1, 2. Йаһоԝа чь тʹәхмин дькә, чахе дьвинә ԝәки әм бь дьл у щан ԛәԝате дьдьнә хәбате, сәва кӧ рʹаст у һʹәлал бьн?

 РʹОЖӘКЕ гәдәк жь мәкʹтәбе вәдьгәрʹә мал, кʹиськәк тʹьжә пʹәрә әʹрде дьвинә. Гәло әԝе чь бькә? Әԝ дькарә хԝәрʹа бьһелә. Ле әԝ ӧса накә, әԝ кʹиськ дьдә хԝәйи. Чахе дийа ԝи гәдәйи әԝе йәке педьһʹәсә, әԝ зарʹа хԝәрʹа гәләк фьрнаԛ дьбә.

² Гәләк де-бав ша дьбьн, чахе зарʹед ԝан рʹаст у һʹәлал ьн. Баве мәйи әʹзмана Йаһоԝа, «Хԝәдейе амьнийе», жи ша дьбә чахе дьвинә, ԝәки әм рʹаст у һʹәлал ьн (Зәбур 31:5). Әм дьхԝазьн «һәр тьшти рʹаст бькьн», ԝәки әԝ мә ԛәбул кә (Ибрани 13:18). Ԝәрә әм шеԝьр кьн чар дәрәщед ӧса, нав кʹижанада һʹәлалийа мә дькарә бе щерʹьбандьне. Паше әме пебьһʹәсьн, кӧ әм чь кʹаре дькарьн бьстиньн, һәрге ԝан дәрәщада рʹаст у һʹәлал бьминьн.

3-5. а) Чаԝа әм дькарьн һьндава хԝә нәһʹәлал бьн? б) Чь дькарә али мә бькә һʹәлал у рʹаст бьн һьндава хԝә?

³ Һәрге әм дьхԝазьн һьндава мәрьва рʹаст у һʹәлал бьн, бәри пешьн әм гәрәке һьндава хԝә ӧса бьн. Ле  әԝ йәк тʹьме һеса нинә. Ԛьрна йәкеда хушк-бьред жь щьвата Лаԝдькйа хԝәха хԝә дьхапандьн бь фькьред ӧса, ԝәки Хԝәде ԝанарʹа рʹази йә, ле бь рʹасти әԝ йәк ӧса нибу (Әʹйанти 3:17). Әм жи дькарьн бь ԝи щурʹәйи хԝә бьхапиньн, бьфькьрьн кӧ әм мәрьвнә гәләк баш ьн.

⁴ Аԛубе шагьрт дьгот: «Һәгәр йәк хԝә хԝәденас һʹәсаб дькә у зьмане хԝә нькарә, әԝ хԝәха хԝә дьхапинә, хԝәденасийа ԝи пʹучʹ ә» (Аԛуб 1:26). Кʹи кӧ зьмане хԝә нькарә, дәрәԝа дькә, бәрзәԛ ә, ԛәрфе хԝә мәрʹьва дькә у дьфькьрә, ԝәки Хԝәде диса жи хьзмәткьрьна ԝи ԛәбул дькә, бь ве йәке әԝ хԝәха хԝә дьхапинә. Чь дькарә али мә бькә нәхапьн?

⁵ Чахе әм хԝә нәйникеда дьньһерʹьн, әм дькарьн хԝә рʹува бьвиньн. Ле чахе әм Кʹьтеба Пироз дьхуньн, әм дькарьн бьвиньн бь рʹасти әм мәрьвнә чь щурʹәйи нә. Кʹьтеба Пироз дькарә али мә бькә, ԝәки әм бьвиньн чьда лазьм ә хԝә бьгӧһезьн. Әм һин дьбьн, ԝәки чь гӧһастьна бькьн кьред хԝәда, ӧса жи фькьр у хәбәрдана хԝәда. (Бьхунә Аԛуб 1:23-25.) Ле һәрге әм хԝәрʹа дьбежьн, ԝәки тʹӧ кемасийа мә тʹӧнә, ԝи чахи әме нькарьбьн гӧһастьнед лазьм бькьн. Ләма жи мәрʹа лазьм ә Кʹьтеба Пироз леколин кьн, сәва кӧ рʹаст у һʹәлал дина хԝә бьдьнә сәр һʹӧнӧред хԝә (Луринед Йерʹәмйа 3:40; Һагай 1:5). Ӧса жи дӧа ԝе али мә бькә бьвиньн бь рʹасти әм мәрьвнә чь щурʹәйи нә. Дӧайед хԝәда әм дькарьн жь Йаһоԝа бьхԝазьн, ԝәки әԝ нишани мә бькә у аликʹарийе бьдә мә, ԝәки кемасийед хԝә бьвиньн у хԝә рʹаст кьн (Зәбур 139:23, 24). Әм заньн, ԝәки «мәрьве ԛәлп, ль бәр чʹәʹве Хӧдан зьвер ә, ле бәле Әԝ һәвале сьтԛе дьле рʹаст ә» (Мәтʹәлок 3:32).

