СӘРЕ 9
«Жь Ԛавийе Бьрʹәвьн!»
«Аԝа хԝәстьнед дьле хԝәйә ве дьне бькӧжьн: Бенамусийе, һʹәрамийе, тәме хьраб, дьлһавьжийа хьраб у тьмайе, кӧ пʹутпʹарьсти йә» (КОЛОСИ 3:5).
1, 2. Бьлам чь кьр, сәва зийане бьдә щьмәʹта Йаһоԝа?
МӘʹСИГЬР дьчә ԝи щийи, кʹидәре дькарә әԝ щурʹә мәʹси бьгьрә, кʹижани дьхԝазә. Әԝ хԝарьна мәʹсийа дьжберә у дькә чәнгәле, йа кӧ сәр дара мәʹсигьра йә у давежә аве. Әԝ бь сәбьр һивийе йә, ԝәки мәʹси дәве хԝә бавежә ве хԝарьне у бе гьртьне.
2 Мина ԝе йәке, мәрьв жи дькарьн бькʹәвьнә тʹәлька. Мәсәлә, чахе Исраели Дәшта Моԝабеда чадьрада дьжитьн, әԝана ида незики Әʹрде Создайи дьбун. Пʹадше Моԝабе соз да Бьлам, ԝәки һәрге әԝ ньфьрʹа щьмәʹта Исраел бькә, әԝе гәләк пʹәра бьдә ԝи. Ахьрийе Бьлам хԝәст ӧса бькә, ԝәки Исраели тьштәки ӧса бькьн, кӧ бенә ньфьрʹкьрьне. Әԝи гәләк фәсал тʹәльк бьжарт. Әԝи жьнед Моԝаби йед щаһьл шандә зома Исраеле, сәва ԝана бьдә шашкьрьне (Жьмар 22:1-7; 31:15, 16; Әʹйанти 2:14).
3. Чаԝа Исраели кʹәтьнә тʹәлька Бьлам?
3 Гәло Бьлам пе тʹәлька хԝә гьһиштә нета хԝә? Бәле. Бь һʹәзара меред Исраели дәстпекьрьн тʹәви ԛизед Моԝабе бенамусийе бькьн. У ӧса ԝана дәстпекьр сәре хԝә бәр хӧданед ԛәлп дайньн, ӧса жи бәр хӧдане һʹәрам, Баәʹл-Пʹьһоррʹа, йе кӧ хӧдане бенамусийе бу. Ахьрийеда һәма бәр Әʹрде Создайи 24 000 Исраели һатьнә ԛьрʹкьрьне (Жьмар 25:1-9).
4. Чьма бь һʹәзара Исраели бенамуси кьрьн?
4 Чьма һаԛас Исраели, кʹәтьнә тʹәлька Бьлам? Әԝана тʹәне дәрһәԛа хԝәстьнед хԝә дьфькьрин, у бир кьрьн һʹәму тьшт, чь кӧ Йаһоԝа сәва ԝана кьрьбу. Гәләк мәʹнийед Исраелийа һәбун, ԝәки Хԝәдерʹа амьн бьминьн. Әԝи әԝана хьлаз кьрьн жь дилтийа Мьсьре, бәрʹийеда тʹер дькьр, у бе хоф әԝана дьбьрьнә Әʹрде Создайи (Ибрани 3:12). Ле йәкә ԝана бенамуси кьр. Паԝлосе шанди ньвиси: «Әм ԛавийе нәкьн, чаԝа жь ԝан һьнәка ԛави кьр у . . . ԛьрʹ бун» (1 Корьнтʹи 10:8).
5, 6. Чь дәрс әм дькарьн хԝәрʹа һьлдьн жь ԛәԝьмандьна, кӧ Дәшта Моԝабеда ԛәԝьми?
