СӘРЕ 16
Мьԛабьли Мире-щьна дәре
«Мьԛабьли Мирещьн бьсәкьньн у әԝе жь ԝә бьрʹәвә» (АԚУБ 4:7).
1, 2. Чь әм гәрәке бьзаньбьн дәрһәԛа Шәйтʹан у щьнед ԝи?
ЙАҺОԜА соз дьдә, ԝәки әʹмьр дьнйа тʹәзәда ԝе гәләк хԝәш бә. Ахьрийе әме ӧса бьжин, чаԝа кӧ сәре-серида хԝәстьна Хԝәде бу. Ле ньһа әм дьнйа ӧсада дьжин, кʹижан дәсте Шәйтʹан у щьнед ԝида нә (2 Корьнтʹи 4:4). Рʹаст ә, әм ԝана нькарьн бьвиньн, ле әԝана бь рʹасти һәнә у гәләк ԛәԝат ьн.
2 Ви сәрида әме шеԝьр кьн, кӧ ча әм дькарьн хԝә незики Йаһоԝа бьгьрьн у хԝә жь Мире-щьна хԝәй кьн. Йаһоԝа соз дьдә, ԝәки ԝе али мә бькә. Ле диса жи әм гәрәке бьзаньбьн, кʹижан ьн методед Мире-щьна у ча щьнед ԝи дькарьн мә бьхапиньн, сәва кӧ һʹьщуми сәр мә кьн.
«МИНА ШЕР МЬРʹӘ-МЬРʹА ԜИ ЙӘ»
3. Мире-щьна чь дьхԝазә сәре мә бькә?
3 Мире-щьна дьбежә, ԝәки әм сәва кʹара хԝә Йаһоԝарʹа хьзмәт дькьн у һәрге әм бькʹәвьнә дәрәщед чәтьн, әме ида Ԝирʹа хьзмәт нәкьн. (Бьхунә Ибо 2:4, 5.) Чахе кәсәк нишан дькә, ԝәки дьхԝазә дәрһәԛа Йаһоԝа пебьһʹәсә, Шәйтʹан у щьнед ԝи әԝе йәке тʹәхмин дькьн у дьхԝазьн ԝи бьдьнә сәкьнандьне. Әԝана гәләк һерс дькʹәвьн, чахе мәрьв хԝә тʹәсмили Йаһоԝа дькә у те ньхӧмандьне. Кʹьтеба Пирозда те готьне, ԝәки Мире-щьна «мина шер мьрʹә-мьрʹа ԝи йә, дьгәрʹә кʹа кʹе һʹуфи хԝә кә» (1 Пәтрус 5:8). Мире-щьна дьхԝазә һәләԛәтийа мә тʹәви Хԝәде кʹӧта кә (Зәбур 7:1, 2; 2 Тимотʹейо 3:12).
Мире-щьна һерс дькʹәвә чахе әм хԝә тʹәсмили Йаһоԝа дькьн
4, 5. а) Мире-щьна чь нькарә бькә? б) Чь те һʹәсабе «мьԛабьли Мирещьн бьсәкьньн»?
4 Ле әм гәрәке жь Шәйтʹан у щьнед ԝи нәтьрсьн, чьмки Йаһоԝа ԝе нәһелә, ԝәки әԝана тьштәки сәре мә бькьн. Йаһоԝа соз дьдә, ԝәки «әʹлаләтәкә . . . мәзьн», демәк Мәсиһийед рʹаст, ԝе жь «тәнгасийа » хьлаз бьн ( мәзьнӘʹйанти 7:9, 14). Мире-щьна нькарә тьштәки ӧса бькә, ԝәки нәһелә әм хьлаз бьн, чьмки Йаһоԝа щьмәʹта хԝә хԝәй дькә.
5 Һәрге әм жь Йаһоԝа дур нәкʹәвьн, Мире-щьна ԝе нькарьбә һәләԛәтийа мә тʹәви Хԝәде хьраб кә. Хәбәра Хԝәде мә дьдә баԝәркьрьне: «Һәр кӧ һун бь Хӧданрʹа бьн, әԝ жи бь ԝәрʹа бә» (2 Дирок 15:2; бьхунә 1 Корьнтʹи 10:13.) Гәләк мәрьвед амьн йед ԝәʹде бәре, мәсәлә Һабил, Һәнох, Нӧһ, Сәра у Муса мьԛабьли Мире-щьна дьсәкьнин у Йаһоԝарʹа амьн дьман (Ибрани 11:4-40). Әм жи дькарьн ве йәкеда чʹәʹв бьдьнә ԝан. Хәбәра Хԝәде ӧса дьбежә: «Мьԛабьли Мирещьн бьсәкьньн у әԝе жь ԝә бьрʹәвә» (Аԛуб 4:7).
