1, 2. Кʹижан пʹешкʹеша ԛимәт, Йаһоԝа дайә мә?

 ЙАҺОԜА пʹешкʹешәкә ԛимәт дайә мә һәр кәси. Әԝ пʹешкʹеш жийин ә (Дәстпебун 1:27). Әԝ дьхԝазә, ԝәки әм бь әʹмьрәки бәхтәԝар бьжин. Ләма жи әԝ принсипа дьдә мә, сәва кӧ әм һин бьн сафикьрьнед рʹаст бькьн. Әм гәрәке ԝан принсипа бьдьнә хәбате, сәва кӧ бьбьнә мәрьвед ӧса, йед кӧ «ԛәнщи у хьрабийе жь һәв дәрдьхьн» (Ибрани 5:14). Һәрге әм ӧса бькьн, әме изьне бьдьн, ԝәки Йаһоԝа мә һин кә, кӧ әм рʹаст бьфькьрьн. Чахе әм пе принсипед Хԝәде дьжин у дьвиньн, ԝәки әԝ йәк чь кʹаре мәрʹа тинә, әм фәʹм дькьн, кӧ әԝ принсип чьԛас ԛимәт ьн.

² Әʹмьр дькарә гәләк чәтьн бә. Әм дькарьн гәләк щар рʹасти дәрәщед ӧса бен, дәрһәԛа кʹижани Кʹьтеба Пирозда рʹебәрийа конкрет нәһатийә дайине. Мәсәлә, мәрʹа дькарә лазьм бә бьжберьн методед ԛәнщкьрьнейә хунева гьредайи. Чаԝа әм дькарьн сафикьрьнед ӧса бькьн, кӧ дьле Йаһоԝа ша кьн? Принсипед Кʹьтеба Пироз мәрʹа дьдьнә кʹьфше, кӧ Йаһоԝа ча дьньһерʹә сәр жийине у хуне. Һәрге әм ԝан принсипа рʹьнд фәʹм кьн, әме бькарьбьн сафикьрьнед билани бькьн у исафа тʹәмьз хԝәй кьн (Мәтʹәлок 2:6-11). Ԝәрә ньһа чәнд принсипа шеԝьр кьн.

3, 4. а) Чаԝа Йаһоԝа әʹйан кьр ньһерʹандьна хԝә сәр хуне? б) Хун чь те һʹәсабе?

³ Кʹьтеба Пирозда те готьне, ԝәки хун пироз ә, чьмки әԝ те һʹәсабе әʹмьр. Әʹмьр жи гәләк ԛимәт ә бәр чʹәʹве Йаһоԝа. Паши ԝе йәке, чахе Ԛайин бьре хԝә кӧшт, Йаһоԝа готә ԝи: «Дәнге хуна бьре тә жь әʹрде шькийате хԝә ль мьн дькә» (Дәстпебун 4:10). Хуна Һабил дьһатә һʹәсабе әʹмьре ԝи. Чахе Ԛайин бьре хԝә Һабил кӧшт, демәк әԝи әʹмьр жь ԝи станд.

⁴ Паши Селава ԝәʹде Нӧһ, Хԝәде готә мәрьва, ԝәки әԝана дькарьн гошт бьхԝьн, ле тʹәмикә ӧса да ԝан: «Гошт сахийеда, аԝа готи хунева нәхԝьн» (Дәстпебун 9:4). Әԝ тʹәми һатьбу дайине бона һʹәму зӧрʹәтед Нӧһ, һәла һе мәрʹа жи. Әʹйан ә, ԝәки бона Йаһоԝа хун те һʹәсабе әʹмьр. Ньһерʹандьна мә жи гәрәке мина йа ԝи бә (Зәбур 36:9).

5, 6. Чаԝа Ԛануна Муса дьдә кʹьфше ньһерʹандьна Йаһоԝа сәр хуне?

⁵ Йаһоԝа Ԛанунеда, йа кӧ Әԝи дабу Муса, гот: «Һәгәр йәки . . . хуна һʹәйԝанәки бьхԝә, әзе бәре хԝә бьдьмә әԝ кәсе хунхԝар у ԝи жь нава щьмәʹта ԝи ӧнда кьм. Чьмки әʹмьре һәр бинбәри хунеда йә» (Ԛануна Кʹаһинтийе 17:10, 11).