6. Чьрʹа жьн у мер гәрәке һьндава һәв рʹаст у һʹәлал бьн?

⁶ Гәләк фәрз ә малбәта хԝәда рʹаст у һʹәлал бьн. Кʹәнге жьн у мер һьндава һәв һʹәлал ьн, әԝана хԝә аза тʹәхмин дькьн у һеса дькарьн итʹбарийа хԝә һәвдӧ биньн. Нәһʹәлали зәԝащеда дькарә бь щурʹә-щурʹә метода бе әʹйанкьрьне. Мәсәлә, жьн йан мер дькарә дәстпекә тʹәви кәсәки бькʹәвә флирте, йан порнографийе бьньһерʹә, йан жи дьзива бькʹәвә һәләԛәтийа рʹомантик тʹәви кәсәки дьн. Дина хԝә бьдә, Зәбурбеж чь дьбежә: «Әз тʹәви дәрәԝина рʹунаним у тʹәви дӧрʹуйа рʹе начьм» (Зәбур 26:4). Һәрге һәла һе фькьрада жи тӧ һәвалзәԝаще хԝәрʹа нәамьн би, әԝ йәк дькарә зийане бьдә зәԝаща тә.

7, 8. Ча тӧ дькари бь сайа Кʹьтеба Пироз зарʹа һин ки, ԝәки әԝана һʹәлал бьн?

 ⁷ Ӧса жи лазьм ә зарʹа һин кьн, ԝәки гәләк фәрз ә кӧ әԝана жи рʹаст у һʹәлал бьн. Де-бав әԝе йәке бь сайа Кʹьтеба Пироз гәрәке зарʹед хԝә һин кьн. Әԝана дькарьн гьли кьн дәрһәԛа ԝан мәрьва, йед кӧ нәамьн бун, мәсәлә: Акʹане, кӧ дьзи кьр; Гәһази, йе кӧ дәрәԝ кьр сәва пʹәра бьстинә; Щьһудайе Исхәрйоти, йе кӧ пʹәра дьдьзийа у сәва 30 зиви бьстинә, нәмамийа Иса кьр (Йешу 6:17-19; 7:11-25; 2 Пʹадшати 5:14-16, 20-27; Мәтта 26:14, 15; Йуһʹәнна 12:6).

⁸ Кʹьтеба Пирозда ӧса жи те готьне дәрһәԛа гәләк мәсәлед ԝан мәрьва, йед кӧ һʹәлал бун, мәсәлә: Аԛуб кьрә сәр кӧрʹед хԝә, ԝәки әԝана пʹәре дити пашда вәгәрʹиньн; Йәфтаһ у ԛиза ԝи, созе кӧ дабунә Хԝәде, анинә сери; у Иса Хԝәдерʹа амьн ма, һәла һе дәрәщед чәтьнда жи (Дәстпебун 43:12; Һʹакьмти 11:30-40; Йуһʹәнна 18:3-11). Әԝ мәсәлә дькарьн али зарʹа бькьн, ԝәки әԝана фәʹм кьн, кӧ чьԛас фәрз ә рʹаст у һʹәлал бьн.

9. Һәрге де-бав рʹаст у һʹәлал ьн, әԝ йәк ча дькарә али зарʹа бькә?

⁹ Де-бав дькарьн жь ԝе принсипа Кʹьтеба Пироз тьштәки фәрз һин бьн: «Ле бәле аԝа тӧ кӧ һәвале хԝә һин дьки, хԝәха хԝә һин наки? Даннасин дьки, кӧ нәдьзьн, ле тӧ дьдьзи?» (Рʹомайи 2:21). Зарʹ тедәрдьхьн, чахе де-бав тьштәки дьбежьн, ле щурʹәки дьн дькьн. Һәрге әм зарʹед хԝәрʹа дьбежьн, кӧ әԝана гәрәке һʹәлал у рʹаст бьн, ле хԝәха әԝе йәке накьн, ԝи чахи зарʹ хьраб һин дьбьн. Кʹәнге зарʹ дьбиньн, ԝәки де-баве ԝан һәла һе тьштед бьчʹукда жи дәрәԝа дькьн, әԝана жи ԝе дәстпекьн ӧса бькьн. (Бьхунә Луԛа 16:10.) Ле һәрге зарʹ жь мәсәла де-бавайә баш, рʹастийе у һʹәлалийе һин дьбьн, әԝ йәк  дькарә кʹаре ԝанрʹа бинә, чахе әԝана хԝәха бьбьнә де-бав (Мәтʹәлок 22:6; Әфәси 6:4).