5 Дьнйа тʹәзә гәләк незик ә. Ньһа әм жи мина Исраелийа незики Әʹрде Создайи нә (1 Корьнтʹи 10:11). Мәрьвед рʹожа иройин, жь щьмәʹта Моԝаби зедәтьр хԝә бенамусийева гьртьнә. Әԝ йәк һеса дькарә һʹӧкӧм бә сәр щьмәʹта Йаһоԝа жи. Тʹәлька лапә ԛәԝи, йа кӧ Мире-щьна дьдә хәбате, әԝ һәләԛәтийа сексуали йә (Жьмар 25:6, 14; 2 Корьнтʹи 2:11; Щьһуда 4).
6 Пьрсе бьдә хԝә: «Гәло әзе чь бьжберьм, шабуна жь рʹьһәтийа ԝәʹдәлу йа кӧ хԝәһʹьзийева гьредайи йә, йан шабуна жь жийина һʹәта-һʹәтайе, дьнйа тʹәзәда?» Бь рʹасти жи һежа йә, ԝәки һʹәму ԛәԝате бьдьнә хәбате, сәва кӧ тʹәмийа Йаһоԝа биньн сери: «Жь ԛавийе бьрʹәвьн!» (1 Корьнтʹи 6:18).
ЧЬ ТЕ ҺʹӘСАБЕ ԚАВИ?
7, 8. Чь те һʹәсабе бенамуси? Чьма әԝ пьрс ӧса фәрз ә?
7 Рʹожа иройин гәләк мәрьв бешәрм бунә у хԝә беԛәдьр дьдьнә кʹьфше һьндава ԛануна Хԝәде, дәрһәԛа һәләԛәтийа сексуали. Кʹьтеба Пирозда ԛави те һʹәсабе, һәләԛәтийа сексуали ортʹа ԝан, йед кӧ һәврʹа зәԝащеда ниньн. Әԝ ӧса жи те һʹәсабе һәләԛәтийа сексуал ортʹа дӧ мера йан дӧ жьна, ӧса жи һʹәрьмандьна тʹәви һʹәйԝана. Дькʹәвьнә нава ԝе йәке кьред сексуали тʹәви органед щьнси йед мәрьвед дьн, секса орали у анали, йан жи мьздана әндәмед шәрми. Дьԛәԝьмә әм шәрм дькьн ԝе тʹеме шеԝьр кьн, ле әм гәрәке зәлал фәʹм бькьн ԝан тьшта, сәва кӧ хԝә дур бьгьрьн жь ԝе йәке, чь кӧ Хԝәде нәфрʹәт дькә. (Бьньһерʹә Әʹламәтийа Зедә 23.)
8 Кʹьтеба Пироз мәрʹа әʹйан нишан дькә, ԝәки әԝед кӧ бәрдәԝам дькьн ԛавийе бькьн, нькарьн бьминьн ча әндәмед щьвате (1 Корьнтʹи 6:9; Әʹйанти 22:15). Хенщи ԝе йәке, мәрьве ԛав ԛәдьре хԝә ӧнда дькә, у мәрьв итʹбарийа хԝә ԝи йан ԝе найньн. Ԛави һәр гав мәрьва дьбә бәрбь чәтьнайа. Мәсәлә, чәтьнайед ӧса пешда тинә, кӧ исаф ԝана дьчәрчьринә, жьн һʹәмлә дәрте, чәтьнайи зәԝащеда пешда тен, у һәла һе нәхԝәш жи дькʹәвьн у дьмьрьн. (Бьхунә Галати 6:7, 8.) Һәрге мәрьв дәрһәԛа ахьрийа ԛавийе бьфькьрә, дьбәкә әԝ нә жи бьхԝазә ԝе йәке бькә. Ле мәрьв дьһа зәʹф дьфькьрьн дәрһәԛа хԝәстьнед хԝәйә шәхси, чь кӧ ԝана дьбә бәрбь бенамусийе. Гава пешьн әԝ һәйә ньһерʹандьна порнографийе.
НЬҺЕРʹАНДЬНА ПОРНОГРАФИЙЕ ГАВА ПЕШЬН Ә
9. Чьма порнографийа хоф ә?
