1, 2. Чь әм гәрәке бькьн, сәва кӧ нава һʹьзкьрьна Хԝәдеда бьминьн?

 ӘМ ГЬШК жи дьхԝазьн сьһʹәт-ԛәԝат бьн. Ләма жи әм хԝарьна керһати дьхԝьн, спортева мьжул дьбьн у бона бәдәна хԝә хәм дькьн. Рʹаст ә, сәва ԝе йәке лазьм ә ԛәԝате бьдьнә хәбате, ле ахьрийа ԝе йәке шабун ә. Әм ӧса жи гәрәке тьштәки дьнда сьһʹәт-ԛәԝат бьн.

² Дьбәкә мә гәләк гавед баш авитийә сәва Йаһоԝа рʹьнд нас кьн, ле диса жи әм гәрәке бәрдәԝам кьн ԛәԝате бьдьнә хәбате, ԝәки һәләԛәтийа хԝә тʹәви ԝи дьһа незик кьн. Чахе Щьһуда дьготә Мәсиһийа, ԝәки «хԝә нава ԝе һʹьзкьрьна Хԝәдейә һьндава хԝәда хԝәй кьн», әԝи ӧса жи кʹьфш кьр ча әԝе йәке бькьн. Әԝи готә ԝан: «Хԝә бьдьнә сәр авакьрьна баԝәрийа хԝәйә пироз» (Щьһуда 20, 21). Ле әм ча дькарьн баԝәрийа хԝә ава кьн, демәк ԛәԝи кьн?

3-5. а) Мире-щьна дьхԝазә, ԝәки тӧ ча бьньһерʹи сәр нормед Йаһоԝа? б) Ча тӧ дьньһерʹи сәр ԛанун у принсипед Йаһоԝа?

³ Гәләк фәрз ә, ԝәки тӧ хԝәха избат би кӧ рʹийа Йаһоԝа йа лапә баш ә. Мире-щьна дьхԝазә тә бьдә  баԝәркьрьне, ԝәки нормед Йаһоԝа гәләк чәтьн ьн, у нә һеса йә пе ԝан норма бьжин. Әԝ ӧса жи дьхԝазә мә бьдә баԝәркьрьне, ԝәки мәрьв ԝе дьһа бәхтәԝар дьбә, һәрге хԝәха сафи дькә чь бона ԝи баш ә у чь на. Мире-щьна һәла һе жь ԝәʹде бахче Еденеда дьхԝәст, ԝәки мәрьв ԝе йәке баԝәр кьн (Дәстпебун 3:1-6). Һʹәта рʹожа иро жи, әԝ дьхԝазә әԝе нета хԝә бинә сери.

⁴ Ле Мире-щьна рʹаст ә? Гәло нормед Йаһоԝа гәләк сәрт ьн? На. Бьдә бәр чʹәʹве хԝә, ԝәки тӧ бахчәки бәдәԝда дьгәрʹи у сурәкә бьльнд дьвини, йа кӧ рʹийа тә дьгьрә, ԝәки дәрбази щики дьн би. Дьбәкә тӧ дьшьрмиш би, «Чьма әԝ сур рʹийа мьн дьгьрә?» Ле ԝи чахи тӧ мьрʹә-мьрʹа шер дьбьһейи, йе кӧ пьшт суре йә. Гәло ньһа тӧйе чь бьфькьри дәрһәԛа ԝе суре? Тӧйе рʹази би, кӧ әԝ сур тә хԝәй дькә, ԝәки нәби хӧре шер! Принсипед Йаһоԝа мина ԝе суре нә, ле Мире-щьна мина шер ә. Хәбәра Хԝәде дьбежә: «Сәрԝахт бьн, һʹьшйар бьминьн! Мирещьне нәйаре ԝә мина шер мьрʹә-мьрʹа ԝи йә, дьгәрʹә кʹа кʹе һʹуфи хԝә кә» (1 Пәтрус 5:8).

⁵ Йаһоԝа дьхԝазә, ԝәки әм бь әʹмьре лапи баш бьжин. Әԝ нахԝазә, ԝәки Мире-щьна мә бьхапинә. Ләма жи әԝи ԛанун у принсип данә мә, йе кӧ мә хԝәй дькьн у дьһа бәхтәԝар дькьн (Әфәси 6:11). Аԛуб ньвиси: «Ле әԝе кӧ чʹәʹве хԝә жь ԛануна кʹамьлә кӧ аза дькә набьрʹә у нава ԝеда дьминә . . . әԝ ԝан кьрьнед хԝәда хԝәзьли йә» (Аԛуб 1:25).