10. Чаԝа әм дькарьн хәбәрданеда һьндава хушк-бьра һʹәлал бьн?

¹⁰ Әм ӧса жи гәрәке рʹаст у һʹәлал бьн һьндава хушк-бьред хԝәйә Мәсиһи. Хәбәра мәйә һәр рʹожи һеса дькарә дәрбази гәвәзтийе йан бӧхдана бә. Һәрге әм тьштәки дьбежьн, ле ньзаньн әԝ йәк рʹаст ә йан на, ԝи чахи әм дькарьн дәрәԝа бәла кьн. Ләма жи дьһа баш ә, әм зьмане хԝә бькарьбьн (Мәтʹәлок 10:19). Сәва кӧ әм рʹаст у һʹәлал бенә һʹәсабе, әʹсә нинә әм бежьн дәрһәԛа ԝан һʹәму тьшта, чь кӧ дьфькьрьн, заньн йан пеһʹәсийанә. Хенщи ве йәке, чь кӧ әм дьбьһен, һәрге рʹаст бә жи, әԝ нә шьхӧле мә йә у әʹсәйи нинә әԝе йәке гьли кьн (1 Тʹесалоники 4:11). Һьнә мәрьв бәрзәԛбуна хԝә һәԛ дәрдьхьн бь ве готьне: «Әз рʹаст у һʹәлал ьм». Ле хьзмәткʹаред Йаһоԝа һәртʹьм дьхԝазьн, ԝәки хәбәрдана ԝан мәʹрифәти у ԛәнщ бә. (Бьхунә Колоси 4:6.)

11, 12. а) Чаԝа мәрьве кӧ гӧнә кьрийә, дькарә дәрәща хԝә дьһа хьраб кә, һәрге нә һʹәлал бә? б) Кʹижан пьрс әм гәрәке һьлдьн һʹәсаб? в) Чаԝа әм дькарьн рʹаст у һʹәлал бьн һьндава тʹәшкиләта Йаһоԝа?

¹¹ Йаһоԝа рʹуспи кʹьфш кьрьнә, ԝәки әԝана аликʹарийе бьдьнә щьвате. Чахе әм тʹәви рʹуспийа рʹаст у һʹәлал ьн, ԝи чахи ԝанарʹа һе һеса дьбә али мә бькьн. Гәло чьрʹа? Һәрге тӧ нәхԝәш кʹәти у чуйи бал һʹәким, сәва кӧ әԝ али тә бькә, гәло тӧйе нишанед нәхԝәшийа хԝә жь ԝи вәшери? Һәрге вәшери, әԝе ча али тә бькә? Ӧса жи һәрге мә шашикә мәзьн кьрийә, әм гәрәке вәнәшерьн. Дәԝса ԝе йәке әм гәрәке һәрʹьн щәм рʹуспийа, ԝанарʹа һʹәму тьшти рʹаст у һʹәлал бежьн (Зәбур 12:2; Кʹаред Шандийа 5:1-11). Ньһа  бьдьнә бәр чʹәʹве хԝә дәрәщәкә дьн: Тӧ чь гәрәке бьки һәрге пебьһʹәси, ԝәки һәвале тә шашикә мәзьн кьрийә? (Ԛануна Кʹаһинтийе 5:1). Дьбәкә тӧйе бежи: «Һәрге әз бь рʹасти һәвале ԝи мә, әз гәрәке шашийа ԝи вәшерьм?» Йан тӧйе бини бира хԝә, ԝәки рʹуспи һазьр ьн али ԝи бькьн, сәва әԝ һәләԛәтийа хԝә тʹәви Йаһоԝа вәгәрʹинә у ԛәԝи кә (Ибрани 13:17; Аԛуб 5:14, 15).

¹² Ӧса жи әм гәрәке рʹаст у һʹәлал бьн һьндава тʹәшкиләта Йаһоԝа, чахе һʹәсабед хԝә дьньвисьн, бәʹса хәбәре, һʹәсабе хьзмәтийа хԝә. У ӧса жи әм гәрәке рʹаст у һʹәлал бьн, чахе әʹрза бона пешәнга йан әʹрзед дьн тʹьжә дькьн. (Бьхунә Мәтʹәлок 6:16-19.)