⁶ Ԛануна Мусада һатьбу готьне, ԝәки әԝе кӧ һʹәйԝана бона хԝарьне дькӧжә, гәрәке пешийе хуна ԝи бьрʹежә сәр әʹрде. Бь ԝе йәке әʹйан дьбу, ԝәки әʹмьре һʹәйԝен пашда вәдьгәрʹә бал Әʹфьрандаре ви, Йаһоԝа (Ԛануна Дӧщари 12:16; Һәзәԛел 18:4). Ле Йаһоԝа дәʹԝа нәдькьр, ԝәки Исраели ӧса бькьн, кӧ ньԛьткә хун гоштда нәминә. Һәрге ԝана ӧса дькьр, чаԝа жь ԝан дьһатә дәʹԝакьрьне‚  ԝәки хун бе рʹетьне, ԝи чахи ԝана дькарьбу бь исафа тʹәмьз әԝ гошт бьхԝарана. Чахе ԝана һьндава хуна һʹәйԝана ԛәдьр дьданә кʹьфше, бь ԝе йәке ԝана ԛәдьре Йаһоԝа‚ Пʹешкʹешдаре әʹмьр, дьгьртьн. Ԛануне ӧса жи жь Исраелийа дәʹԝа дькьр, ԝәки сәва бахшандьна гӧнед хԝә һʹәйԝана бькьнә ԛӧрбан. (Бьньһерʹә Әʹламәтийа Зедә 19 у 20.)

7. Чаԝа Даԝьд ԛәдьр һьндава хуне да кʹьфше?

⁷ Әм дькарьн жь дәрәщәке бьвиньн, кӧ хун чьԛас ԛимәт ә. Әԝ дәрәщә ԛәԝьми чахе Даԝьд шәрʹ дькьр тʹәви Фьльстийа. Әскәред Даԝьд дитьн, ԝәки әԝ гәләк тʹи йә, ләма жи ԝана әʹмьре хԝә кьрьнә бьн ԛәзийе, чунә мәйдана дьжмьна, сәва ԝирʹа аве биньн. Ле чахе ԝана ав ани у данә Даԝьд, әԝи инкʹар кьр аве вәхԝә, у бәр Йаһоԝа рʹет. Даԝьд гот: «Йа Йаһоԝа наԛәԝьмә кӧ әз ве йәке бькьм! Әзе ча хуна ван мәрийа вәхԝьм, йед кӧ нәфса хԝә данә бәр ԛәзийе». Даԝьд фәʹм дькьр кӧ әʹмьр у хун чьԛас ԛимәт ә бәр чʹәʹве Хԝәде (2 Самуйел 23:15-17, ДТʹ).

8, 9. Рʹожа иройин ньһерʹандьна Мәсиһийа сәр хуне, гәрәке чь щурʹәйи бә?

⁸ Паши мьрьна Иса, щьмәʹта Хԝәдерʹа ида нәлазьм бу Ԛануна Муса бьԛәдиньн. Ле Йаһоԝа жь Мәсиһийа дәʹԝа дькьр чәнд тʹәмийед ԝе Ԛануне биньн сери. Рʹаст ә ԝанарʹа ида нәлазьм бу һʹәйԝана бькьнә ԛӧрбан, ле әԝана диса жи гәрәке хԝә «дури . . . хуне» бьгьртана. Әв ӧса фәрз бу, чаԝа хԝә дур бьгьрьн жь бенамусийе у пʹута (Кʹаред Шандийа 15:28, 29).

⁹ Әԝ йәк рʹожа иройин жи фәрз ә. Әм чаԝа Мәсиһи заньн, ԝәки Йаһоԝа йә Канийа жийине, у әʹмьр жь ԝи йә. Әм ӧса жи фәʹм дькьн, ԝәки хун пироз ә у те һʹәсабе әʹмьр. Ләма әм гәрәке принсипед Кʹьтеба  Пироз һьлдьнә һʹәсаб, чахе сафи дькьн кʹижан методед ԛәнщкьрьне йед кӧ хунева гьредайи нә, бьдьнә хәбате.