9 Порнографийа ӧса һатийә чекьрьне, ԝәки хԝәстьнед сексуали пешда бинә. Рʹожа иройин порнографийа һʹәму щийа һәйә; журналада, кʹьтебада, мусикеда, бәрнамед телевизийонеда, у һʹәчʹи зәʹф интернетеда. Гәләк мәрьв фәʹм дькьн, ԝәки порнографийа зийане тинә у гәләк хоф ә. Әԝ йәк хԝәстьнед сексуали бь щурʹе мьрдар пешда тинә у мәрьв ԛавийева те гьредане. Ньһерʹандьна порнографийайе дьбә бәрбь ԝе йәке, кӧ мәрьв дәстпедькә мастурбасийева мьжул бә, чәтьнайи зәԝащеда пешда тен, у һәла һе жьн-мер жь һәв дьԛәтьн жи (Рʹомайи 1:24-27; Әфәси 4:19; бьньһерʹә Әʹламәтийа Зедә 24).
Ԝе бь билани бә фәсал би, гава интернете дьди хәбате
10. Принсипа Аԛуб 1:14, 15-да ньвисар, ча али мә дькә, ԝәки хԝә жь ԛавийе дур бьгьрьн?
10 Гәләк фәрз ә, ԝәки әм фәʹм кьн, кӧ ча дькарә ӧса бьԛәԝьмә, ԝәки әм бькʹәвьнә тʹәлька ԛавийе. Дина хԝә бьдьне, Аԛуб 1:14, 15-да чь те готьне: «Һәр кәс дьбә машоԛе дьлһавьжийед хԝә, дьхапә у те щерʹьбандьне. Һьнге дьлһавьжи кәле хԝә дьстинә, гӧнә же дьфьрькә у гӧнә жи кӧ мәзьн дьбә, мьрьн же дьбә». Чахе фькьред хьраб дькʹәвьнә һʹьше тә, дәрберʹа ԝан фькьра жь сәре хԝә дәрхә. Һәрге тә ньшкева шькләкә еротик дит, перʹа-пʹера бәре хԝә бьгӧһезә алики дьн! Компоторе весинә, йан бәрнама телевизийоне бьгӧһезә. Изьне нәдә, ԝәки хԝәстьнед нәрʹаст бькʹәвьнә дьле тә. Һәрге тӧ ӧса нәки, хԝәстьнед нәрʹаст нав тәда дькарьн ӧса гӧрʹ бьн, ԝәки ида гәләк чәтьн бә ԝана контрол ки. (Бьхунә Мәтта 5:29, 30.)
11. Һәрге фькьред хьраб бал мә пешда бен, Йаһоԝа ча дькарә али мә бькә?
11 Йаһоԝа һе рʹьнд мә нас дькә, нә кӧ әм хԝәха у әԝ занә, ԝәки әм нәԛәданди нә. Әԝ ӧса жи занә, ԝәки әм дькарьн хԝәстьнед нәрʹаст алт кьн. Йаһоԝа дьбежә мә: «Аԝа хԝәстьнед дьле хԝәйә ве дьне бькӧжьн: Бенамусийе, һʹәрамийе, тәме хьраб, дьлһавьжийа хьраб у тьмайе, кӧ пʹутпʹарьсти йә» (Колоси 3:5). Дькарә нә һеса бә хԝә контрол кьн, ле Йаһоԝа сәбьре дьдә кʹьфше һьндава мә у һазьр ә али мә бькә (Зәбур 68:19). Бьрак ньһерʹандьна порнографийева һатьбу гьредане у дәстпекьр мастурбасийе бькә. Һәвалед ԝийи мәкʹтәбе дьфькьрин, ԝәки әԝ йәк бона салийед әʹмьре ԝан нормал ә. Ле әԝи гот: «Исафа мьн әз дьчәрчьрандьм, әз бенамусийеда хәньԛи бум». Әԝи фәʹм кьр, ԝәки гәрәке хԝәстьнед хԝә контрол кә, у бь аликʹарийа Йаһоԝа, әԝи хәйсәтед хԝәйә хьраб жь хԝә дур хьст. Һәрге фькьред бенамуси бал тә пешда тен, лавайа Йаһоԝа бькә, ԝәки «зорайийа ԛәԝате» бьдә тә, сәва бькарьби фькьред хԝә тʹәмьз хԝәй ки (2 Корьнтʹи 4:7; 1 Корьнтʹи 9:27).
