе чь щурʹәйи бе хәбьтандьне.

Чахе дәрһәԛа методед ԛәнщкьрьнейә хунева гьредайи сафикьрьна дьки, сәр ԝан пьрса дьшьрмиш бә:

• Һәрге хуна мьн жь бәдәне дәре у сәр һьнә ԝәʹдә сиркуласийа хуне бе сәкьнандьне, гәло исафа мьн ԝе изьне бьдә мьн, ԝәки ве хуна дәркʹәти һʹәсаб кьм ча пʹара бәдәна хԝә, у жь мьн найе дәʹԝакьрьне кӧ әв «бьрʹежә ль сәр әʹрде»? (Ԛануна Дӧщари 12:23, 24).

• Гәло исафа мьнә сәр һʹиме Кʹьтеба Пироз һинкьри, ԝе мьн бьчәрчьринә йан на, һәрге ԝәʹде метода ԛәнщкьрьне хуна мьн һьлдьн у бьдьнә хәбьтандьне, сәва һьнә гӧһастьна нав ԝеда бькьн у пашда вәгәрʹиньн бәдәна мьн?

• Гәло әз фәʹм дькьм, һәрге әз һʹәму методед ԛәнщкьрьнейә хунева гьредайи инкʹар дькьм, әв те һʹәсабе, ԝәки әз ӧса жи инкʹар дькьм анализа хуне, һемодилусийа йан апарата ӧса, йа кӧ сиркуласийа хуне дькә?

 Пешийа кӧ дәрһәԛа фьраксийед хуне у методед ԛәнщкьрьнейә хунева гьредайи, сафикьрьна бькьн, әм гәрәке дӧада жь Йаһоԝа рʹебәрийе бьхԝазьн у леколина бькьн (Аԛуб 1:5, 6). Паше, әм гәрәке сәр һʹиме исафа хԝә, кӧ пе Кʹьтеба Пироз һинкьри йә, сафикьрьна бькьн. Әм гәрәке жь мәрьвед дьн нәпьрсьн, кӧ ԝана ԝе чь бькьра дәрәща мәда, у тʹӧ кәс жи гәрәке сәр сафикьрьна мәйә шәхси һʹӧкӧм нәкә (Рʹомайи 14:12; Галати 6:5).

▸ Сәре 7, абзаса 11

Тʹәмьзайи намусийеда те һʹәсабе, ԝәки рʹабун-руньштандьна мә у кьред мә бәр чʹәʹве Йаһоԝа тʹәмьз бьн. Намуси те һʹәсабе, ԝәки фькьр, хәбәрдан у кьред хԝәда тʹәмьз бьн. Йаһоԝа жь мә дәʹԝа дькә, ԝәки әм хԝә жь һʹәрамийе йан бенамусийе дур бьгьрьн (Мәтʹәлок 1:10; 3:1). Һʹәта кӧ рʹасти щерʹьбандьна бен, әм гәрәке пешда сафи кьн һәртʹьм хԝә ль нормед Йаһоԝа бьгьрьн. Әм гәрәке һәр гав Йаһоԝарʹа дӧа бькьн, ԝәки әԝ али мә бькә, әм фькьред хԝә тʹәмьз хԝәй кьн у щерʹьбандьнада сәркʹәвьн (1 Корьнтʹи 6:9, 10, 18; Әфәси 5:5).

▸ Сәре 8, абзаса 11

Хьраби те һʹәсабе хәбәрдан йан рʹабун-рʹуньштандьна ӧса, кʹижан мьԛабьли нормед Йаһоԝа нә у әʹйан дькьн, ԝәки мәрьва шәрма хԝә ӧнда кьрьнә. Мәрьвед ӧса дьдьнә кʹьфше, ԝәки ԛәдьре ԛанунед Хԝәде нагьрьн. Чахе бенамуси йан һʹәрами те кьрьне, комитейа диԝанкьрьне дәрһәԛа ве ԛәԝьмандьне сафикьрьна дькә. Щурʹә-щурʹә кьред хьраб у нәтʹәмьз дькʹәвьнә нава һʹәрамийе. Һьнә ԛәԝьмандьнед бенамусийева гьредайи, дькарьн бенә сафикьрьне бь сайа комитейа диԝанкьрьне йа щьватеда, әԝ ԝе йәкева гьредайи йә, кӧ гӧнә чьԛас гьран ә (Галати 5:19-21; Әфәси 4:19; сәва һе зедә әʹламәти, бьньһерʹьн «Пьрсед Хԝәндәвана» жь «Бьрща Ԛәрәԝьлийе» йа 15 Тирмәһе, сала 2006).

