1, 2. Чьрʹа әм гәрәке фәсал бьн чахе ԝәʹдәдәрбазкьрьна дьжберьн?

 БЬДӘ бәр чʹәʹве хԝә, ԝәки тӧ дьхԝази емишәке бьхԝи, ле дьвини алик хьраб буйә. Тӧйе чь бьки? Тӧйе бьхԝи, йан бавежи? Йан те алийе хьраб кәр ки бавежи, ле алийе баш бьхԝи?

² Әм дькарьн бежьн, ԝәки ԝәʹдәдәрбазкьрьн мина ԝи емиши йә. Һьнәк жь ԝан дькарьн мә хԝәш бен, ле һʹәчʹи зәʹф дькарьн хьраб бьн, чьмки бенамусийева,  зӧлмийева, йан тьштед щьнава гьредайи нә. Ле чахе тӧ ԝәʹдәдәрбазкьрьна дьжбери, гәло тӧ ӧса дьбежи: «Әԝа бьжартьна мьн ә. Әз дькарьм бьжберьм әԝ ԝәʹдәдәрбазкьрьн кʹижан мьн хԝәш те»? Йан тӧ дьбежи: «Һәму ԝәʹдәдәрбазкьрьн хьраб ьн»? Йан тӧ фәсал хԝәрʹа дьжбери ԝәʹдәдәрбазкьрьна, кʹижанида хьраби тʹӧнә йә у тәрʹа шабуне тинә?

3. Дәрһәԛа чь әм гәрәке бьфькьрьн, чахе ԝәʹдәдәрбазкьрьне дьжберьн?

³ Мә гьшкарʹа лазьм ә һесабун у ԝәʹдәдәрбазкьрьн, ләма жи әм гәрәке бьжартьнәкә баш бькьн. Сәва ԝе йәке, лазьм ә пьрсәкә ӧса бьдьнә хԝә, кӧ чаԝа бьжартьна ԝәʹдәдәрбазкьрьне дькарә һʹӧкӧм кә сәр һәләԛәтийа мә тʹәви Йаһоԝа.

4. Кʹижан принсипа Кʹьтеба Пироз, дькарә али мә бькә, ԝәки ԝәʹдәдәрбазкьрьнед баш бьжберьн?

⁴ Чахе мә хԝә тʹәсмили Йаһоԝа кьр, мә соз да, ԝәки әме тʹәмамийа әʹмьре хԝә ԝирʹа хьзмәт кьн. (Бьхунә Ԝаиз 5:4.) Мә соз да, ԝәки әме «һәр тьшти бона шькьрдайина Хԝәде бькьн» (1 Корьнтʹи 10:31). Әм гәрәке бир нәкьн, ԝәки әм Шәʹдед Йаһоԝа нә, нә тʹәне ԝәʹде щьвате йан хьзмәтийе, ле ԝәʹде һесабуне у ԝәʹдәдәрбазкьрьне жи.

5. Хьзмәткьрьна мә Йаһоԝарʹа гәрәке чь щурʹәйи бә?

⁵ Һәр тьштед кӧ әм әʹмьре хԝәда дькьн, гьредайи йә тʹәви хьзмәткьрьна мә Йаһоԝарʹа. Паԝлос әԝ йәк шьровәдькьр бь ԝан гьлийа: «Ԛальбе хԝә тʹәсмили Хԝәде кьн чаԝа ԛӧрбанәкә сах, пироз, ль Хԝәде ԛәбул» (Рʹомайи 12:1, ДТʹ). Иса гот: «Хӧдан Хԝәдейе  хԝә һʹьз бькә, бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә» (Марԛос 12:30). Әм һәр гав дьхԝазьн һʹәму тьштед лапи баш бьдьнә Йаһоԝа. Чахе Исраелед бәре һʹәйԝан Йаһоԝарʹа дькьрьнә ԛӧрбан, ԝана гәрәке һʹәйԝанед беԛьсур банийа. Һәрге ԛьсура һʹәйԝан һәбуйа, Хԝәде ԝе әԝ ԛӧрбан ԛәбул нәкьра (Ԛануна Кʹаһинтийе 22:18-20). Хьзмәткьрьна мә жи дькарә мина ԝе ԛӧрбана пе зийане бә. Чьрʹа?