12. Чьрʹа әм гәрәке «мьԛати дьле хԝә» бьн?
12 Сьлеман ньвиси: «Жь һәр тьшти зедәтьр мьԛати дьле хԝә бә, чьмки канийа әʹмьр жь ԝи дәрте» (Мәтʹәлок 4:23). «Дьле» мә әʹйан дькә кӧ әм дьле хԝәда мәрьвнә ча ньн, демәк чь кӧ Йаһоԝа дьвинә. Әԝ чь әм дьньһерʹьн дькарә гәләк сәр мә һʹӧкӧм кә. Ибойе амьн гот: «Мьн бь чʹәʹве хԝәрʹа пәйманәке чекьр у әзе чаԝа чʹәʹв бавежьм ԛизьке?» (Ибо 31:1). Әм жи гәрәке мина Ибо контрол кьн, әм чь дьньһерʹьн у дәрһәԛа чь дьфькьрьн. У мина зәбурбеж дӧа бькьн: «Чʹәʹве мьн хԝәй кә жь бош-бәталийе у рʹийа Хԝәда Тӧ мьн бьдә жийане» (Зәбур 119:37).
ДИНАҺЕ БЬЖАРТЬНА НӘАԚЬЛАЙИ КЬР
13. Динаһе һәвалед чь щурʹәйи хԝәрʹа бьжарт?
13 Һәвалед мә дькарьн баш йан хьраб сәр мә һʹӧкӧм кьн. Һәрге тӧ ԝан һәвала бьжбери, йед кӧ пе принсипед Хԝәде дьжин, әԝана ԝе али тә бькьн, ԝәки тӧ жи ӧса бьжийи (Мәтʹәлок 13:20; бьхунә 1 Корьнтʹи 15:33.) Жь мәсәла Динаһе әм дькарьн бьвиньн чьԛас фәрз ә һәвалед баш хԝәрʹа бьжберьн. Әԝ ԛиза Аԛуб бу, демәк әԝ мәзьн дьбу ԝе малбәтеда, кʹижане Йаһоԝа дьһʹәбанд. Динаһ кәчʹькәкә намус бу, ле тʹәви кәчʹькед Кәнани, йед кӧ Йаһоԝа нәдьһʹәбандьн незик һәвалти дькьр. Ньһерʹандьна щьмәʹта Кәнани сәр һәләԛәтийа сексуали гәләк щӧдә дьбу жь ньһерʹандьна щьмәʹта Хԝәде, у гьшка әԝана нас дькьрьн ча мәрьвнә бенамус (Ԛануна Кʹаһинтийе 18:6-25). Чахе Динаһ тʹәви һәвалед хԝә бу, әԝ рʹасти щаһьләки Кәнани һат, наве кʹижани Шәкәм бу у әԝи щаһьли әԝ бәгәм кьр. Шәкәм малбәта хԝәда мәрьве «һәри хԝәйиԛәдьр» дьһатә һʹәсабе. Ле әԝи Йаһоԝа һʹьз нәдькьр (Дәстпебун 34:18, 19).
14. Чь һатә сәре Динаһе?
14 Шәкәм әԝ тьшт дькьрьн, чь кӧ сәва ԝи нормал у тʹәбийәти бун. Әԝи Динаһ бәгәм кьр, ләма жи «дәст авитә ԝе у бь дәсте зоре әԝ рʹурʹәш кьр». (Бьхунә Дәстпебун 34:1-4.) Жь бо ԝе йәке һьн әԝе зийан станд, һьн жи малбәта ԝе (Дәстпебун 34:7, 25-31; Галати 6:7, 8).
15, 16. Чаԝа әм дькарьн биланийе ԛазанщ кьн?
