Хԝәде дьхԝазә, ԝәки әм ль щьнәте сәр әʹрде, дь әʹдьлайийеда у бәхтәԝарийеда һʹәта-һʹәтайе бьжин!

Дьбәк тӧ дьшьрмиш би: «Әв йәк чаԝа ԝе бьԛәԝьмә?». Кʹьтеба Пироз дьбежә, кӧ әв йәк бь сайа Пʹадшатийа Хԝәде дькарә бьԛәԝьмә, у ԛьрара Хԝәде әԝ ә, кӧ һʹәму мәри пебьһʹәсьн дәрһәԛа ве пʹадшатийе у ԛьрара Хԝәде сәва мә (Зәбур 37:11, 29; Ишайа 9:7).

Хԝәде дьхԝазә, ԝәки әм кʹаре бьстиньн.

Мина бавәки баш, кӧ тʹәне ԛәнщийе зарʹед хԝәрʹа дьхԝазә, Баве мәйи әʹзмана жи дьхԝазә, ԝәки әм һʹәта-һʹәтайе бәхтәԝар бьн (Ишайа 48:17, 18). Йаһоԝа соз дьдә, кʹи кӧ «әʹмьре Хԝәде дьԛәдинә ԝе һʹәта-һʹәтайе бьминә» (1 Йуһʹәнна 2:17).

Хԝәде дьхԝазә, ԝәки әм бь рʹебәрийа ԝи бьжин.

Дь Кʹьтеба Пирозда те готьне, кӧ әʹфьрандаре мә дьхԝазә «рʹейед хԝә һини мә бькә», ԝәки әм бькарьбьн ль сәр ԝе рʹе һʹәрьн, кʹижан кӧ әԝ мәрʹа нишан дькә, демәк бь рʹебәрийа Йаһоԝа бьжин (Ишайа 2:2, 3). Йаһоԝа щьмәʹтәкә ӧса саз кьрийә, йе кӧ «наве ԝи һьлдьнә сәр хԝә», сәва кӧ ԛьрара ԝи ль сәр әʹрде әʹйан кьн (Кʹаред Шандийа 15:14).

Хԝәде дьхԝазә, ԝәки әм бь йәкти ԝирʹа ԛӧльх кьн.

Бь сайа ԝе йәке кӧ әм рʹаст Йаһоԝарʹа ԛӧльх дькьн, әм бь һʹәзкьрьна һьндава һәв дьбьнә йәк (Йуһʹәнна 13:35). Ле кʹи рʹожа иройин һʹәму щийа һин дькә мәрийа, ԝәки ча бь йәкти Хԝәдерʹа ԛӧльх кьн? Әм ԝә тʹәглиф дькьн щаба ве пьрсе жь ве брошуре пебьһʹәсьн.