10, 11. а) Ньһерʹандьна Шәʹдед Йаһоԝа сәр хәбьтандьна хуне у чар пʹаред ԝе, чь щурʹәйи йә? б) Кʹижан сафикьрьнед шәхси, һәр Мәсиһи гәрәке хԝәха бькә?

¹⁰ Шәʹдед Йаһоԝа фәʹм дькьн, ԝәки әв готьн «дури . . . хуне . . . бьн» те һʹәсабе, нә кӧ тʹәне хуне нәхԝьн у вәнәхԝьн, ле һе зедә тьшт. Әԝ ӧса жи те һʹәсабе хуне бәри хԝә нәдьн, нә жи хуна хԝә бьдьнә хԝәйкьрьне, сәва бәри кәсәки дьн бьдьн. Әԝ һьн жи те һʹәсабе, кӧ тʹӧ йәк жь чар пʹаред хунейә сәрәкә, демәк еритросит, лейкосит, тромбосит у плазма, бәри хԝә нәдьн.

¹¹ Әԝ чар пʹаред хунейә сәрәкә тенә пʹарәвәкьрьне сәр пʹаред дьһа һур, йед кӧ һатьнә навкьрьне ча фьраксийа. Һәр Мәсиһи гәрәке хԝәха сафи кә, кӧ кʹижан фьраксийа дькарә ԛәбул кә, ле кʹижан на. Ӧса жи гәрәке сафи кә тʹәви кʹижан методед ԛәнщкьрьне, йед кӧ хунева гьредайи нә, ԛайил бә. Һәр кәс гәрәке хԝәха сафи кә, ԝәки тʹәви хуна ԝи чь бькьн у чь на, ԝәʹде операсийайе, ԝәʹде анализа хуне, ӧса жи ԝәʹде методәкә ԛәнщкьрьне. Әԝ метод әв ә, кӧ хун тʹӧ щики найе хԝәйкьрьне, ле жь бәдәне дькʹәвә машина хәбьтандьна хуне, те тʹәмьзкьрьне у пашда вәдьгәрʹә бәдәне. (Бьньһерʹә Әʹламәтийа Зедә 21.)

12. а) Чьрʹа сафикьрьнед мәйә сәр һʹиме исафа мә, гәләк фәрз ьн бона Йаһоԝа? б) Чаԝа әм дькарьн һьндава методед ԛәнщкьрьне сафикьрьнед билани бькьн?

¹² Гәло бона Йаһоԝа фәрз ә сафикьрьна мәйә  шәхси, йа кӧ гьредайи йә тʹәви исафа мә? Әре, фәрз ә. Йаһоԝа һьлдьдә һʹәсаб нет у фькьред мә. (Бьхунә Мәтʹәлок 17:3; 24:12.) Ԝи чахи гава әм бәр  сафикьрьне сәкьнинә, кӧ кʹижан методед ԛәнщкьрьне бьжберьн, әм гәрәке дӧа бькьн, ԝәки Йаһоԝа рʹебәрийе бьдә мә у ӧса жи ԝан методед ԛәнщкьрьне леколин кьн. Паши ԝе йәке, әм гәрәке бьдьнә хәбате исафа хԝәйә сәр һʹиме Кʹьтеба Пироз һинкьри, сәва кӧ сафикьрьна шәхси бькьн. Әм гәрәке жь кәсәки нәпьрсьн, кӧ әԝи ԝе чь бькьра һәрге дәԝса мә буйа, у тʹӧ кәс гәрәке һʹӧкӧм нәкә сәр сафикьрьна мә. Һәр Мәсиһи ԝе хԝәха «хӧрща хԝә һьлгьрә» (Галати 6:5; Рʹомайи 14:12).

13. Чь әм педьһʹәсьн дәрһәԛа Йаһоԝа жь ԛанун у принсипед ԝи һьндава хуне?