ӘМ БӘРДӘԜАМ ДЬКЬН ШӘРʹ БЬКЬН
6. Чь щурʹәйи Мире-щьна һʹьщуми сәр мә дькә?
6 Мире-щьна занә, ԝәки Йаһоԝа ԝе нәһелә, кӧ әԝ һʹәму тьшт чь кӧ дьхԝазә бинә сәре мә, ле йәкә әԝ һʹәму мәщала дьдә хәбате, сәва һәләԛәтийа мә тʹәви Йаһоԝа сьст кә. Рʹожа иройин, Мире-щьна бь щурʹә-щурʹә метода һʹьщуми сәр мә дькә у ԝан метода ида бь һʹәзара сала дьдә хәбате. Гәло әԝ чь метод ьн?
7. Чьма Мире-щьна һʹьщуми сәр щьмәʹта Йаһоԝа дькә?
7 Йуһʹәннайе шанди ӧса ньвисийә: «Тʹәмамийа дьнйайе бьн һʹӧкӧме Йе Хьрабда йә» (1 Йуһʹәнна 5:19). Мире-щьна әв дьнйа зӧлм кьрийә бьн дәсте хԝә у дьхԝазә щьмәʹта Йаһоԝа жи бькә бьн дәсте хԝә (Миха 4:1; Йуһʹәнна 15:19; Әʹйанти 12:12, 17). Мире-щьна занә, кӧ ԝәʹде ԝи һьндьк майә, ләма жи әԝ пәй һәр кәси жь мә дькʹәвә, ԝәки әм Хԝәдерʹа амьн нәминьн. Щарна Мире-щьна шәхси һʹьщуми сәр мә дькә, у гәләк щар һʹьщумкьрьнед ԝи бь фелбазийе нә.
8. Һәр Мәсиһи гәрәке чь фәʹм бькьн?
8 Әфәси 6:12-да әм хәбәред ӧса дьхуньн: «Шәрʹе мә . . . мьԛабьли ордийед рʹӧһʹанийә хьрабә ль дийаре әʹзмана нә». Шәйтʹан у щьнед ԝи һʹьщуми сәр һәр Мәсиһики кьрьнә. Әм гәрәке фәʹм бькьн, ԝәки әԝед кӧ хԝә тʹәсмили Йаһоԝа кьрьнә, ԝи шәрʹида ньн. Паԝлосе шанди, нәʹма хԝәйә Әфәсийарʹа, се щара һелане дьдә Мәсиһийа, ԝәки әԝана «ԛәԝин бьсәкьньн» (Әфәси 6:11, 13, 14).
9. Шәйтʹан у щьнед ԝи чь дьхԝазьн сәре мә бькьн?
9 Шәйтʹан у щьнед ԝи дьхԝазьн бь щурʹә-щурʹә метода мә бьхапиньн. Һәрге әм щерʹьбандьнәкеда сәркʹәтьнә, әԝ найе һʹәсабе, ԝәки әме сәд сәләфи щерʹьбандьнед дьнда жи тәйах кьн. Мире-щьна дьхԝазә бьвинә әм чьда сьст ьн у тʹәлька дайнә, кӧ мә бьгьрә. Ле әм дькарьн нәкʹәвьнә тʹәлькед ԝи, чьмки әм жь Кʹьтеба Пироз дәрһәԛа тʹәлькед Мире-щьна педьһʹәсьн (2 Корьнтʹи 2:11; бьньһерʹә Әʹламәтийа Зедә 31). Йәк жь ԝан тʹәлька сербази йә.
ХԜӘ ЖЬ ЩЬНА ДУР БЬГЬРӘ
10. а) Чь йә сербази? б) Йаһоԝа ча дьньһерʹә сәр сербазийе?
10 Сербази әԝ һәйә тʹәвгьредана тʹәви щьна, бь сайа һьнә тьшта, мәсәлә кʹочʹәкти, фәʹльквәкьрьн, бәньк-бутьк йан хәбәрдана тʹәви мьрийа. Кʹьтеба Пироз мәрʹа дьбежә, кӧ сербази «кʹьрет ә» у әм нькарьн һьн сербазийева мьжул бьн, һьн жи Йаһоԝарʹа хьзмәт кьн (Ԛануна Дӧщари 18:10-12; Әʹйанти 21:8). Мәсиһи гәрәке хԝә жь һʹәму щурʹә сербазийа дур бьгьрьн (Рʹомайи 12:9).
