СӘРЕ 15
Жь Хәбата Хԝә Шабуне Бьстинә
«Һәр мәрьв гәрәке . . . ләзәте бьвинә жь һʹәму кьред хԝә» (ԜАИЗ 3:13, ДТʹ).
1-3. а) Һʹәчʹи зәʹф мәрьв ча дьньһерʹьн сәр хәбата хԝә? б) Кʹижан пьрса әме шеԝьр кьн ԝи сәрида?
СӘР тʹәмамийа дьнйайе мәрьв гәләк ԛәԝат у ԝәʹде хԝә хәрщ дькьн, сәва әʹбура хԝә у малбәта хԝә бькьн. Гәләк мәрьв хәбата хԝә һʹьз накьн, у һьнәк жи дькʹәвьнә стресе жь бо ԝе йәке, кӧ һәр рʹож гәрәке һәрʹьнә хәбате. Дьбә тӧ жи хԝә ӧса тʹәхмин дьки. Ле тӧ чь дькари бьки, сәва кӧ хәбата тә тәрʹа шабуне бинә? Чаԝа тӧ дькари ньһерʹандьна хԝә сәр хәбате бьгӧһези?
2 Йаһоԝа дьбежә мә: «Һәр мәрьв гәрәке бьхԝә, вәхԝә у ләзәте бьвинә жь һʹәму кьред хԝә. Әԝ дайина Хԝәде йә» (Ԝаиз 3:13, ДТʹ). Йаһоԝа әм ӧса әʹфьрандьнә, ԝәки һʹәԝщәти у хԝәстьна мә һәйә, кӧ бьхәбьтьн. Әԝ дьхԝазә, ԝәки әм шабуне бьстиньн жь ԝе йәке, чь кӧ әм дькьн. (Бьхунә Ԝаиз 2:24; 5:18.)
3 Демәк, чь дькарә али мә бькә, ԝәки әм шабуне жь хәбата хԝә бьстиньн? Мәсиһи гәрәке хԝә жь кʹижан щурʹе хәбате дур бьгьрә? Чаԝа әм дькарьн ӧса бькьн, ԝәки хәбата мә рʹе мә нәгьрә Йаһоԝарʹа хьзмәт кьн? У кʹижан ә шьхӧле лапи фәрз, кӧ әм дькарьн бькьн?
ДӦ ҺОСТӘЙЕД ҺӘРИ МӘЗЬН
4, 5. Ньһерʹандьна Йаһоԝа сәр хәбате чь щурʹәйи йә?
4 Йаһоԝа гәләк һʹьз дькә бьхәбьтә. Дәстпебун 1:1-да ньвисар ә: «Дәстпебунеда Хԝәде әʹрд у әʹзман әʹфьрандьн». Паши ԝе йәке ча Хԝәде әʹрд у һәр тьштед сәр әʹфьранд, әԝи гот, ԝәки һʹәму чекьрьна ԝи «гәләки ԛәнщ бун» (Дәстпебун 1:31). Әʹфьрандаре мә чь кӧ чекьр, гьшк ԝи хԝәш һат (1 Тимотʹейо 1:11).
5 Йаһоԝа хәбатһʹьз ә. Иса гот: «Баве мьн һʹәта ньһа шьхӧле хԝә дькә» (Йуһʹәнна 5:17). Рʹаст ә, әм дәрһәԛа һʹәму чекьрьнед Йаһоԝа ньзаньн, ле диса жи һьнәк жь ԝан мәрʹа әʹйан ьн. Йаһоԝа дьжберә ԝан мәрьва, йед кӧ ԝе тʹәви Кӧрʹе ԝи Иса Мәсиһ, сәрԝертийе Пʹадшатийа ԝида бькьн (2 Корьнтʹи 5:17). Ӧса жи Йаһоԝа рʹебәрийе дьдә мәрьва у бона ԝан хәм дькә. Шьхӧле бәлакьрьна мьзгинийе нав тʹәмамийа дьнйайеда, али бь милийона мәрьва дькә, ԝәки Йаһоԝа нас кьн у һевийа жийина һʹәта-һʹәтайе сәр әʹрде, щьнәтеда бьстиньн (Йуһʹәнна 6:44; Рʹомайи 6:23).
6, 7. Иса хәбата чь щурʹәйи дькьр?