▸ Сәре 9, абзаса 7; Сәре 12, абзаса 10

Йаһоԝа ӧса кьр, ԝәки малбәтеда һәләԛәтийа сексуали ортʹа жьн у мерда, ча әʹйанкьрьна һʹьзкьрьне бә. Ле һәрге кәсәк мастурбасийева мьжул дьбә, демәк органед хԝәйә щьнси мьз дьдә, әԝ һʹәрамийе дькә. Әԝ хәйсәт дькарә һәләԛәтийа ԝи тʹәви Йаһоԝа хьраб кә. У ӧса жи дькарә хԝәстьнед мьрʹдарʹ нав ԝида пешда бинә, у ньһерʹандьна ԝи сәр һәләԛәтийа сексуал нәрʹаст бә (Колоси 3:5). Әԝ мәрьв бал кʹижана әв хәйсәте һʹәрам һәйә, дькарә ԝирʹа чәтьн бә ви хәйсәти жь хԝә дур хә, ле диса жи әԝ гәрәке шәрʹе хԝә бәрдәԝам кә, һʹәта кӧ сәркʹәвә (Зәбур 86:5; 1 Йуһʹәнна 3:20). Һәрге тӧ жи ԝи һалида ни, бь дьл у щан жь Йаһоԝа аликʹарийе һиви кә. Хԝә жь тьштед ӧса дур бьгьрә, чь кӧ ԝе хԝәстьнед хьраб нав тәда пешда биньн, мәсәлә жь порнографийе. Ӧса жи хәбәр дә тʹәви де йан баве хԝә, йед кӧ Мәсиһи нә, йан жи тʹәви һәваләки рʹӧʹһанида гьһишти, йе кӧ ԛәдьре ԛанунед Йаһоԝа дьгьрә (Мәтʹәлок 1:8, 9; 1 Тʹесалоники 5:14; Тито 2:3-5). Тӧ дькари баԝәр би, ԝәки Йаһоԝа дьвинә у ԛимәт дькә, ԝәки тӧ ԛәԝате дьди хәбате, сәва тʹәмьзайа намусийе хԝәй ки (Зәбур 51:17; Ишайа 1:18).

▸ Сәре 9, абзаса 9

Пʹьрʹәжьни те һʹәсабе, ԝәки чәнд жьнед мерәки һәнә. Йаһоԝа зәԝащ ӧса саз кьр, ԝәки жьн тʹәне мерәки бьстинә у мер тʹәне жьнәке. Ԝәʹде Исраелийа, Йаһоԝа изьн дьда, ԝәки мер чәнд жьна бьстинә, ле сәре-серида әԝи әԝ йәк ԛьрар нәкьрьбу. Рʹожа иро Йаһоԝа изьне надә, ԝәки нав щьмәʹта ԝида пʹьрʹәжьни һәбә. Гәрәке мер тʹәне жьнәке бьстинә у жьн тʹәне мерәки (Мәтта 19:9; 1 Тимотʹейо 3:2).

▸ Сәре 10, абзаса 12

Йаһоԝа дьхԝәст, ԝәки жьн у мер тʹәмамийа әʹмьре хԝә тʹәвайи бьжин (Дәстпебун 2:24; Малахи 2:15, 16; Мәтта 19:3-6; 1 Корьнтʹи 7:39). Әԝи изьн да, ԝәки жьн у мер тʹәне ԝи чахи жь һәв бьԛәтьн, һәрге йәк жь ԝан бенамусийе бькә. Йаһоԝа изьне дьдә жьн йан мере нәнәһәԛ, ԝәки сафи кә жь һәвалзәԝаще хԝәйи кӧ бенамуси кьрийә, бьԛәтә йан на (Мәтта 19:9).

 Щарна Мәсиһи дькарьн сафи кьн, жь һәвалзәԝаще хԝә башԛә бьжин, һәла һе ԝи чахи жи, һәрге кәсәк жь ԝан бенамуси нәкьрийә (1 Корьнтʹи 7:11). Дәрәщед ӧсада кӧ жере ньвисар ьн, Мәсиһи дькарьн сафи кьн башԛә бьжин.