¹³ Һәр тьшт чь кӧ Йаһоԝа мә һин дькә, бона кʹара мә йә у һʹьзкьрьна ԝи мәрʹа әʹйан дькә (Зәбур 19:7-11). Ле ӧса нибә, кӧ һун тʹәне бона кʹара хԝә гӧһ бьдьнә Йаһоԝа. Әм гӧһ дьдьнә ԝи чьмки ԝи һʹьз дькьн. Һʹьзкьрьна мә һьндава Йаһоԝа һелане дьдә мә, ԝәки әм хуне бәри хԝә нәдьн (Кʹаред Шандийа 15:20). Әԝ йәк ӧса жи кʹар ә бона сьһʹәт-ԛәԝата мә. Рʹожа иройин, гәләк мәрьв заньн дәрһәԛа зийана кӧ жь хунбәрдане пешда те у гәләк һʹәким баԝәр ьн, ԝәки операсийа, кӧ бе хун те кьрьне дьһа баш ә бона сьһʹәт-ԛәԝата мәрьва. Әԝ йәк әʹйан ә, ԝәки рʹебәрийед Йаһоԝа билан ьн у жь һʹьзкьрьне нә (Бьхунә Ишайа 55:9; Йуһʹәнна 14:21, 23).

14, 15. а) Йаһоԝа кʹижан ԛанун дабун щьмәʹта хԝә, сәва кӧ ԝана хԝәй кә? б) Тӧ ча дькари ԝан принсипед, кӧ сәр һʹиме ԝан ԛануна нә, бьди хәбате?

¹⁴ Ԛанунед Хԝәде һәртʹьм тенә дайине бона кʹара щьмәʹта ԝи. Йаһоԝа Исраелед бәрерʹа ԛанун кʹьфш  кьр, сәва кӧ ԝана жь ԛәзийа хԝәй кә. Мәсәлә, ԛанунәкеда дьһатә готьне, ԝәки хԝәйе мале гәрәке дора бане мала хԝә сур кә, сәва кӧ тʹӧ кәс жорда нәкʹәвә (Ԛануна Дӧщари 22:8). Ԛанунәкә дьнда дьһатә готьне дәрһәԛа һʹәйԝана. Һәрге гайе кәсәки мәрьва дьхьст, әԝ щабдар бу мьԛати гайе хԝә бә, сәва зийане нәдә тʹӧ кәси (Дәркʹәтьн 21:28, 29). Һәрге Исраели гӧһ нәда ве ԛануне, у жь бо ԝе йәке кәсәк бьмьра, әԝ сәва ԝе йәке щабдар бу.

¹⁵ Жь ԝан ԛануна те кʹьфше, ԝәки әʹмьр чьԛас ԛимәт ә бәр чʹәʹве Йаһоԝа. Занәбуна ԝе йәке чаԝа гәрәке сәр мә һʹӧкӧм бә? Әм гәрәке бьдьнә кʹьфше, ԝәки әʹмьр ԛимәт дькьн, бь ԝе йәке кӧ ча әм хәм дькьн бона авайи у әʹрәба хԝә, чаԝа әʹрәбе дажон, у чь щурʹә һесабун дьжберьн. Һьнә мәрьв, илаһи йед щаһьл дьфькьрьн, ԝәки ԝе тьштәк нәйе сәре ԝан, ләма жи әԝана хԝә дькьнә бьн ԛәзийе у дәрәщед хофда фәсал ниньн. Ле Йаһоԝа нахԝазә, ԝәки әм жи ӧса дьшьрмиш бьн. Әԝ дьхԝазә, ԝәки әм әʹмьре хԝә у әʹмьре мәрьвед дьн ԛимәт кьн (Ԝаиз 11:9, 10).

16. Чаԝа Йаһоԝа дьньһерʹә сәр зарʹбәркьрьне?