6. Ча әм дькарьн избат бьн, ԝәки рʹебәрийед Йаһоԝа лапи баш ьн?

⁶ Чахе әм пе рʹебәрийа Йаһоԝа дьжин, ԝи чахи әʹмьре мә баш дьбә у һәләԛәтийа мә тʹәви ԝи ԛәԝи дьбә. Мәсәлә, әм кʹаре дьстиньн чахе ԛәбул дькьн тʹәглифкьрьна Хԝәде, кӧ һәр гав ԝирʹа дӧа бькьн  (Мәтта 6:5-8; 1 Тʹесалоники 5:17). Ӧса жи әм гәләк бәхтәԝар дьбьн, чахе тиньн сери ве тʹәмийа Йаһоԝа, ԝәки тʹәвайи тʹоп бьн сәва кӧ Ԝи бьһʹәбиньн у һелане бьдьнә һевдӧ, ӧса жи бь тʹәмами шьхӧлкʹарийе бькьн бәлакьрьна мьзгинийеда (Мәтта 28:19, 20; Галати 6:2; Ибрани 10:24, 25). Чахе әм дьфькьрьн дәрһәԛа ԝе йәке, кӧ ча әв һʹәму тьшт али мә дькьн, ԝәки әм баԝәрийеда ԛәԝи бьминьн, ԝи чахи әм дьһа избат дьбьн, ԝәки рʹебәрийед Йаһоԝа лапи баш ьн.

7, 8. Чь дькарә али мә бькә, ԝәки әм бәр хԝә нәкʹәвьн сәва щерʹьбандьнед, кӧ дькарьн ахьрийе бьԛәԝьмьн?

⁷ Дьԛәԝьмә әм бәр хԝә дькʹәвьн, ԝәки ахьрийеда баԝәрийа мә ԝе ԛайим бе щерʹьбандьне. Һәрге фькьред ӧса тенә һʹьше тә, әԝан хәбәред Йаһоԝа бинә бира хԝә: «Әз Йаһоԝа, Хԝәдайе тә мә, кʹижан кӧ  тьштед ԛәнщ тә һин дькә у ве рʹерʹа тә дьбә, ль сәр кʹижани тӧ гәрәке һәрʹи. Хԝази тә гӧһ бьда ԛанунед мьн! Һьнге ԝе әʹдьлайа тә мина чʹем буйа у рʹастийа тә мина пʹелед бәʹре» (Ишайа 48:17, 18, ДТʹ).

⁸ Чахе әм гӧрʹа Йаһоԝада дьминьн, әʹдьлайи дьле мәда мина чʹем ә, йа кӧ ԝе тʹӧ щар зьһа нәбә, у рʹастийа мә ԝе мина пʹелед бәʹре бә, йа кӧ һәртʹьм дәве бәʹре тʹәмьз дькә. Әʹмьре мәда чь жи бьԛәԝьмә, әм дькарьн амьнийа хԝә хԝәй кьн. Кʹьтеба Пироз соз дьдә: «Тӧ баре хԝә бьдә Хӧдан Әԝе һьлгьрә дәԝса тә. Әԝе тʹӧ щар нәһелә, ԝәки йе рʹаст бьлькʹӧмә» (Зәбур 55:22).

9, 10. Чь те һʹәсабе гьһишти бьн?

⁹ Һәрге һун һәләԛәтийа хԝә тʹәви Йаһоԝа ԛәԝи кьн, ԝи чахи һуне «бенә сәр һинбуна гьһишти» (Ибрани 6:1). Чь те һʹәсабе гьһишти бьн?