6 Иса жи мина Баве хԝә хәбатһʹьз ә. Әԝ пешийа кӧ бьһата сәр әʹрде, «һостәйе» Хԝәде бу, у тʹәви ԝи һәр тьштед сәр әʹрде у әʹзмана чедькьр (Мәтʹәлок 8:22-31; Колоси 1:15-17). Һәла һе сәр әʹрде жи Иса бәрдәԝам дькьр бь дьл у щан бьхәбьтә. Әԝ жь бьчʹуктайа хԝәда һин дьбу, кӧ бьбә нәщар у бькарьбә тьшта чекә у мала ава кә. Әԝи шьхӧле хԝә ӧса баш дькьр, кӧ мәрьва ԝи нас дькьрьн ча «нәщар» (Марԛос 6:3).
7 Ле диса жи бона Иса шьхӧле лапи фәрз сәр әʹрде әԝ бу, кӧ мьзгинийа хере бәла кә у дәрһәԛа Йаһоԝа мәрьва һин кә. Ԝәʹде ԝи се сал у нив һәбу, сәва кӧ шьхӧле бәлакьрьна мьзгинийе бькә, у әԝ сьбәһе зу һʹәта еваре гәләк дьхәбьти (Луԛа 21:37, 38; Йуһʹәнна 3:2). Иса бь сәда километьр рʹейед тʹоз у халирʹа ньга дьчу, сәва кӧ мьзгинийа хере бьгьһинә гәләк мәрьва (Луԛа 8:1).
8, 9. Чьма Иса жь хәбата хԝә шабун дьстанд?
8 Бона Иса, ԛәдандьна ԛьрара Хԝәде, мина хԝарьне бу. Әԝе йәке ԛәԝат дьда ԝи. Һәбун рʹожед ӧса, кӧ Иса шьхӧлед мьзгинийева ӧса мьжул дьбу, ԝәки ԝәʹдә нәдьдит сәва нан бьхԝә (Йуһʹәнна 4:31-38). Әԝи һәр мәщал дьда хәбате, сәва кӧ дәрһәԛа Баве хԝә мәрьва һин кә. Ләма жи әԝи дькарьбу Йаһоԝарʹа бежә: «Мьн тӧ ль сәр рʹуйе әʹрде рʹумәт кьри, әԝ шьхӧле тә дабу мьн кӧ әз бькьм мьн ани сери» (Йуһʹәнна 17:4).
9 Фәʹмдари йә, ԝәки Йаһоԝа у Иса гәләк дьхәбьтьн у шабуне дьстиньн жь хәбата хԝә. Әм дьхԝазьн «чʹәʹв бьдьнә Хԝәде», у ӧса жи әм дьхԝазьн пәй гавед Иса һәрʹьн (Әфәси 5:1; 1 Пәтрус 2:21). Ләма жи әм һәр шьхӧлед хԝәда ԛәԝате хәрщ дькьн, ԝәки һе баш бькьн.
НЬҺЕРʹАНДЬНА МӘ СӘР ХӘБАТЕ ГӘРӘКЕ ЧЬ ЩУРʹӘЙИ БӘ?
10, 11. Чь дькарә али тә бькә, ԝәки хәбата хԝә һʹьз бьки?
10 Әм, ча щьмәʹта Йаһоԝа, ԛәԝате дьдьнә хәбате, сәва кӧ әʹбура хԝә у малбәта хԝә бькьн. Әм дьхԝазьн ньһерʹандьна мә һьндава хәбате рʹаст бә, ле әԝ йәк нә һәр гав һеса йә. Һәрге әм хәбата хԝә һʹьз накьн, әм чь дькарьн бькьн, ԝәки шабуне бьстиньн жь хәбате?
Һәрге тӧ ньһерʹандьна рʹаст сәр хәбате хԝәй дьки, әԝ йәк ԝе али тә бькә, ԝәки жь һʹәму щурʹә хәбате шабуне бьстини
11 Ньһерʹандьна рʹаст хԝәй кә. Дьбәкә мәщала мә тʹӧнә хәбата хԝә бьгӧһезьн, ле әм дькарьн ньһәрʹандьна хԝә бьгӧһезьн. Һәрге әм фәʹм кьн, ԝәки Йаһоԝа чь жь мә дәʹԝа дькә, әԝ йәк дькарә али мә бькә. Мәсәлә: Йаһоԝа дьхԝазә, ԝәки малхе мале чьԛас дькарә, әʹбура малбәта хԝә бькә. Кʹьтеба Пирозда те готьне, ԝәки әԝе кӧ бона нәфәред хԝә хәм накә «жь нәбаԝәра жи хьрабтьр ә» (1 Тимотʹейо 5:8). Һәрге тӧ малхе мале йи, тӧ бь тʹәмами ԛәԝата хԝә дьди хәбате, сәва нәфәред хԝә хԝәй ки. Фьрԛи тʹӧнә тӧ хәбата чь щурʹәйи дьки, чахе тӧ бона нәфәред хԝә хәм дьки, Йаһоԝа жь тә рʹази дьбә.