¹⁶ Әʹмьре һәр мәрьвәки ԛимәт ә бәр чʹәʹве Йаһоԝа. Һәла һе әʹмьре зарʹа кӧ һе нәһатийә буйине жи, ԛимәт ә бәр чʹәʹве ԝи. Ԛануна Мусада дьһатә готьне, һәрге кәсәк бе һʹәмде хԝә зийане бьдә кʹӧлфәтәкә һʹәмлә, у әԝ кʹӧлфәт бьмьрә йан жи зарʹ бәр һәрʹә, әԝ кәс бәр чʹәʹве Йаһоԝа те һʹәсабе меркӧж. Әԝ те һʹәсабе, һәрге әԝи кәси нәхԝәстийә жи, ле ӧса ԛәԝьми кӧ йәк мьр, әԝ кәс гәрәке әʹмьр жь бәр әʹмьрва бьда. (Бьхунә Дәркʹәтьн 21:22, 23.) Бәр чʹәʹве Хԝәде зарʹа зьке деда жи мәрьве сах ә. Жь бо ԝе дәрәще, тӧ ча дьфькьри, Хԝәде ча дьньһерʹә сәр зарʹбәркьрьне?  Ча тӧ дьшьрмиш дьби, Хԝәде чь тʹәхмин дькә, гава дьвинә кӧ һәр сал бь милиона зарʹ тенә бәркьрьне?

17. Чь дькарә дьл бьдә бәр ԝе кʹӧлфәте, йа кӧ зарʹ бәр хԝә кьрьбу пешийа кӧ Йаһоԝа нас кьрʹа?

¹⁷ Ле һәрге кʹӧлфәт һʹәта Йаһоԝа нас кьра, ида зарʹ бәр хԝә кьрьбу? Әԝ кʹӧлфәт дькарә баԝәр бә, ԝәки Йаһоԝа сәр һʹиме ԛӧрбана Иса дькарә бьбахшинә ԝе (Луԛа 5:32; Әфәси 1:7). Һәрге кʹӧлфәт бь дьл у щан гӧне хԝә тʹобә дькә, әԝ ида гәрәке хԝә нәһәԛ тʹәхмин нәкә. «Дьлшәԝат у рʹәʹм ә Хӧдан . . . Чьԛас рʹоһьлат жь рʹоавайе дуртьр ә, һаԛаси жи гӧнәйед мә жь мә дур хьсти нә» (Зәбур 103:8-14).

18. Чьрʹа әм гәрәке һʹәму тьшти бькьн, сәва кӧ фькьред зӧлм жь дьле хԝә дәрхьн?

¹⁸ Ԛәдьр һьндава жийине демәк пешкʹеша Хԝәде, жь дьл дәрте. Әԝ ԛәдьр ӧса жи әʹйан дьбә ԝе йәкеда, чаԝа әм хԝә дьдьнә кʹьфше һьндава мәрьва. Йуһʹәннайе шанди ньвиси: «Һәр кәсе кӧ бьре ԝи бәр чʹәʹва рʹәш ә, әԝ меркӧж ә» (1 Йуһʹәнна 3:15). Әм дькарьн нә жи тʹәхмин кьн, ча әм дькарьн дәстпекьн кәсәки нәфрʹәт кьн. Жь бо нәфрʹәткьрьне мәрьв дькарә кәсәки дьн беһӧрмәт кә, бадиһәԝа ԝи нәһәԛ кә, йан жи мьрьне ԝирʹа бьхԝазә. Йаһоԝа занә әм һьндава мәрьва чь дьфькьрьн (Ԛануна Кʹаһинтийе 19:16; Ԛануна Дӧщари 19:18-21; Мәтта 5:22). Һәрге әм тʹәхмин дькьн, ԝәки фькьред хԝәда йәке нәфрʹәт дькьн, әм гәрәке сәр хԝә бьхәбьтьн, ԝәки ван фькьра жь хԝә дур хьн (Аԛуб 1:14, 15; 4:1-3).

19. Ньһерʹандьна Йаһоԝа сәр зӧлмийе, чаԝа гәрәке сәр мә һʹӧкӧм бә?

¹⁹ Диса бь щурʹәки дьн жи әм дькарьн ԛәдьр бьдьнә кʹьфше һьндава әʹмьр. Жь Зәбура 11:5 әм педьһʹәсьн,  ԝәки Йаһоԝа «дьжәнә нәпʹак у йе зӧлме һʹьз дькә». Һәрге әм дьжберьн ԝәʹдәдәрбазкьрьнед ӧса, йед кӧ бь зӧлмийе тʹьжә нә, ӧса әм дьдьнә кʹьфше, ԝәки зӧлмийе һʹьз дькьн. Гәло чьрʹа әм нахԝазьн һʹьше хԝә пе хәбәр, фькьр у шьклед зӧлм тʹьжә кьн? Чьмки әм дьхԝазьн, ԝәки фькьред мә тʹәмьз у щайиз бьн. (Бьхунә Филипи 4:8, 9.)

