Әз бажарәки бьчʹукда, Акулда, һатьмә буйине, кʹижан кӧ жь Гӧатәмалайе алийе рʹоавайе ортʹа чʹийада бу. Малбәта мьн жь мьләте Ишил ә, демәк ньсьла жь бәрәка Майа. Хенщи зьмане Испани, мьн сәр зьмане мьләте хԝә жи хәбәр дьда. Бьчʹуктайа мьнда шәрʹе бажарванийе дәрбаз дьбу, кʹижан кӧ Гӧатәмалайеда ԝәкә 36 сала кʹьшанд. У ԝи чахи гәләк мәрьвед жь мьләте мә мьрьн.

Чахе әз чардәһ сали бум, бьре мьни һʹәфт сали, пе бомбе дьлист у әԝ ньшкева тʹәԛийа. Жь бо ве ԛәԝьмандьне әз кор бум, ле бьре мьн мьр. Мьн тʹәмамийа бьчʹуктайа хԝә щики башԛәкьрида дәрбаз кьр, кӧ бажаре Гӧатәмалайеда бона зарʹед кор саз кьрьбун. Ведәре әз һатьмә һинкьрьне, ԝәки һʹәрфед Бьрел бьхуньм у фәʹм бькьм. Дәрсдаред мьн изьн нәдьдан, кӧ зарʹед дьн тʹәви мьн хәбәр дьн у мьн фәʹм нәдькьр чьма әԝана ӧса дькьн. Жь бо ве йәке һʹәму зарʹа хԝә жь мьн дур дьгьртьн. Мьн хԝә тʹәне тʹәхмин дькьр. Ле чахе сале дӧ щара әз дьчумә мал, шабуна ньге мьн әʹрд нәдьгьрт. Әз ша дьбум тʹәви дийа хԝә бьм, чьмки әԝ гәләк һʹәйф бу у тʹьме жь мьн фәʹм дькьр. Ле чахе әз бумә дәһә сали, дийа мьн мьр. Әв йәк дәрдәки гәләк гьран бу бона мьн, чьмки тʹәне дийа мьн, әз һʹьз дькьрьм.

Чахе әз 11 сали бум, әз вәгәрʹийам бажаре хԝә у мьн тʹәви малбәта бьре хԝә дьжит, йе кӧ кӧрʹе баве мьн у демарийа мьн бу. Әԝана бона һʹәԝщед мьни физики хәм дькьрьн, ле бона һʹале мьни емосийали тʹӧ кәс нәдьфькьри, у әз гәләк һʹәԝще һʹьзкьрьне бум. Щарна чʹәʹвед мьн тʹьжә һесьр дьбун у мьн жь Хԝәде дьпьрси: «Чьма дийа мьн мьр? Чьма әз кор бум?» Мәрьва мьнрʹа дьгот, ԝәки әв ԛьрара Хԝәде йә. Әз фькьрим ԝәки Хԝәде берʹәʹм у нәһәԛ ә. Мьн дьхԝәст хԝә бькӧшта, ле мьн мәщал нәдьдит.

Жь бо ве йәке кӧ әз кор бум, әз алийе физики у емосийалида сьст бум. Бьчʹуктайеда чәнд щара алийе сексуалида зорбәти мьн кьрьн. Мьн дәрһәԛа ве йәке тʹӧ кәсирʹа гьли нәдькьр, чьмки әз дьфькьрим, ԝәки тʹӧ кәс ԝе нәкʹәвә һʹәйра мьн. Мәрьва хԝә жь мьн дур дьгьртьн у тʹәви мьн хәбәр нәдьдан, ләма мьн жи хԝә жь ԝана дур дьгьрт. Әз тʹьме дьлтәнг бум у мьн итʹбарийа хԝә тʹӧ кәси нәдьани.

Щарәке мәкʹтәбеда ԝәʹде һесабуне, Шәʹдед Йаһоԝа незики мьн бун, әԝана щоте зәԝьщи бун. Дәрсдарәки, гӧне хԝә мьн дьани, ләма жи әԝе готә ԝан, ԝәки бен тʹәсәлийа мьн бькьн. Әԝана дәрһәԛа созед Хԝәде мьнрʹа гьли кьрьн, ԝәки мәрьвед мәйи һʹьзкьри кӧ мьрьн ә, ԝе диса вәгәрʹьн жийине, у чʹәʹвед йед кор жи ԝе вәбьн (Ишайа 35:5; Йуһʹәнна 5:28, 29). Хәбәрдана ԝан гәләк мьн хԝәш һат, ле мьнрʹа чәтьн бу тʹәви ԝан хәбәр дьм, чьмки әз һини хәбәрдане нәдьбум. Әв щоте зәԝьщи диса жи дьһатьн у рʹастийа Кʹьтеба Пироз мьн һин дькьрьн. Әԝана һьндава мьнда тʹьме ԛәнщ у бь сәбьр бун. Хенщи ԝе йәке әԝана 10 километра зедәтьр нава чʹийарʹа дәрбаз дьбун, сәва кӧ бенә бажаре мә у мьн бьвиньн.

Бьре мьн готә мьн, ԝәки ча те кʹьфше әԝ жьн-мер дәԝләти ниньн, ле гәләк тʹәмьз у бь маԛули хԝәкьри бун. Әԝана гәләк бона мьн хәм дькьрьн у һәла һе жи пʹешкʹеш мьнрʹа дьанин. Әз дьфькьрим, ԝәки тʹәне Мәсиһийед рʹаст дькарьн ӧса бь дьл у щан бона кәсәки хәм бькьн.