12. Әԝ йәк кӧ әм хәбатһʹьз у һʹәлал ьн, чь кʹаре мәрʹа тинә?
12 Хәбатһʹьз у һʹәлал бә. Әԝ йәк ԝе али тә бькә, ԝәки шабуне жь хәбата хԝә бьстини (Мәтʹәлок 12:24; 22:29). Һәрге тӧ рʹаст у һʹәлал би, демәк пʹәра, ԝәʹдә у тьшта нәдьзи, мәзьне хәбате ԝе бькарьбә итʹбарийа хԝә тә бинә (Әфәси 4:28). Ле дьһа фәрз әв ә, ԝәки Йаһоԝа дьвинә кӧ тӧ рʹьнд хәбата хԝә дьки у һʹәлал и. Ԝи чахи исафа тә «рʹьһʹәт ә», чьмки тӧ зани, ԝәки Хԝәдайе кӧ тӧ һʹьз дьки, жь тә рʹази йә (Ибрани 13:18; Колоси 3:22-24).
13. Чь кʹаре дькарә мәра бинә әԝ йәк, кӧ әм сәр хәбате һʹәлал ьн?
13 Рʹабун-рʹуньштандьна мә сәр хәбате, дькарә рʹумәте бьдә Йаһоԝа. Әԝ йәк жи мәʹни йә, ԝәки әм рʹьнд хәбата хԝә бькьн (Тито 2:9, 10). Ӧса дькарә бьԛәԝьмә, ԝәки жь бо мәсәла тәйә баш, йәк жь һәвалхәбатчийед тә бьхԝазә Кʹьтеба Пироз һин бә. (Бьхунә Мәтʹәлок 27:11; 1 Пәтрус 2:12.)
ЧЬ ЩУРʹӘ ХӘБАТ ӘЗ ГӘРӘКЕ ХԜӘРʹА БЬЖБЕРЬМ?
14-16. Чь әм гәрәке һьлдьн һʹәсаб, чахе хԝәрʹа хәбате дьжберьн?
14 Кʹьтеба Пирозда нәньвисар ә, ԝәки Мәсиһи кʹижан хәбате дькарьн ԛәбул кьн, ле кʹижане на. Ле принсипед ӧса һатьнә дайине, кӧ дькарьн али мә бькьн хәбатәкә баш хԝәрʹа бьжберьн (Мәтʹәлок 2:6). Пьрсед кӧ жере ньвисар ьн, дькарьн али мә бькьн принсипед жь Кʹьтеба Пироз бьдьнә хәбате.
Хәбатәкә ӧса бьгәрʹә, кʹижан мьԛабьли принсипед Йаһоԝа нинә
15 Гәло сәр ве хәбате әзе мәщбур бьм тьштәки ӧса бькьм, чь кӧ бәр чʹәʹве Йаһоԝа нәрʹаст ә? Әм пеһʹәсийан, ԝәки Йаһоԝа чь нәфрʹәт дькә, мәсәлә дьзи у дәрәԝи (Дәркʹәтьн 20:4; Кʹаред Шандийа 15:29; Әфәси 4:28; Әʹйанти 21:8). Ләма жи әм гәрәке фәсал бьн, сәва кӧ хԝә дур бьгьрьн жь хәбатед ӧса, кӧ мьԛабьли нормед Йаһоԝа нә. (Бьхунә 1 Йуһʹәнна 5:3.)
16 Гәло әв хәбат пьштгьрийа ԝан тьшта накә, чь кӧ Йаһоԝа нәфрʹәт дькә? Мәсәлә, тӧйе чь бьки һәрге тә тʹәглиф кьн, ԝәки бьби секретаре нәхԝәшханәкә ӧсада, кʹидәре тʹәне зарʹбәркьрьне дькьн? Тьштәки хьраб ԝе йәкеда тʹӧнә, ԝәки әм бьбьнә секретар. Ле әм заньн Йаһоԝа ча дьньһерʹә сәр зарʹбәркьрьне. Рʹаст ә, те хԝәха зарʹбәркьрьнеда шьхӧлкʹарийе нәки, ле гәло тӧйе тʹәхмин нәки, ԝәки бь ньһерʹандьна Йаһоԝа тӧ жи тʹәви ԝи гӧнәйи дьби? (Дәркʹәтьн 21:22-24).