¹⁰ Чахе әм әʹмьрда мәзьн дьбьн, әԝ йәк найе һʹәсабе, ԝәки әм дьбьнә Мәсиһийед гьһишти. Сәва кӧ әм гьһишти бьн, әм гәрәке Йаһоԝа бькьнә Досте хԝәйи лапи незик у сәр тьшта ӧса бьньһерʹьн ча әԝ дьньһерʹә (Йуһʹәнна 4:23). Паԝлос ньвиси: «Йед кӧ ль гора бьнйатʹа мәрьвайе дьжин, әԝ сәр тьштед бьнйатʹа мәрьвайе дьфькьрьн, ле йед ль гора Рʹӧһʹ дьжин, әԝ сәр тьштед Рʹӧһʹ дьфькьрьн» (Рʹомайи 8:5). Бәле, мәрьве рʹӧһʹанида гьһишти, тьштед материйали у рʹьһʹәтийе, накә нета жийина хԝә. Дәԝсе әԝ хьзмәткьрьна Йаһоԝарʹа, датинә щийе пешьн у әʹмьре хԝәда бьжартьнед билани дькә (Мәтʹәлок 27:11; бьхунә Аԛуб 1:2, 3.) Әԝ изьне надә хԝә тьштед хьраб бькә. Мәрьве гьһишти занә, ча рʹаст хԝә бьдә кʹьфше у һәма ӧса жи дькә.

11, 12. а) Паԝлос чь дьгот дәрһәԛа фәрәсәте Мәсиһийа, кӧ «ԛәнщи у хьрабийе» жь һәв дәрхьн? б) Мәсиһийе гьһишти чь щурʹәйи мина спортсмене пешдачуйи йә?

 ¹¹ Әм гәрәке ԛәԝате бьдьнә хәбате, сәва кӧ гьһишти бьн. Паԝлосе шанди ньвиси: «Ле хԝарьна гьран бона мәрьвед гьһишти йә, йед кӧ сәԝдайе хԝәда кʹәти-рʹабуйи нә [һинкьри нә], ԛәнщи у хьрабийе жь һәв дәрдьхьн» (Ибрани 5:14). Әԝ хәбәр «кʹәти-рʹабуйи» демәк «һинкьри», һьндава спортсмена дьһатә хәбьтандьне.

¹² Чахе әм дьвиньн, кӧ спортсмен спортеда пешдачуйи йә, әм фәʹм дькьн, ԝәки әԝи гәләк ԝәʹдә у ԛәԝат дайә хәбате. Әԝ нәһатийә буйине ча спортсмен. Чахе зарʹ те буйине, әԝ һе ньзанә ча гәрәке дәст-ньге хԝә бьдә хәбате. Ле ԝәʹдә шунда, әԝ һин дьбә ча тьшта дәсте хԝәда бьгьрә у ча рʹе һәрʹә. Һинкьрьн дькарә али ԝи бькә, ԝәки әԝ бьбә спортсмен. Мина ԝе йәке мәрʹа жи ԝәʹдә у һинкьрьн лазьм ә, ԝәки бьбьнә Мәсиһийед гьһишти.

13. Чь ԝе али мә бькә, ԝәки әм һин бьн ӧса бьфькьрьн, ча Йаһоԝа дьфькьрә?

¹³ Ԝе әʹдәбйәтеда мә шеԝьр кьр, ԝәки ча әм дькарьн ӧса бьфькьрьн, чаԝа Йаһоԝа у ньһерʹандьна хԝә бькьн мина йа ԝи. Әм ӧса жи һин бун нормед Йаһоԝа ԛимәт кьн у һʹьз кьн. Чахе әм сафикьрьна дькьн, әм пьрса дьдьнә хԝә: «Ве дәрәщеда әз кʹижан ԛанун йан принсипед Кʹьтеба Пироз дькарьм бьдьмә хәбате? У чь щурʹәйи? Йаһоԝа дьхԝазә кӧ әз чь бькьм?» (Бьхунә Мәтʹәлок 3:5, 6; Аԛуб 1:5.)

14. Сәва кӧ баԝәрийа мә ԛәԝи бә, әм гәрәке чь бькьн?

¹⁴ Әм һәртʹьм дьхәбьтьн, ԝәки баԝәрийа мә һьндава Йаһоԝа һе ԛәԝи бә. Чаԝа хԝарьна керһати бәдәна мә ԛәԝи дькә, ӧса жи леколинкьрьна дәрһәԛа Йаһоԝа баԝәрийа мә ԛәԝи дькә. Чахе мә дәстпекьр Кʹьтеба  Пироз һин бьн, серида әм рʹастийед сәрәкә дәрһәԛа Йаһоԝа у рʹийед ԝи һин бун. Ле чьԛас ԝәʹдә дәрбаз дьбу, һаԛас мәрʹа лазьм дьбу дьһа кʹур рʹастийе фәʹм кьн. Һәма әԝ йәк Паԝлос һьлда һʹәсаб, чахе гот: «Хԝарьна гьран бона мәрьвед гьһишти йә». Чахе әм әʹмьре хԝәда дьдьнә хәбате ԝе йәке, чь кӧ педьһʹәсьн, ԝи чахи әм биланийе ԛазанщ дькьн. Кʹьтеба Пирозда те готьне: «Сәри сәрԝахти йә» (Мәтʹәлок 4:5-7; 1 Пәтрус 2:2).