6, 7. Чаԝа ԝәʹдәдәрбазкьрьна мә дькарә һʹӧкӧм бә сәр хьзмәткьрьна мә Йаһоԝарʹа?

⁶ Йаһоԝа мәрʹа дьбежә: «Пироз бьн, чьмки әзи пироз ьм» (1 Пәтрус 1:14-16; 2 Пәтрус 3:11). Йаһоԝа хьзмәткьрьна мә ԛәбул дькә тʹәне ԝи чахи, һәрге әв пироз ә, демәк тʹәмьз ә (Ԛануна Дӧщари 15:21). Хьзмәткьрьна мә нькарә тʹәмьз бе һʹәсабе, һәрге әм ԝан тьшта дькьн, чь кӧ Йаһоԝа нәфрʹәт дькә. Мәсәлә бенамуси, зӧлми йан тьштед щьнава гьредайи (Рʹомайи 6:12-14; 8:13). Һәрге әм ӧса ԝәʹдә дәрбаз кьн, әме дьле Йаһоԝа бешиньн. Жь бо ԝе йәке, хьзмәткьрьна мә дькарә бәр чʹәʹве Йаһоԝа нәтʹәмьз у нәлайиԛ бе һʹәсабе у зийана ԛәԝи бьдә һәләԛәтийа мә тʹәви ԝи.

⁷ Чаԝа әм дькарьн бь билани хԝәрʹа ԝәʹдәдәрбазкьрьна бьжберьн? Кʹижан принсипед жь Кʹьтеба Пироз дькарьн али мә бькьн кӧ тедәрхьн, кʹижан ԝәʹдәдәрбазкьрьн щайиз ә, ле кʹижан на?

8, 9. Ԝәʹдәдәрбазкьрьнед чь щурʹәйи әм инкʹар дькьн у чьрʹа?

⁸ Рʹожа иройин һәнә гәләк щурʹә ԝәʹдәдәрбазкьрьн. Һьнәк жь ԝана щайиз ьн бона Мәсиһийа, ле һʹәчʹи  зәʹф на. Ԝәрен әм пешийе тедәрхьн, кӧ әм гәрәке хԝә жь кʹижан ԝәʹдәдәрбазкьрьна дур бьгьрьн.

⁹ Нава гәләк синәмада, малпәрада, бәрнамед телевизийонеда, видео листькада у кʹьламада һәнә бенамуси, зӧлми у тьштед щьнава гьредайи. Гәләк щар тьштед хьраб ӧса тенә хане, ча тьштед бехоф у кʹән. Ле Мәсиһи пьшта хԝә дьдьн ԝан ԝәʹдәдәрбазкьрьна, йед кӧ мьԛабьли нормед Йаһоԝа нә (Кʹаред Шандийа 15:28, 29; 1 Корьнтʹи 6:9, 10). Чахе әм инкʹар дькьн ԝан ԝәʹдәдәрбазкьрьна, ӧса әм Йаһоԝарʹа дьдьнә кʹьфше, ԝәки тьштед хьраб нәфрʹәт дькьн (Зәбур 34:14; Рʹомайи 12:9).

10. Әм чь зийане дькарьн бьстиньн, чахе нәрʹаст ԝәʹдәдәрбазкьрьна дьжберьн?

¹⁰ Ле һьнәк дьфькьрьн, ԝәки әԝ ԝәʹдәдәрбазкьрьн кʹижанада зӧлми, бенамуси йан тьштед щьнава гьредайи һәнә, хьраб ниньн. Әԝана ӧса дьфькьрьн: «Әԝ йәк чь зийане дькарә мьнрʹа бинә? Әзе әʹмьрада тьштед ӧса нәкьм». Һәрге әм ӧса дьфькьрьн, демәк әм хԝәха хԝә дьхапиньн. Кʹьтеба Пирозда те готьне: «Дьл жь һәр тьшти зедәтьр хапиноки йә у ԛәлс ә» (Йерʹәмйа 17:9). Һәрге әм шабуне жь ԝан тьшта бьстиньн чь кӧ Йаһоԝа хԝәш найе, әме ча бькарьбьн бежьн, ԝәки әм ԝан тьшта нәфрʹәт дькьн? Чьԛас зедә әм мьжул бьн ԝан ԝәʹдәдәрбазкьрьнава, һаԛас зедә әԝ йәк бона мә ԝе бьбә тьштәки нормал. Ахьрийе, исафа мә ԝе сьст бә у нькарьбә рʹаст рʹебәрийе мә бькә, чахе әм бәрбь шашийа һәрьн (Зәбур 119:70; 1 Тимотʹейо 4:1, 2).