17. Чь дькарә али мә бькә, ԝәки сафикьрьнед ӧса бькьн, кӧ Йаһоԝа хԝәш бен?
17 Чахе әм принсипед Кʹьтеба Пироз дьдьнә хәбате, ӧса әм дькарьн бьбьнә әԝ мәрьв, дәрһәԛа кʹижана Ибрани 5:14-да те готьне, «йед кӧ сәԝдайе хԝәда кʹәти-рʹабуйи нә, ԛәнщи у хьрабийе жь һәв дәрдьхьн». Пьрса бьдә хԝә: «Һәрге әз әԝе хәбате ԛәбул кьм, гәло әзе нәбьм кәвьре лькʹӧмандьне бона мәрьвед дьн? Гәло жь бо ԝе хәбате ԝе лазьм нибә, кӧ һәвалзәԝащ у зарʹед хԝә бьһельм у һәрʹьм ԝәлатәки дьн? У әԝ йәк ԝе ча сәр ԝан һʹӧкӧм бә?»
«КʹИЖАН ҺӘРӘ ԚӘНЩ Ә, ҺУН ԜЕ БЬБЬЖЕРЬН»
18. Чьма мәрʹа дькарә чәтьн бә хьзмәткьрьне дайньн щийе пешьн?
18 Ԝан «рʹожед ахьрийеда» дькарә чәтьн бә, ԝәки хьзмәткьрьна Йаһоԝарʹа, дайньн щийе пешьн (2 Тимотʹейо 3:1). Һеса нинә хәбате бьвини у ӧнда нәки. Әм мәщбур ьн бона малбәта хԝә хәм кьн, ле әм заньн, ԝәки хьзмәткьрьна мә гәрәке щийе пешьн бьгьрә. Әм гәрәке нәһельн, ԝәки тьштед материали әʹмьре мәда щийе фәрз бьгьрьн (1 Тимотʹейо 6:9, 10). Ча әм дькарьн ԝан тьшта бьжберьн «кʹижан һәрә ԛәнщ ә» у һьн жи әʹбура малбәта хԝә бькьн? (Филипи 1:10).
19. Ча итʹбарийа мә һьндава Йаһоԝа дькарә али мә бькә, ньһерʹандьна рʹаст сәр хәбате хԝәй кьн?
19 Бь тʹәмами итʹбарийа хԝә Йаһоԝа бинә. (Бьхунә Мәтʹәлок 3:5, 6.) Әм заньн, ԝәки Йаһоԝа дьвинә әм һʹәԝще чь нә у бона мә хәм дькә (Зәбур 37:25; 1 Пәтрус 5:7). Хәбәра Ԝи мәрʹа дьбежә: «Пʹәрәһʹьзи бьра нава жийина ԝәда щи нәгьрә у дәстед ԝәда чьԛас һәйә, рʹази бьн, чьмки Хԝәде гот: ‹Әзе тʹӧ щар жь тә нәчьм у тʹӧ щар тә бәрʹнадьм›» (Ибрани 13:5). Йаһоԝа нахԝазә, ԝәки әм тʹьме бәр хԝә кʹәвьн, кӧ әме ча әʹбура малбәта хԝә бькьн. Гәләк щар әԝи дайә кʹьфше, ԝәки әԝ дькарә бона һʹәԝщед щьмәʹта хԝә хәм бькә (Мәтта 6:25-32). Әм чь хәбате жи бькьн, гәрәке тʹьме Хәбәра Хԝәде һин бьн, мьзгинийа хере бәла кьн у һәрʹьнә щьвате (Мәтта 24:14; Ибрани 10:24, 25).
20. Чаԝа әм дькарьн жийина хԝә һеса кьн?