11. Һәрге тьштед сербазийе мәрʹа һʹәԝас бьн, әԝ йәк дькарә мә бәрбь чь бьвә?
11 Мире-щьна занә, кӧ һәрге дина мә һәрʹә сәр тьштед сербази, һьнге ԝирʹа ԝе дьһа һеса бә, мә бькә нава шьхӧлед сербазийе. Һʹәму щурʹә сербази, ԝе һәләԛәтийа мә тʹәви Йаһоԝа хьраб кьн.
МИРЕ-ЩЬНА ДЬХԜАЗӘ МӘ БЬХАПИНӘ
12. Мире-щьна дьхԝазә мә чьда бьдә баԝәркьрьне?
12 Мире-щьна дьхԝазә мәрьва бьхальфинә. Әԝ һеди-һеди шьке дькә дьле мәрьва, һʹәта кӧ мәрьв «жь хәрабрʹа дьбежьн ԛәнщ, жь ԛәнщрʹа дьбежьн хәраб» (Ишайа 5:20). Мире-щьна дьхԝазә мәрьва бьдә баԝәркьрьне, кӧ ширәтед жь Кʹьтеба Пироз бекер ьн у ԝәки әме дьһа бәхтәԝар бьн, һәрге нормед Хԝәде пьшт гӧһе хԝәва бавежьн.
13. Мире-щьна чь щурʹәйи шьк дькьрә дьла?
13 Метода Мире-щьна йа сәрәкә әԝ ә, кӧ шьке бькә дьле мә. Әԝ ида гәләк ԝәхт әве методе дьдә хәбате. Бахче Еденеда, Мире-щьна сәва кӧ шьке бькә дьле Һеԝайе, жь ԝе пьрси: «Рʹасти Хԝәде готийә ԝәки жь һʹәму даред бахчә гәрәке нәхԝьн?» (Дәстпебун 3:1). Ԝәʹдә шунда, рʹожед Ибода, Мире-щьна һәма бәр чʹәʹве мәләка пьрс да Йаһоԝа: «Ма Ибо жь щиһе вала жь Хԝәде дьтьрсә?» (Ибо 1:9). Мире-щьна, паши ньхӧмандьна Иса, пе хәбәред ӧса ԝи дьщерʹьбанд: «Һәгәр тӧ Кӧрʹе Хԝәде йи, дә бежә ван кәвьра кӧ бьбьнә нан» (Мәтта 4:3).
14. Мире-щьна сербазийе ча дьдә кʹьфше?
14 Рʹожа иройин жи, Мире-щьна бәрдәԝам дькә шьке бькә дьла. Әԝ һьнә щурʹед сербазийе ӧса дьдә кʹьфше, ча тьштәки һʹәԝас у бь ԝе йәке дьхԝазә, ԝәки мәрьв бьфькьрьн, кӧ сербазийеда тьштәки хьраб тʹӧнә. Һәла һе һьнә Мәсиһийа жи дәстпекьрьнә сәр ԝе йәке чʹәʹве хԝә дадьн (2 Корьнтʹи 11:3). Ле әм чь гәрәке бькьн, ԝәки хԝә жь ԝе йәке хԝәй кьн? Ча әм дькарьн избат бьн, ԝәки әм нәкʹәтьнә тʹәлька Мире-щьна? Ԝәрә дӧ дәрәща бьньһерʹьн, кʹижанада әм дькарьн бенә хапандьнә: ԝәʹдәдәрбазкьрьн у методед ԛәнщкьрьне.
МИРЕ-ЩЬНА ХԜӘСТЬНЕД МӘ МЬԚАБЬЛИ МӘ ДЬДӘ ХӘБАТЕ
15. Чаԝа бь сайа ԝәʹдәдәрбазкьрьна, әм дькарьн бькʹәвьнә нава сербазийе?