15 Нә әʹсәйи йә әм шашийед мина йе Динаһе бькьн, ԝәки паше фәʹм кьн кӧ нормед Йаһоԝа бона мә керһати нә. «Кʹи кӧ тʹәви билана рʹе дьчә, ԝе бьбә билан, ле кʹаре кʹе тʹәви беаԛьла йә, ԝе зьраре кʹәвә» (Мәтʹәлок 13:20). Нете дайньн пешийа хԝә, ԝәки «һәр рʹейа кӧ ԛәнщ ә» фәʹм бькьн у ӧса хԝә жь кӧл-дәрда дур бьгьрьн (Мәтʹәлок 2:6-9; Зәбур 1:1-3).
16 Әм дькарьн биланийе ԛазанщ кьн, һәрге пешийа кӧ тьштәки сафи кьн, Хәбәра Хԝәде леколин кьн, дӧа бькьн у ширәтед жь хӧламе амьн у сәрԝахт бьдьнә хәбате (Мәтта 24:45; Аԛуб 1:5). Әм заньн, ԝәки әм гьшк жи сьст у гӧнәкʹар ьн (Йерʹәмйа 17:9). Ле тӧйе ча хԝә бьди кʹьфше, һәрге кәсәк тәрʹа дьбежә, ԝәки тӧ бәрбь бенамусийе дьчи? Гәло тӧйе бьхәйиди, йан бь мьлуктийе ширәте һьлди? (2 Пʹадшати 22:18, 19).
17. Мәсәле бинә, ча ширәтед кӧ хушк-бьра дьдьнә мә, дькарьн али мә бькьн.
17 Мәсәлә, дәрәщәкә ӧса бьдә бәр чʹәʹве хԝә. Сәр хәбате мерәк дина хԝә дьдә хушкәкә мә у дьхԝазә, ԝәки әԝана дәстпекьн рʹасти һәв бен. Әԝ мер Йаһоԝарʹа хьзмәт накә, ле те кʹьфше ча мәрьвәки ԛәнщ у баш. Хушкәкә дьн, ԝана тʹәвайи дьвинә у паше дьхԝазә ԝе хушкерʹа хәбәр дә. Хушка кӧ рʹасти гәдә те, ԝе ча хԝә бьдә кʹьфше гава ширәте бьстинә? Гәло әԝе хԝә һәԛ дәрхә, йан ве һʹәсаб кә, кӧ әԝ ширәт бь билани йә? Дьԛәԝьмә әԝ Йаһоԝа һʹьз дькә у дьхԝазә ԝе йәке бькә, чь кӧ рʹаст ә. Ле һәрге әԝ бәрдәԝам кә рʹасти ԝи хорте щаһьл бе, гәло ԝи чахи әԝ дькарә бежә, ԝәки жь ԛавийе дьрʹәвә, йан әԝ хԝәда итʹбар ә? (Мәтʹәлок 22:3; 28:26; Мәтта 6:13; 26:41).
ЖЬ МӘСӘЛА УСЬВ ҺИН БӘ
18, 19. Шьровәкә, ча Усьв жь ԛавийе рʹәви.
18 Хорте щаһьл, Усьв, Мьсьреда дил бу. Рʹож бь рʹож, жьна ахайе ԝи дькьрә сәр ԝи, ԝәки тʹәви ԝе ԛавийе бькә, ле Усьв заньбу, ԝәки әԝ йәк нәрʹаст ә. Әԝи Йаһоԝа һʹьз дькьр, у дьхԝәст әԝ жь ԝи рʹази бә. Жьна ахайе Усьв тʹьме ԛәԝат дьда хәбате, сәва ԝи ԛайил кә, ԝәки тʹәви ԝе рʹазе, ле Усьв инкʹар дькьр. Жь бо ԝе йәке кӧ әԝ хӧлам бу, әԝ нькарьбу жь ве мале дәркʹәта. Рʹожәке, гава жьна аха зоре ԝи дькьр, ԝәки тʹәви ԝе рʹазе, әԝ «рʹәви дәркʹәтә дәрва». (Бьхунә Дәстпебун 39:7-12.)