20-22. а) Чаԝа Йаһоԝа дьньһерʹә сәр дьнйа Мире-щьна? б) Чаԝа хьзмәткʹаред Хԝәде дькарьн бьдьнә кʹьфше, ԝәки пʹара ве дьнйайе ниньн?

²⁰ Дьнйа Мире-щьна ԛәдьр надә кʹьфше һьндава әʹмьр, у Йаһоԝа әԝе йәке һʹәсаб дькә ча кӧштьн у хунретьн. Нава гәләк ԛьрнада, жь бо нәһәԛийа политикайе, бь милиона мәрьв тенә кӧштьне, гәләк хьзмәткʹаред Йаһоԝа жи дькʹәвьнә нава ԝи һʹәсаби. Кʹьтеба Пирозда сәр ԝан сәрԝертийа те готьне щәʹнәԝьр (Данийел 8:3, 4, 20-22; Әʹйанти 13:1, 2, 7, 8). Рʹожа иройин кʹьрин-фьротана чʹәка бизьнесәкә мәзьн ә. Мәрьв хԝәрʹа кʹара мәзьн дьстиньн жь ԝан тьшта, чь кӧ сәва кӧштьна мәрьва те чекьрьне. Әʹйан ә, «тʹәмамийа дьнйайе бьн һʹӧкӧме Йе Хьрабда йә» (1 Йуһʹәнна 5:19).

²¹ Ле Мәсиһийед рʹаст «нә пʹара дьнйайе нә». Щьмәʹта Йаһоԝа тʹәвнәбуйине хԝәй дькә һьндава пьрсед политике у шәрʹ-дәʹԝа. Әԝана кәсәки накӧжьн у пьштгьрийа тʹӧ организасийед кӧ мәрьва дькӧжьн, накьн (Йуһʹәнна 15:19; 17:16). Гава Мәсиһи рʹасти пәйкʹәтьна жи тен, әԝана кʹине нажон. Иса һин дькьр, ԝәки әм гәрәке һәла дьжмьнед хԝә жи һʹьз бькьн (Мәтта 5:44; Рʹомайи 12:17-21).

 ²² Рʹелигийед ве дьнйайе жи нәһәԛ ьн кӧштьна бь милиона мәрьвада. Дәрһәԛа Бабилона Мәзьн, демәк империйа рʹелигийа ԛәлп, Кʹьтеба Пирозда те готьне: «Хуна пʹехәмбәр у щьмәʹта Хԝәде кʹәтә стуйе ԝи бажари, бәле хуна ԝан һʹәмуйа кӧ ль сәр рʹуйе әʹрде һатьнә рʹетьне». Гәло һун дькарьн фәʹм кьн, кӧ чьма Йаһоԝа тʹәмийе дьдә мә: «Жь нава ԝе дәркʹәвьн, щьмәʹта мьн»? Әԝед кӧ Йаһоԝа дьһʹәбиньн, набьнә пʹара ԝан рʹелигийед ԛәлп (Әʹйанти 17:6; 18:2, 4, 24).

23. Чь те һʹәсабе жь Бабилона Мәзьн «дәркʹәвьн»?

²³ «Дәркʹәвьн» жь Бабилона Мәзьн те һʹәсабе, ԝәки әм әʹйан кьн кӧ ида пʹара рʹелигийа ԛәлп ниньн. Мәсәлә, мәрʹа дькарә лазьм бә избат бьн, ԝәки наве мә жь ԝан рʹелигийа һатийә дәрхьстьне у әм ида әндәме ԝан ниньн. Ле әԝ жи бәс нинә. Әм ӧса жи гәрәке кьред хьраб, йед кӧ рʹелигийед ԛәлп дькьн, нәфрʹәт у инкʹар кьн. Рʹелигийед ԛәлп һәртʹьм мәрьва бәрбь бенамусийе, политике у тьмайе һелан дькьн (Бьхунә Зәбур 97:10; Әʹйанти 18:7, 9, 11-17). Жь бо ве йәке, бь милиона мәрьв әʹмьре хԝә ӧнда дькьн.