15 Рʹожа иройин гәләк синәм, видео, бәрнамед телевизийоне, листькед сәр компӧтәре у малпәред интернете тʹьжә нә бь сербазийе, кʹочʹәктийе у ԛәԝатед нәтʹәбийәти. Гәләк мәрьв сәр ԝе йәке дьньһерʹьн, ча сәр тьштәки нормал у нә жи фәʹм дькьн, ԝәки изьне дьдьнә щьна, ԝәки сәр әʹмьре ԝан һʹӧкӧм кьн. Мәрьв дькарә тьштед щьнава бе гьредане бь сайа һороскопе, фәʹльквәкьрьна бь карта, ньһерʹандьна сәр ԛаһԝәйе у дәста. Мире-щьна ӧса дькә, ԝәки әԝ тьшт һʹәԝас у бехоф бенә кʹьфше. Мәрьв ӧса жи дькарьн бьфькьрьн, ԝәки хофи ԝе йәкеда тʹӧнә, һәрге тьштед щьнава гьредайи бьньһерʹьн, чьмки әԝана хԝәха ԝан тьшта накьн. Чьма фькьред ӧса хоф ьн? (1 Корьнтʹи 10:12).
16. Чьма әм гәрәке хԝә жь ԝәʹдәдәрбазкьрьнед сербазийева гьредайи, дур бьгьрьн?
16 Шәйтʹан у щьнед ԝи ньзаньн әм дәрһәԛа чь дьфькьрьн. Ле пе шьхӧл у сафикьрьнед мәйә дәрһәԛа ԝәʹдәдәрбазкьрьна, дькарьн тедәрхьн чь мә хԝәш те. Ӧса жи чахе әм дьжберьн синәма, кʹьлама, кʹьтебед кʹочʹәктийе, бәньк-бутьк, у тьштед дьнә щьнава гьредайи, һьнге Шәйтʹан у щьнед ԝи дькарьн тедәрхьн, ԝәки әв тьшт мәрʹа һʹәԝас ьн. Ԝи чахи әԝана ԝе бьхԝазьн һе зедә мә бькьнә нава сербазийе. (Бьхунә Галати 6:7.)
17. Мире-щьна ча дькарә һʹӧкӧм кә сәр хԝәстьна мә, ԝәки сьһʹәт-ԛәԝат бьн?
17 Мире-щьна ӧса жи дькарә сәр мә һʹӧкӧм кә, бь хԝәстьна мәйә сьһʹәт-ԛәԝат бьн. Рʹожа иройин гәләк мәрьв жь бо нәхԝәшийа дьчәрчьрьн. Дьԛәԝьмә мәрьв гәләк щурʹә ԛәнщкьрьн щерʹьбандийә, ле ԛәнщ нәбуйә (Марԛос 5:25, 26). Жь бо ԝе йәке, әԝ дькарә ӧса дьлтәнг бә, ԝәки сәр һʹәму щурʹед ԛәнщкьрьне жи ԛайил бә. Ле әм, ча Мәсиһи, гәрәке фәсал бьн, ԝәки тʹәви методед ԛәнщкьрьнейә сербазийева гьредайи, ԛайил нәбьн (Ишайа 1:13).
Итʹбарийа хԝә Йаһоԝа бинә чахе тӧ нәхԝәш и
18. Жь кʹижан методед ԛәнщкьрьне Мәсиһи гәрәке хԝә дур бьгьрә?
18 Ԝәʹде Исраелед бәре, һәбун мәрьвед ӧса кӧ сербазийева мьжул дьбун. Йаһоԝа дьготә ԝан: «Дәма һун дәстед хԝә вәкьн, әзе чʹәʹвед хԝә жь ԝә вәшерьм; дәма һун заһф дӧайан бькьн жи әзе гӧһдари нәкьм» (Ишайа 1:15). Һәла бьдә бәр чʹәʹве хԝә, ԝәки Йаһоԝа нә жи дьхԝәст гӧһ бьда дӧайед ԝан! Әм нахԝазьн тьштәки ӧса бькьн, чь кӧ ԝе һәләԛәтийа мә тʹәви Йаһоԝа хьраб кә у рʹийа ԝи бьгьрә али мә бькә, илаһи гава әм нәхԝәш ьн (Зәбур 41:3). Пешийа кӧ метода ԛәнщкьрьне бьжберьн, әм гәрәке леколин кьн, һәла әԝ метод сербазийева у ԛәԝата нәтʹәбийәтива гьредайи нинә (Мәтта 6:13). Һәрге гьредайи йә, демәк әм гәрәке хԝә жь ԝе методе дур бьгьрьн! (Бьньһерʹә Әʹламәтийа Зедә 32.)