• Чахе мер нахԝазә хәм кә бона малбәта хԝә: Мер инкʹар дькә, әʹбура нәфәре хԝә бькә, у жь бо ԝе йәке нәфәред ԝи бьрчи у бе пʹәрә дьминьн (1 Тимотʹейо 5:8).

• Зийана физики: Чахе жьн йан мер тʹәхмин дькә, ԝәки жь бо һәвалзәԝащ сьһʹәт-ԛәԝат у әʹмьре ԝи (ԝе) кʹәтийә бьн ԛәзийе (Галати 5:19-21).

• Чахе һәвалзәԝащ рʹе ԝи (ԝе) дьгьрә, ԝәки һәләԛәтийа ԝи (ԝе) тʹәви Йаһоԝа һәбә: Чахе һәвалзәԝащ наһелә, әԝ Йаһоԝарʹа хьзмәт кә (Кʹаред Шандийа 5:29).

▸ Сәре 11, абзаса 19

Һәр кәс һʹәԝще пʹайа у һелана йә (Мәтʹәлок 12:25; 16:24). Әм дькарьн пе хәбәред ԛәнщ у дьлгәрм һәв һелан кьн у ԛәԝи кьн. Бь ԝе йәке әм али хушк-бьра дькьн, ԝәки әԝана тәйах кьн у һәла һе дәрәщед чәтьнда жи Йаһоԝарʹа хьзмәт кьн (Мәтʹәлок 12:18; Филипи 2:1-4). Һәрге йәк хԝә дьлтәнг тʹәхмин дькә, әм гәрәке бь ԛәдьр гӧһ бьдьнә ԝи у һʹәстед ԝи һьлдьнә һʹәсаб. Әԝ йәк дькарә али мә бькә фәʹм кьн, ԝәки чь әм гәрәке бежьн йан бькьн сәва аликʹарийе бьдьнә ԝи (Аԛуб 1:19). Хԝәрʹа нете дайнә, ԝәки дьһа незик хушк-бьра нас ки, сәва бьзаньби әԝана һʹәԝще чь аликʹарийе нә. Ԝи чахи тӧйе бькарьби али ԝан бьки, ԝәки әԝана незики Канийа дьлшәԝатийе у һʹәму бәрдьлийе бьн (2 Корьнтʹи 1:3, 4; 1 Тʹесалоники 5:11).

▸ Сәре 12, абзаса 16

Кʹьтеба Пирозда найе дайине рʹебәри дәрһәԛа әʹдәтед дәʹԝата. Һʹәр щики әʹдәт у дәʹԝакьрьнед дәʹԝата бь щурʹе хԝә йә (Дәстпебун 24:67; Мәтта 1:24; 25:10; Луԛа 14:8). Пʹарәкә лапә фәрз йа дәʹԝате,  әԝ һәйә соз йа кӧ бук у зәʹва дьдьнә һәв бәр Йаһоԝа. Гәләк бук у зәʹва дьхԝазьн, ԝәки һәвал у мәрьвед ԝан ԝедәре бьн, кʹидәре әԝана созе зәԝаще дьдьнә һәв у дьхԝазьн ԝәки рʹуспи готарʹа сәр һʹиме Кʹьтеба Пироз бежә. Ӧса жи бук у зәʹва кӧ дькʹәвьнә зәԝаще гәрәке хԝәха сафи кьн, ԝәки ча дәʹԝата ԝана дәрбаз бә (Луԛа 14:28; Йуһʹәнна 2:1-11). Бук у зәʹва гәрәке избат бьн, ԝәки бь һʹәму ԝан тьшта, чь кӧ әԝана сафи дькьн сәр дәʹԝата хԝә бькьн, Йаһоԝа ԝе рʹумәт бә (Дәстпебун 2:18-24; Мәтта 19:5, 6). Принсипед Кʹьтеба Пироз, дькарьн али ԝан бькьн, ԝәки сафикьрьнед баш бькьн (1 Йуһʹәнна 2:16, 17). Һәрге бук у зәʹва сафи кьрьнә, ичʹке дайньн сәр тʹәхтә, әԝана гәрәке избат бьн, ԝәки ԝе һәр тьшт баш у лайиԛ дәрбаз бә (Мәтʹәлок 20:1; Әфәси 5:18). Ле һәрге сафи дькьн, ԝәки сәр дәʹԝата ԝан кʹьлам у листьк һәбьн, әԝана гәрәке избат бьн, ԝәки әԝ тьшт ԝе Йаһоԝа рʹумәт кьн. Бук у зәʹвед Мәсиһи гәрәке дина хԝә бьдьнә сәр һәләԛәтийа хԝә тʹәви Йаһоԝа у тʹәви һәв, нә кӧ сәр ԝе йәке дәʹԝата ԝан чьԛас нав-дәнг у бьһа дәрбаз бә (Мәтʹәлок 18:22; сәва һе зедә әʹламәти, бьньһерʹьн «Бьрща Ԛәрәԝьлийе» йа 15 Щотмәһе, сала 2006, рʹупʹелед 18-31).