11. Чаԝа Галати 6:7 дькарә али мә бькә, бь биланийе ԝәʹдәдәрбазкьрьна бьжберьн?

¹¹ Хәбәра Хԝәдеда те готьне: «Чьмки мәрьв чь дьчинә, ԝе жи дьчьнә» (Галати 6:7). Бь рʹасти, гава  әм жь тьштед хьраб шабуне дьстиньн, ахьрийе әм дькарьн хԝәха жи ԝан тьшта бькьн. Мәсәлә, һьнәк дькарьн бькʹәвьнә бәр байе ԝәʹдәдәрбазкьрьна, кӧ бенамусийева гьредайи нә у ахьрийе хԝәха бенамусийе бькьн. Ле Йаһоԝа аликʹарийа лазьм дьдә мә, сәва әм бькарьбьн бь биланийе ԝәʹдәдәрбазкьрьна бьжберьн.

12. Чь ԝе али мә бькә сафикьрьнед рʹаст бькьн, һьндава ԝәʹдәдәрбазкьрьна?

¹² Һьнә ԝәʹдәдәрбазкьрьнада зәлал те кʹьфше, ԝәки әԝ Йаһоԝа хԝәш найен у әм фәʹм дькьн, кӧ гәрәке хԝә жь ԝан дур бьгьрьн. Ле һәрге чәтьн ә әԝе йәке тедәрхьн? Йаһоԝа бона мә ԛанун кʹьфш нәкьрийә, кӧ чь изьн ә бьньһерʹьн, бьбьһен у бьхуньн, у чь изьн нинә. Ле дәԝсе әԝ дьхԝазә, ԝәки әм исафа хԝә бьдьнә хәбате, йа кӧ сәр һʹиме Кʹьтеба Пироз һинкьри йә. (Бьхунә Галати 6:5.) Йаһоԝа ԝан принсипа дьдә мә, йед кӧ мә һин дькьн, мина ԝи сәр һәр тьшта бьньһерʹьн. Әԝ принсип али мә дькьн рʹаст исафа хԝә һин кьн. Әԝ йәк ԝе али мә бькә «бьзаньбьн чь йә ԛьрара Хӧдан» у сафикьрьнед ӧса бькьн, йед кӧ ԝе Йаһоԝа хԝәш бен (Әфәси 5:17).

13. Чьрʹа сафикьрьнед Мәсиһийа һьндава ԝәʹдәдәрбазкьрьна жь һәв щӧдә дьбьн? Ле Мәсиһи гәрәке чь һьлдьн һʹәсаб?

¹³ Гәләк щар сафикьрьна Мәсиһийа һьндава ԝәʹдәдәрбазкьрьна дькарә жь һәв щӧдә бә. Гәло чьрʹа? Чьмки һәр кәс тьштәки бәгәм дькә. Ӧса жи, әԝ чь кӧ дькарә бона йәки щайиз бә, бона йед дьн щайиз нинә. Ле чь жи һәбә, сәва кӧ Мәсиһи сафикьрьнед  рʹаст бькьн, әԝана гәрәке принсипед Кʹьтеба Пироз һьлдьн һʹәсаб (Филипи 1:9). Әԝ йәк ԝе али мә бькә ԝәʹдәдәрбазкьрьнед ӧса бьжберьн, йед кӧ Хԝәде хԝәш тен (Зәбур 119:11, 129; 1 Пәтрус 2:16).

14. а) Чьрʹа фәрз ә бьфькьрьн, кӧ чьԛас ԝәʹдә әм хәрщ дькьн сәр ԝәʹдәдәрбазкьрьна? б) Паԝлос чь ширәт да Мәсиһийа?