СӘРҺАТИЙЕД ЩЬНАВА ГЬРЕДАЙИ
19. Мире-щьна чь дькә, ԝәки гәләк мәрьв ԝи бьтьрсьн?
19 Һьнә мәрьв дьфькьрьн кӧ Шәйтʹан у щьнед ԝи кәсед рʹеали ниньн, ле һьнәк жь ԛәԝьмандьнед әʹмьре хԝәда заньн, ԝәки әԝана рʹеали нә. Гәләк мәрьв бьн тьрса рʹӧһʹед хьрабда дьжин у бунә диле әʹйд-ԛәйда. Ле һьнәк жи тьрсе дькьнә дьле мәрьва бь ԝе йәке, кӧ гьли дькьн щьн чь сәре мәрьва дькьн. Гәләк щар сәрһатийед ӧса һʹәԝаса мәрьва пешда тиньн, у әԝана һелан дьбьн дәрһәԛа ԝе йәке мәрьвед дьнрʹа жи гьли кьн. Сәрһатийед ԝи щурʹәйи тьрса Мире-щьна дькьнә сәр мәрьва.
20. Чаԝа дькарә ӧса бьԛәԝьмә, ԝәки әм дәрәԝед Мире-щьна бәла кьн?
20 Бьфькьрә дәрһәԛа ԝе йәке, ԝәки Мире-щьна дьхԝазә, кӧ мәрьв ԝи бьтьрсьн (2 Тʹесалоники 2:9, 10). Әԝ йәки дәрәԝин ә у занә ча һʹӧкӧм кә сәр ԝан мәрьва, йед кӧ һʹәԝаса хԝә һьндава сербазийе пешда тиньн. У әԝ дькарә ӧса бькә, ԝәки мәрьв баԝәрийа хԝә ԝан тьшта бинә, чь кӧ нәрʹаст ьн. Әԝ мәрьв дькарьн гьли кьн дәрһәԛа ԝан тьшта, чь кӧ бь тʹәхмина ԝан, ԝана дитийә йан бьһистийә. Әԝана чьԛас щар гьли дькьн, һаԛас щар жи тьшта сәрда зедә дькьн. Әм нахԝазьн ԝе йәкеда пьштгьрийа Мире-щьна бькьн, кӧ бь ԝан сәрһатийа, тьрса ԝи бькьнә сәр мәрьва (Йуһʹәнна 8:44; 2 Тимотʹейо 2:16).
21. Дәԝса кӧ дәрһәԛа сәрһатийед щьна хәбәр дьн, әм гәрәке дәрһәԛа чь хәбәр дьн?
21 Һәрге йәк жь Шәʹдед Йаһоԝа хԝәха рʹасти дәрәщәкә щьнава гьредайи һатийә, әԝе, сәва ԝәʹдә тʹәви һәвала һʹәԝас дәрбаз кә, сәрһатийед щьнава гьредайи гьли нәкә. Щьмәʹта Йаһоԝа гәрәке Шәйтʹан у щьнед ԝи нәтьрсьн. Ле дәԝсе әм гәрәке дина хԝә бьдьнә сәр Иса у ԛәԝата, кӧ Йаһоԝа дайә ԝи (Ибрани 12:2). Иса шагьртед хԝәрʹа сәрһатийед дәрһәԛа щьна гьли нәдькьр. Әԝи дина хԝә дьда мьзгинийа дәрһәԛа Пʹадшатийе у сәр «кьред Хԝәдейә мәзьн» (Кʹаред Шандийа 2:11; Луԛа 8:1; Рʹомайи 1:11, 12).
22. Әм чь сафикьрьна гәрәке бькьн?
22 Бьра тʹӧ щар бира мә нәчә, ԝәки нета Мире-щьна әԝ ә, ԝәки һәләԛәтийа мә тʹәви Йаһоԝа хьраб кә. Әԝ һʹәму мәщала дьдә хәбате, сәва кӧ нета хԝә бинә сери. Әм заньн, ԝәки Мире-щьна гәләк метода дьдә хәбате, у әм хԝә дур дьгьрьн жь һәр тьштед щьнава гьредайи. Әм гәрәке «щи нәдьнә Мирещьн», кӧ амьнийа мә сьст кә. (Бьхунә Әфәси 4:27.) Бәле һәрге әм пешбәри Мире-щьна дәрен, әме бькарьбьн хԝе жь тʹәлькед ԝи дур бьгьрьн у бьн пʹәре Йаһоԝада бенә хԝәйкьрьне (Әфәси 6:11).