13. Чаԝа әм дькарьн рʹаст у һʹәлал бьн, чахе тʹәви хушк-бьра дьхәбьтьн?

¹³ Хушк-бьред Мәсиһи, гәрәке шьхӧлед хәбате тʹәви һʹәбандьна Йаһоԝа нәхьн. Мәсәлә, чахе әм Ода Пʹадшатийеда, йан хьзмәтийеда ньн, әм шьхӧлед кӧ хәбата мәва гьредайи йә накьн. У ӧса жи әм гәрәке сәва кʹара хԝә хушк-бьра нәдьнә хәбате. Һәрге тӧ хушк йан бьра бал хԝә дьди хәбате, тӧ гәрәке һәԛе хәбате һаԛас бьди, чьԛас кӧ пешда ԝә хәбәр дабу, у гәрәке ԝан һʹәму борщдарийа бьԛәдини, кʹижан бь ԛануне жь тә те хԝәстьне. Мәсәлә, пʹәре ԛәнщкьрьна ԝан бьдьн йан жи кʹәнге изьна ԝан һәйә һәрʹьн һеса бьн, ԝи чахи һәԛе ԝан кем нәкьн (1 Тимотʹейо 5:18; Аԛуб 5:1-4). У ӧса жи һәрге тӧ бал Шәʹде Йаһоԝа дьхәбьти, һивийе нибә, ԝәки әԝе һьндава тәда бь щурʹе мәхсус бә (Әфәси 6:5-8). Әм гәрәке һәр тьшти бькьн, ԝәки хәбата хԝә ԝәʹдәда дәстпекьн у ԝәʹдәда хьлаз кьн, у борщдарийа хԝә бь тʹәмами бьԛәдиньн, сәва чь жи әм һәԛе хԝә дьстиньн (2 Тʹесалоники 3:10).

14. Мәсиһи чь гәрәке бькьн, пешийа кӧ дәстпекьн тʹәвайи бизнесе бькьн?

 ¹⁴ Ле чь әм гәрәке бькьн, чахе тʹәви хушк-бьред Масиһи бизнесе вәдькьн? Дькʹәвә нава ԝе йәкеда ӧса жи әԝ, кӧ әм пʹәра дәйни дьдьн, йан жи дәйни һьлдьдьн. Дәрһәԛа дәрәщед ӧса, Кʹьтеба Пирозда принсипәкә фәрз те дайине: Бьра һʹәму тьшт бе ньвисаре! Чахе Йерʹәмийа әʹрд кʹьри, әԝи әԝ кʹьрин-фьротан сәр дӧ кʹахаза ньвиси, сәр кʹахазәке шәʹда ԛоле хԝә данин. Әԝи әв һәрдӧ кʹахаз хԝәй кьр, ԝәки чахе лазьм бә, бьдә хәбате (Йерʹәмйа 32:9-12; ӧса жи бьньһерʹә Дәстпебун 23:16-20). Һьнәк дьфькьрьн, һәрге әԝана бона һәр шьхӧләкә пʹәрава гьредайи дьхԝазьн, ԝәки хушк-бьра ԛоле хԝә дайньн, ӧса дькарә бе кʹьфше, кӧ әԝана итʹбарийа хԝә хушк-бьра найньн. Ле бь рʹасти, гавәкә ӧса дькарә мә хԝәй кә жь нәфәʹмдарийе, жь хәмгинийе у дӧдьлибуне. Бир нәкә, ԝәки әʹдьлайа мә тʹәви хушк-бьред мәйә рʹӧһʹани, жь шьхӧле бизнеса мә дьһа фәрзтьр ә (1 Корьнтʹи 6:1-8; бьньһерʹә Әʹламәтийа Зедә 30).

15. Йаһоԝа ча дьньһерʹә сәр ԝе йәке, ԝәки мәрьв арш-вершийеда ԛәлпийе дькә?