¹⁴ Ӧса жи фәрз ә бьфькьрьн, кӧ чьԛас ԝәʹдә әм хәрщ дькьн сәр ԝәʹдәдәрбазкьрьна. Әԝ йәк ԝе мәрʹа бьдә кʹьфше, һәла ԝәʹдәдәрбазкьрьн чьԛас фәрз  ә сәва мә. Сәва мә, Мәсиһийа, лапи ԛимәт әʹмьре мәда, әԝ һәйә хьзмәткьрьна мә Йаһоԝарʹа. (Бьхунә Мәтта 6:33.) Ле әм дькарьн нә жи тʹәхмин кьн, чаԝа ԝәʹдәдәрбазкьрьн дькарә гәләк ԝәʹдә жь мә бьстинә.  Паԝлос тʹәми да Мәсиһийа: «Нәбьнә мина бефәʹма, ле мина сәрԝахта. Дәст бьдьнә бәр ԝәхт» (Әфәси 5:15, 16). Фәрз ә, ԝәки әм избат бьн, кӧ хьзмәткьрьна мә Хԝәдерʹа әʹмьре мәда щийе пешьн дьгьрә. Ләма жи әм гәрәке кʹьфш кьн, кӧ әм чьԛас ԝәʹдә дькарьн хәрщ кьн сәр һесабун у ԝәʹдәдәрбазкьрьне (Филипи 1:10).

15. Чаԝа әм дькарьн хԝә хԝәй кьн жь ԝәʹдәдәрбазкьрьнед ӧса, кʹижан кӧ дькарьн зийане бьдьнә һәләԛәтийа мә тʹәви Йаһоԝа?

¹⁵ Фәʹмдари йә, ԝәки әм гәрәке инкʹар кьн ԝан ԝәʹдәдәрбазкьрьна йед кӧ Йаһоԝа хԝәш найен. Ле чь әм гәрәке бькьн һәрге һәнә ԝәʹдәдәрбазкьрьнед ӧса, кʹижанида әм дӧдьли дьбьн? Гәло әм гәрәке фәсал бьн? Бьфькьрә дәрһәԛа ԝе йәке. Һәрге һун рʹийа сәр чʹийерʹа дьчьн, гәло һуне ԛәрахе рʹерʹа һәрʹьн жь кʹидәре дькарьн бькʹәвьн? Һәмьки на. Һәрге һун әʹмьре хԝә ԛимәт дькьн, һуне хԝә жь зийане дур бьгьрьн. Әԝе йәке әм дькарьн бәрамбәри бьжартьна мә, һьндава ԝәʹдәдәрбазкьрьна бькьн. Хәбәра Хԝәдеда те готьне: «Жь хьрабийе ньге хԝә дур хә» (Мәтʹәлок 4:25-27). Ләма жи әм хԝә дур дьгьрьн нә кӧ тʹәне жь ԝан ԝәʹдәдәрбазкьрьна, йед кӧ әм заньн кӧ хьраб ьн, ле ӧса жи жь йед ӧса кӧ әм дьфькьрьн, ԝәки дькарьн зийане бьдьнә һәләԛәтийа мә тʹәви Йаһоԝа.

16. а) Чь нә әԝ һьнә тьшт, чь кӧ Йаһоԝа нәфрʹәт дькә? б) Чаԝа әм дьдьнә кʹьфше, кӧ нәфрʹәт дькьн ԝан тьшта, чь кӧ Йаһоԝа нәфрʹәт дькә?