15. Чьрʹа фәрз ә, ԝәки әм бь дьл у щан Йаһоԝа у хушк-бьра һʹьз бькьн?

¹⁵ Рʹаст ә, мәрьв дькарә сьһʹәт-ԛәԝат бә, ле сәва кӧ сьһʹәт-ԛәԝата хԝә хԝәй кә, лазьм ә һәртʹьм пәй хԝә бьньһерʹә. Мина ԝе йәке Мәсиһийе гьһишти занә, ԝәки әԝ гәрәке һәртʹьм ԛәԝате бьдә хәбате, сәва һәләԛәтийа хԝә тʹәви Йаһоԝа ԛәԝи хԝәй кә. Паԝлос тинә бира мә: «Һун дьле хԝә бьщерʹьбиньн у дина хԝә бьдьне, кʹа һун нава баԝәрийеда нә?» (2 Корьнтʹи 13:5). Мәрʹа нә тʹәне баԝәрийа ԛәԝи лазьм ә, ле һе зедә тьшт. Һʹьзкьрьна мә һьндава Йаһоԝа у хушк-бьра гәрәке бәрдәԝам бә, мәзьн бә. Паԝлос гот: «Һәгәр . . . һʹәму занәбуне фәʹм бькьм у һәгәр баԝәрийа мьн жи һаԛас һәбә, һʹәта чʹийа жи жь щи бьгӧһезьм, ле һʹьзкьрьн дьле мьнда тʹӧнәбә, әз нә тʹӧ тьшт ьм» (1 Корьнтʹи 13:1-3).

16. Мире-щьна дьхԝазә, ԝәки әм хԝә ча тʹәхмин кьн?

¹⁶ Мире-щьна дьхԝазә, ԝәки әм бьфькьрьн, кӧ әм нәһежа нә рʹазибуна Хԝәде бьстиньн. Әԝ дьхԝазә, ԝәки әм дьлтәнг бьн у бьфькьрьн, ԝәки чәтьнайед мә найенә сафикьрьне. Әԝ нахԝазә, ԝәки әм итʹбарийа хԝә хушк-бьра биньн у бәхтәԝар бьн (Әфәси 2:2). Мире-щьна занә, ԝәки фькьред мәйә нәрʹаст дькарьн мә гьшкарʹа зийане биньн у ӧса жи һәләԛәтийа мә тʹәви Йаһоԝа  хьраб кьн. Ле Йаһоԝа мәрʹа тьштәки ӧса дьдә, чь кӧ дькарә али мә бькә, ԝәки әм мьԛабьли ԝан фькьред нәрʹаст шәрʹ кьн. Әԝи һеви дайә мә.

17. Гәло һеви чьԛас фәрз ә?

¹⁷ Кʹьтеба Пирозда, 1 Тʹесалоники 5:8-да, һевийа мә бәрамбәри кʹӧмзьрьһʹе дьбә, йе кӧ әскәра дькьрьнә сәре хԝә, сәва бенә хԝәйкьрьне, кʹӧмзьрьһʹ ӧса жи те навкьрьне «һевийа хьлазийе, ИМ». Һевийа мә сәр созед Йаһоԝа дькарә һʹьш-аԛьле мә хԝәй кә у али мә бькә мьԛабьли фькьред нәрʹаст дәрен.

18, 19. Һевийе ча Иса ԛәԝи дькьр?

¹⁸ Һевийе Иса ԛәԝи дькьр. Шәва пешийа мьрьна ԝи, дәрәщед чәтьн пәй һәв рʹасти ԝи дьһатьн. Һәваләки ԝийи незик нәмамийа ԝи кьр. Йәки дьн инкʹар кьр, ԝәки ԝи нас дькә, ле йед дьн жи әԝ һиштьн у рʹәвин. Бьнәлийед ԝәлате ԝи жи мьԛабьли ԝи дәркʹәтьн у  хԝәстьн, ԝәки ԝи сәр стуна дар дардакьн. Чь али ԝи кьр, ԝәки әԝи бәр һаԛас чәтьнайа тәйах дькьр? «Бона ԝе шабуна пешийа хԝә хач [стун, ДТʹ] һьлани, шәрм бәр тьштәки һʹәсаб нәкьр, паше кʹеләка Хԝәдейә рʹасте сәр тʹәхт рʹуньшт» (Ибрани 12:2).