▸ Сәре 13, абзаса 18

Әм гәрәке сәр һʹиме принсипед жь Кʹьтеба Пироз сафикьрьнед билани бькьн. Мәсәлә, Мәсиһи тʹәви һәвалзәԝаще хԝәйи нәбаԝәр, алийе мәрьвед ԝийи нәбаԝәрда һатийә тʹәглифкьрьне сәр щәжьнәке, кӧ мьԛабьли принсипед Кʹьтеба Пироз ә. Һәрге тӧ рʹасти дәрәщәкә ӧса бейи, тӧйе чь бьки? Һәрге исафа тә изьне дьдә тә, ԝәки тӧ һәрʹи, тӧ дькари һәвалзәԝаще хԝәрʹа шьровәки, ԝәки тӧйе әʹйд-ԛәйдед ве щәжьне нәки. Ӧса жи тӧ гәрәке пешда бьфькьри, гәло әԝ сафикьрьна тә, ԝе бона кәсәки нәбә кәвьре лькʹӧмандьне (1 Корьнтʹи 8:9; 10:23, 24).

Йан жи дьԛәԝьмә мәзьне хәбата тә, ԝәʹде щәжьне пʹәра пʹешкʹеш бьдә тә. Гәло тӧйе инкʹар ки әԝе пʹешкʹеше? Әʹсәйи нинә. Сафикьрьна тә дькарә сәр һʹиме ԝе йәке бә, ча мәзьне хәбата тә сәр ԝе йәке дьньһерʹә. Әԝ ве пʹешкʹеше ча пʹарәкә щәжьне һʹәсаб дькә, йан дьхԝазә рʹазибуне тәрʹа бьдә кʹьфше? Әԝ пьрс у дәрәщед дьн ԝе али тә бькьн, сафи ки ԝан пʹешкʹеша ԛәбул ки, йан на.

 Дәрәщәкә дьн жи дькарә ӧса бә, мәсәлә кәсәк ԝәʹде щәжьне пʹешкʹешәке бьдә тә у бежә: «Әз заньм, ԝәки тӧ ԝан щәжьна дәрбаз наки, ле әз дьхԝазьм әԝе пʹешкʹеше бьдьмә тә». Дьбәкә әԝ мәрьв дьхԝазә тәрʹа ԛәнщийе бькә. Йан жи дьԛәԝьмә тӧ тʹәхмин дьки, ԝәки әԝ дьхԝазә баԝәрийа тә бьщерʹьбинә у тә бькә нава ве щәжьне? Чахе тӧ сәр ԝан дәрәща дьфькьри, паше ида хԝәха дькари сафи ки, әԝе пʹешкʹеше ԛәбул ки, йан на. Һʹәму сафикьрьнед хԝәда әм дьхԝазьн исафа тʹәмьз у амьнийа хԝә Йаһоԝарʹа хԝәй кьн (Кʹаред Шандийа 23:1).

▸ Сәре 13, абзаса 22

Һәрге әм ортʹа һәвда чәтьнайа зу сафи дькьн, әԝ чәтьнайи дәрбази проблема мәзьн набә у ӧса әм әʹдьлайе хԝәй дькьн (Мәтта 5:23-26). Бона һәр Мәсиһики гәрәке фәрз бә, ԝәки әԝ Йаһоԝа рʹумәт кә у щьватеда йәктийе хԝәй кә (Йуһʹәнна 13:34, 35; 1 Корьнтʹи 13:4, 5).

