Нава тʹәмамийа дьнйайеда һе зедә у зедә мәрьв һʹәԝаса хԝә веганизме тиньн.

•   «Веганизм әв һәйә философийа у жийина ӧса, кӧ чьԛас жь дәсте мәрьва те, жь зордарийе һьндава һʹәйԝана хԝә дур бьгьрьн, ԝана бона кʹара хԝә нәдьнә хәбате у ӧса жи жь ԝана хӧрәке, кʹьнща у тьштед дьн ченәкьн»—The Vegan Society.

 Хенщи хәмкьрьна бона һʹәйԝана, һьнә мәрьв дьбьнә веган, ԝәки тʹәбийәте у сьһʹәт-ԛәԝате хԝәйи кьн, ӧса жи жь бо ньһерʹандьна религийа хԝә.

•   «Веганизм жь диетед дьн щӧдә дьбә, чьмки мәрьв веганизме ча баԝәри у сафикьрьна намусийева гьредайи һʹәсаб дькьн. Ӧса жи әԝана дьфькьрьн кӧ бь веганизме дькарьн дьнйайе алийе башда бьгӧһезьн»—Britannica Academic.

 Гәло бь сайа веганизме ахьрийа планета мә ԝе бь рʹасти баш бә? Кʹьтеба Пироз чь дьбежә?

 Кʹьтеба Пироз әʹйан дькә ԝәки Әʹфьрандар, Йаһоԝа Хԝәде, a мәрьва жь һʹәйԝана бьльндтьр һʹәсаб дькә у һʹӧкӧмәти сәр һʹәйԝанарʹа дайә дәсте мәрьва (Дәстпебун 1:27, 28). Хенщи ве йәке, Хԝәде изьн дайә мәрьва кӧ һʹәйԝана ча хӧрәк бьдьнә хәбате (Дәстпебун 9:3). Ле диса жи, әԝ ԛәдәхә дькә зордари у сәртбун һьндава һʹәйԝана (Мәтʹәлок 12:10).

 Ль гора Кʹьтеба Пироз, гошт бьхԝьн йан на, сафикьрьна шәхси йә. b Әв сафикьрьн сәр ньһерʹандьна Хԝәде һьндава мәда һʹӧкӧм набә, демәк мә бәр чʹәʹве Хԝәде четьр накә (1 Корьнтʹи 8:8). Тʹӧ кәс нькарә мәрьв сущдар кә бона сафикьрьна ԝийә кӧ чь бьхԝә у чь на (Рʹомайи 14:3).

 Кʹьтеба Пироз дьдә кʹьфше, ԝәки сафикьрьна мәйә кӧ чь щурʹәйи бьжин, нькарьбә проблемед дьнйайе сафи кә. Кʹока гәләк проблемед ве дьнйайе системед политикида, сосйалида у економикида нә, йед кӧ мәрьв нькарьн рʹаст кьн. Кʹьтеба Пироз дьбежә:

•   «Йа хԝар найе рʹасткьрьн» (Ԝаиз 1:15, ИМ).

 Әʹфьрандаре мә ԝе проблемед мә сафи бькә. Кʹьтеба Пироз бь зьмане симболик шьровәдькә, кӧ әԝ ԝе чь бькә.

•   «Һьнге мьн әʹрд у әʹзманәки ну дитьн, чьмки әʹрд у әʹзмане бәре дәрбаз бун у иди бәʹр тʹӧнәбу» (Әʹйанти 21:1).

 Хԝәде ԝе дәԝса сәрԝертийед мәрьвайи, йане «әʹзмане бәре», «әʹзманәки ну» саз бькә, демәк Пʹадшатийа әʹзмани. Әв Пʹадшати ԝе ‘әʹрде бәре’, демәк мәрьвед зӧлм кʹӧта кә, у әԝе сәр ‘әʹрде нурʹа’ сәрԝертийе бькә, демәк сәр ԝан мәрьварʹа, йед кӧ бь дьл у щан һʹӧкӧмәтийа Хԝәде ԛәбул дькьн.

 Тʹәне бьн сәрԝертийа Пʹадшатийа Хԝәде инсанәт ԝе һин бә ча тʹәви һʹәйԝана әʹдьлайеда бьн у тʹәбийәте хԝәйи кьн (Ишайа 11:6-9).