¹⁹ Иса заньбу, һәрге әԝ һʹәта хьлазийе тәйах кә, ԝе Баве хԝә рʹумәт кә у бьдә избаткьрьне, ԝәки Мире-щьна дәрәԝин ә. Әԝе һевийе, шабунәкә мәзьн ԝирʹа ани. Әԝи ӧса жи заньбу, ԝәки зутьрәке әԝе диса вәгәрʹә әʹзмен, щәм Баве хԝә. Әԝе һевийе ӧса жи али ԝи кьр, ԝәки тәйах кә. Мина Иса әм жи, гәрәке һʹьш-аԛьле хԝә бьдьнә сәр һевийа хԝә. Ӧса әме бькарьбьн тәйах кьн нава һʹәму чәтьнайада.

20. Чь дькарә али тә бькә, ньһерʹандьна рʹаст хԝәй ки?

²⁰ Йаһоԝа баԝәрийа мә у сәбьра мә дьвинә (Ишайа 30:18; бьхунә Малахи 3:10.) Әԝ соз дьдә, ԝәки ԝе  «хԝәстьнед дьле тә бьдә тә» (Зәбур 37:4). Ләма жи, һʹьш-аԛьле хԝә бьдә сәр һевийа хԝә. Мире-щьна дьхԝазә, ԝәки тӧ һевийа хԝә ӧнда ки у бьфькьри, ԝәки созед Йаһоԝа ԝе тʹӧ щар нәйенә сери. Ле нәһелә, ԝәки фькьред нәрʹаст бькʹәвьнә һʹьше тә! Һәрге тӧ тʹәхмин дьки, ԝәки фькьред ӧса бал тә пешда тен у һевийа тә сьст дьбә, аликʹарийе жь Йаһоԝа бьхԝазә. Бира хԝәда хԝәй кә ԝан гьлийед жь Филипи 4:6, 7: «Бона тʹӧ тьшти хәм нәкьн, ле хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә».

21, 22. а) Нета Йаһоԝа дәрһәԛа әʹрде чь йә? б) Тә чь сафи кьрийә бьки?

²¹ Тʹьме дьшьрмиш бә дәрһәԛа ахьрийа баш, йед кӧ һивийа мә йә. Зутьрәке сәр дьнйайе һʹәму мәрьв ԝе Йаһоԝарʹа хьзмәт кьн (Әʹйанти 7:9, 14). Тʹәне бьдә бәр чʹәʹве хԝә жийина дьнйа тʹәзәда. Әԝе ӧса баш бә, ԝәки әм нә жи дькарьн бьдьнә бәр чʹәʹве хԝә! Мире-щьна, щьнед ԝи у һʹәму зӧлми ԝе кʹӧта бьн. Тӧйе тʹӧ щар нәхԝәш нәкʹәви у нә жи бьмьри. Тӧйе һәр рʹож жь жийине шабуне бьстини у һәр шәбәԛ тӧйе пе ԛәԝате тʹьжә рʹаби. Һʹәму мәрьв ԝе тʹәвайи бьхәбьтьн у әʹрде бькьнә щьнәт. Хԝарьна һʹәмушка ԝе тʹер-тʹьжә бә у ԝе бехофийеда бьжин. Мәрьвед зордар у зӧлм ԝе тʹӧнә бьн, ле һʹәмушк ԝе һьндава һәвдӧ ԛәнщ у һʹәйф бьн. Ԝи ԝәʹдәйи сәр әʹрде инсанәт ԝе бәхтәԝар бә, чьмки «азайи у рʹумәта зарʹед Хԝәде» бьстиньн (Рʹомайи 8:21).

²² Йаһоԝа дьхԝазә бьбә Досте мәйи незик. Ләма жи чьԛас дәсте тә те бькә, ԝәки гӧрʹа Йаһоԝада бьмини у һәр рʹож незики ԝи би. Ԝәрә әм һʹәмушк жи һʹәта-һʹәтайе һʹьзкьрьна Хԝәдеда бьминьн! (Щьһуда 21).