Һәрге Мәсиһи жь бо пьрсед хәбатева гьредайи, һәв фәʹм накьн, әԝана гәрәке һʹәму тьшти бькьн, сәва нав һәвда ԝан пьрса сафи кьн, нә кӧ һәв бьдьнә диԝане. Йәке Корьнтʹи 6:1-8-да, Паԝлосе шанди ширәта дьдә дәрһәԛа диԝанкьрьна ортʹа Мәсиһийа. Һәрге һәв бьдьнә диԝане әԝ йәк дькарә хьраб һʹӧкӧм бә сәр наве Йаһоԝа у сәр щьвате. Кʹьтеба Мәтта 18:15-17-да те готьне, ԝәки се гав һәнә, йед кӧ Мәсиһи дькарьн бькьн, сәва дәрәщед чәтьн сафи кьн, мәсәлә бӧхданбежи у хапандьн. 1) Пешийе әԝана гәрәке ԛәԝате бьдьнә хәбате, сәва кӧ хԝәха чәтьнайа сафи кьн. 2) Һәрге әԝ чәтьнайи сафи нәбу, әԝана дькарьн бьпьрсьн жь йәк йан дӧ хушк-бьред рʹӧһʹанида гьһишти, сәва кӧ али ԝан бькьн. 3) Паше, һәрге лазьм бә, әԝана дькарьн жь рʹуспийа аликʹарийе бьхԝазьн, сәва әԝе чәтьнайе сафи кьн. Һьнге рʹуспи ԝе ԛәԝате бьдьнә хәбате, сәва бь сайа принсипед Кʹьтеба Пироз али ԝан бькьн әʹдьлайе хԝәй кьн. Һәрге йәк жь ԝан нахԝазә гӧһ бьдә принсипед Кʹьтеба Пироз, дьбәкә лазьм бә сәва сафикьрьна ԝе дәрәще щьватеда рʹуспи комитейа диԝанкьрьне саз кьн.

Һәнә дәрәщә кʹижанада лазьм ә һәрʹьнә бал диԝане, мәсәлә чахе жьн у мер һәв дьԛәтьн, изьне бьстиньн сәва хԝәйитийе зарʹа  бькьн, алиментед зарʹа бьстиньн, жь компанийа бехофийе һәԛе хԝә бьстиньн, чахе бизнес зийане дьстинә, йан жи чахе пәймане чедькьн, ԝәки һәбун бьгьһижә кʹе. Һәрге Мәсиһи, әԝан һʹәму тьшта рʹаст дьдә хәбате, ԝәки һʹәму тьшти пе әʹдьлайе сафи кә, ԝи чахи әԝ мьԛабьли ширәта Паԝлос дәрнайе.

Һәрге тьштед ӧса бьԛәԝьмә мәсәлә, бенамусийа бь дәсте зоре, зорбәти һьндава зарʹа, ԛачахти, дьзи, йан кӧштьн, Мәсиһи дькарә дәрһәԛа ԝан ԛәԝьмандьна әʹлами сәрԝерʹа бькә. Һьнге әԝ мьԛабьли ширәта Паԝлос дәрнайе.

▸ Сәре 14, абзаса 14

Жь ԝәʹде бахче Едене дәстпекьри, һʹәта рʹожа иро Мире-щьна ԛәԝате дьдә хәбате, сәва кӧ мәрьва бьхальфинә (Дәстпебун 3:1-6; Әʹйанти 12:9). Әԝ занә, һәрге әԝ һʹьш-аԛьле мә хьраб кә, ԝи чахи әԝе бькарьбә ӧса сәр мә һʹӧкӧм кә, ԝәки әм тьштед нәрʹаст бькьн (2 Корьнтʹи 4:4; Аԛуб 1:14, 15). Әԝ бь сайа политикайе, рʹелигийайе, комерсийайе, ԝәʹдәдәрбазкьрьна, хԝәндьна бьльнд у гәләк тьштед дьн ньһерʹандьна хԝә бәла дькә, сәва кӧ инсанәт нет-фькьред ԝи ԛәбул кә (Йуһʹәнна 14:30; 1 Йуһʹәнна 5:19).