19 Һәрге Усьв изьн бьда, кӧ фькьред бенамуси тʹьме һʹьше ԝида буна, дьбәкә әԝ дәрәщә щурʹәки майин хьлаз буйа. Ле сәва Усьв һәләԛәтийа ԝи тʹәви Йаһоԝа жь һʹәму тьшти фәрзтьр бу. Әԝи гот: «Ахайе мьн . . . тьштәк жи әԝи жь мьн на-на нәкьрийә пештьри тә, чьмки тӧ жьна ԝи йи, әзе чаԝа ве хьрабийа мәзьн бькьм у ль бәр Хԝәде гӧнә бькьм?» (Дәстпебун 39:8, 9).
20. Әм жь кʹӧ заньн, ԝәки Йаһоԝа жь Усьв рʹази бу?
20 Рʹаст ә Усьв дур бу жь мал у нәфәред хԝә, ле диса жи әԝ амьн дьма Хԝәдерʹа у Йаһоԝа ԝи кʹәрәм дькьр (Дәстпебун 41:39-49). Йаһоԝа гәләк ша дьбу, гава дьдит кӧ Усьв амьнийе дьдә кʹьфше (Мәтʹәлок 27:11). Бәле, дәрәщед ӧсада дькарә чәтьн бә хԝә жь ԛавийе дур бьгьрьн. Ле ԝан хәбәра бир нәкә: «Гәли Хӧдан һʹьзкьрийа, бьжәньнә хьрабийе! Әԝ әʹмьрә амьнед Хԝә хԝәй дькә, жь дәсте нәпʹака хьлаз дькә» (Зәбур 97:10).
21. Ча бьраки щаһьл чʹәʹв да Усьв?
21 Һәр рʹож, щьмәʹта Йаһоԝа бь мерхаси дьдә кʹьфше, ԝәки хьрабийе нәфрʹәт дькә у ԛәнщийе һʹьз дькә (Амос 5:15). Фьрԛи тʹӧнә әм чәнд сали нә, йәкә әм дькарьн Йаһоԝарʹа амьн бьминьн. Баԝәрийа бьраки щаһьл мәкʹтәбеда һатә щерʹьбандьне. Кәчʹькәке готә ԝи, ԝәки ԝе тʹәви ԝи бькʹәвә һәләԛәтийа сексуал, һәрге әԝ дәрса математикайеда али ԝе бькә. Гәло әԝи бьрайи чь сафи кьр? Әԝи чʹәʹв да Усьв. Әԝ дьбежә: «Мьн перʹа-перʹа хԝәстьна ԝе инкʹар кьр. Мьн амьни хԝәй кьр, ӧса мьн ԛәдьре хԝә у рʹьһʹәти ӧнда нәкьр». Һәр «ԝәхтәки кьн нава кʹефа гӧнада» кӧл-дәрда у еше дьлда пешда тинә (Ибрани 11:25). Әԝ йәк кӧ әм гӧрʹа Йаһоԝада дьминьн, шабуна һʹәта-һʹәтайе тинә (Мәтʹәлок 10:22).
БЬҺЕЛӘ ԜӘКИ ЙАҺОԜА АЛИ ТӘ БЬКӘ
22, 23. Һәрге мә гӧне гьран кьрийә, ԝи чахи Йаһоԝа ча дькарә али мә бькә?
22 Мире-щьна ԝе һʹәму ԛәԝата хԝә бьдә хәбате, сәва тә бькә тʹәлька ԛавийе, у әв йәк дькарә сәва тә бь рʹасти щерʹьбандьнәкә чәтьн бә. Щарна дькарә фькьред хьраб бькʹәвьнә һʹьше мә һәр кәси (Рʹомайи 7:21-25). Йаһоԝа мә фәʹм дькә, чьмки занә «кӧ әм хали нә» (Зәбур 103:14). Ле һәрге Мәсиһи бенамусийе бькә? Гәло сәва ԝе йәке чʹарә тʹӧнә? Һәйә. Һәрге мәрьв бона гӧне хԝә пʹошман дьбә, Йаһоԝа али ԝи дькә. Хԝәде һазьр ә гӧне ԝи «афу» кә (Зәбур 86:5; Аԛуб 5:16; бьхунә Мәтʹәлок 28:13.)