¹⁵ Әм гәрәке рʹаст у һʹәлал бьн һьндава һʹәмуйа, фьрԛи тʹӧнә әԝана Шәʹдед Йаһоԝа нә йан на. Бона Йаһоԝа гәләк фәрз ә, ԝәки әм рʹаст у һʹәлал бьн. «Мезина ԛәлп ль бәр Хӧдан һʹәрами йә, ле мезина рʹаст ль Ԝи хԝәш те» (Мәтʹәлок 11:1; 20:10, 23). Ԝәʹде бәре, мезин дьданә хәбате сәва кʹьрин-фьротане. Ле һьнә базьргана мәрьв дьхапандьн бь ԝе йәке, кӧ тьшт кем дьданә ԝан, йан жи гәләк бьһа дьфьротьн. Рʹожа иройин жи мина ԝәʹде бәре, ԛәлпи тьштәки нормал те һʹәсабе. Йаһоԝа ча ԝәʹде бәре, ӧса жи рʹожа иройин ԛәлпийе нәфрʹәт дькә.

16, 17. Әм гәрәке хԝә жь чь щурʹә ԛәлпийе дур бьгьрьн?

 ¹⁶ Һәр мәрьв дькарә рʹасти дәрәщәкә ӧса бе, ԝәки һʹәлалийа ԝи бе щерʹьбандьне, мәсәлә, чахе әм кʹахаза сәва хәбате бьстиньн, йан йа бона хәрщдайине тʹьжә дькьн, йан жи чахе мәкʹтәбеда егзамина дьдьн. Гәләк мәрьв баԝәр дькьн, ԝәки тьштәки хьраб ԝе йәкеда тʹӧнә, кӧ дәрәԝа бькьн, тьштәки зедә кьн, йан щабед ӧса бьдьн, кӧ мәрьва бьхальфиньн. Әԝ йәк мә әʹщебмайи накә. Кʹьтеба Пироз пʹехәмбәрти кьрийә, ԝәки рʹожен ахьрийеда мәрьв ԝе бьбьнә «хԝәһʹьз, пʹәрәһʹьз . . . нәйаред ԛәнщийе» (2 Тимотʹейо 3:1-5).

¹⁷ Щарна ӧса дькарә бе кʹьфше, ԝәки мәрьвед ԛәлп ԝе дьнеда һе пешдачуйи нә (Зәбур 73:1-8). Жь бо һʹәлалийа хԝә Мәсиһи дькарә хәбата хԝә ӧнда кә, алийе пʹәрада бе хапандьне, йан жи сәр хәбате нәһәԛийе ль ԝи бькьн. Ле рʹасти у һʹәлали жь һәр ԛӧрбанәке четьр ә. Чьма?

18. Чьма наве баш ӧса ԛимәт ә?

¹⁸ Рʹожа иройин һьндьк ьн мәрьвед рʹаст, һʹәлал у бь итʹбар. Мәщала мә һәр кәси һәйә, ԝәки навәки ӧса хԝәрʹа ԛазанщ кьн (Миха 7:2). Һьнә мәрьв дьбәкә сәр ԝә бькʹәньн у ԝә ча мәрьве геж һʹәсаб кьн, чьмки һун мәрьвнә рʹаст у һʹәлал ьн. Ле һьнәк ԝе жь бо һʹәлалийа ԝә, итʹбарийа хԝә ԝә биньн у ԝә гәләк ԛимәт кьн. Сәр тʹәмамийа дьнйайе, Шәʹдед Йаһоԝа тенә наскьрьне ча мәрьвнә рʹаст у һʹәлал. Гәләк мәзьнед хәбате дьхԝазьн, ԝәки Шәʹдед Йаһоԝа бал ԝан бьхәбьтьн, чьмки заньн әԝана рʹаст у һʹәлал ьн. Чахе хәбатчийед дьн жь бо ԛәлпийа хԝә хәбата хԝә ӧнда дькьн, ԝи чахи Шәʹдед Йаһоԝа хәбатеда дьминьн.

19. Рʹасти у һʹәлали ча дькарә сәр һәләԛәтийа тә тʹәви Йаһоԝа һʹӧкӧм кә?

 ¹⁹ Һәрге тӧ рʹаст у һʹәлал би, исафа тә ԝе тʹәмьз бә у тӧйе әʹдьлайа дьл бьстини. Әм дькарьн чʹәʹв бьдьнә Паԝлос, йе кӧ дьгот: «Әм әʹсәйи заньн кӧ исафа мә рʹьһʹәт ә» (Ибрани 13:18). Йа лапә фәрз әԝ ә, кӧ Баве мәйи бь һʹьзкьрьн, Йаһоԝа, ԝе бьвинә, ԝәки тӧ ԛәԝате дьди хәбате, сәва кӧ һʹәму тьштида рʹаст у һʹәлал би, у әԝе щәфе тә ԛимәт кә. (Бьхунә Зәбур 15:1, 2; Мәтʹәлок 22:1.)