Әз Кʹьтеба Пироз бь сайа әʹдәбйәтед кӧ бь һʹәрфед Бьрел нәшьркьри бун, һин дьбум. Мьн һинкьрьнед Кʹьтеба Пироз фәʹм дькьр, ле һьнә тьшт мьнрʹа чәтьн бу бь дьл ԛәбул кьм. Мәсәлә, мьнрʹа чәтьн бу баԝәр бькьм, ԝәки Хԝәде бь рʹасти бона мьн хәм дькә, у кӧ мәрьвед дьн жи дькарьн мьн һʹьз бькьн. Мьн фәʹм дькьр, чьма Йаһоԝа һишт, ԝәки зӧлми һәбә, ле мьнрʹа чәтьн бу әԝи һʹәсаб кьм ча Баве һʹьзкьри. *

Һеди-һеди бь сайа занәбуна жь Кʹьтеба Пироз, ньһерʹандьна мьн сәр жийине дьһатә гӧһастьне. Мәсәлә әз пеһʹәсийам, ԝәки дьле Хԝәде дьшәԝьтә, чахе әԝ дьвинә кӧ мәрьв чаԝа дьчәрчьрьн. Хԝәде дәрһәԛа хьзмәткʹаред хԝә, йед кӧ жь бо кәсед дьн дьчәрчьрин, ӧса готийә: «Мьн щәфе щьмәʹта хԝәйә Мьсьреда дит ... әз һаш жь тәнгасийа ԝан һәмә» (Дәркʹәтьн 3:7). Чахе мьн фәʹм кьр кӧ Йаһоԝа чьԛас дьлшәԝат у рʹәʹм ә, мьн хԝәст жийина хԝә тʹәсмили ԝи бькьм. У сала 1998-да әз ча Шәʹде Йаһоԝа һатьмә ньхӧмандьне.

Ԝәкә саләк шунда паши ньхӧмандьне әз һинбунәкә мәхсус дәрбаз бум, кʹижан кӧ бона мәрьвед кор незики бажаре Ескуйинтла һатьбу сазкьрьне. Рʹуспик жь ве мьһале пеһʹәсийа, кӧ әз рʹекә чьԛас дьреж тем кӧ жь бажаре хԝә бемә сәр щьвата у мьнрʹа зәʹф чәтьн ә. Чьмки әв щьват пьшт чʹийа бу у йа лапә незики мьн әԝ бу, жь кʹидәре әв жьн мер дьһатьн у Кʹьтеба Пироз әз һин дькьрьм. Мьнрʹа һеса нибу, кӧ рʹийа ӧса дьреж һәрʹьм, сәва кӧ бьгьһижьмә щьвате. Рʹуспийе щьвате тʹәви малбәтәкә Шәʹдед Йаһоԝа жь бажаре Ескуйинтлайе хәбәр да, сәва кӧ әз мала ԝанда бьжим у әԝана али мьн бькьн һәрʹьмә щьвата. Һьнгева әԝана бона мьн ӧса хәм дькьн, те бежи әз нәфәре мала ԝан ьм.

Хенщи ве дәрәще хушк-бьра гәләк щар һʹьзкьрьна хԝә һьндава мьнда дьданә кʹьфше. Бь рʹасти һʹьзкьрьна ԝан мьн да баԝәркьрьне, ԝәки әз нава Мәсиһийед рʹастда ньм (Йуһʹәнна 13:34, 35).

Әз ида хԝә тʹәне у беԛимәт һʹәсаб накьм. Ньһа һьм нета жийина мьн, һьм жи һевийа мьн һәйә. Дәԝса кӧ дина хԝә бьдьмә һʹале хԝәйи гьран, әз һʹәчʹи зәʹф дина хԝә дьдьм ԝе йәке, ԝәки али мәрийа бькьм, кӧ рʹастийа жь Кʹьтеба Пироз пебьһʹәсьн. Әз гәләк ша мә, ԝәки мәщала мьн һәйә ча рʹуспийе щьвате хьзмәт кьм у һьнә щьватада бәр гәләк мәрийа тʹемед Кʹьтеба Пирозва гьредайи бьхуньм. Әз һәла һе жи сәр щьватед мәзьнә серʹожи пе готара дәрдькʹәтьм, кʹидәре бь һʹәзара мәрьва һазьр бун.

Сала 2010-да Ел Салвадореда әз Мәк′тәба сәва Мьзгинванед П′адшатийе дәрбаз бум. Әве мәкʹтәбе али мьн кьр, ԝәки щабдарийед хԝәйә щьвате һе рʹьнд биньм сери. Бь сайа ве һинбуне әз избат бум, кӧ Йаһоԝа гәләк мьн ԛимәт дькә у һʹьз дькә. Йаһоԝа али һʹәмуйа дькә, ԝәки шьхӧле ԝи биньн сери, фьрԛи тʹӧнә ԛәԝата кʹе дьгьһижә чь.

Иса гот: «Хԝәзи ль дайийа, нә кӧ ль стандийа» (Кʹаред Шандийа 20:35). Бәре әз дьфькьрим кӧ нькарьм али кәсәки бькьм, ле иро әз бь рʹасти бәхтәԝар ьм, чьмки ԛәԝата мьн дьгьһиже әве йәке бькьм.