¹⁶ Зәбурбеж ньвиси: «Гәли Хӧдан Һʹьзкьрийа, бьжәньнә хьрабийе!» (Зәбур 97:10). Жь Кʹьтеба Пироз әм педьһʹәсьн дәрһәԛа фькьр у һәстед Йаһоԝа. Пьрсе бьдә хԝә, ԝәки чь кӧ тӧ педьһʹәси ча дькарә али тә бькә ньһерʹандьна  Йаһоԝа һьлди һʹәсаб. Мәсәлә, әм пеһʹәсийан, ԝәки Йаһоԝа нәфрʹәт дькә «зьмане дәрәԝин, дәстед кӧ хуна бесущ дьрʹежьн, дьле кӧ тʹьвдира хьраб дәртинә, ньгед кӧ бона хьрабийе зу дьрʹәвә» (Мәтʹәлок 6:16-19). Әм һин дьбьн, кӧ гәрәке хԝә дур бьгьрьн жь «бенамуси, . . . пʹутпʹарьсти, пирәсерти, . . . һʹәвсуди, һерскʹәтьн, . . . чʹәʹве хьраб, меркӧжи, сәрхԝәш, кучʹьксанти у чь кӧ мина ван ьн» (Галати 5:19-21). Тә дина хԝә дайә, чаԝа әԝ принсипед жь Кʹьтеба Пироз дькарьн али тә бькьн, кӧ рʹаст ԝәʹдәдәрбазкьрьна бьжбери? Әм дьхԝазьн гӧһ бьдьнә ширәтед Йаһоԝа һәр дәрәщед әʹмьре хԝәда, фьрԛи тʹӧнә әм тәне нә йан на (2 Корьнтʹи 3:18). Чахе әм тʹәне нә, сафикьрьнед мә дьдьнә кʹьфше, кӧ әм бь рʹасти мәрьвнә чь щурʹәйи нә (Зәбур 11:4; 16:8).

17. Пешийа кӧ әм ԝәʹдәдәрбазкьрьна бьжберьн, чь щурʹә пьрса әм гәрәке бьдьнә хԝә?

¹⁷ Гава тӧ ԝәʹдәдәрбазкьрьна дьжбери, пьрсе бьдә хԝә: «Чаԝа бьжартьна мьн ԝе һʹӧкӧм бә сәр һәләԛәтийа мьн тʹәви Йаһоԝа? Чаԝа әԝ йәк ԝе һʹӧкӧм бә сәр исафа мьн?» Дә ԝәрен әм һьнә принсипед дьн шеԝьр кьн, йед кӧ дькарьн али мә бькьн, ԝәки ԝәʹдәдәрбазкьрьна рʹаст бьжберьн.

18, 19. а) Паԝлос чь ширәт да Мәсиһийа? б) Кʹижан принсип ԝе али мә бькьн, рʹаст ԝәʹдәдәрбазкьрьна бьжберьн?

¹⁸ Чахе әм ԝәʹдәдәрбазкьрьна дьжберьн, демәк әм тьштед ӧса дьжберьн, чь кӧ ԝе һʹьше мә тʹьжә кьн. Паԝлос ньвиси: «Чь кӧ бь маԛултийе йә, чь кӧ бь һәԛийе йә, чь кӧ бь һʹәлалийе йә, чь кӧ бь хԝәшийе йә, чь кӧ бь фьрасәтийе йә у һәр тьштед кӧ әʹсьли у лайиԛи ԛәнщготьне нә, сәр ван тьшта бьфькьрьн» (Филипи 4:8). Гава әм һʹьше хԝә бь тьштед тʹәмьз тʹьжә дькьн, әм дькарьн бежьн: «Бьра готьнед дәве мьн у әԝ  фькьред дьле мьн ль бәр Тә бенә ԛәбулкьрьн Хӧдане . . . мьн» (Зәбур 19:14).

¹⁹ Пьрсе бьдә хԝә: «Әз һʹьше хԝә бь чь тʹьжә дькьм? Гәло паши ԝе йәке чахе мьн фьлан филм йан бәрнама телевизийоне ньһерʹи, фькьред мьн тʹәмьз у щайиз ман йан на? Гәло әз әʹдьлайе тʹәхмин дькьм у исафа мьн тʹәмьз ә? (Әфәси 5:5; 1 Тимотʹейо 1:5, 19). Гәло әз дькарьм аза Йаһоԝарʹа дӧа бькьм? Йан мьнрʹа чәтьн ә? Гәло әз жь бо ԝе ԝәʹдәдәрбазкьрьне һелан набьм, кӧ дәрһәԛа зӧлмийе у бенамусийе бьфькьрьм? (Мәтта 12:33; Марԛос 7:20-23). Гәло әз накʹәвьмә ‹кьрасе бәнде ве дьнйайе›, чахе ԝәʹдәдәрбазкьрьна дьжберьм?» (Рʹомайи 12:2). Щабед мәйи һʹәлал ԝе али мә бькьн, ԝәки әм бьвиньн чь әм дькарьн бькьн, сәва кӧ һәләԛәтийа хԝә тʹәви Йаһоԝа хԝәй кьн. Әм дьхԝазьн мина зәбурбеж дӧа бькьн. Әԝи гот: «Чʹәʹве мьн хԝәй кә жь бош-бәталийе» * (Зәбур 119:37).