23 Йаһоԝа «пʹешкʹеш бь щурʹе мәрьва», демәк рʹуспи данә мә, йед кӧ бь һʹьзкьрьне мьԛати мә дьбьн (Әфәси 4:8, 12, ДТʹ; Аԛуб 5:14, 15). Бәле, Хԝәде рʹуспи кʹьфш кьрьнә, сәва әԝана али мә бькьн, ԝәки әм һәләԛәтийа баш тʹәви ԝи тʹәзәда ава кьн (Мәтʹәлок 15:32).
СӘРԜАХТИЙЕ ԚАЗАНЩ КӘ
24, 25. Ча сәрԝахти дькарә али мә бькә, кӧ жь бенамусийе бьрʹәвьн?
24 Сәва кӧ сафикьрьнед рʹаст бькьн, мәрʹа лазьм ә фәʹм кьн, кӧ ԛанунед Йаһоԝа ча мәрʹа кʹаре тиньн. Әм нахԝазьн чʹәʹв бьдьнә ԝи хорте щаһьл, дәрһәԛа кʹижани Мәтʹәлок 7:6-23-да те готьне. Әԝ «бефәʹм» бу, ләма жи кʹәтә тʹәлька ԛавийе. Фәʹмкʹари те һʹәсабе һе зедә тьшт, нә кӧ тʹәне һʹьш-аԛьл. Һәрге әм фәʹмкʹар бьн, әме ԛәԝата хԝә бьдьнә хәбате, сәва кӧ фькьред Хԝәде фәʹм бькьн у анәгори ԝе йәке бьжин. Ԝан хәбәред билани бира хԝәда хԝәй кьн: «Йе сәрԝахтийе дәстинә, әԝ нәфса хԝә һʹьз дькә, йе билантийе хԝәй дькә, әԝ хер у хԝәшийе дьбинә» (Мәтʹәлок 19:8).
25 Гәло тӧ сәд сәләфи баԝәр и, ԝәки нормед Хԝәде рʹаст ьн? Тӧ бь рʹасти баԝәр и, ԝәки һәрге бь ԝан норма бьжийи, тӧйе бәхтәԝар би? (Зәбур 19:7-10; Ишайа 48:17, 18). Һәрге тӧ дӧдьли дьби, бинә бира хԝә кӧ Йаһоԝа чьԛас ԛәнщи сәва тә кьрийә. Кʹьтеба Пироз дьбежә: «Тәʹм кьн у бьзаньбьн кӧ Хӧдан ча ԛәнщ ә!» (Зәбур 34:8). Һәрге тӧ нормед Хԝәде хԝәй ки, чьԛас һәрʹә, тӧйе һе зедә Хԝәде һʹьз бьки. Чь кӧ Хԝәде һʹьз дькә, тӧ жи һʹьз бькә, ле чь кӧ Хԝәде нәфрʹәт дькә, тӧ жи нәфрʹәт кә. Һʹьш-аԛьле хԝә бь тьштед баш тʹьжә кә, мәсәлә чь кӧ бь рʹастийе йә, чь кӧ бь һәԛийе йә, чь кӧ бь һʹәлалийе йә, чь кӧ бь хԝәшийе йә у әʹсьли йә (Филипи 4:8, 9). Әм дькарьн чʹәʹв бьдьнә Усьв, йе кӧ биланийа Йаһоԝа дьда хәбате у кʹар жь ԝе дьстанд (Ишайа 64:8).
26. Әме сәред дьнда чь шеԝьр кьн?
26 Фьрԛи тʹӧнә тӧ зәԝащеда ни йан на, Йаһоԝа дьхԝазә, ԝәки тӧ ша у бәхтәԝар бьжийи. Дӧ сәред дьнда әме пебьһʹәсьн, кӧ чь дькарә али мә бькә, ԝәки зәԝаща хԝәда бәхтәԝар бьн.