20 Чʹәʹве хԝә пʹак хԝәй кьн. (Бьхунә Мәтта 6:22, 23.) Әԝ те һʹәсабе, ԝәки әм гәрәке әʹмьре хԝә һеса кьн у дьһа зәʹф дина хԝә бьдьнә сәр хьзмәткьрьна Йаһоԝарʹа. Әм заньн, ԝәки ԝе нәаԛьлайи бә, һәрге әм изьне бьдьн, ԝәки пʹәрә, һʹәбук у һащәтед тʹәзә бона мә дьһа фәрз бьн, нә кӧ һәләԛәтийа мә тʹәви Йаһоԝа. Ле ԝе чь али мә бькә, сәва әм тьштед фәрз дайньн щийе пешьн? Әм гәрәке һʹәму тьшти бькьн, ԝәки нәкʹәвьнә бьн дәйна. Ле һәрге тӧ һʹәта ньһа бьн дәйнада ни, һәр тьшти бькә, ԝәки дәйне хԝә кем ки, йан жь бь тʹәмами бьди. Һәрге әм фәсал нибьн, тьштед материали дькарьн гәләк ԝәʹдә у ԛәԝате жь мә бьстиньн, у әме ида нькарьбьн ԝәʹдә вәԛәтиньн бона дӧа, һинбуне йан хьзмәткьрьне. Дәԝса кӧ пәй тьштед материали кʹәвьн, әм дьхԝазьн һин бьн, кӧ «бь ԝан әм рʹази бьн», чь кӧ бал мә һәйә (1 Тимотʹейо 6:8). У әм чь дәрәщада бьн жи, ԝе баш бә бьфькьрьн, ча әм дькарьн дьһа зедә Йаһоԝарʹа хьзмәт кьн.
21. Чьма һун гәрәке сафи кьн, чь гәрәке щийе пешьн бьгьрә дьле ԝәда?
21 Нетед рʹаст дайнә пешийа хԝә. Әм гәрәке ԝәʹдә, ԛәԝат у пʹәре хԝә бь билани бьдьнә хәбате. Һәрге әм фәсал нибьн, дьбәкә тьштед нәфәрз, мәсәлә хԝәндьна бьльнд йан пʹәрә, ԝәʹде мәйи ԛимәт жь мә бьстиньн. Иса гот: «Ле бәре пешьн . . . Пʹадшатийа Хԝәде бьгәрʹьн» (Мәтта 6:33). Сафикьрьн, хәйсәт, график у нет-фькьред мә әʹйан дькьн, кӧ дьле мәда чь щийе пешьн дьгьрә.
ХӘБАТА ЛАПӘ ФӘРЗ, КʹИЖАН ӘМ ДЬКАРЬН БЬКЬН
22, 23. а) Кʹижан ә хәбата лапә фәрз, йа кӧ әм ча Мәсиһи гәрәке бькьн? б) Чь дькарә али мә бькә шабуне бьстиньн жь хәбата хԝә?
22 Хьзмәткьрьна мә Йаһоԝарʹа у бәлакьрьна мьзгинийа хере, хәбатәкә лапә фәрз ә бона мә (Мәтта 24:14; 28:19, 20). Мина Иса әм жи дьхԝазьн ԝе хәбатеда һәр тьшти бькьн. Һьнәк хьзмәткʹар дәрбази ԝи щийи бунә, кʹидәре һʹәԝщәтийа мәзьн һәйә. Ле һьнәк жи зьмане хәриб һин дьбьн, ԝәки мәрьварʹа сәр зьмане ԝан мьзгинийе бәла кьн. Һун дькарьн тʹәви ԝан хушк-бьра хәбәр дьн, йед кӧ ԝе йәкеда щерʹьбанди нә. Әԝана ԝе тәрʹа гьли кьн чаԝа жийина ԝана бәхтәԝар у баш буйә. (Бьхунә Мәтʹәлок 10:22.)
Хьзмәткьрьна Йаһоԝарʹа гәрәке лапә фәрз бә жийина тәда
23 Рʹожа иройин, гәләк жь мә сәва кӧ малбәта хԝә хԝәй кьн, епʹещә ԝәʹдә хәрщ дькьн сәр хәбате у һәла һе чәнд хәбата дькьн жи. Йаһоԝа дьвинә у ԛимәт дькә ԝе йәке, ԝәки әм һʹәму тьшти дькьн, сәва кӧ малбәта хԝә хԝәй кьн. Фьрԛи тʹӧнә, әм кʹижан хәбате дькьн, ԝәрә әм бәрдәԝам кьн чʹәʹв бьдьнә Йаһоԝа у Иса, ԝәки бь хирәт бьхәбьтьн. У әм гәрәке бира хԝәда хԝәй кьн, кӧ хәбата лапә фәрз әԝ ә, ԝәки әм Йаһоԝарʹа хьзмәт кьн у мьзгинийа хере дәрһәԛа Пʹадшатийа Хԝәде һʹәмуйарʹа гьли кьн. Әԝ йәк ԝе бь рʹасти шабуне мәрʹа бинә.