20, 21. Чаԝа әм дькарьн һьлдьн һʹәсаб ньһерʹандьна, мәрьвед дьн, гава әм ԝәʹдәдәрбазкьрьна дьжберьн?

²⁰ Диса принсипед фәрз, әԝ ьн: «Һәр тьшт әʹдәт ә, ле һәр тьшт ава накә. Нәбә кӧ йәк кʹара хԝә бьгәрʹә, ле йа һәвале хԝә» (1 Корьнтʹи 10:23, 24). Рʹаст ә азайа мәйә бьжартьне һәйә, ле әԝ йәк найе һʹәсабе, ԝәки әм гәрәке һәр тьшти бькьн. Әм пешда гәрәке бьфькьрьн дәрһәԛа ԝе йәке, ча сафикьрьнед мә дькарьн һʹӧкӧм бьн сәр хушк-бьред мә.

 ²¹ Исафа мәрьва жь һәв щӧдә дьбә. Мәсәлә, исафа тә изьне дьдә тә, ԝәки тӧ бәрнамәкә телевизийоне бьньһерʹи. Ле тӧ педьһʹәси, ԝәки исафа хушк-бьра наһелә, ԝәки һьнә жь ԝан бәрнама бьньһерʹьн. Гәло тӧйе чь бьки? Рʹаст ә изьна тә һәйә ԝе бәрнаме бьньһерʹи, ле гәло чьрʹа тӧ дькари сафи ки нәньһерʹи? Чьмки тӧ нахԝази «нәһәԛийе ль хушк-бьред хԝә» бьки, йан жи «ль бәр Мәсиһ нәһәԛийе» бьки (1 Корьнтʹи 8:12). Әм нахԝазьн тьштед ӧса бькьн, кӧ бьбьнә кәвьре лькʹӧмандьне бона хушк-бьра (Рʹомайи 14:1; 15:1; 1 Корьнтʹи 10:32).

22. Чаԝа әм дькарьн бь билани хԝә бьдьнә кʹьфше, гава бьжартьнед хушк-бьра жь йед мә щӧдә дьбьн?

²² Ле һәрге исафа тә изьне надә тә, ԝәки ԝан тьшта бьньһерʹи, бьхуни йан жи бьки, чь кӧ исафа мәрьвед дьн изьне дьдә ԝан? Жь бо ԝе йәке кӧ тӧ хушк-бьра һʹьз дьки у ԛәдьрә ԝан зани, тӧйе зоре ԝана нәки, ԝәки әԝана бьжартьнед мина тә бькьн. Мәрьве кӧ әʹрәбе дажо занә, ԝәки мәрьвед дьн дькарьн йан һе зу йан һе һеди бажон, ле йәкә әԝана жи ажованед баш ьн. Мина ве йәке, чаԝа тӧ ӧса жи хушк-бьра сәр һʹиме принсипед Кʹьтеба Пироз сафикьрьна дькьн, ле диса жи фькьред ԝә һьндава ԝәʹдәдәрбазкьрьна дькарьн жь һәв щӧдә бьн (Ԝаиз 7:16; Филипи 4:5).

23. Чь ԝе али мә бькә, ԝәки рʹаст ԝәʹдәдәрбазкьрьна бьжберьн?

²³ Демәк чь ԝе али мә бькә, ԝәки рʹаст ԝәʹдәдәрбазкьрьна бьжберьн? Чахе әм гӧһ бьдьнә исафа хԝә, йа кӧ сәр һʹиме принсипед Кʹьтеба Пироз һинкьри йә, у хәм бькьн бона хушк-бьра, ԝи чахи әме бьжартьнед баш бькьн. Һьнге әме шабуне бьстиньн жь ԝе йәке, кӧ әм «һәр тьшти бона шькьрдайина Хԝәде» дькьн.