Мире-щьна занә, ԝәки ԝәʹде ԝи һьндьк майә, сәва мәрьва бьхапинә. Ләма әԝ һʹәму тьшти дькә, сәва кӧ чьԛас дькарә гәлә мәрьва бьхальфинә. Ле әԝ дьһа зәʹф дьхԝазә ԝана бьхальфине, йед кӧ Йаһоԝарʹа хьзмәт дькьн (Әʹйанти 12:12). Һәрге әм фәсал нибьн, Мире-щьна дькарә һеди-һеди һʹьш-аԛьле мә хьраб кә (1 Корьнтʹи 10:12). Мәсәлә, Йаһоԝа дьхԝәст, ԝәки зәԝащ һʹәта-һʹәтайе бькʹьшинә (Мәтта 19:5, 6, 9). Ле гәләк мәрьв рʹожа иройин зәԝаще һʹәсаб дькьн, ча тьштәки ԝәʹдәлу, чьмки һеса дькарьн жь һәв бьԛәтьн. Әԝ ньһерʹандьн бь сайа синәм у бәрʹнамед телевизийоне бәла дьбә. Әм гәрәке избат бьн, ԝәки әм изьне надьн кӧ ньһерʹандьна ве дьнйайе һьндава зәԝаще, сәр мә һʹӧкӧм бә.

Диса Мире-щьна дьхԝазә сәр мә һʹӧкӧм кә бь сайа ԝе йәке, кӧ әм бьхԝазьн хԝә сәри хԝә бьн (2 Тимотʹейо 3:4). Һәрге әм фәсал нибьн, әме ԛәдьр һьндава бьред щабдар ӧнда кьн, йед кӧ жь Йаһоԝа һатьнә  кʹьфшкьрьне. Мәсәлә, бьра дьбәкә мьԛабьли рʹебәрийа рʹуспийед щьвате дәре (Ибрани 12:5). Йан хушк дькарә рʹола малхе мале, кӧ Йаһоԝа дайә ԝи, бькә бьн шьке (1 Корьнтʹи 11:3).

Әм гәрәке изьне нәдьнә Мире-щьна, ԝәки сәр һʹьш-аԛьле мә һʹӧкӧм кә. Дәԝсе әм дьхԝазьн чʹәʹв бьдьнә ньһерʹандьна Йаһоԝа у бәрдәԝам кьн «сәр тьштед жорьн бьфькьрьн» (Колоси 3:2; 2 Корьнтʹи 2:11).

▸ Сәре 16, абзаса 9

Әм гьшк жи дьхԝазьн сьһʹәт-ԛәԝат бьн у бь методед лапи баш бенә ԛәнщкьрьне чахе нәхԝәш ьн (Ишайа 38:21; Марԛос 5:25, 26; Луԛа 10:34). Рʹожа иройин һәнә гәләк щурʹә дәрман у методед ԛәнщкьрьне. Гәләк фәрз ә, ԝәки әм гӧрʹа принсипед жь Кʹьтеба Пироз бькьн, чахе сафи дькьн кʹижан метода ԛәнщкьрьне бьжберьн. Әм бир накьн, ԝәки тʹәне Пʹадшатийа Хԝәде ԝе бькарьбә мә бь тʹәмами жь нәхԝәшийа ԛәнщ кә. Әм нахԝазьн һаԛас бькʹәвьнә дәрде сьһʹәт-ԛәԝата хԝә, ԝәки хьзмәткьрьна хԝә Йаһоԝарʹа, пьшт гӧһе хԝәва бавежьн (Ишайа 33:24; 1 Тимотʹейо 4:16).

Әм гәрәке фәсал бьн, ԝәки ԛайил нәбьн тʹәви ԝан методед ԛәнщкьрьне, йед кӧ щьнава гьредайи нә (Ԛануна Дӧщари 18:10-12; Ишайа 1:13). Ләма жи пешийа кӧ ԛайил бьн методәкә ԛәнщкьрьне йан фьлан дәрмани бьдьнә хәбате, әм гәрәке пебьһʹәсьн әв метод йан дәрман тʹәви чь гьредайи нә у фькьред ча пешда тинә (Мәтʹәлок 14:15). Тʹӧ щар бир нәкьн, ԝәки Мире-щьна гәләк дьхԝазә мә бькә һәләԛәтийа тʹәви щьна. Һәрге һʹьше мәрʹа дәрбаз бә, ԝәки дьԛәԝьмә әв метода ԛәнщкьрьне, щьнава гьредайи йә, ԝе баш бә әԝе методе инкʹар кьн (1 Пәтрус 5:8).

▸ Сәре 16, абзаса 18