24, 25. Әԝ йәк кӧ әм Йаһоԝа нас дькьн, ча әʹдьлайе у исафа тʹәмьз дьдә мә?

²⁴ Һʹәта кӧ мә Йаһоԝа нас кьра, һәр кәс жь мә дьбәкә пьштгьрийа ԝан тьштед хьраб дькьр, чь кӧ дьнйа Шәйтʹан дькә. Ле ньһа әм һатьнә гӧһастьне. Мә кʹьрин ԛәбул кьр, у әʹмьре хԝә тʹәсмили Хԝәде кьр. Әм сәр хԝә тʹәхмин дькьн «ԝәхтед жийиндарийе» жь Йаһоԝа. Әʹдьлайи дьле мәда йә у исафа мә тʹәмьз ә, чьмки әм заньн, ԝәки Йаһоԝа жь мә рʹази йә (Кʹаред Шандийа 3:19, 20; Ишайа 1:18).

²⁵ Һәрге бәре мә хԝә организасийона ӧса дьгьрт, йа кӧ ԛәдьр һьндава әʹмьр нәдьда кʹьфше, Йаһоԝа дькарә  сәр һʹиме кʹьрине бьбахшинә мә. Әм бь рʹасти жи ԛимәт дькьн пʹешкʹеша Йаһоԝа, демәк жийине. Әм али мәрьва дькьн, кӧ дәрһәԛа Йаһоԝа пебьһʹәсьн у хԝә жь дьнйа Мире-щьна дур бьгьрьн, у ӧса жи шабуне бьстиньн жь һʹәләԛәтийа незик тʹәви Хԝәде. Бь ԝе йәке әм дьдьнә кʹьфше, ԝәки әʹмьр ԛимәт дькьн (2 Корьнтʹи 6:1, 2).

26-28. а) Кʹижан хәбата ԛимәт Йаһоԝа да Һәзәԛел? б) Рʹожа иройин, Йаһоԝа чь жь мә дәԝа дькә?

²⁶ Ԝәʹде Исраелед бәре, Йаһоԝа готә Һәзәԛел пʹехәмбәр, ԝәки щьмәʹтерʹа әʹлам кә кӧ Оршәлим зутьрәке ԝе бе ԝерʹанкьрьне у ԝана һин кә, кӧ чь гәрәке бькьн сәва хьлаз бьн. Һәрге Һәзәԛел әԝ йәк әʹлами щьмәʹте нәкьра, ԝи чахи әԝе сәва хуна ԝан мәрьва бәр чʹәʹве Йаһоԝа нәһәԛ бьһата һʹәсабе (Һәзәԛел 33:7-9). Һәзәԛел һәр тьшт дькьр сәва әʹламәтийе бәла кә, бь ԝе йәке дьда кʹьфше, ԝәки әʹмьр ԛимәт дькә.

²⁷ Йаһоԝа тʹәми дайә мә, сәва кӧ мәрьварʹа әʹлам кьн, ԝәки зутьрәке дьнйа Мире-щьна ԝе бе кʹӧтакьрьне, у али ԝан бькьн, ԝәки хьлаз бьн у бьгьһижьнә дьнйа тʹәзә (Ишайа 61:2; Мәтта 24:14). Әм дьхԝазьн һʹәму тьшти бькьн, сәва кӧ әԝе мьзгинийе мәрьварʹа әʹлам кьн. Әм дьхԝазьн мина Паԝлос бежьн: «Щабдаре хуна ԝә тʹӧ кәси ниньм, чьмки мьн хԝә нәда паш, тʹәмамийа ԛьрара Хԝәде ԝәрʹа гот» (Кʹаред Шандийа 20:26, 27).

²⁸ Гәләк тьштед дьн жи һәнә, чьда әм гәрәке хԝә тʹәмьз хԝәй кьн. Ԝәрә сәред дьнда дәрһәԛа ԝан тьшта шеԝьр кьн.